Nganong Kaylap Kaayo ang Pagdumot?—Unsay Giingon sa Bibliya?

Ang mga balita karon napuno ug mga report bahin sa mga tawo nga nagsultig sakit nga mga pulong o naghimog bayolenteng mga krimen tungod sa pagdumot. Daghan pod ug report bahin sa mga gubat ug mga pag-atake nga gihimo sa uban tungod sa ilang pagdumot sa laing rasa.

• “Tungod sa gubat sa Israel ug Gaza ug sa mga tawo nga nagpasiugda sa pagdumot ug pagkabayolente, midaghan pag-ayo ang sakit nga sinultihan diha sa social media.”—The New York Times, Nobyembre 15, 2023.

• “Sukad niadtong Oktubre 7, mikalit ug daghan ang makapabalaka nga mga report bahin sa mga krimen ug sakit nga sinultihan tungod sa pagdumot.”—Dennis Francis, presidente sa United Nations General Assembly, Nobyembre 3, 2023.

Ang pagkabayolente, mga gubat, ug sakit nga sinultihan tungod sa pagdumot nahitabo na sa una. Gani, ang Bibliya nag-ingon nga naay mga tawo kaniadto nga “[nagpunting sa] ilang sakit nga mga pulong samag mga pana,” nakiggubat, ug mihimog bayolenteng mga butang. (Salmo 64:3; 120:7; 140:1) Pero gipatin-aw sa Bibliya nga ang pagdumot nga atong nakita karon naay importanteng kahulogan.

Pagdumot—Ilhanan sa atong panahon

Gipakita sa Bibliya ang duha ka hinungdan kon nganong komon kaayo ang pagdumot karon.

1. 1. Kini nagtagna sa panahon nga “mobugnaw ang gugma sa kadaghanan.” (Mateo 24:12) Imbes magpakitag gugma, ang kadaghanan sa mga tawo magpakitag mga kinaiya nga moresultag pagdumtanay.—2 Timoteo 3:1-5.

2. 2. Ang grabeng pagdumot nga atong nakita karon maoy resulta sa pintas ug daotang impluwensiya ni Satanas nga Yawa. Ang Bibliya nag-ingon nga “ang tibuok kalibotan nailalom sa gahom sa usa nga daotan.”—1 Juan 5:19; Pinadayag 12:9, 12.

Pero gipakita pod sa Bibliya nga sa dili madugay wagtangon sa Diyos ang tanang hinungdan sa pagdumot. Ug dili lang kana. Iya pong wad-on ang tanang pag-antos nga resulta sa pagdumot. Ang Bibliya nagsaad:

• “Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”—Pinadayag 21:4.