“Sama sa mga Bituon sa mga Langit”
“AKO gayong padaghanon ang imong binhi sama sa mga bituon sa mga langit ug sama sa balas nga anaa sa baybayon.” (Genesis 22:17) Kana ang saad sa Diyos ngadto sa patriarkang si Abraham. Hinuon, ang usa ka bag-ong isyu sa basahong Bible Review mipunting sa daw problema niining tekstoha.
Ang Bibliya sa siyentipikanhon husto sa pagtandi sa gidaghanon sa mga bituon sa mga langit ngadto sa binilyong lugas sa balas sa baybayon. Ugaling, nga ang mga bituon moabot sa binilyon lagmit wala hisayri sa karaang mga panahon. Nagsaysay ang Bible Review: “Sa pagkamatuod walay ingon ka daghang bituon sa langit nga makita sa mata nga walay tabang. Ang mga astronomo nagasugid kanato nga kon wala ang usa ka matang sa teleskopyo, kita makakita lamag tali sa 2,000 ug 4,000 ka bituon, bisan pa sa tin-aw nga langit sa gabii.” Ang The World Book Encyclopedia nagaingon nga “duolag 6,000 ka bituon nagadan-ag nga igo nga makita nga walay teleskopyo.”
Nan, sa unsang paagi igapatin-aw ang talagsaong katukma sa Bibliya sa paghimo niining pagtandia? Usa ka katin-awan mao nga ang Bibliya “maoy gidasig sa Diyos.” (2 Timoteo 3:16) Hinuon, ang artikulo diha sa Bible Review naghimo sa dili kasagarang buhat aron sa pagsupak niining konklusyona pinaagi sa pagsugyot nga tingali si Abraham usa ka astronomo! Kining talagsaong pagbanabana gisundan sa pangutana: “Mahimo bang ang mga karaang tawo may mga teleskopyo nga nagpadayag sa mga bituon nga dili makita sa natural nga mata?” Sa pagpaluyo sa maong teoriya, ang artikulo nagsitar ug ebidensiya nga ang mga kristal nga nadiskobrehan sa Nineve ug sa ubang karaang dapit mahimong nagsilbing kinaraang mga lente.
Bisan pa niana, walay ebidensiya nga migamit ang mga tawong karaan sa maong mga lente aron sa pagtan-aw sa bituon. Ug bisan pag naglungtad ang karaang mga teleskopyo, unsa ang ebidensiya nga mahimong gigamit kadto ni Abraham o sa magsusulat sa Genesis? Sa pagkamatuod, ang saad sa Diyos kang Abraham maoy usa lamang sa daghang panig-ingnan sa siyentipikanhong katukma sa Bibliya. Lagmit nga wala tabangi sa teleskopyo nga ang propeta Jeremias nagtaho sa susamang tukmang pahayag: ‘Ang panon sa kalangitan dili maihap, ni masukod ang balas sa dagat.’—Jeremias 33:22.
[Tinubdan sa Letrato sa panid 25]
Mga letrato sa NASA