Pag-alagad Uban sa Usa ka Grupo nga Adunay Talagsaong Pinulongan sa Korea
ANG usa ka madasigon kaayo apan hilom nga grupo nagkatigom alang sa usa ka distritong kombensiyon sa mga Saksi ni Jehova sa ting-init niadtong 1997. Kadto ang unang kombensiyon niining matanga didto sa Korea alang sa mga bungol. May kinatas-ang ihap nga tumatambong nga 1,174. Ang tibuok programa—lakip ang mga pakigpulong, mga interbiyo, ug usa ka drama—gipresentar sa Korean Sign Language ug gisalida diha sa dakong telon nga makita sa tibuok Assembly Hall. Kadto mao ang tayuktok sa daghang tuig nga paghago sa ubay-ubayng mga boluntaryo.
Moabot ang panahon diha sa usa ka yutan-ong paraiso nga “ang igdulungog sa mga bungol mabuksan.” (Isaias 35:5) Aron matagamtam ang kinabuhi sa maong Paraiso, ang tanan, lakip ang mga bungol, kinahanglang makasulod una sa espirituwal nga paraiso, ang malamboong espirituwal nga kahimtang sa gipanalanginan-sa-Diyos nga katawhan. Sila kinahanglang mahimong dedikado, bawtismadong mga Saksi ni Jehova, nga iyang ginatudloan.—Miqueas 4:1-4.
Gamay nga Sinugdanan
Bisan tuod dihay gihimong pagsangyaw alang sa mga bungol sa katuigang 1960, sa katuigang 1970 lamang nga ang pipila kanila misugod sa pagtambong sa mga tigom sa mga Saksi ni Jehova sa Seoul, ang kaulohang siyudad sa Korea. Ang usa ka Kristohanong igsoong lalaki nga paspas mosulat naggamit ug pisara aron isulat ang pangunang mga punto sa mga pakigpulong, lakip ang gigamit nga mga teksto sa Bibliya.
Sa 1971 sa siyudad sa Taejon, usa ka Saksi nga may anak lalaki nga bungol misugod pagtudlo kaniya ug sa iyang bungol nga mga higala bahin sa mensahe sa Gingharian. Gikan ning maong grupo mitungha ang masibotong mga indibiduwal nga karon nag-alagad ingong haligi diha sa kanataran nga naggamit ug senyas nga pinulongan.—Zacarias 4:10.
Mga Batan-on Nagtanyag sa Ilang Kaugalingon nga Kinabubut-on
Aron ang mga bungol makabatog kahibalo bahin kang Jehova ug kang Jesus ug makasubay sa dalan sa kinabuhi, kinahanglang himoon ang dakong paningkamot pinaagig laing mga boluntaryo. (Juan 17:3) Aron mahimo kini, daghang Saksi ni Jehova ang nagtuon ug senyas nga pinulongan ug nakabatog makapadasig nga mga kasinatian.
Usa ka 15 anyos, si Park In-sun, naninguha sa pagtuon ug senyas nga pinulongan. Aron mahimo kana, siya nagpraktis diha sa usa ka pabrika nga may grupo sa 20 ka bungol nga nagtrabaho didto. Sulod sa walo ka bulan siya suod nga nagtrabaho uban kanila aron iyang makat-onan ang ilang sinenyasan ug ang dagan sa ilang hunahuna. Pagkasunod tuig, nahimo siyang regular payunir, o bug-os-panahong magmamantala sa Gingharian, ug nag-alagad uban sa mga bungol nga interesado sa kamatuoran sa Bibliya. Kusog kaayong midako ang grupo, ug sa wala madugay kapin sa 35 ang nagtambong sa mga tigom ma-Dominggo.—Salmo 110:3.
Human niana, sa unang higayon sa Seoul, ang Kristohanong mga tigom gihikay nga himoon lamang gayod sa senyas nga pinulongan. Si Brader Park In-sun nag-alagad ingong espesyal payunir niining mauswagong grupo. Hanas na siya karon sa pagsenyas. Sulod sa pipila ka bulan, siya nagdumalag 28 ka pagtuon sa Bibliya uban sa mga bungol. Daghan kanila miuswag ug nahimong mga Saksi ni Jehova.
Ingong resulta niining aktibo kaayong pagboluntaryo, ang unang senyas-ug-pinulongan nga kongregasyon sa Seoul natukod niadtong Oktubre 1976, nga may 40 ka magmamantala ug 2 ka regular payunir. Nakapadasig kadto sa maong buluhaton diha sa ubang mga siyudad sa Korea. Daghang bungol ang gigutom sa maayong balita ug naghulat lang nga maduaw.
Pag-alagad Taliwala sa mga Bungol
Naghunahuna ka tingali kon giunsa pagkaplag ang mga bungol. Daghan kanila nakontak pinaagi sa pagpailaila ngadto sa laing mga bungol. Ang mga tag-iyag tindahan sa bugas giduol usab, ug ilang gihatag ang mga ngalan ug mga adres sa mga bungol. Ang pipila ka opisina sa kagamhanan mitabang sa pagtagana sa maong impormasyon. Malamposon kaayo ang pagkobre sa teritoryo nga gipuy-an sa mga bungol nga, ngadtongadto, naporma ang upat ka senyas-ug-pinulongan nga mga kongregasyon. Daghang Kristohanong mga batan-on ang nadasig sa pagtuon ug senyas nga pinulongan.
Ang espesyal payunir nga mga ministro nga nakakat-on pagsenyas gitudlo sa sangang buhatan sa mga Saksi ni Jehova sa pag-alagad sa maong mga kongregasyon. Di pa dugay, ang mga migraduwar sa Ministerial Training School naasayn ning maong mga kongregasyon ug nakapalig-on kanila sa espirituwal.
Dunay mga kalisdanan nga angayng buntogon. Ang pagtabang ning maong teritoryo nanginahanglan nga maningkamot ka pag-ayo nga masabtan ang kultura sa mga bungol. Pintok kaayo ang ilang panghunahuna ug linihokan. Usahay makapikal kini sa mga tawo ug mosangpot sa di-pagsinabtanay. Dugang pa, sa dihang ang mga Saksi magdumalag mga pagtuon sa Bibliya sa balay uban sa mga bungol, kinahanglang tabangan sila nga mahanas sa ilang sinenyasan ug dasigon sila sa pagpauswag sa ilang programa sa pagbasa ug pagtuon.
Sa ilang adlaw-adlaw nga mga buluhaton, ang mga bungol masugamak sa mga kalisdanan nga kasagarang wala mahibaloi sa uban. Ang pagduol sa mga opisina sa kagamhanan ug mga pasilidad sa maayong panglawas, maingon man ang yanong mga transaksiyon sa negosyo, sagad mahimong dakong mga problema alang kanila. Tungod kay ang mga Saksi gikan sa kanait nga mga kongregasyon naghatag ug mahigugmaong tabang, ang mga bungol nakasinatig tinuod nga panag-igsoonay diha sa Kristohanong kongregasyon.—Juan 13:34, 35.
Di-Pormal nga Pagsangyaw Namunga
Didto sa Pusan, ang dakong dunggoanang siyudad sa habagatan sa Korea, nahimamat sa usa ka Saksi ang duha ka bungol nga misulat diha sa usa ka pirasong papel: “Gusto kami ug Paraiso. Buot kaming mahibalo sa mga kasulatan nga naghisgot bahin sa kinabuhing walay kataposan.” Gisulat sa igsoon ang ilang adres ug naghikay sa pagduaw kanila. Sa iyang pagduaw, iyang nakaplagan ang usa ka lawak nga napuno sa mga bungol nga naghulat aron makakat-on sa mensahe sa Gingharian. Ang maong kasinatian nagtukmod niya sa pagtuon ug senyas nga pinulongan. Sa wala madugay natukod ang senyas-ug-pinulongan nga kongregasyon sa Pusan.
Usa ka igsoon sa maong kongregasyon nakamatikod sa duha ka bungol nga nagsinenyasay ug giduol sila. Sa pagkahibalo nga mao pay ilang pagtambong sa usa ka relihiyosong tigom, iyang gidapit sila ngadto sa Kingdom Hall sa alas dos sa hapon sa maong adlaw. Sila miabot, ug nasugdan ang pagtuon sa Bibliya. Wala madugay human niadto, ang 2 mitambong sa distritong kombensiyon uban sa laing 20 ka bungol nga ilang mga higala. Gikan sa maong grupo, daghan ang nagpahinungod sa ilang kinabuhi kang Jehova. Duha ang nahimong mga ansiyano ug usa ang ministeryal nga alagad sa senyas-ug-pinulongan nga mga kongregasyon.
Determinasyon Gigantihan
Sanglit ang ubang mga bungol layolayog gipuy-an gikan sa bisan haing senyas-ug-pinulongan nga kongregasyon, ang dakong paningkamot ug determinasyon gikinahanglan kanunay aron matagan-an sila ug regular nga espirituwal nga pagkaon gikan sa Bibliya. Pananglitan, ang panginabuhi sa usa ka 31 anyos nga lalaki mao ang pagpanagat didto sa usa ka isla. Nakadungog siya sa mensahe sa Bibliya gikan sa iyang manghod nga lalaki, nga nasangyawan sa mga Saksi ni Jehova. Sa paningkamot nga matagbaw ang iyang espirituwal nga kagutom, ang bungol nga mananagat nanakayan ug napulog-unom ka kilometros padulong sa Tongyoung City, sa habagatang baybayon sa Korea. Gihimo niya kadto aron mahimamat ang usa ka espesyal nga payunir gikan sa kongregasyon sa senyas nga pinulongan sa Masan City. Kada Lunes, kining espesyal payunir mopanaw ug 65 kilometros aron tun-an sa Bibliya ang bungol nga mananagat.
Aron makatambong sa tigom ma-Dominggo sa Masan City, ang bungol nga estudyante sa Bibliya kinahanglang manakayan ug 16 kilometros ug dayon mosakay ug bus sa lain pang 65 kilometros. Namunga ang iyang determinasyon. Sa pipila ka bulan, miuswag ang iyang pagsenyas, siya nakakat-on ug dugang Koreano nga alpabeto, ug—labing hinungdanon—nakakat-on sa bugtong paagi sa pagbaton ug relasyon kang Jehova. Kay nakasabot sa kahinungdanon sa mga tigom ug regular nga pagsangyaw, siya mibalhin ngadto sa teritoryo sa kongregasyon sa senyas nga pinulongan. Dali ra ba ang pagbuhat niadto? Dili. Kinahanglang mohunong siya sa pagpanagat diin siya makasapi ug mga $3,800 dolyares kada bulan, apan ang iyang determinasyon gigantihan. Human motubo diha sa kamatuoran, siya nabawtismohan ug karon malipayong nag-alagad kang Jehova uban sa iyang pamilya.
Paghubad Alang sa mga Bungol
Ang maayong balita sa Gingharian sagad ipasa nga binaba. Apan, aron ikapasa nga mas tukma ang mensahe gikan sa Pulong sa Diyos, hinungdanon nga ang pagtulon-an sa Bibliya ipresentar diha sa mas permanenteng porma. Busa, sa unang siglo, ang mga basahon ug mga sulat gisulat sa eksperyensiyadong mga ansiyano. (Buhat 15:22-31; Efeso 3:4; Colosas 1:2; 4:16) Sa atong panahon, ang dagayang espirituwal nga pagkaon gitagana pinaagig mga basahon ug ubang Kristohanong mga publikasyon. Kini gihubad ngadto sa ginatos ka pinulongan, lakip ang nagkalainlaing senyas nga pinulongan. Aron mahimo kini diha sa Korean Sign Language, ang sangang buhatan adunay departamento sa paghubad sa senyas nga pinulongan. Ang departamento sa video maoy mogama sa mga video sa senyas nga pinulongan. Kini motaganag espirituwal nga abiyo alang sa bungol nga mga magwawali sa maayong balita ug mga interesado diha sa mga kongregasyon sa tibuok Korea.
Bisan tuod daghan ang nahanas sa pagsenyas ug nakatabang sa paggamag mga video, sagad nga ang hawod nga mga maghuhubad mao ang mga anak sa bungol nga mga ginikanan. Nakakat-on na sila pagsenyas gikan pa sa pagkamasuso. Kini sila mosenyas nga tukma ug mohatag usab ug kinasingkasing nga kahulogan ug pagpasiugda sa mensahe pinaagi sa ilang pagkompas ug mga ekspresyon sa nawong, busa ilang matukbil ang hunahuna ug kasingkasing.
Sama sa nahisgotan na, ang mga kombensiyon ug mga asembliya sa senyas nga pinulongan ginahimo na karon nga regular sa Korea. Dakong trabaho, gasto, ug paningkamot ang gikinahanglan sa pagpalampos niini. Bisan pa niana, kadtong nanambong mapasalamaton ning maong kahikayan. Inigkahuman ning maong mga tigom, daghan ang magpabilin nga buot pang ipadayon ang makapalig-ong panag-ubanay ug panaghisgot sa maayong espirituwal nga pagkaon nga gitagana. Dayag, ang pag-alagad uban niining grupoha adunay mga suliran, apan ang espirituwal nga mga panalangin maoy nakapahimo niini nga mapuslanon kaayo.
[Hulagway sa panid 10]
Mga video sa senyas nga pinulongan gigama sa Korea: “Unsay Gikinahanglan sa Diyos Kanato?,” “Pagpabili sa Atong Espirituwal nga Panulondon,” “Pasidaan nga mga Panig-ingnan Alang sa Atong Adlaw,” ug “Pagtahod sa Awtoridad ni Jehova”
[Mga hulagway sa panid 10]
Nunot-sa-relo gikan sa ubos: Video sa senyas nga pinulongan nga gigama sa sangang buhatan sa Korea; pag-andam ug mga senyas alang sa teokratikanhong mga termino; tem sa paghubad sa senyas nga pinulongan; pagmostra alang sa tigsenyas panahon sa paggama ug video