Mopatim-aw nga niadtong mga 278-277 W.K.P. ang daghang Indo-Uropanhong katawhan nga nailhang mga Celt, o Galli, gikan sa Gaul, kinsa gitawag sa mga Grego nga Ga·laʹtai (mao nga ang rehiyon gitawag niining ngalana), mibalhin tabok sa Bosporus ug nanimuyo niining dapita. Giuban nila ang ilang mga asawa ug mga anak ug tingali gilikayan ang pagpakigminyo uban sa mga tawo nga nanimuyo na didto, niining paagiha napatunhay ang ilang rasanhong kinaiyahan latas sa kasiglohan. Ang ilang kataposang hari nga si Amyntas namatay niadtong 25 W.K.P., ug kadto maoy sa panahon sa iyang pagmando ingong hari nga kontrolado sa Imperyo sa Roma ug nga human niadto ang dapit nga gitawag ug Galacia gipadako nga nagsakop sa mga bahin sa Licaonia, Pisidia, Paphlagonia, Ponto, ug Frigia. Kining gipadak-an na nga Galacia mao ang giduaw ni apostol Pablo ug sa ubang nagasangyaw nga mga Kristohanon sa unang siglo K.P. ug didto ilang nakaplagan ang mga tawo nga gustong maorganisar ingong Kristohanong mga kongregasyon.​—Buh 18:23; 1Co 16:1.

Si Pablo ug Pedro nagpadalag mga sulat ngadto sa Kristohanong mga kongregasyon nga nahimutang sa lalawigan sa Galacia. (Gal 1:​1, 2; 1Pe 1:1) Wala hisgoti kon mao usab kini ang mga kongregasyon nga gitukod ni Pablo ug Bernabe. Niana nga panaw agi sa Galacia, si Pablo ug Bernabe miduaw sa mga siyudad sa Galacia sama sa Antioquia sa Pisidia, Iconio, Listra, ug Derbe (Buh 13:​14, 51; 14:​1, 5, 6), ug sa dihang sila mibalik ngadto sa mga igsoon sa Antioquia sa Sirya ilang giasoy kon sa unsang paagi niining mga dapita ug sa ubang mga dapit ‘gibuksan sa Diyos ngadto sa kanasoran ang pultahan sa pagtuo.’ (Buh 14:27)

Kang Kinsa Gipadala. Dugay nang gilalisan kon unsa nga mga kongregasyon ang lakip sa “mga kongregasyon sa Galacia” (Gal 1:2) nga gipadad-an sa sulat. Sa pagpaluyo sa pangatarongan nga kini maoy wala-nganli nga mga kongregasyon sa amihanang bahin sa lalawigan sa Galacia, giingon nga ang katawhan nga nagpuyo niining dapita maoy etniko nga mga taga-Galacia, samtang kadtong didto sa H maoy dili. Apan, sagad nga gigamit ni Pablo diha sa iyang mga sinulat ang opisyal nga Romanhong mga ngalan sa mga lalawigan, ug ang lalawigan sa Galacia sa iyang panahon naglakip sa habagatang Licaonianhon nga mga siyudad sa Iconio, Listra, ug Derbe ingon man sa siyudad sa Antioquia sa Pisidia. Sa tanan niini nga mga siyudad giorganisar ni Pablo ang Kristohanong mga kongregasyon sa iyang unang panaw sa pag-ebanghelyo sa dihang siya gikuyogan ni Bernabe. Ang mga kongregasyon sa mga siyudad sa Iconio, Listra, Derbe, ug Antioquia sa Pisidia mao gayod ang gipadad-an niini nga sulat, tungod kay gihisgotan niini nga sulat si Bernabe, usa nga dayag nga nailhan niadtong gisulatan ni Pablo. (2:​1, 9, 13) Walay timailhan sa ubang teksto sa Kasulatan nga si Bernabe nailhan sa mga Kristohanon sa amihanang bahin sa Galacia o nga si Pablo mihimog mga panaw latas sa maong teritoryo.

Ang gipatugbaw ni Pablo nga, “Oh walay salabotan nga mga taga-Galacia,” wala magpamatuod nga siya nagtumong lamang sa usa ka etnikong katawhan nga naggikan sa kaliwat nga Gallic sa amihanang bahin sa Galacia. (Gal 3:1) Hinunoa, si Pablo nagbadlong sa pipila diha sa mga kongregasyon didto tungod kay sila mitugot nga maimpluwensiyahan sa mga magtutuo sa Judaismo sa ilang taliwala, mga Hudiyo nga misulay sa pag-establisar sa ilang kaugalingong pagkamatarong pinaagi sa Moisesnong kahikayan puli sa ‘pagkamatarong tungod sa pagtuo’ nga gitagana sa bag-ong pakigsaad. (2:15–​3:14; 4:​9, 10) Labot sa rasa, ang “mga kongregasyon sa Galacia” (1:2) nga gisulatan ni Pablo maoy nagkasagol nga mga Hudiyo ug mga dili-Hudiyo, ug ang naulahi maoy tinuli nga mga kinabig ug dili-tinuli nga mga Hentil, ug walay duhaduha nga ang pipila maoy gikan sa kaliwat nga Celtic. (Buh 13:​14, 43; 16:1; Gal 5:2) Silang tanan sa katibuk-an, gitawag nga mga Kristohanon sa Galacia tungod kay ang dapit nga ilang gipuy-an gitawag man ug Galacia. Ang katibuk-ang diwa sa sulat nagpakita nga si Pablo nagsulat ngadto sa mga nailhan na niya pag-ayo sa habagatang bahin niini nga Romanhong lalawigan, dili ngadto sa mga dili gayod niya kaila nga nagpuyo sa amihanang bahin, nga dayag wala gayod niya maduaw.