Paghubad sa 2020 “Paglipay Kanunay”! Rehiyonal nga Kombensiyon

Sa Hulyo ug Agosto 2020, sa unang higayon, ang mga igsoon sa tibuok kalibotan motan-aw sa samang mga pakigpulong sa rehiyonal nga kombensiyon sulod sa samang mga panahon. Aron mahimo ni, ang rekording sa mga pakigpulong kinahanglang hubaron sa kapig 500 ka pinulongan. Sagad, maabtag usa ka tuig o kapin pa ang pagplano ug paghuman sa ingon niana nga mga proyekto. Pero tungod sa coronavirus pandemic, ang mga maghuhubad sa 2020 “Paglipay Kanunay”! Rehiyonal nga Kombensiyon duna na lay kapig tulo ka bulan sa paghuman sa proyekto.

Ang Translation Services ug Global Purchasing sa Tibuok Kalibotang Hedkuwarter sa mga Saksi ni Jehova mitabang niining dako kaayo nga proyekto. Ang Translation Services nahibalo nga daghang translation team ang nagkinahanglag dugang nga equipment aron mahimo ni nga proyekto, sama sa taas ug kalidad nga mga mikropono. Ang Global Purchasing mipalit ug 1,000 ka mikropono ug gipadala kini sa halos 200 ka lokasyon.

Aron makadaginot, ang mga mikropono gipalit nga dinaghan, gipadala sa usa ka lokasyon, ug unya gikan didto gipadala sa lainlaing lokasyon sa tibuok kalibotan. Kay gipalit ni nga dinaghan, ang matag mikropono mikantidad na lang ug mga $170 U.S., apil na ang bayad sa pagpadala. Busa nakadaginot ta ug kapig 20 porsiyento kay sa kon gipalit ni nga tinagsa.

Kinahanglang himoon sa Global Purchasing ang pagpalit ug pagpadala niini sa Abril ug Mayo 2020—mga bulan nga limitado ang transaksiyon sa negosyo tungod sa pandemic. Bisan pa niana, sa kataposan sa Mayo, nadawat na sa kadaghanang remote translation office, sangang buhatan, ug uban pang lokasyon sa paghubad ang gikinahanglang equipment.

“Maayo gyod ang kooperasyon sa mga departamento sa Bethel ug sa mga kompaniya para niini nga proyekto,” miingon si Jay Swinney, nga tigdumala sa Global Purchasing. “Tungod sa espiritu ni Jehova, paspas nato ning nahimo ug nagamit nato sa maalamong paagi ang donasyon aron matagan-an ang teokratikanhong mga panginahanglan.”

Si Nicholas Ahladis, nga nag-alagad sa Translation Services, miingon: “Ang mga maghuhubad nga na-lockdown nadasig pag-ayo dihang nadawat nila ang equipment. Bisag dili nila kauban ang ubang membro sa ilang translation team, magkatinabangay gihapon sila sa paghubad ug pagrekord sa mga pakigpulong, drama, ug mga awit sa kapig 500 ka pinulongan.”

Kini maoy usa sa daghang proyekto nga natapos aron mapahimuslan sa mga igsoon sa tibuok kalibotan ang 2020 “Paglipay Kanunay”! Rehiyonal nga Kombensiyon. Tungod sa inyong kinasingkasing nga donasyon pinaagi sa donate.jw.org ug sa ubang paagi, atong napalit kining gikinahanglang mga equipment.