Unsay Giingon sa Bibliya Bahin sa Easter?

Tubag sa Bibliya

Ang Easter wala ipasukad sa Bibliya. Kon imong susihon ang sinugdanan niini, imong masayran ang tinuod nga kahulogan sa Easter—kini maoy tradisyong gipasukad sa karaang mga rituwal sa pagsanay. Tagda ang mosunod.

1. Ngalan: Ang Encyclopædia Britannica nag-ingon: “Dili matino ang sinugdanan sa Ingles nga ngalang Easter; ang Anglo-Saxon nga paring si Venerable Bede sa ika-8ng siglo nagkuha niana gikan sa Anglo-Saxon nga diyosa sa tingpamulak nga si Eostre.” Ang uban naglangkit niana kang Astarte, ang Fenicianhong diyosa sa pagsanay kinsa may Babilonyanhong katugbang nga si Ishtar.

2. Mga koneho: Kini maoy mga simbolo sa pagsanay “nga naggikan sa karaang seremonyas ug simbolismo sa paganong pista sa tingpamulak sa Europe ug Middle East.”—Encyclopædia Britannica.

3. Mga itlog: Sumala sa Funk & Wagnalls Standard Dictionary of Folklore, Mythology and Legend, ang pagpangita sa mga itlog sa Easter, nga gidala kono sa koneho sa Easter, “dili lamang dula sa mga bata, kondili may timailhan sa usa ka rituwal sa pagsanay.” Ang pipila ka kultura nagtuo nga ang giadornohang itlog sa Easter “makahatag ug kalipay, kauswagan, maayong panglawas, ug proteksiyon.”—Traditional Festivals.

4. Bag-ong besti sa Easter: “Giisip nga kawalay-pagtahod ug demalas ang pagsugat sa Scandinavian nga diyosa sa Tingpamulak, o Eastre, kon dili bag-o ang besti.”—The Giant Book of Superstitions.

5. Mga misa inigsubang sa adlaw: Gilangkit kini sa mga rituwal sa karaang mga tigsimbag adlaw “nga gihimo panahon sa vernal equinox nga nagsugat sa adlaw ug sa dakong gahom niini sa pagpatunghag bag-ong kinabuhi sa tanang buhing butang.”—Celebrations—The Complete Book of American Holidays.

Ang The American Book of Days naghubit sa sinugdanan sa Easter: “Walay duhaduha nga ang Simbahan sa unang mga adlaw niini misagop sa karaang pagano nga mga kostumbre ug naghatag ug Kristohanong kahulogan niana.”

Ang Bibliya nagpasidaan batok sa pagsimba sa Diyos pinaagi sa pagsunod sa mga tradisyon o mga kostumbre nga dili-makapahimuot kaniya. (Marcos 7:6-8) Ang 2 Corinto 6:17 nag-ingon: “‘Ilain ang inyong kaugalingon,’ nagaingon si Jehova, ‘ug hunong na sa paghikap sa mahugaw nga butang.’” Ang Easter maoy paganong selebrasyon nga likayan gayod niadtong gustong magpahimuot sa Diyos.