Ang Sonar sa Dolphin

Ang dolphin magpatunghag lainlaing tingog ug maminaw sa echo niini aron makanabigar ug mahibalo kon unsay naa sa iyang palibot. Tungod sa sonar sa bottlenose dolphin (Tursiops truncatus), ang mga siyentista naningkamot sa paghimog mga underwater acoustic system aron masulbad ang mga problema nga dili masulbad sa teknolohiya karon.

Hunahunaa: Tungod sa sonar, ang dolphin makahibalo nga naay isda nga nagtago sa balas ug makaila sab siya kon ang usa ka butang isda ba o bato. Sumala ni Keith Brown, propesor sa Heriot-Watt University, Edinburgh, Scotland, ang dolphin makaila sab “kon ang sulod ba sa sudlanan tab-ang nga tubig, tubig sa dagat, syrup, o lana sa distansiya nga 10 metros [32.8 piye].” Ang mga siyentista gustong mobuhat ug mga himan nga makahimo sa pipila niana nga mga abilidad.

Gitun-an sa mga researcher ang tingog ug paagi sa pagdungog sa dolphin ug misulay sa pagsundog niini. Busa nakahimo silag sonar device nga naay high-tech nga mga elektronik ug gibutang kini sa sudlanan nga pormag tubo nga halos usa ka metros (3.3 piye) ang gitas-on. Kini nga himan, nga gitaod sa underwater robotic vehicle nga pormag torpedo, gidisenyo aron mag-inspeksiyon sa salog sa dagat, mangitag nalubong nga mga butang sama sa kable ug tubo, ug mag-analisar niini nga dili ra tandogon ang maong mga butang. Ang mga nagdisenyo niini naghunahuna nga magamit kini sa oil ug gas industry. Pinaagi niini nga himan, nga gisundog sa sonar sa dolphin, mas daghang datos ang makuha kon itandi sa mga sonar device karon, matabangan ang mga teknisyan sa pagplastar sa mga underwater equipment sa pinakamaayong lokasyon, pagpangitag mga daot​—sama sa mga liki sa tiiltiil sa oil-rig—​ug bisan sa pagpangitag mga bara sa linya sa tubo.

Unsay imong hunahuna? Ang sonar sa bottlenose dolphin mitungha ba pinaagig ebolusyon? O kini ba gidisenyo?