Mapasalamaton Ko nga Gipili Nako ang Hustong Karera

Nagdako ko sa lugar sa Australia nga dili siyudad. Nakat-onan sa akong ginikanan ug mga apohan ang kamatuoran sa katuigang 1950. Miuban kog sangyaw pagka-6 anyos nako ug nabawtismohan pagka-13 anyos. Sagad mag-oksilyare payunir ko sa tingbakasyon sa klase. Gihigugma nako si Jehova ug gusto nako siyang alagaron hangtod sa hangtod.

Pagka-15 anyos nako, nakita sa akong mga coach sa eskuwelahan nga maayo kaayo ko sa sports. Tungod ini, gitanyagan kog scholarship sa mga representante sa professional rugby league team. Ganahan ko sa ideya nga mahimong sikat nga rugby player, pero gipahinungod na nako ang akong kaugalingon kang Jehova. Giingnan ko ni Papa nga pamalandongon ang akong pahinungod sa dili pa ko modesisyon nga magsugod ug karera sa sports. Ako tong gihimo ug naamgohan nako nga dili ko bug-os makaalagad kang Jehova kon mosikat ko sa sports, maong gibalibaran nako ang scholarship. Pipila ka bulan sa ulahi, gitanyagan kog laing scholarship sa Australian Institute of Sport sa Canberra. Bansayon ko ingong marathon runner nga naay kahigayonan nga morepresentar sa Australia sa Commonwealth Games o sa Olympic Games. Pero gusto gyod nakong tumanon ang akong pahinungod sa Diyos nga akong gimahal—maong gibalibaran na pod nako ni.

Wa madugay, miundang kog eskuwela ug nagpayunir, nga dugay na nakong gustong himoon. Pero nagkaproblema sa pinansiyal ang akong pamilya, maong miundang kog payunir ug nagtrabahog full time ingong drayber sa makinarya sa uma. Adtong panahona, hapit na kong mag-20 anyos ug naglain kog puyo. Nag-alagad gihapon ko kang Jehova pero morag rutina na lang ni. Naluya ko ug mihuyang ang akong relasyon kang Jehova. Nakighigala ko sa mga tawong palainom ug imoral, ug natental ko sa pagsundog nila. Gibalewala nako ang akong relasyon kang Jehova aron himoon ang mga butang nga makahatag nakog temporaryong kalipay.

Kinahanglan nakong ibalik ang akong pokus sa pag-alagad, maong mibalhin kog laing lungsod nga layo sa impluwensiya sa akong kanhing mga higala. Mas nakigsuod ko kang Jehova ug nagplano kong mobalik pagpayunir. Dayon nailaila nako si Leann McSharry—usa ka babaye nga maulawon, dili taga-siyudad, ug payunir, ug nagkahigalaay mi. Ginahisgotan namo ang among mga tumong, ug apil ani ang misyonaryong pag-alagad. Naminyo mi niadtong 1993. Gusto namong magpagiya kang Jehova sa among kinabuhi.

Pagkab-ot sa Among mga Tumong

Nianang tuiga, mibalik ko sa pagka-regular payunir. Kay determinado ming magkinabuhing simple ug dili mangutang, mipalit mig daan nga trailer, o mobile home, aron among puy-an. Sulod sa unom ka tuig, nagbalhinbalhin mi sa mga lugar nga gisugyot sa organisasyon ni Jehova, ug misulod mig lainlaing trabaho sa pagsuportar sa among kaugalingon. Nagsangyaw mi uban sa gagmayng kongregasyon diha sa lapad, patag, ug uga nga mga teritoryo sa hilit nga mga lugar sa Queensland. Sagad, magtapok mi sa hilit nga mga lugar ug magtigom diha sa kakahoyan o sa lokal nga community hall. Malipayon mi adto. Pero naghunahuna gihapon mi, ‘Naa pa ba tay mahimo para kang Jehova?’ Wa madugay, nakadawat mig tubag.

Gidapit mi sa organisasyon ni Jehova nga magmisyonaryo sa laing nasod! Pero gikulbaan mi ug mibating dili kuwalipikado, kay basin dili mi mahimong maayong misyonaryo tungod kay wala mi nabansay sa Gilead School. Ganahan kaayo mi sa ministeryo, pero kay gamay ra mig Bible study sa among asaynment sa hilit nga mga lugar, giisip namo nga dili kaayo mi maayong manudlo.

Gisulti namo ang among mga kabalaka kang Max Lloyd, membro sa Komite sa Sangang Buhatan.a Gipasaligan mi niya nga kon padayon ming magpagamit kang Jehova bisag mobati mi nga dili kuwalipikado, tabangan mi ni Jehova nga molampos sa bisan unsa nga iyang ipahimo namo. Tungod sa maong inamahan nga pagdasig, malipayon namong gidawat ang among asaynment sa Sri Lanka.

Lisod nga Asaynment

Niadtong 1999, miabot mi sa Colombo, ang kaulohan sa Sri Lanka. Lahi gyod kaayo ni sa among malinawong kinabuhi sa hilit nga mga lugar sa Australia! Didto mi nakasinatig giyera ug kapobrehon, daghan kaayog tawo didto, naay mga makililimos, ug kinahanglan namong sabton ang komplikadong mga pinulongan. Pero naay bahandi sa Sri Lanka—ang atong minahal nga mga igsoon ug ang daghan kaayong mapainubsanong tawo nga wala pa makaila kang Jehova.

Giasayn mi sa Kandy, siyudad nga nahimutang sa nindot nga bukid nga napalibotan ug mga plantasyon sa tsa ug kalasangan. Kini nga siyudad ilado kay daghan dinhig templo sa Budhista. Gamay ra sa mga tawo dinhi ang naay nahibaloan bahin sa ilang mahigugmaong Maglalalang. Sa among kongregasyon, naay mga igsoon nga nagsultig Sinhala ug Tamil, ug ang mga tigom gihimo sa maong duha ka pinulongan. Lisod tun-an ang Sinhala, pero naapresyar sa among kongregasyon ug mga Bible study ang among paningkamot, bisag magkatawa sila sa among mga sayop!

Pero dili ang pinulongan ang pinakalisod sa among asaynment. Sa unang higayon sa among kinabuhi, nakaeksperyensiya mig grabe kaayong pagsupak sa kamatuoran. Dihay higayon nga gipalibotan mig suko kaayo nga grupo sa mga lalaki. Gisunog sa uban ang among literatura samtang ako ug ang laing igsoon gitadyakan ug gikulata sa uban. Samtang nahitabo ni, miampo mi kang Jehova nga magpabilin ming kalmado ug nga hinumdoman mi niya kon mamatay mi. Maayo na lang kay mibiya ra ang maong grupo. Nagkurog ming mibiya sa maong baryo, pero nagpasalamat mi kang Jehova kay iya ming giproteksiyonan.

Paglabay sa panahon, giganahan na mi pag-ayo sa Sri Lanka. Bisag nabahinbahin ang nasod tungod sa giyera, nalipay kaayo ming makita kon giunsa pagkabig ni Jehova ang sinserong mga tawo ngadto sa iyang nahiusa nga pamilya. Daghan mig makapalipay nga kasinatian niining nindot nga isla. Pero human lang sa duha ka tuig, ang mga awtoridad nagpadala sa presyur sa relihiyosong mga lider, ug kadaghanan sa mga misyonaryo kinahanglang mobiya sa nasod.

Sa misunod nga mga semana, naglibog ug naguol mi. Asa na kaha mi ani paingon? Giasayn mi sa Nagamandong Lawas sa Papua New Guinea. Miabot mi sa kaulohan, sa Port Moresby, niadtong Septiyembre 2001.

Talagsaong Eksperyensiya sa Papua New Guinea

Bisag duol ra kaayo ang Papua New Guinea sa Australia, lahi kaayo ang adlaw-adlaw nga pagkinabuhi ug kultura dinhi, maong kinahanglan na pod ming mag-adjust. Nagkat-on mig Tok Pisin, ang pinakakomon nga ginagamit nga pinulongan sa nasod nga naay kapig 800 ka pinulongan!

Human sa tulo ka tuig sa lungsod sa Popondetta, giasayn mi sa sirkitong buluhaton. Wa gyod mi magdahom nga gamiton mi ni Jehova sa ingon ini nga paagi! Gipabilhan gyod nako ang giya, pagkahamtong, ug pagpanudlo sa nagapanawng mga tigdumala, pero mibati kong dili kuwalipikado nga mag-alagad ingong tigdumala sa sirkito. Sukad sa una, gusto na gyod kong magmisyonaryo. Wa gyod ko magdahom nga mahimo kong tigdumala sa sirkito! Di gihapon ko katuo nga gihatagan ko ni Jehova sa maong pribilehiyo.

Kon sa mga lungsod mi moduaw, sagad naa mi koryente ug tubig ug naa poy kuwarto nga naay katre. Pero sagad wala ning mga butanga sa hilit nga mga lugar. Sa gagmayng payag mi mangatulog, maghaling mi sa gawas aron makaluto, ug sa sapa ug suba mi mangaligo—pero kon naay mga buaya, maghakot mig tubig gamit ang balde ug didto mi mangaligo sa payag.

Kini nga asaynment nagkinahanglan ug dugang nga pisikal nga kalig-on kay sa among mga asaynment sa una. Pero kombinsido mi nga kon amo ning tumanon ug ‘gamiton ang among kusog,’ palamposon mi ni Jehova. (Maghuhukom 6:14) Daghan sa mga kongregasyon ug grupo nga among giduaw ang lisod adtoon, kay lagyo nig distansiya agi sa bagang kalasangan, kalamakan duol sa dagat, o batoon nga kabukiran. Mobiyahe mi gamit ang four-by-four nga sakyanan, bangka, eroplano, ug sagad magbaktas mi aron maadto ang atong mga igsoon.b

Aron duawon ang usa ka kongregasyon duol sa Indonesian border, mibiyahe mig kapin sa 350 kilometros agi sa mga dalan nga sagad dili maayo. Sa maong biyahe, kapig 200 ka beses ming mitabok ug sapa ug suba nga sagad walay tulay. Sulod sa daghang tuig, dili na namo maihap ang mga oras nga among gigugol sa pagkalot ug pagtuklod sa among sakyanan gikan sa baga ug pilit nga lapok aron lang makaabot sa atong minahal nga mga igsoon nga mapahiyomong nagpaabot namo ug naay dalang pagkaon.

Dihang mobiyahe mi paingon sa mga baryo nga naa sa bukid sakay sa gagmayng eroplano, ang piloto sagad molusot sa mga panganod aron pangitaon ang landinganan. Dayon, molabay siya duol sa landinganan aron tan-awon kon naa bay mga bata o mga hayop. Human, mangandam na ming molanding sa lapok ug batsi nga landinganan nga nahimutang sa delikadong bahin sa ibabaw sa bukid nga kapig 2,100 metros (7,000 ka piye) ang gihabogon. Usahay, ang paglupad gikan sa mubong landinganan nga pangpang na ang tumoy mao ray bugtong paagi aron makabiya sa maong hilit nga mga baryo.c

Usahay, lagyo among baktason agi sa bakilid kaayo nga bukid o kalamakan duol sa dagat sa init ug igang nga panahon samtang nagdalag mga backpack nga puno ug mga literatura ug pangunang mga suplay. Kay kauban man namo ang atong matinumanong mga igsoon, nahimo ning kahigayonan aron magdinasigay ug magkinataw-anay.

Mouyon mi sa gibati ni apostol Pablo nga narekord sa 1 Tesalonica 2:8: “Kay gimahal mo namo pag-ayo, determinado mi . . . sa paghatag sa among kinabuhi sa pagtabang kaninyo.” Ug among nakita nga andam pod nang himoon sa mga igsoon para namo, nga ipameligro ang ilang kinabuhi aron mapanalipdan mi gikan sa armadong kriminal nga mga gang. Dihay kas-a nga si Leann gihulga sa usa ka lalaki nga nagdalag sundang. Wala nako siya matabangi adto kay naa ko sa pikas bahin sa baryo. Mipatunga dayon ang usa ka brader kang Leann ug sa lalaki. Pero maayo na lang kay naay mipugong sa nasuko nga lalaki, maong gamay ra ang samad sa brader. Kada adlaw ming gitabangan ni Jehova sa nasod nga nag-anam ka bayolente aron padayon namong mapalig-on ang mga igsoon.

Kay limitado ra ang medikal nga mga pasilidad sa Papua New Guinea, naglisod mi sa pag-atiman sa among panglawas. Niadtong 2010, nameligro ang kinabuhi ni Leann tungod sa bacterial infection, maong niadto mig Australia para sa emergency nga pagtambal. Gitabangan mi ni Jehova nga magpabiling kalmado. Maayo na lang kay nakakita rag epektibong antibiotic ang mga doktor. Usa sa mga doktor ang nag-ingon: “Naghago mo para sa Diyos, maong wala gyod mo niya pasagdi.” Human sa daghang bulan, mibalik mi sa among asaynment.

Dakong Buluhaton Pagbalik sa Australia

Pagkasunod tuig, nagsige mig balikbalik sa Australia aron mapadayon ang pagtambal ni Leann. Pagka-2012, giingnan mi sa sangang buhatan nga magpabilin sa Australia aron atimanon ang among panglawas. Bisag dugay na kaayo ming wala sa Australia, wala ra kaayo mi maglisod sa pag-atiman sa among panglawas. Mas naglisod hinuon mi sa among panghunahuna ug emosyon. Naguol ming mobiya sa asaynment ug sa mga igsoon nga gimahal namo pag-ayo. Mibati mi nga morag napakyas mi ug nga dili na mi mapuslanon kang Jehova. Tungod sa daghang tuig nga wala mi sa Australia, naglisod na pod mig adjust dinhi. Gikinahanglan gyod namo ang tabang sa mga igsoon niadtong panahona.

Pagkaayo ni Leann, nag-alagad mi ingong espesyal payunir sa Wollongong, south sa Sydney, New South Wales. Human sa mga usa ka tuig, nalipay mi nga nakadawat ug imbitasyon para sa Bible School for Christian Couples (School for Kingdom Evangelizers karon). Dayon giasayn mi sa Australasia branch sa sirkitong buluhaton. Sulod sa daghang katuigan, giduaw namo ang mga kongregasyon ug grupo diha sa busy nga mga siyudad, hilit nga mga lungsod sa desyerto, ug baryo sa mga mangingisda. Apil sa among asaynment karon ang samag desyerto nga northwest sa Australia ug ang tibuok Timor-Leste.

Kauban nako ang akong asawa nga kanunayng nagsuportar nako ug nakapokus sa pag-alagad. Espesyal gyod kaayo siya nga regalo gikan kang Jehova. Walay gibalibaran nga asaynment si Leann, bisag lisod kaayo o dili komportable ang situwasyon. Dihang pangutan-on kon nganong nakaya niya ang mga kalisdanan, siya moingon, “Isulti nako ang tanan kang Jehova.” Dayon, samtang magbasa sa Pulong sa Diyos, tugotan niya si Jehova nga tudloan siya kon unsay pinakamaayong hunahunaon, bation, o himoon.

Wala gyod ko magmahay nga gitugotan nako si Jehova nga giyahan ko sa akong kinabuhi imbes nga mosulod sa karera sa sports sa kalibotan. Akong napamatud-an nga puwede tang bansayon ni Jehova aron mapalampos ang bisan unsa nga gusto niya kon andam tang modawat sa asaynment nga iyang giasayn nato. Nakat-onan nako nga mangayog kaalam ug balaang espiritu kada adlaw, ilabina dihang naay mga problema ug mga desisyon nga kinahanglang himoon. Ang atong mahigugmaong Amahan, si Jehova, naghatag namo ug makahuloganon ug makapatagbaw nga kinabuhi ug eksayted na ming makita kon unsa pay iyang mapalampos gamit ang “mga sudlanang kulonon” nga sama namo.—2 Corinto 4:7.