Maibog Ko sa Pareho Nakog Sekso—Nagpasabot ba Kana nga Homoseksuwal Ko?
Dili gayod!
Ang tinuod, ang pagkaibog sa sama nimog sekso sagad mawala ra.
Kana ang nasinatian ni Lisette, 16 anyos, kinsa naibog kanhi sa sama niyang babaye. Siya miingon: “Akong nakat-onan sa among leksiyon sa biology nga panahon sa pagkabatan-on ang mga hormone usahay modaghan o modiyutay. Sa akong tan-aw, kon daghag mahibaloan ang mga batan-on bahin sa ilang lawas, sila makasabot nga ang pagkaibog sa samag sekso lumalabay lang ug sila dili mapresyur nga mahimong homoseksuwal.”
Tanang batan-on dunay kapilian—sila makapili sa baliko nga panglantaw sa kalibotan bahin sa sekso o sa hataas nga sukdanan sa moralidad nga gipadayag diha sa Pulong sa Diyos
Apan komosta kon dili mawala ang imong gibati? Kawalay konsiderasyon ba sa bahin sa Diyos ang pagsugo sa usa nga naibog sa parehas niyag sekso nga likayan ang homoseksuwalidad?
Kon oo ang imong tubag sa ikaduhang pangutana, angay kang mahibalo nga kana nga pangatarongan gibase sa sayop nga pagtuo nga kinahanglang panungtan sa tawo ang iyang pangibog. Ang Bibliya naghatag ug dignidad sa tawo pinaagi sa pagpasalig kaniya nga siya makapugong sa iyang kailibgon kon gusto gyod niya.—Colosas 3:5.
Ang Bibliya makataronganon. Usa lang ka balaod ang gihatag niini alang sa mga tawong maibog sa parehas nilag sekso ug sa mga tawong maibog sa kaatbang nga sekso, nga mao ang ‘pagkalagiw gikan sa pakighilawas.’ (1 Corinto 6:18) Ang tinuod, milyonmilyong dili homoseksuwal nga nagtinguha sa pagsunod sa prinsipyo sa Bibliya nagpugong sa ilang kaugalingon bisan pa sa mga tentasyon. Ang mga homoseksuwal makahimo usab niana kon buot gyod nilang pahimut-an ang Diyos.—Deuteronomio 30:19.