Ang kamatuoran nga gigamit ang Hebreohanong mga pulong nga ʽAsh ug ʽAʹyish ingon man ang ubang mga termino maylabot sa adlaw, mga bituon, ug sa langit nagpakitang kini nagtumong sa pipila ka langitnong konstelasyon. (Tan-awa ang Job 9:​7-9; 38:​32, 33.) Sa pagkakaron imposible ang pagtino kon unsa nga konstelasyon ang gitumong niini ug busa mas maayong gamiton na lamang ang katumbas nga espeling alang niining ngalana (sama sa among ulohan) inay nga hubaron ang maong Hebreohanong mga pulong pinaagig espesipikong mga ngalan sama sa “Arcturus” (Gr., Ar·ktouʹros, sa literal nagkahulogang “Magbalantay sa Oso”) (KJ), o “Oso” (RS).

Ang kamatuoran nga ang Job 38:32 naghisgot sa Ash “uban sa mga anak niini” nagpalig-on sa pasukaranan nga nalangkit ang usa ka konstelasyon. Ang Ursa Major (ang Dakong Oso) sagad mao ang gituohan nga konstelasyon, nga may pito ka pangunang mga bituon diha niana nga mahimong mao ang “mga anak niini.” Ang hinungdanong punto sa teksto mao, dili ang tukmang ngalan sa konstelasyon, kondili ang pangutana nga gibangon: “Ikaw ba makagiya kanila?” Busa gipasiugda ni Jehova nga Diyos diha kang Job ang kaalam ug gahom sa Maglalalang, nga imposible gayod alang sa tawo ang paggiya sa mga kalihokan niining dagko kaayong mga butang sa langit.

Gihisgotan sa Aramaikong Targum nga ang Mazzaroth mao ra ang maz·za·lohthʹ sa 2 Hari 23:​5, “mga konstelasyon sa zodiac,” o “dose ka simbolo, o, mga konstelasyon.” (NW; panaplin sa KJ) Gituohan sa pipila nga ang pulong naggikan sa usa ka lintunganayng pulong nga nagkahulogang “pagsirkulo” ug nga ang Mazzaroth nagtumong sa sirkulo sa zodiac. Hinunoa, sa Job 38:32 gigamit ang usa ka singular nga pronombre sa Hebreohanong ekspresyon nga “sa tinudlong panahon niini,” samtang ang gihisgotan sa 2 Hari 23:5 maoy plural. Busa, ang Mazzaroth mopatim-awng nagtumong sa usa ka partikular nga konstelasyon inay sa tibuok nga sirkulo sa zodiac, apan kini dili matino sa pagkakaron.

Sa Job 38:32 si Jehova nangutana kang Job: “Mapagula mo ba ang konstelasyong Mazzaroth sa tinudlong panahon niini? Ug kon bahin sa konstelasyong Ash uban sa mga anak niini, ikaw ba makagiya kanila?” Busa, bisan unsa man kining matanga sa mga konstelasyon, gipangutana sa Diyos si Job kon siya ba makakontrolar sa makitang langitnong mga butang, ug makapagula sa usa ka grupo sa takdang panahon niini o magagiya sa lain pang konstelasyon diha sa gilatid nga agianan niini sa langit.