Kinsay Founder sa mga Saksi ni Jehova?

Ang organisasyon sa mga Saksi ni Jehova karon nagsugod sa hinapos nga bahin sa katuigang 1800. Niadtong panahona, ang usa ka gamayng grupo sa mga estudyante sa Bibliya nga nagpuyo duol sa Pittsburgh, Pennsylvania, sa United States, nagsugod pagtuon sa Bibliya sa sistematikong paagi. Ilang gitandi ang mga doktrina nga gitudlo sa ubang relihiyon sa kon unsa gayoy gitudlo sa Bibliya. Ang ilang nakat-onan ilang gipatik sa mga libro, mantalaan, ug sa magasin nga karon gitawag nga Ang Bantayanang Torre—Nagapahayag sa Gingharian ni Jehova.

Apil sa maong grupo sa sinserong mga estudyante sa Bibliya mao si Charles Taze Russell. Bisan tuod si Russell ang nanguna niadto sa buluhatong pagpanudlo bahin sa Bibliya ug ang unang editor sa Ang Bantayanang Torre, dili siya founder sa usa ka bag-ong relihiyon. Ang tumong ni Russell ug sa ubang mga Estudyante sa Bibliya, ingon sa pagtawag kanila niadto, mao ang pagmantala sa mga pagtulon-an ni Jesu-Kristo ug sa pagsunod sa gihimo sa Kristohanong kongregasyon sa unang siglo. Kay si Jesus mao man ang Magtutukod sa Kristiyanidad, kami nag-ila kaniya nga mao ang founder sa among organisasyon.—Colosas 1:18-20.