Watchtower ONLINE NGA LIBRARYA

ONLINE NGA LIBRARYA

ijwbq artikulo 156
Tinuod ba ang Estorya Bahin Kang Noe ug sa Dakong Lunop?

Tubag sa mga Pangutana Bahin sa Bibliya

ijwbq artikulo 156

Mga elepante, giraffe, leyon, ug langgam nanulod sa arka

Tinuod ba ang Estorya Bahin Kang Noe ug sa Dakong Lunop?

Tubag sa Bibliya

Oo. Ang Lunop maoy tinuod nga hitabo. Gipahinabo to sa Diyos aron laglagon ang mga daotan, pero iyang gipatukod ug arka si Noe aron luwason ang maayong mga tawo ug ang mga mananap. (Genesis 6:11-20) Makatuo ta nga nahitabo gyod ang Lunop kay narekord ni sa Bibliya, nga “gisulat pinaagi sa paggiya sa Diyos.”—2 Timoteo 3:16.

Tinuod o dili?

Gipakita sa Bibliya nga si Noe tinuod nga tawo ug ang Lunop nahitabo gayod.

Ang mga magsusulat sa Bibliya mituo nga si Noe tinuod nga tawo. Pananglitan, ang mga magsusulat sa Bibliya nga si Esdras ug Lucas, kinsa ekspertong mga historyano, nag-apil kang Noe sa kaliwatan sa nasod sa Israel. (1 Cronicas 1:4; Lucas 3:36) Ang mga magsusulat sa Ebanghelyo nga si Mateo ug Lucas nagrekord sa giingon ni Jesus bahin kang Noe ug sa Lunop.—Mateo 24:37-39; Lucas 17:26, 27.

Dugang pa, si propetang Ezequiel ug si apostol Pablo naghisgot kang Noe ingong ehemplo sa pagtuo ug pagkamatarong. (Ezequiel 14:14, 20; Hebreohanon 11:7) Hisgotan kaha nila ingong sulondan ang usa ka tawo nga wala maglungtad? Busa klaro nga si Noe ug ang ubang matinumanong lalaki ug babaye sulondan para nato tungod kay sila tinuod nga mga tawo.—Hebreohanon 12:1; Santiago 5:17.
Ang Bibliya naghatag ug espesipikong mga detalye bahin sa Lunop. Ang asoy sa Bibliya bahin sa Lunop wala sugdi ug “Niadtong unang panahon,” nga sagad mabasa sa dili tinuod nga mga estorya. Sa kasukwahi, gisulti sa Bibliya kon unsa nga tuig, bulan, ug adlaw nahitabo ang mga panghitabong konektado sa Lunop. (Genesis 7:11; 8:4, 13, 14) Gisulti pod niini ang sukod sa arka nga gihimo ni Noe. (Genesis 6:15) Base niini nga mga detalye, gipakita sa Bibliya nga ang Lunop nahitabo gayod.

Nganong nahitabo ang Lunop?

Ang Bibliya nag-ingon nga sa wala pa ang Lunop, “grabe na ang pagkadaotan sa mga tawo.” (Genesis 6:5) Kini midugang nga “sa panan-aw sa matuod nga Diyos ang yuta nadaot” kay kini puno sa kapintasan ug seksuwal nga imoralidad.—Genesis 6:11; Judas 6, 7.

Ang Bibliya nag-ingon nga ang kadaghanan sa maong mga problema gipahinabo sa daotang mga anghel nga mibiya sa langit aron makigrelasyon sa mga babaye. Kini nga mga anghel may mga anak nga gitawag ug Nepilim, nga nagpahinabog grabeng kadaot ug pag-antos sa mga tawo nianang panahona. (Genesis 6:1, 2, 4) Ang Diyos mihukom nga laglagon ang mga daotan sa yuta ug tugotan ang maayong mga tawo nga magsugod ug bag-ong kinabuhi.—Genesis 6:6, 7, 17.

Nahibalo ba ang mga tawo nga moabot ang Lunop?

Oo. Giingnan sa Diyos si Noe kon unsay mahitabo ug gisugo siya sa pagtukod ug arka aron maluwas ang iyang pamilya ug ang mga mananap. (Genesis 6:13, 14; 7:1-4) Gipasidan-an ni Noe ang mga tawo bahin sa umaabot nga kalaglagan, pero gibalewala nila ang iyang mga pasidaan. (2 Pedro 2:5) Ang Bibliya nag-ingon: “Wala sila magtagad hangtod miabot ang Lunop ug gibanlas silang tanan.”—Mateo 24:37-39.

Unsay hitsura sa arka ni Noe?

Ang arka maoy dakong rektanggulo nga kahon, nga mga 133 metros (437 piye) ang gitas-on, 22 metros (73 piye) ang gilapdon, ug 13 metros (44 piye) ang gihabogon.a Ang arka hinimo sa kahoyng tagokon, ug kini gibulitan ug alkitran sa sulod ug gawas. Kini tres andanas ug daghag kuwarto. May pultahan ang kilid niini ug dayag nga may bentana sa ibabaw nga bahin. Lagmit ang arka may atop nga handag ug diyutay aron dili magpondo ang tubig.—Genesis 6:14-16.

Makita sa tsart ang gitas-on sa arka ni Noe, sa jetliner, ug sa elepante

Unsa ka dugay ang pagtukod ni Noe sa arka?

Wala isulti sa Bibliya kon unsa ka dugay ang pagtukod ni Noe sa arka, pero lagmit iya ning gitukod sa daghang katuigan. Si Noe kapig 500 anyos dihang natawo ang iyang kamagulangang anak, ug 600 anyos siya dihang nahitabo ang Lunop.b—Genesis 5:32; 7:6.

Ang Diyos nagsugo kang Noe sa pagtukod ug arka dihang ang iyang tulo ka anak nangaminyo na. Lagmit 50 o 60 ka tuig ang milabay sukad sila gipanganak hangtod nangaminyo. (Genesis 6:14, 18) Kon tinuod ni, makataronganon ang paghinapos nga ang arka nahuman sulod sa 40 o 50 ka tuig.

Mga estorya bahin sa dakong lunop

Sa tibuok kalibotan, komon kaayo ang mga estorya bahin sa lunop. Bisag ang ilang mga bersiyon lahi nianang sa Bibliya, daghan niana may mga bahin nga susama sa giingon sa Bibliya. Dihang ang mga kaliwat ni Noe nakaabot sa lainlaing bahin sa yuta, posibleng giestorya nila ang bahin sa Lunop. Pero ngadtongadto, daghan nag nausab sa estorya. Niay mga pananglitan.

Estorya sa mga Grego: Ang lalaki ug babaye nga naluwas sa lunop gisugo nga pun-on pag-usab ang yuta pinaagi sa paglabayg mga bato sa ilang likod. Dayon, ang mga bato nahimong mga lalaki ug babaye.

Estorya sa mga Hindu: Gipasidan-an sa isda ang usa ka tawo nga ang katawhan laglagon pinaagig lunop. Gipahimo siya sa isda ug bangka. Naluwas siya sa lunop kay gigiyahan sa isda ang bangka sa luwas nga lugar.

Estorya sa mga taga-Babilonya: Ang lalaki ug babaye nga naluwas sa lunop gihatagan ug imortal nga kinabuhi ug nahimong diyos ug diyosa.

Estorya sa mga taga-Central America: Ang usa ka lalaki, iyang asawa, ug ilang mga anak naluwas sa lunop, samtang ang ubang tawo nahimong mga isda.

a Sa Bibliya, maniko ang gigamit nga sukod sa arka. Ang “maniko sa mga Hebreohanon sagad 17.5 ka pulgada (44.45 sentimetros).”—The Illustrated Bible Dictionary, Rebisadong Edisyon, Bahin 3, panid 1635.

b Bahin sa gitas-on sa kinabuhi sa mga tawo sama ni Noe, tan-awa ang artikulong “Tinuod Bang ang mga Tawo Kaniadto Tag-as Kaayog Kinabuhi?” sa Disyembre 1, 2010 nga isyu sa Bantayanang Torre.