Juan 14:6—“Ako ang Dalan ug ang Kamatuoran ug ang Kinabuhi”

“Si Jesus mitubag: ‘Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.’”—Juan 14:6, Bag-ong Kalibotang Hubad.

“Si Jesus mitubag, ‘Ako ang dalan, ang kamatuoran ug ang kinabuhi. Walay makaadto sa Amahan kon dili moagi kanako.’”—Juan 14:6, Ang Bag-ong Maayong Balita Biblia.

Kahulogan sa Juan 14:6

Ang usa nga gustong mosimba sa Amahan, si Jehovaa nga Diyos, kinahanglang moila sa importanteng papel ni Jesus.

“Ako ang dalan.” Gitagana ni Jesus “ang dalan” aron ang usa makaduol sa Diyos sa dalawatong paagi. Pananglitan, kadtong mag-ampo sa Diyos kinahanglang maghimo niana sa ngalan ni Jesus. (Juan 16:23, 24) Tungod sa kamatayon ni Jesus, ang katawhan mapasig-uli ngadto sa Diyos, o makabaton pag-usab sa Iyang pag-uyon. (Roma 5:8-11) Naghatag sab si Jesus ug sumbanan sa panggawi nga angayng sundon niadtong nagtinguha nga mapalipay ang Diyos.—Juan 13:15.

“Ako . . . ang kamatuoran.” Si Jesus kanunayng nagsulti sa kamatuoran ug nagkinabuhi uyon niana. (1 Pedro 2:22) Pinaagi sa pagpaminaw kaniya, ang usa makakat-on sa kamatuoran bahin sa Diyos. (Juan 8:31, 32) Si Jesus mao sab “ang kamatuoran” kay gituman niya ang mga tagna sa Bibliya. Busa, pinaagi kaniya, nahimong realidad ang mga saad sa Diyos.—Juan 1:17; 2 Corinto 1:19, 20; Colosas 2:16, 17.

“Ako . . . ang kinabuhi.” Gihatag ni Jesus ang iyang kinabuhi aron kadtong magpakitag pagtuo kaniya makabaton ug kinabuhing walay kataposan. (Juan 3:16, 36) Siya sab “ang kinabuhi” para niadtong nangamatay, kay banhawon niya sila.—Juan 5:28, 29; 11:25.

“Walay makaadto sa Amahan kon dili pinaagi kanako.” Kadtong gustong makabaton sa pag-uyon sa Diyos kinahanglang modawat sa talagsaong papel ni Jesus. Mahimo nila kana pinaagi sa pag-ampo sa Diyos sa ngalan ni Jesus, nga nagpakita nga ilang giila ang awtoridad ni Jesu-Kristo. (Juan 15:16) Giila sab nila nga ang kaluwasan naposible lang tungod kang Jesus.—Buhat 4:12; Filipos 2:8-11.

Konteksto sa Juan 14:6

Sa Juan kapitulo 13 hangtod sa 17, mabasa ang tambag ni Jesus ngadto sa iyang 11 ka matinumanong apostoles sa gabii una siya mamatay. Sa kapitulo 14, gidasig ni Jesus ang iyang mga tinun-an sa pagpakitag pagtuo kaniya ug sa iyang Amahan ug sa paghigugma ug pagsunod kanila. (Juan 14:1, 12, 15-17, 21, 23, 24) Gipadayag niya ang iyang suod nga relasyon sa iyang Amahan nga nabatonan niya sukad pa kaniadto. (Juan 14:10, 20, 28, 31) Bisag hapit na siyang mobalik sa langit, gipasaligan ni Jesus ang iyang mga tinun-an nga dili niya sila biyaan. (Juan 14:18) Siya nagsaad sab kanilag “magtatabang” ug naghubit niini ingong “ang balaang espiritu, nga ipadala sa Amahan pinaagi sa akong ngalan.” (Juan 14:25-27) Niini ug sa uban pang paagi, giandam ni Jesus ang iyang mga sumusunod sa umaabot nga mga pagsulay.