Ang Tawhanong mga Kagamhanan Makahanaw ba sa Kakabos?
ANG milyonmilyong tawo nagdako nga wala makaagig kakabos. Wala gayod sila mangatulog nga gigutom o nangatulog nga nagkurog sa katugnaw. Bisan pa niana, daghan kanila nahangawa sa mga kabos ug naningkamot pag-ayo nga makatabang kanila.
Ugaling lang, ang kakabos maoy mapait gihapon nga kasinatian sa katawhan nga gihasi sa giyera sibil, mga baha, mga hulaw, ug sa ubang mga suliran. Kining mga butanga mao ang daotang kasinatian sa kakha-tuka lang nga mga mag-uuma sa Aprika. Ang pipila napugos sa pagbiya sa ilang mga balay ug namalhin sa dagkong mga siyudad o namuyo ingong mga kagiw diha sa usa ka bag-ong nasod. Ang ubang mga tagabalangay namalhin sa mga siyudad kay sila nahaylo sa gilaoman nga mas maayong kinabuhi.
Ang huot nga mga siyudad sagad mahimong mga sanayanan sa mga kabos. Adunay gamay kaayong luna, kon aduna man, nga katamnan. Kasagaran lisod mangitag trabaho. Kay bug-os nawad-ag paglaom, ang daghan mahimong mga kriminal. Ang mga nagpuyo sa siyudad mangayog hinabang, apan ang tawhanong mga gobyerno dili makasulbad sa nagkagrabeng kakabos. Nga naghisgot sa usa ka taho sa Hiniusang Kanasoran nga giluwatan niadtong Nobyembre 2003, ang The Independent sa London nag-ingon: “Nagkadaghan ang katawhan nga gigutom sa kalibotan.” Kini dugang miingon: “Sa tibuok kalibotan, gikalkulo nga 842 ka milyong tawo ang kulang ug sustansiya karong adlawa—ug nagtubo ang gidaghanon, tungod sa dugang 5 ka milyong katawhan nga gigutom kada tuig.”
Ang sangang buhatan sa mga Saksi ni Jehova sa Habagatang Aprika makadawat usahay ug mga sulat gikan sa mga kabos. Pananglitan, usa ka lalaki nga taga-Bloemfontein misulat: “Wala koy trabaho ug kon makahigayon, mangawat ako sa siyudad. Kon dili ako mangawat, gutomon kami sulod sa daghang adlaw—wala pay labot ang grabeng katugnaw. Wala gayoy makitang trabaho. Daghan ang naglaroylaroy sa kadalanan nga nangitag trabaho ug pagkaon. Akong nahibaloan nga ang uban mangukay sa mga basurahan aron mangitag pagkaon. Ang pipila maghikog pa. Daghan nga sama kanako masulub-on kaayo ug nawad-ag paglaom. Maorag wala nay paglaom sa unahan. Wala ba kini makita sa Diyos, nga naglalang kanato uban ang panginahanglan nga mokaon ug magbesti sa atong kaugalingon?”
Adunay makapahupayng mga tubag sa mga kabalaka niining tawhana. Sumala sa ipakita sa sunod artikulo, makaplagan ang maong mga tubag diha sa mga panid sa Pulong sa Diyos, ang Bibliya.