Mga Pangutana Gikan sa mga Magbabasa

◼ Gisugo ang katawhan sa Diyos sa ‘pag-atiman niadtong mga iya,’ busa nganong gipalayas man ni Abraham si Hagar ug Ishmael ngadto sa kamingawan?

Mahigugmaon ug sibo alang sa mga alagad sa Diyos sa pag-atiman alang sa panginahanglan sa mga sakop sa pamilya. Mahitungod sa Kristohanong mga ginikanan, si apostol Pablo misulat: “Sa pagkatinuod kon adunay tawo nga dili motagana alang niadtong mga iya, ug ilabina alang sa mga sakop sa iyang kaugalingong banay, kini siya nagalimod sa iyang pagtuo ug labi pa siyang daotan kay sa tawong walay pagtuo.”—1 Timoteo 5:8.

Makatino kita nga ang dalan ni Abraham dili supak sa espiritu sa maong diyosnong tambag, kay siya gihimo ingong pananglitan sa tinuod nga pagtuo, sa pagkahimong “higala ni Jehova.”—Santiago 2:23; Hebreohanon 11:8-19.

Ang Diyos nagsaad sa pagpanalangin pinaagi sa binhi ni Abraham, o manunonod. Dihang natigulang na si Sarah ug wala gihapon manganak, iyang giawhag si Abraham sa paghatag kaniyag anak nga lalaki pinaagi sa iyang ulipong Ehiptohanon nga si Hagar. Sa ulahi, dihang nagsabak si Hagar, misugod siya sa pagbiaybiay kang Sarah nga mahimong ikahubit kini nga “kabangisan,” o may daotang tuyo batok sa minahal nga asawa ni Abraham. (Exodo 23:1; 2 Samuel 22:49; Salmo 11:5) Gitugotan ni Abraham si Sarah sa pagbadlong kang Hagar, nga niini mikalagiw si Hagar ngadto sa kamingawan, tingali mipaingon balik sa Ehipto. Ang asoy wala mag-ingon nga nagdala siyag mga pagkaon, busa nahibalo tingali siya nga makabaton ra siyag pagkaon ug tubig sa ubang mga kampamento, sama nianang gikan sa mga grupo sa Bedouin.—Genesis 12:1-3, 7; 16:1-6.

Nangilabot ang manulonda ug gisultihan si Hagar nga siya kinahanglang mobalik, nga makabaton siya ug daghang mga kaliwat, ug nga ang iyang anak nga si Ishmael ‘magabatok sa tanan.’ (Genesis 16:7-12) Sa milabay ang pila ka tuig, napamatud-an si Ishmael nga nagabatok sa batan-ong Isaac, ang tinuod nga manununod ni Abraham nga natawo kang Sarah. Misugod si Ishmael sa ‘pagyubit,’ o sa pag-abuso, kang Isaac. Dili kini kay yanong panag-away lamang sa mga managsoon. Gipadayag kini sa Pulong sa Diyos ingong “paglutos” sa gitagna sa Diyos nga binhi ni Abraham. Busa angay ang malig-ong aksiyon.—Genesis 21:1-9; Galacia 4:29-31.

Gisultihan ni Jehova si Abraham sa pagpamati sa baroganan ni sa iyang asawa kon unsay angay himoon, sa ‘pagpapahawa kang Hagar ug sa iyang anak.’ Bisag naguol si Abraham sa pagpalakaw kang Hagar uban sa iyang anak, gihatagan gihapon sila ni Abraham ug materyal nga mga tagana. Lahi sa miagi dihang miadto si Hagar sa kamingawan, niining panahona siya migikan nga may taganang tinapay (tingali nagpasabot sa nagkalainlaing mga pagkaon) ug tubig—nga gitagana ni Abraham. Siya nasaag “sa kamingawan sa Beer-sheba,” ug nahurot ang iyang mga pagkaon sa wala pa siya makakitag usa sa mga atabay sa maong lugar. Apan dili ikapasangil kang Abraham ang nahitabo kaniya, kay iyang ‘gitagan-an kadtong mga iya,’ bisan sa dili-maayong paggawi nga maoy hinungdan sa ilang pagpahawa gikan sa panimalay.—Genesis 21:10-21.

[Mapa/Hulagway sa panid 31]

(Alang sa bug-os nga pagkahan-ay sa teksto, tan-awa ang publikasyon)

Dakong Dagat

Bukid Carmelo

Megiddo

Jerusalem

Hebron

Beer-sheba

Patayng Dagat

Negeb

[Credit Line]

Gibase sa mapa nga copyright sa Pictorial Archive

(Near Eastern History) Est. and Survey of Israel

[Hulagway]

Wadi Zin, ugang suba nga walog sa habagatan sa Beer-sheba