BET-EZEL

Usa ka lungsod, dayag nga nahimutang sa Juda, nga gihisgotan lamang diha sa tagna ni Miqueas bahin sa katalagman nga tinong modangat sa dili-matinumanong Samaria ug Jerusalem. (Miq 1:11) Niining bahina sa tagna, ang manalagna sublisubling migamit ug mga pulong nga kaamgid ug tunog ug may kaatbang nga kahulogan sa mga ngalan sa ubay-ubayng mga lungsod, mao nga sa pagkatinuod siya miingon: “Didto sa balay sa Apra [lagmit nagkahulogang “Abog”] ligid sa abog. Agi, Oh babayeng molupyo sa Sapir [nagkahulogang “Maanindot; Pinasinaw; Kahimut-anan”], diha sa makauulawng pagkahubo. Ang babayeng molupyo sa Zaanan wala mogula. Ang pagminatay sa Bet-ezel [nagkahulogang “Balay sa Duol (Tupad)”] mokuha gikan kaninyo sa nahimutangan niini.

Bisag pangagpas lamang ang gituohang nahimutangan niini, gihunahuna nga ang Bet-ezel nahimutang sa dapit sa presenteng-adlaw nga Deir el-ʽAsal, mga 16 km (10 mi) sa KHK sa Hebron.