SEBRA

[Heb., peʹreʼ].

Usa ka hayop nga pamilya sa kabayo nga ang hitsura ug mga kinaiya kaamgid sa ihalas nga asno, apan kini daling mailhan gikan sa asno tungod sa dagtom o itom nga mga budlis niini. Ang mga budlis nagsilbing takoban sa hitsura sa sebra nga tungod niana bisan ang mga tawong lumad nga igmat ug mata sagad dili makamatikod sa ilang presensiya sa gilay-ong 40 o 50 m lamang (130 o 160 p). Ang hait nga panan-aw ug maayong panimaho sa sebra, maingon man ang iyang katulin nga modagan, nagsilbing usa ka proteksiyon batok sa kumakaon ug karne nga mga mananap. Gikataho nga kini nga hayop makadagan ug 64 km/oras (40 mko) sa iyang unang pagsutoy. Dugang pa, ang mga kuko ug mga ngipon niini maoy epektibong mga hinagiban sa pagdepensa.

Ang sebra maoy usa ka ihalas nga hayop nga lisod mansohon. (Job 24:5; 39:5; Isa 32:14) Ang mga sebra kasagaran manibsib sa mga balili. (Job 6:5; Jer 14:6) Sila kanunayng magatagbaw sa ilang kauhaw (Sal 104:11) ug panagsa rang mopalayo ug kapin sa 8 km (5 mi) gikan sa tubig.

Ang kagahian sa mga sebra ug ang kahigal kaayo sa baye kon mangulag gigamit sa pag-ilustrar sa pagkaindependente ug pagkamananapaw sa sukihan nga Israel. (Jer 2:24; Os 8:9) Ang manulonda ni Jehova nagtagna nga ang anak nga lalaki ni Abraham nga si Ismael mahimong “usa ka tawo nga samag sebra.” Lagmit nagtumong kini sa usa ka mabangis ug independenteng tinamdan, ingon sa gipasabot sa mga pulong: “Ang iyang kamot mahimong batok sa matag usa.”​—Gen 16:12.

Ang “onager” ug “ihalas nga asno” maoy laing tukma nga mga hubad sa Hebreohanong pulong nga peʹreʼ.​—Job 6:​5, ftn sa Rbi8.