Ipakita ang Personal nga Interes—Pinaagi sa Pagkamaluloton
1 Nga naghinumdom sa unang higayon nga iyang nahimamat ang usa sa mga Saksi ni Jehova, usa ka babaye nga mapihigon batok sa mga Saksi miingon: “Wala na ako makahinumdom kon unsay among giestoryahan, apan nahinumdom ako sa iyang pagkamaluloton kaayo kanako ug kon unsa siya kamaabiabihon ug kamapaubsanon. Nadani gayod ako kaniya.” Kining mga komentoha nagpasiugda sa kahinungdanon sa pagpakitag sinserong personal nga interes sa atong ginasangyawan.—Filip. 2:4.
2 Ang Gugma Maluloton: Ang usa ka paagi nga atong ikapakita ang gugma ngadto sa uban maoy pinaagi sa pagkamaluloton. (1 Cor. 13:4) Ang usa ka tawong maluloton interesado gayod sa kaayohan sa uban ug maningkamot sa paghimog mapuslanong mga butang alang kanila. Siyempre, ang buluhatong pagsangyaw mismo maoy usa ka buhat sa kalulot. Apan ang atong tiunayng kahingawa alang sa mga tawo ikapakita dili lang pinaagi sa pagsangyaw kanila. Ang atong tibuok paagi sa pagpakiglabot sa mga tawo—ang atong pagkamahigalaon, ang atong maayong pamatasan, ang paagi sa atong pagpatalinghog, ang mga butang nga atong isulti ug kon giunsa nato pagsulti kana, bisan ang atong tinan-awan sa dihang makig-estorya sa tagbalay—magbutyag nga kita nahingawa gayod kanila.—Mat. 8:2, 3.
3 Ang mahigugmaong kahingawa alang sa mga tawo magtukmod usab kanato sa pagtabang diha sa praktikal nga mga paagi. Samtang namalaybalay, usa ka payunir nga brader ang gipapahawa dayon sa usa ka edarang biyuda sa dihang iyang nahibaloan nga usa diay siya ka Saksi. Matod sa babaye nga didto siya sa kosina nga nag-ilis ug bombilya ug nagtungtong sa usa ka hagdan sa dihang ang brader mitimbre sa pultahan. “Peligro baya kon ikaw-ikaw ray mohimo niana,” matod sa brader. Gipadayon niya ang brader. Giilisan sa brader ang bombilya ug dayon mibiya. Taudtaod, sa dihang mihapit ang anak nga lalaki sa maong biyuda aron sa pagsusi kon maayo ra ba ang iyang kahimtang, iyang gisultihan siya sa nahitabo. Nakadayeg kaayo ang iyang anak mao nga gipangita niini ang brader aron pasalamatan. Mitultol kini ngadto sa maayong panaghisgot, ug ang maong anak midawat ug pagtuon sa Bibliya.
4 Pinaagi sa pagkamaluloton, atong gisumbalik-silaw ang gugma ni Jehova alang sa mga tawo ug atong gidayandayanan ang mensahe sa Gingharian. Busa, hinaot magpadayon kita sa ‘pagrekomendar sa atong kaugalingon ingong malulotong mga ministro sa Diyos.’—2 Cor. 6:4, 6.