Gihupay Niya ang Uban Bisan pa sa Iyang Problema sa Panglawas

Si Clodean usa ka Saksi ni Jehova ug nagpuyo sa South Africa. Naospital siya kay kinahanglan siyang operahan. Daghan siyag komplikasyon ug kinahanglan siyang modesisyon kon unsang paagi sa pagtambal ang iyang dawaton. Sa wala pa ang operasyon ug human niana, mibati siyag kaluya, sakit sa lawas, ug stress. Halos 10 ka semana sa iyang pag-uli gikan sa ospital, dili gihapon siya kabangon. Ug tungod sa COVID-19 nga pandemic, dili siya puwedeng bisitahon.

Kay dili niya gusto nga maluoy sa iyang kaugalingon, nangayo si Clodean ug kusog gikan sa Diyos aron makahupay siya sa uban. Dihang makabangon na siya, gikontak dayon niya ang manghod nga babaye sa iyang silingan, nga nag-Bible study sa una uban sa mga Saksi. Nag-share si Clodean ug makapalig-on nga mensahe gikan sa Pulong sa Diyos, ug nadasig ang babaye nga mobalik ug Bible study. Gi-explain pod ni Clodean ang mga benepisyo sa pagtambong sa Kristohanong mga tigom, ug giseguro niya nga maka-tie in ang babaye sa tigom sa kongregasyon pinaagig videoconference. Ni-connect ang babaye ug mikomento pa gani sa pangutanag tubag nga bahin sa programa.

Giestorya sab ni Clodean ang manghod sa iyang study nga gusto pod magtuon sa Bibliya. Gisultihan niya si Clodean nga interesado pod ang uban. Ang resulta? Nakasugod si Clodean ug Bible study sa upat pa ka babaye. Pero dili ra diha kutob!

Kay nagpakita si Clodean ug sinserong interes sa uban, nakasugod siyag Bible study sa 10 pa ka babaye panahon sa pandemic, maong 16 na tanan ang iyang study! Ang uban regular na nga nagatambong sa Kristohanong mga tigom pinaagig videoconference. Kay busy siya niining paagiha, nakatabang to kang Clodean nga dili magpokus sa iyang kahimtang. Kay gibati pod niya nga gihupay siya ni Jehova, “ang Diyos sa tanang paghupay,” nakahimo siya sa paghupay sa uban.—2 Corinto 1:3, 4.

Unsay gibati sa mga study ni Clodean bahin sa ilang nakat-onan? Ang usa miingon: “Daghan kaayo kog benepisyo nga nakuha. Pero ang kinalabwan mao ang pagkahibalo sa ngalan sa Diyos. Nakatabang ni nako nga masuod kang Jehova.” Komosta ang unang babaye nga gikontak ni Clodean? Eksayted na siya nga magpabawtismo. Nakapalipay kaayo kang Clodean kini nga mga eksperyensiya. Ug naka-recover na siya sa iyang operasyon.