Unya anaa usab ang pormal o mahugpongon nga paralelismo (synthetic) diin ang ikaduhang bahin dili kay nagpahayag lamang sa samang hunahuna ingon sa una o naghatag lamang ug sukwahi nga ideya. Hinunoa, kini nagpalapad ug nagdugang ug bag-ong ideya. Ang Salmo 19:7-9 maoy usa ka pananglitan niini:

Ang balaod ni Jehova hingpit,

nga nagapahiuli sa kalag.

Ang pahinumdom ni Jehova kasaligan,

nga nagahimo nga maalamon sa walay kasinatian.

Matikdi nga ang ideya gikompleto sa ikaduhang bahin sa matag tudling-pulong o hugpong sa mga pulong; busa, ang tibuok bersikulo maoy resulta sa paghugpong sa duha ka elemento. Diha lamang sa ikaduhang katunga sa mga laray, sama sa “nga nagapahiuli sa kalag” ug sa “nga nagahimo nga maalamon sa walay kasinatian,” nga mahibalo ang magbabasa kon nganong ang ‘balaod hingpit’ ug kon nganong ang “pahinumdom ni Jehova kasaligan.”