Gipasimple nga Pag-imprenta Aron Tabangan ang “Tanang Matang sa Tawo”

Gusto ni Jehova nga Diyos nga ang “tanang matang sa tawo . . . makakat-on sa tukmang kahibalo sa kamatuoran.” (1 Timoteo 2:3, 4) Pero ang mga igsoon ug ang atong ginasangyawan lainlain ug pinulongan. Kada tuig nag-imprenta tag halos duha ka bilyong literatura sa maong mga pinulongan. Unsay atong ginahimo aron matagana ang espirituwal nga pagkaon sa daghan kaayong pinulongan samtang gigamit ang mga donasyon sa maalamong paagi?

Gimenosan ang Imprentahanan, Pero Gipanindot ang Equipment

Sa katuigang 1980, nag-imprenta tag mga magasin sa kapig 40 ka nasod. Sukad niadto anam-anam natong giusab ang pagkaorganisar sa atong pag-imprenta, maong sa siyam ka nasod na lang ni gihimo karon. Pero ang gidaghanon sa mga pinulongan sa mga literatura nga regular natong ginaimprenta misakag halos 500 porsiyento! Unsaon nato pag-imprenta sa mas daghang pinulongan nga gimenosan man ang gidaghanon sa imprentahanan? Naposible na tungod sa gipanindot nga equipment.

Tungod sa bag-ong mga press makaimprenta tag mas daghang literatura sa mubong panahon. Ang daan nga mga press nagkinahanglag dakong panahon sa paghimog mga changeover—ang pagpangandam para sa sunod nga batch sa iimprenta. Karon, sa gipanindot nga equipment, ang paghimog mga changeover sagad mas paspas nag upat ka pilo. Mas daghan na tag maimprenta nga mga literatura, apil ang pag-imprenta sa mga literatura sa mga pinulongan nga gamay ra ang naggamit. Siyempre ang kada batch nagkinahanglan ug bag-ong printing plate. Sa milabayng tuig migasto tag halos duha ka milyong dolyar sa printing plate lang.a Maong para sa ginagmayng batch, mogamit tag mga digital press nga wala magkinahanglan ug printing plate. Kini nga mga press, apil ang naggamit ug laser technology, makaimprenta ug ginagmayng batch sa mga literatura nga gamay rag gasto ug wala ra kaayoy masayang nga materyales.

Sa milabayng tulo ka tuig, migasto tag kapin sa 10 ka milyong dolyar aron mas panindoton pa ang tanan natong equipment sa pag-imprenta ug pag-bind. Matikdi kon giunsa nato paggamit ang pipila sa maong mga equipment sa paghimog mga Bibliya. Sa nangagi, kapig 40 ka step ang kinahanglan aron makahimog Bibliya human kini maimprenta—apil ani ang pagtahi, pagputol, pag-trim, pagliha, ug pag-gild. Gawas pa, sagad kinahanglang manomanohon ug balhin ug han-ay ang mga Bibliya aron makapadayon sa sunod nga step. Karon, 10 ka step na lang ang kinahanglan kay nausa na ang kadaghanan sa mga step diha sa bag-ong equipment ug naa nay mga conveyor nga modala sa mga Bibliya paingon sa sunod nga step. Busa namenosan natog 55 porsiyento ang manomano nga trabaho para sa paghimog Bibliya. Sa sangang buhatan sa Japan, ang bindery makahimo sa una ug 2,000 ka Bibliya sulod sa walo ka oras. Karon, mga 35,000 ka Bibliya na ang mahimo sulod sa walo ka oras!

Mas Makadaginot kon Gamay ra ang naa sa Inventory

Tungod niini nga mga kabag-ohan nakadaginot ta sa mga donasyon. Pananglitan, karon nga makaimprenta na tag ginagmayng batch ug mas paspas nang makahimog mga changeover, dili na kinahanglang mag-stock ug daghang literatura sa kada imprentahanan. Si Gary, nga nag-alagad sa sangang buhatan sa United States, miingon: “Sa primero, morag dili makataronganon nga magsigeg imprenta ug ginagmayng batch sa mga literatura. Morag mas maayo nga usahay lang mag-imprenta, pero dinagko nga batch. Sa unang tuig nga nagsige mig imprenta ug ginagmayng batch, midako ug 60,000 ka dolyar ang atong nagasto para sa mga printing plate ug nausik nga papel. Pero anang tuiga, nakadaginot tag kapin sa 1.5 milyon ka dolyar nga gastohon unta sa pag-stock ug papel ug naimprenta nga mga libro!” Kining kuwartaha gigamit para sa uban pang importanteng galastohan, sama sa pagtukod ug Kingdom Hall ug sa disaster relief.

Kay gamay na lang ang inventory, nadugangan ang bakanteng mga lugar diha sa pipila sa atong mga sangang buhatan. Kini nga mga lugar puwede nang gamiton para sa uban pang panginahanglan sa Bethel. Gawas pa, kay pipila na lang ang lokasyon sa mga imprentahanan, dili na kinahanglang dagko ang bag-ong mga proyekto sa pagpanukod. Pananglitan, ang pag-imprenta sa sangang buhatan sa Britain gibalhin na sa sangang buhatan sa Central Europe ug sa uban pang imprentahanan niadtong 2018. Tungod ani, nakadaginot tag minilyon ka dolyar dihang gitukod ang bag-ong sangang buhatan diha sa Chelmsford, England.

“Imo Kong Gihinumdoman!”

Ang atong gipasimple nga pag-imprenta ilabinang nakatabang sa mas daghang tawo nga masuod kang Jehova. Makaimprenta na ta sa mas daghang pinulongan, bisag pipila ka gatos ka kopya lang ang gikinahanglan sa usa ka publikasyon. Pananglitan, naa lay mga 35,000 ang makasultig Wallisian nga nagpuyo sa New Caledonia ug sa Wallis and Futuna. Pero niadtong Agosto 2024, gi-release ang kompletong Bag-ong Kalibotang Hubad sa Balaang Kasulatan sa Wallisian. Si Selafina, usa ka sister nga makasultig Wallisian, miingon: “Sa una, makabasa kog mga pulong sa French nga Bibliya nga dili nako masabtan. Maong nakahilak ko pagkadawat nako sa Wallisian nga Bibliya. Miampo ko, ‘Oh Jehova, imo kong gihinumdoman! Dili ka mapihigon nga Diyos.’”

Bisag wala ray 500,000 ang makasultig Sanga sa Democratic Republic of the Congo, available sa maong pinulongan ang librong Mabuhi Ka Hangtod sa Hangtod! Si Josué, nga naa sa Sanga nga kongregasyon, miingon: “Sa una, lisod kaayong ipatin-aw o hubaron ang pipila ka pulong ug ekspresyon ngadto sa mga Bible study. Pero bisag puwerte na nimong paningkamot, usahay dili gihapon makasabot ang estudyante kon unsay giingon sa libro. Maayo na lang kay naa nay Sanga aning libroha. Karon mas masabtan na sa akong mga Bible study kon unsay gitudlo ug dili na ko kinahanglang mohatag ug tag-as nga mga eksplinasyon.”

Nag-imprenta ug nag-apod-apod tag mga espirituwal nga pagkaon sa mas daghang tawo ug mas daghang pinulongan karon kay sukad masukad. Nahimo nato ni tungod sa inyong mga donasyon, apil ang gikan sa donate.jw.org. Salamat kay mahinatagon kaayo mo.