Anna Moneymaker/Getty Images
PADAYON SA PAGBANTAY!
Giabante sa mga Siyentista ang Doomsday Clock—Unsay Giingon sa Bibliya?
Niadtong Enero 24, 2023, gi-set sa mga siyentista ang Doomsday Clocka nga mas duol sa tungang gabii, nga simbolikong nagrepresentar sa kataposan sa kalibotan.
“Ang ‘Doomsday Clock’ nga nagsimbolo sa kadaot nga gipahinabo sa mga tawo sa ilang kaugalingon giabante niadtong Martes nga mas duol sukad masukad sa tungang gabii, tungod sa giyera sa Ukraine, sa kahadlok sa nukleyar nga giyera, ug sa problema sa climate change.”—AFP International Text Wire.
“Ang mga siyentista miingon niadtong Martes nga ang ‘Doomsday Clock’ giabante ug hangtod 90 segundos una pa ang tungang gabii—nga nagpakita nga ang mga tawo mas duol na sukad masukad sa armagedon.”—ABC News.
“Ang usa ka grupo sa internasyonal nga mga siyentista nagpasidaan nga ang mga tawo mas nameligro karon nga mahanaw sukad masukad.”—The Guardian.
Hapit na bang mahanaw ang mga tawo ug ang atong planeta? Angay ba tang mahadlok kon unsay mahitabo sa umaabot? Unsay giingon sa Bibliya?
Kon unsay mahitabo sa umaabot
Sumala sa Bibliya, “ang yuta magpabilin hangtod sa hangtod” ug naay mga tawo nga “magpuyo niini hangtod sa hangtod.” (Ecclesiastes 1:4; Salmo 37:29) Busa dili mahitabo nga ang yuta mahanaw o dili na kapuy-an tungod sa mga tawo.
Pero naay gihisgotan ang Bibliya nga matapos. Pananglitan, kini nag-ingon nga “ang kalibotan nagakahanaw.”—1 Juan 2:17.
Aron mahibaloan kon unsay gipasabot sa Bibliya dihang maghisgot nig kataposan sa kalibotan, basaha ang artikulong “Hapit na Bang Matapos ang Kalibotan? Unsa ang Apokalipsis?”
Aron makakat-on kon unsay giingon sa Bibliya bahin sa mga hitabo sa kalibotan sa umaabot, basaha ang artikulong “Kanus-a ang Kataposan sa Kalibotan?”
Magpabiling positibo
Ang Bibliya makatabang nato nga magpabiling positibo bisan pa sa mga problema sa kalibotan karon. Sa unsang paagi?
Ang Bibliya naghatag natog praktikal nga tambag. (2 Timoteo 3:16, 17) Pananglitan, basaha ang artikulong “Kon Unsaon nga Dili Sobrang Mabalaka” aron makita kon sa unsang paagi ang Bibliya makatabang nimo nga magpabiling positibo bisan pa sa mga kalisdanan sa kinabuhi.
Ang Bibliya naghatag ug kasaligang paglaom para sa umaabot. (Roma 15:4) Gihisgotan niini kon unsa gyoy atong madahom karon ug sa umaabot, nga makatabang nato nga magpabiling lig-on bisan pa sa nagakahitabo sa kalibotan karon.
Aron makabenepisyo ka pag-ayo sa Bibliya, kinasingkasing ka namong giimbitahan nga sulayan ang among ginatanyag nga libreng pagtuon sa Bibliya nga may instruktor.
a “Ang Doomsday Clock maoy usa ka simbolikong orasan nga magpasidaan sa publiko kon unsa na ka duol ang kataposan sa kalibotan tungod sa peligrosong mga teknolohiya nga kita ra poy naghimo. Kini maoy usa ka pahinumdom sa mga kapeligrohan nga kinahanglan natong hatagag pagtagad kon gusto natong magpabiling buhi sa planeta.”—Bulletin of the Atomic Scientists.