Ang Abilidad sa Paglupad sa Fruit Fly

Kadtong mohapak ug langaw makaingon gyod nga lisod kaayong ig-on ang langaw. Kini nga insekto samag kilat molihok, maong sagad makalikay ni dihang hampakon.

Nadiskobrehan sa mga siyentista nga ang fruit fly, klase sa langaw, makaliko ug makatuyok parehas sa mga fighter jet, pero paspas kaayo nga wala ray usa ka segundo. Bisag bag-o pang gianak, “kini eksperto na kaayong molupad,” miingon si Propesor Michael Dickinson. “Mora kag nagbutang ug bag-ong natawo nga bata diha sa ayroplanong panggiyera ug kahibalo na siyag unsaon ni pagpalupad.”

Gi-video sa mga researcher ang paglupad niini nga mga langaw ug nadiskobrehan nila nga ang ilang pako mokapakapa ug 200 ka beses kada segundo. Pero ang usa ka pagkapa igo na aron maposisyon ang ilang lawas sa direksiyon diin sila moikyas.

Ug unsa ka paspas ang ilang reaksiyon? Nadiskobrehan sa mga researcher nga kon naay peligro, kini nga mga langaw molihok nga mas paspas ug 50 ka pilo kay sa pamilok sa mata. “Sa mubo lang kaayong panahon, mahibaloan na sa langaw kon asa ang peligrong lugar ug kon asang direksiyon siya angayng molupad,” miingon si Dickinson.

Hangtod karon gipaningkamotan sa mga researcher nga mahibaloan kon giunsa kini paghimo sa gamayng utok sa fruit fly.

Unsay imong hunahuna? Ang abilidad ba sa paglupad sa fruit fly mitungha pinaagig ebolusyon? O kini ba gidisenyo?