Asa Nagpuyo ang Yawa?

Tubag sa Bibliya

Ingong espirituhanong linalang, ang Yawa nagpuyo sa dili makita nga kalibotan. Apan, dili kini sa nagkalayong impiyerno diin iyang gipaantos ang mga daotan, ingon sa makita dinhi sa hulagway.

“Gubat sa langit”

Sulod sa usa ka panahon, si Satanas nga Yawa gitugotan pa sa pagsulod sa langit, bisan sa pag-atubang sa Diyos kauban sa matinumanong mga anghel. (Job 1:6) Apan nagtagna ang Bibliya nga mahitabo ang usa ka “gubat sa langit” nga moresulta sa pagpalagpot kang Satanas ug ‘pagtambog kaniya sa yuta.’ (Pinadayag 12:7-9) Ang kronolohiya sa Bibliya ug ang panghitabo sa kalibotan nagpamatuod nga kini nga gubat sa langit nahitabo na. Ang Yawa ania na karon sa kasilinganan sa yuta.

Nagpasabot ba kini nga ang Yawa nagpuyo sa usa ka espesipikong dapit sa atong planeta? Pananglitan, ang karaang siyudad sa Pergamo gikaingon nga maoy “dapit diin anaa ang trono ni Satanas” ug “diin anaa si Satanas nagapuyo.” (Pinadayag 2:13) Sa pagkatinuod, kini nga mga ekspresyon lagmit nagpasabot nga kaylap ang pagsimba kang Satanas sa maong siyudad. Ang Bibliya nag-ingon nga ang Yawa nagmando sa “tanang gingharian sa gipuy-ang yuta,” busa wala siya magpuyo sa usa ka literal nga dapit sa yuta kondili anaa sa kasilinganan sa yuta.—Lucas 4:5, 6.