Unsa man Gyod ang Tinuod nga Kristohanon?—Unsay Giingon sa Bibliya?

Daghang tawo sa tibuok kalibotan ang moingon nga Kristohanon sila, pero dili sila maayog binuhatan. Ang uban nila hakog, dili matinud-anon, o walay pagpakabana sa pagbati sa ubang tawo. Daghan pod ang dili maunongon sa ilang bana o asawa. Tungod ana, nakapangutana ang uban: ‘Unsa man gyod diay ang tinuod nga Kristohanon?’

Ang tinuod nga Kristohanon

Sayon ra kaayo para sa usa ka tawo nga mosulti nga Kristohanon siya. Pero dili pa na igo. Ang Bibliya nag-ingon nga ang usa ka Kristohanon maoy tinun-an ni Jesu-Kristo. (Buhat 11:26) Si Jesus mismo miingon: “Kon kanunay ninyong tumanon ang akong gitudlo, kamo ako gyong mga tinun-an.” (Juan 8:31) Siyempre, walay bug-os makatuman sa tanang gitudlo ni Jesus. Pero ang tinuod nga Kristohanon maningkamot gyod nga sundon ang mga gitudlo ni Jesus ug ipakita ni sa iyang binuhatan kada adlaw. Niay pipila ka pananglitan.

Ang mga Kristohanon magpakitag tinuod nga gugma

Ang giingon ni Jesus: “Hatagan mo nakog bag-ong sugo, nga kamo maghigugmaay; sama sa akong paghigugma kaninyo, kamo usab maghigugmaay. Kon kamo dunay gugma sa usag usa, ang tanan makaila nga kamo akong mga tinun-an.”—Juan 13:34, 35.

Ang gihimo ni Jesus: Si Jesus nagpakitag tinuod nga gugma sa tanan, bisag unsa pay ilang kahimtang sa kinabuhi o kagikan. Giayo niya ang mga masakiton, gipakaon ang mga gigutom, ug gihatag pa gani niya ang iyang kinabuhi para sa uban.—Mateo 14:14-21; 20:28.

Ang ginahimo sa mga Kristohanon: Ang mga Kristohanon nagpakitag tinuod nga gugma sa mga tawo. Sila mahinatagon, mapinasayloon, ug patas ug pagtratar sa uban. Ginatabangan nila ang mga nanginahanglan, ug andam silang mohimog sakripisyo para sa uban.—1 Juan 3:16.

Ang mga Kristohanon matinud-anon

Ang giingon ni Jesus: “Ako . . . ang kamatuoran.”—Juan 14:6.

Ang gihimo ni Jesus: Si Jesus matinud-anon gyod sa tanan niyang gisulti ug gihimo. Wala siya mangilad o manglimbong sa uban. Nailhan siya nga matinud-anon, ug mosulti gyod siya sa tinuod bisan dihang masuko ang uban sa iyang isulti.—Mateo 22:16; 26:63-67.

Ang ginahimo sa mga Kristohanon: Ang mga Kristohanon dili mamakak. Nagabayad silag buhis, dili sila mangawat, ug kasaligan sila sa trabaho. (Roma 13:5-7; Efeso 4:28) Dili sila mangilad sa uban, mangopya sa eksam, o magbutang ug dili tinuod nga mga impormasyon sa ilang mga résumé o ubang dokumento.—Hebreohanon 13:18.

Ang mga Kristohanon maayog pagtratar sa uban

Ang giingon ni Jesus: “Ari kamo kanako, kamong tanang gikapoy ug nabug-atan, ug ako magpalagsik kaninyo. Isangon ang akong yugo ug pagkat-on gikan kanako kay ako malumo ug mapainubsanon, ug kamo mobatig kahayahay. Kay ang akong yugo sayon dad-on, ug ang akong luwan gaan.”—Mateo 11:28-30.

Ang gihimo ni Jesus: Si Jesus buotan ug daling duolon. Suod siya sa mga bata, ginahupay niya ang mga naguol, ug nagpakita siyag pagtahod sa tanan.—Marcos 10:13-15; Lucas 9:11.

Ang ginahimo sa mga Kristohanon: Ang mga Kristohanon buotan ug sinultihan; dili sila sakit manulti. (Efeso 4:29, 31, 32) Mahunahunaon sila sa kaayohan sa uban, ug mangita silag mga kahigayonan nga makatabang.—Galacia 6:10.

Ang mga Kristohanon maunongon sa ilang bana o asawa

Ang giingon ni Jesus: “Kon unsay gihiusa sa Diyos dili angayng bulagon sa tawo.”—Marcos 10:9.

Ang gihimo ni Jesus: Bisag wala magminyo si Jesus, gidasig niya ang mga magtiayon nga magmaunongon sa usag usa. (Mateo 19:9) Naghatag pod siyag pasidaan bahin sa mga buhat nga posibleng makabungkag sa kaminyoon.—Mateo 5:28.

Ang ginahimo sa mga Kristohanon: Ang mga Kristohanon dili mohimog bisan unsa nga makadaot sa ilang kaminyoon. (Hebreohanon 13:4) Sila nagpakitag gugma ug pagtahod sa usag usa.—Efeso 5:28, 33.