Unsay Giingon sa Bibliya Bahin sa Alkoholikong Ilimnon? Sala ba ang Pag-inom Niini?
Tubag sa Bibliya
Dili sala ang pag-inom ug alkoholikong ilimnon basta dili lang palabian. Matod sa Bibliya, regalo sa Diyos ang bino ug makadugang ni sa atong kalipay. (Salmo 104:14, 15; Ecclesiastes 3:13; 9:7) Gihisgotan sab sa Bibliya nga ang bino puwedeng itambal.—1 Timoteo 5:23.
Sa dinhi pa sa yuta si Jesus, miinom siyag bino. (Mateo 26:29; Lucas 7:34) Gani, sa usa sa iyang iladong mga milagro, gihimo niyang bino ang tubig panahon sa kasal ingong regalo.—Juan 2:1-10.
Dili maayong mga epekto sa pagpalabig inom
Tinuod nga gihisgotan sa Bibliya ang maayong mga epekto sa bino, pero gidili niini ang pagpalabig inom ug paghuboghubog. Busa, ang usa ka Kristohanon angay nga dili magpalabig inom ug alkoholikong ilimnon. (1 Timoteo 3:8; Tito 2:2, 3) Mabasa sa Bibliya ang daghang rason kon nganong likayan ang sobrang pag-inom.
Makawala ni sa hustong panghunahuna ug panimbang. (Proverbio 23:29-35) Dili matuman sa tawong hubog ang sugo sa Bibliya nga ‘itugyan ang imong lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa imong gahom sa pagpangatarongan.’—Roma 12:1.
Ang pagpalabig inom makawala sa pagpugong sa kaugalingon ug sa “maayong motibo.”—Oseas 4:11; Efeso 5:18.
Kini makapurdoy ug moresultag seryosong mga sakit.—Proverbio 23:21, 31, 32.
Ang pagpalabig inom ug paghuboghubog dili makapahimuot sa Diyos.—Proverbio 23:20; Galacia 5:19-21.
Timailhan nga daghan nag nainom
Sobra na ang pag-inom sa usa ka tawo kon kini makapameligro na niya o sa uban. Sumala sa Bibliya, ang tawong hubog dili lang kadtong mawad-ag panimuot, kondili lakip sab kadtong dili na makatultol, magbaragbarag, makig-away, o yungit nag sinultihan. (Job 12:25; Salmo 107:27; Proverbio 23:29, 30, 33) Bisan gani kadtong naglikay sa pagkahubog puwede gihapong “mabug-atan sa . . . pagpalabig inom” ug makaagom sa mga epekto niini.—Lucas 21:34, 35.
Bug-os nga paglikay sa alkoholikong ilimnon
Gihisgotan sab sa Bibliya nga dunay mga panahon nga ang mga Kristohanon bug-os nga maglikay sa pag-inom:
Kon ang uban mapandol tungod niini.—Roma 14:21.
Kon ang pag-inom ug alkoholikong ilimnon gidili sa balaod sa nasod nga ilang gipuy-an.—Roma 13:1.
Kon ang usa ka tawo dili makapugong sa iyang pag-inom. Kadtong nag-antos sa alkoholismo ug ubang matang sa pag-abuso sa alkoholikong ilimnon kinahanglang andam nga moundang sa pag-inom.—Mateo 5:29, 30.