MGA BATAN-ON NANGUTANA
Nganong Dili man Ko Tugtan sa Akong Ginikanan nga Maglingawlingaw?
Giimbitar ka sa imong mga higala nga maglingawlingaw sa sunod nga mga adlaw. Nananghid ka sa imong ginikanan pero wala ka nila tugti. Wala na ka matingala kay wala pod ka nila tugti sa miagi.
Niining artikuloha
Nganong pirme kong dili tugtan sa akong ginikanan?
Kon morag pirme kang dili tugtan sa imong ginikanan nga maglingawlingaw, basin maghunahuna ka nga di gyod sila gustong malipay ka.
Mao nay gibati sa tin-edyer nga si Marie sa unang higayon nga gihatagan siyag cellphone. Siya miingon: “Daghan kaayog giingon si Papa nga mga app nga dili nako puwedeng i-download. Giingnan pod ko niya kon kinsa ray puwede nakong kontakon, ug kon unsa ko ka dugay mo-text o motawag nila. Pero ang akong mga amiga makahimo ra bisag unsay ilang gusto!”
Hunahunaa kini: Dili ba gyod gusto sa papa ni Marie nga maglingawlingaw siya, o naa lang siyay laing gikabalak-an?
Ang speed limit makapugong nimo sa pagpakusog ug dagan, pero proteksiyon ni aron dili ka madisgrasya. Ingon ana pod ang mga balaod nga gihatag sa ginikanan
Sulayi kini: Hunahunaa nga ginikanan kunohay ka, ug naa kay tin-edyer nga anak nga bag-o lang nimong gihatagan ug cellphone. Unsa kahay imong kabalak-an? Unsang mga balaod ang imong himoon aron maprotektahan siya? Unsay imong isulti kon moingon ang imong anak nga dili ka gustong malipay siya?
“Pirme kong ingnan ni Papa, ‘Hunahunaa kon ikay ginikanan.’ Nakatabang to nako nga masabtan kon unsa ka importante ang iyang mga balaod ug kon nganong iya tong gihimo. Kon mahimo kong ginikanan, ang mga balaod ni Papa mao pod tingali ang akong ipatuman sa akong mga anak.”—Tanya.
Unsay akong himoon aron tugtan ko sa akong ginikanan?
“Walay kaayohan ang pagpakiglalis. Makapabug-at ra ni sa imong emosyon ug sa imong ginikanan. Kon makiglalis ka, maghunahuna ang imong ginikanan nga dili pa ka hamtong ug dili pa angayng hatagag dugang kagawasan.”—Richard.
“Kasagaran, naa gyoy maayong rason ang akong ginikanan sa kada balaod nga ilang ihatag. Wala man ko nila did-i nga maglingawlingaw; gusto lang nilang maseguro nga kon maglingawlingaw ko, dili ni moresultag kadaot nako.”—Ivy.
Prinsipyo sa Bibliya: “Ipahungaw gyod sa buangbuang ang tanan niyang gibati, apan ang maalamon kalmado ra pirme.”—Proverbio 29:11.
“Sekreto nakong gisupak ang giingon ni Papa bahin sa akong paggamit ug cellphone. Magtagotago kog message sa akong mga amiga dihang gabii na kaayo o mag-download ug mga app nga dili ipa-download ni Papa. Pero masakpan ra gyod gihapon ko niya, ug iya na hinuong pabug-atan ang mga balaod kay wala na siyay salig nako. Dili gyod maayo nga magtagotago ug supak sa imong ginikanan.”—Marie.
“Pailob lang. Nagkinahanglan pa tingalig panahon ayha paluagan sa imong ginikanan ang ilang balaod. Pero kon makita nila nga imo silang gituman, dakog purohan nga hatagan ka nilag dugang kagawasan.”—Melinda.
Prinsipyo sa Bibliya: “Magmasinugtanon mo sa inyong ginikanan sa tanang butang.”—Colosas 3:20.
“Wala ray padulngan kon magsige kag pamugos, ug dili ra gihapon nimo makuha ang imong gusto.”—Natalie.
“Gustong makita sa mga ginikanan nga makahimog maayong desisyon ang ilang anak. Maong dihang makig-estorya ko sa akong ginikanan, klaro nakong ipatin-aw nila ang akong tuyo ug dili ko mangrason base lang sa emosyon. Kon kanay akong himoon, dakog purohan nga tugtan ko nila.”—Joseph.
Prinsipyo sa Bibliya: “Pasidunggi ang imong amahan ug ang imong inahan.”—Efeso 6:2.