Ang Paglimpiyo sa Carpenter Ant sa Antena Niini

Importante nga limpiyo ang usa ka insekto aron kini makalupad pag-ayo, makakatkat, ug makamatikod sa nagakahitabo sa palibot. Pananglitan, kon hugaw ang antena sa hulmigas, maglisod kinig nabigar, komunikar, ug panimaho. Busa “wala gyod kay makita nga hugawng insekto,” miingon ang zoologist nga si Alexander Hackmann. “Makamao silang molimpiyo sa ilang kaugalingon kon sila mahugaw.”

Hunahunaa: Gitun-an ni Hackmann ug sa iyang mga kauban ang paagi sa usa ka klase sa carpenter ant (Camponotus rufifemur) sa paglimpiyo sa antena niini. Ilang nadiskobrehan nga pik-on sa hulmigas ang tiil niini dayon ipaagi dinhi ang antena aron matangtang ang mga hugaw. Ang dagkong mga balhibo sa tiil maoy magtangtang sa dagkong mga hugaw. Ang gagmayng hugaw matangtang pinaagi sa pinong mga balhibo nga ang kal-ang parehas sa gibag-on sa balhibo sa antena. Dayon ang kinagamyang mga hugaw​—nga 1/80 sa gibag-on sa lugas sa buhok sa tawo—​matangtang sa mas pino pa gyod nga mga balhibo.

Tan-awa kon giunsa paglimpiyo sa carpenter ant ang antena niini

Si Hackmann ug ang iyang mga kauban nagtuo nga ang paagi sa hulmigas sa paglimpiyo sa antena niini magamit diha sa industriya. Pananglitan, kini nga paagi magamit aron mamentinar ang kahinlo dihang maggama ug gagmayng mga electronic component ug semiconductor, nga puwedeng maguba bisag gamay ra kaayo ang hugaw.

Unsay imong hunahuna? Ang abilidad sa carpenter ant sa paglimpiyo sa antena niini resulta ba sa ebolusyon? O kini ba gidisenyo?