Usa ka Taas ug Ranggo nga Health Official Nagpasidaan sa Epekto sa Social Media sa mga Batan-on—Unsay Giingon sa Bibliya?

Niadtong Mayo 23, 2023, usa ka taas ug ranggo nga health official sa United States ang nagpasidaan sa dili maayong epekto sa social media diha sa daghang batan-on.

• “Ang social media naa tingali kaayohan sa ubang bata ug batan-on, pero naay daghang ebidensiya nga ang social media makadaot sa mental ug pisikal nga kahimsog sa mga bata ug batan-on.”—Social Media and Youth Mental Health: The U.S. Surgeon General’s Advisory, 2023.

Ang report gibase sa mga research nga naghisgot kon nganong makapabalaka ni.

• Ang mga batan-on nga nag-edad ug 12 hangtod 15 nga “naggamit sa social media ug kapig 3 ka oras kada adlaw naay dobleng kapeligrohan nga makaeksperyensiyag problema sa mental health sama sa depression ug sobrang kabalaka.”

• Dihang ang mga batan-on nga nag-edad ug 14 magsigeg gamit ug social media, sagad wala silay tarong nga tulog, ma-bully sila online, mabalaka sila kon unsay ilang hitsura, mobati silang walay pulos, ug ma-depress. Ug sagad ning mahitabo sa mga babaye kay sa mga lalaki.

Sa unsang paagi maprotektahan sa mga ginikanan ang ilang mga anak niini nga mga kapeligrohan? Ang Bibliya naghatag ug praktikal nga tambag.

Ang mahimo sa mga ginikanan

I-monitor ang imong anak. Ingong ginikanan, konsideraha ang mga kapeligrohan ug timbangtimbanga kon angay bang mogamit ang imong anak ug social media o dili.

• Prinsipyo sa Bibliya: “Bansaya ang batan-on sa dalan nga angay niyang subayon.”—Proverbio 22:6, footnote.

• Aron makakat-og dugang, basaha ang artikulo nga “Angay Bang Mogamit ug Social Media ang Akong Anak?”

Kon tugotan nimo ang imong anak nga mogamit ug social media, mahimong alerto sa posibleng mga kapeligrohan ug regular nga i-monitor ang ginahimo sa imong anak online. Sa unsang paagi?

Panalipdi ang imong anak gikan sa makadaot nga mga content o post. Bansaya ang imong anak nga makaila ug makalikay sa makadaot nga mga content o post.

• Prinsipyo sa Bibliya: “Ang seksuwal nga imoralidad ug ang tanang matang sa kahugawan o kahakog dili ninyo angayng hisgotan,. . . apil niana ang makauulaw nga paggawi, binuang nga sinultihan, ug law-ay nga komedya.”—Efeso 5:3, 4.

• Para sa praktikal nga mga tip, basaha ang artikulo nga “Tudloi ang Imong Tin-edyer nga Anak sa Hustong Paggamit sa Social Media.”

Paghimog limitasyon. Pananglitan, paghimog mga balaod kon kanus-a ug kon unsa kadugay nga makagamit ug social media ang imong anak.

• Prinsipyo sa Bibliya: ‘Pagbantay pag-ayo nga ang inyong paggawi sama sa maalamong mga tawo, nga gamiton ang inyong panahon sa kinamaayohang paagi.’—Efeso 5:15, 16.

• Gamita ang whiteboard animation nga Pagbantay sa Paggamit sa Social Network aron masabtan sa imong anak kon nganong kinahanglan nga naay limitasyon sa paggamit ug social media.