Si Maria ba Inahan sa Diyos?

Ang tubag sa Bibliya

Dili. Ang Bibliya wala mag-ingon nga si Maria inahan sa Diyos, ug wala sab ni magsugo sa mga Kristohanon nga simbahon ug hatagag espesyal nga pagtagad si Maria.a Hunahunaa ni:

Si Maria wala mangangkon nga siya inahan sa Diyos. Ang Bibliya nag-ingon nga ipanganak ni Maria ang “anak sa Diyos,” dili ang Diyos mismo.—Marcos 1:1, Biblia sa Kristohanong Katilingban; Lucas 1:32.
Si Jesu-Kristo wala moingon nga si Maria inahan sa Diyos o nga si Maria angayng simbahon. Gani, gibadlong ni Jesus ang babaye nga naghatag ug espesyal nga pagtagad sa papel ni Maria ingong iyang inahan. Si Jesus miingon: “Malipayon kadtong nagapatalinghog sa pulong sa Diyos ug nagasunod niini!”—Lucas 11:27, 28.
Ang terminong “Inahan sa Diyos” ug “Theotokos” (Nagsamkon sa Diyos) dili makita diha sa Bibliya.
Ang ekspresyong “rayna sa kalangitan” diha sa Bibliya wala magtumong kang Maria, kondili sa bakak nga diyosa nga gisimba sa apostatang mga Israelinhon. (Jeremias 44:15-19) Ang “rayna sa kalangitan” lagmit mao si Ishtar (Astarte), diyosa nga gisimba sa mga taga-Babilonya.
Ang unang mga Kristohanon wala magsimba kang Maria o maghatag kaniyag espesyal nga pasidungog. Usa ka historyano ang miingon nga ang unang mga Kristohanon “wala mag-apil-apil sa mga kulto ug nabalaka nga ang paghatag ug sobrang pagtagad kang Maria moresulta sa pagsimba ug diyosa.”—In Quest of the Jewish Mary.
Ang Bibliya nag-ingon nga ang Diyos walay sinugdanan ug kataposan. (Salmo 90:1, 2; Isaias 40:28) Kay wala man siyay sinugdanan, siya walay inahan. Dugang pa, ang Diyos dili paigo sa tagoangkan ni Maria; ang Bibliya klarong naghisgot nga bisan ang kalangitan dili paigo sa Diyos.—1 Hari 8:27.

Maria—Inahan ni Jesus dili “Inahan sa Diyos”

Hudiyo si Maria, ug siya kaliwat ni Haring David. (Lucas 3:23-31) Si Maria nakabaton ug dakong pabor sa Diyos tungod sa iyang pagtuo ug debosyon. (Lucas 1:28) Gipili siya sa Diyos aron mahimong inahan ni Jesus. (Lucas 1:31, 35) Dihang naminyo siya kang Jose, si Maria nakabaton ug uban pang mga anak.—Marcos 6:3.

Bisag gipakita sa Bibliya nga si Maria nahimong tinun-an ni Jesus, kini wala maghatag ug dugang impormasyon bahin kang Maria.—Buhat 1:14.

Nganong ang uban nag-isip kang Maria ingong inahan sa Diyos?

Nagsugod ang pagsimba kang Maria niadtong ulahing bahin sa ikaupat nga siglo. Niadtong panahona, ang Simbahang Katoliko nahimong relihiyon sa Estado sa Romanhong Imperyo. Ingong resulta, daghang pagano ang midangop sa Kristiyanidad. Gisagop sab sa simbahan ang paganong pagtulon-an sa Trinidad.

Tungod sa doktrina sa Trinidad, daghang membro sa simbahan ang nagtuo nga kon si Jesus mao ang Diyos, si Maria mao ang inahan sa Diyos. Niadtong 431 C.E., opisyal nga gideklarar sa Konseho sa Efeso nga si Maria ang “Inahan sa Diyos.” Human niadto, ang sobrang pagtagad ug pagpasidungog kang Maria, bisan ang pagsimba kaniya mikaylap. Ang mga membro sa simbahan nga may paganong kagikan anam-anam nga naggamit ug mga imahen ug larawan sa Birheng Maria ingong kapuli sa ilang mga diyosa sa pertilidad, sama kang Artemis (Diana, sa mga Romano) ug Isis.

Niadtong 432 C.E., si Pope Sixtus III nagpatukod ug simbahan sa Roma ingong pagpasidungog sa “Inahan sa Diyos.” Kini gitukod duol sa nahimutangan sa karaang templo nga nagpasidungog kang Lucina, usa ka Romanong diyosa sa pagpanganak. Usa ka awtor ang mikomento nga ang maong simbahan maoy “nagpabiling simbolo nga ang pagsimba kang Maria gisagop sa Kristiyanidad sa Roma gikan sa paganong pagsimba sa Dakong Inahan.”—Mary—The Complete Resource.

a Gitudlo sa daghang relihiyon nga si Maria inahan sa Diyos. Ilang giila si Maria ingong “Rayna sa Kalangitan” o ingong Theotokos, usa ka Gregong pulong nga nagkahulogang “Nagsamkon sa Diyos.”

Ang tubag sa Bibliya

Maria​—Inahan ni Jesus dili “Inahan sa Diyos”

Maria—Inahan ni Jesus dili “Inahan sa Diyos”