TABANG ALANG SA PAMILYA | KAMINYOON

Pag-abuso sa Alkoholikong Ilimnon ug ang Imong Kaminyoon

Giingnan na ba ka sa imong kapikas nga nabalaka siya bahin sa imong pag-inom? Kon mao, naay pipila ka butang nga angay nimong hatagag pagtagad.

Niining artikuloha

Ang pag-abuso sa alkoholikong ilimnon makadaot sa kaminyoon

Ang pag-abuso sa alkoholikong ilimnon posibleng moresulta sa daghang sakit, apil ang kanser ug ang sakit sa kasingkasing ug atay. Pero dili lang ni makadaot sa panglawas; makadaot pod ni sa kaminyoon kay sagad mao ni hinungdan sa pagpangabuso sa kapikas, kalisod sa pinansiyal, pagluib, ug diborsiyo.

Ang Bibliya nag-ingon nga kon ang usa dili magkontrol sa pag-inom ug alkoholikong ilimnon, “kini mamaak samag halas, ug mobugag hilo sama sa bitin.” (Proverbio 23:32) Unsaon nimo pagkahibalo nga naa kay seryosong problema sa pag-inom?

Naa ba kay seryosong problema sa pag-inom?

Ang mosunod nga mga pangutana makatabang nimo nga masusi ang imong kaugalingon:

Maglisod ba kag kontrol sa imong pag-inom?
Magsige ba kag hunahuna kon kanus-a na pod ka moinom?
Moinom ba gihapon ka bisag nakahatag na nig problema sa imong kinabuhi—apil sa imong kaminyoon?
Mora ba kag masakit dihang mosulay kag undang sa pag-inom?
Nahimo bang hinungdan sa inyong away ang imong pag-inom?
Mas kusog na ba kang moinom karon?
Magtagotago ba kag inom o naa ba kay gitagong mga ilimnon sa inyong balay o sa imong trabahoan?

Kon oo ang imong tubag sa usa o kapin pa niining mga pangutanaha, posibleng naa na kay seryosong problema sa pag-inom o alcohol use disorder.

Magmatinud-anon sa kaugalingon

Giingnan na ba ka sa imong kapikas nga nabalaka siya bahin sa imong pag-inom? Kon mao, basig nangatarongan ka nga dili ra ni sayop o wala ray problema sa imong pag-inom. Basin gipasangil nimo ni sa uban, apil sa imong kapikas, ug miingon ka:

“Kon maayo lang unta kag tinagdan nako, di man gyod unta ko moinom.”
“Kon kahibalo pa lang ka kon unsa ka lisod ikasabot ang akong boss, moinom pod seguro ka.”
“Daghan kog nailhan nga mas palainom pa nako.”

Kon nakasulti kag sama niini, di kaha nga mas gipalabi nimo ang pag-inom kay sa pagbaton ug malipayong kaminyoon? Asa kahay mas importante?

Prinsipyo sa Bibliya: “Ang lalaking minyo mabalak-on . . . kon sa unsang paagi mabatonan niya ang pag-uyon sa iyang asawa.”—1 Corinto 7:33.

Collage: Duha ka magkalahing hulagway nga nagpakita sa sanong sa bana sa gisulti sa iyang asawa bahin sa iyang pag-inom. 1. Ang bana naglingkod atubangan sa taas nga bungbong ug naggunit ug botelya sa beer. Naa poy duha ka botelya sa salog. Ang asawa nagtindog sa likod sa bungbong ug dili niya makita ang iyang bana. Naguol siya. 2. Ang bana nagtan-aw sa iyang asawa sa bentana diha sa bungbong ug naminaw sa iyang gisulti. — Kon dili ka moangkon nga naa kay problema sa pag-inom, sama kag nagbutang ug bungbong tali nimo ug sa imong kapikas. Pero kon magmatinud-anon ka sa imong kaugalingon, samag nagbutang kag bentana diin makita ug masabtan na nimo ang imong kapikas

Ang imong mahimo

Paminawa pag-ayo ang hunahuna sa imong kapikas. Bisag para nimo morag sobra ra ang kabalaka sa imong kapikas, basin puwede ra gihapon kang mohimog mga kausaban. Kon dili nimo na mahimo ug padayon gihapon kang moinom bisan pag nabalaka na pag-ayo ang imong kapikas, nagpakita na nga posibleng naa gyod kay problema sa pag-inom.

Prinsipyo sa Bibliya: “Ang matag usa padayong magtinguha, dili sa iyang kaugalingong kaayohan, kondili nianang sa laing tawo.”—1 Corinto 10:24.
Pagkuhag dugang impormasyon. Aron modaog, ang usa ka sundalo kinahanglang mahibalo sa mga taktika sa iyang kaaway. Ingon ana pod sa imong bahin. Aron mapildi nimo ang imong kaaway—ang problema sa pag-inom—kinahanglan kang mahibalog dugang bahin niini ug kon nganong daghang tawo ang nabiktima niini. Kinahanglan pod kang mokat-on ug epektibong mga paagi nga makatabang nimo sa pagkontrol o pag-undang sa pag-inom, ug madaog ang pagkaadik sa alkoholikong ilimnon.

Prinsipyo sa Bibliya: ‘Padayong likayi ang makasasalang mga tinguha, nga nakig-away kaninyo.’—1 Pedro 2:11.
Pangayog tabang. Naay daghang medikal nga tabang para niadtong naay seryosong problema sa pag-inom. Apil ani ang mga recovery program, treatment center, ug ospital. Puwede pod kang moduol sa usa ka hamtong nga higala nga makatabang nimo sa pag-ila sa posibleng mga hinungdan sa imong problema sa pag-inom. Ug kon matental ka nga moinom ug balik, puwede nimo siyang tawgan.

Puwede kang mangayog medikal nga tabang

Prinsipyo sa Bibliya: “Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”—Proverbio 17:17.

Ang pag-abuso sa alkoholikong ilimnon maoy komplikadong problema nga dili masulbad pinaagi lang sa pagbasa ug mubo nga artikulo. Dili pod ni nimo maundang kon moingon lang kag, “Maningkamot ko nga dili na moinom ug daghan.” Pero angay nimong mahibaloan nga ang imong himoon bahin sa imong problema sa pag-inom makaapektar dili lang sa imong panglawas, kondili sa imo pong kaminyoon.

Para sa dugang impormasyon: Basaha ang mosunod nga mga artikulo aron imong mahibaloan kon sa unsang paagi nadaog sa uban ang pag-abuso sa alkoholikong ilimnon.

“Dili na Ko Bayolente”

“Wala na Nako Ikaulaw ang Kaugalingon”

“Ang Kadalanan Nahimong Akong Pinuy-anan”

Tan-awa pod ang video nga ‘Gilaay Na Ko sa Akong Kinabuhi’