Ang Pag-abli sa Dalang Balik sa Paraiso

“Si [Jesus] miingon kaniya: ‘Sa pagkamatuod ako magaingon kanimo karong adlawa, Ikaw magauban kanako sa Paraiso,’”—LUCAS 23:43.

1, 2. (a) Unsay kahulogan sa “paraiso,” ug sama sa unsa kaha ang tanaman sa Eden? (b) Sa unsang paagi ang Hebreohanong pulong “tanaman” gihubad diha sa Kristohanon Gregong Kasulatan?

ANG tawhanong pamilya nagsugod sa Paraiso. Mahitungod sa paglalang sa tawo, atong mabasa diha sa unang libro sa Balaang Kasulatan: “Giumol ni Jehova nga Diyos ang tawo gikan sa abog sa yuta ug gihuypan niya sa mga buho sa iyang ilong sa gininhawa sa kinabuhi, ug ang tawo nahimong kalag nga may kinabuhi. Ug si Jehova nga Diyos nagbuhat ug usa ka tanaman sa silangan sa Eden, ug gibutang niya didto ang tawo nga iyang giumol.” (Genesis 2:7, 8) Ang ngalang “Eden” nagkahulogang “Kalipay,” ug busa ang tanaman sa Eden maoy usa ka dako nga parke sa kalipay, nga dunay daghan ug nagkalainlaing matahom nga mga kinaiyahan.

² Ang pulong “paraiso” gikuha gikan sa Gregong pinulongan, ug niana nga pinulongan kini nagkahulogang samag-parke nga tanaman. Ang Gregong pulong nga gigamit sa paghubad sa Hebreohanong nobreng gan, nga nagkahulogan “tanaman,” mao ang pa·raʹdei·sos. Ang Kasulatan gikan sa Mateo ngadto sa Pinadayag gisulat sa Grego nga pinulongan, ug kining Gregong pulong mao ang gigamit sa pagsulat sa mga pulong ni Ginoong Jesu-Kristo sa nag-antos siya sa silot sa kamatayon diha sa kahoy sa pagsakit sa Kalbaryo sa Nisan 14 sa tuig 33 K.P.

Ang Saad ni Jesus nga Paraiso sa Usa ka Mamumuhat ug Daotan

3. (a) Unsay gipangutana sa mamumuhat ug daotan kang Jesus? (b) Ang hangyo sa mamumuhat ug daotan nagpakita ug unsa mahitungod sa iyang pagtuo kang Jesus?

³ Niadtong panahona, duha ka mamumuhat ug daotan ang gilansang tapad kang Jesus. Ang usa kanila mihunong sa pagbiaybiay kang Jesus nga maoy padayong gihimo sa ikaduhang kawatan nga gilansang sa pikas kiliran ni Jesus. Ang maluloy-on nga mamumuhat ug daotan miliso ug miingon: “Jesus, hinumdomi ako inig-abot mo sa imong gingharian,” busa nagpahayag sa pagtuo nga si Jesus, bisan pa nga gilansang tapad niya, nahalinya alang sa umaabot nga gingharian. (Lucas 23:42; Marcos 15:32) Seguradong nakatandog kaayo kana sa kasingkasing ni Ginoong Jesus! Kadtong mahigalaon nga kriminal nagtuo nga walay sala si Jesu-Kristo ug nga siya dili takos sa grabeng silot sama sa paglansang nga makauulaw sa katilingban. (Lucas 23:41) Iyang gipakita pinaagi sa iyang hangyo nga siya nagtuo nga si Jesus pagabanhawon gikan sa patay ug moadto sa gingharian. Ang mamumuhat ug daotan nagpakita usab ug pagtuo nga siya mismo makabaton ug pagkabanhaw ug nga si Jesus mao ang Usa nga motawag kaniya gikan sa patay ug paboran siya ug bag-o nga kinabuhi sa yuta.

4. Sa unsang paagi gitubag ni Jesus ang hangyo sa mamumuhat ug daotan, nga nagpaila ug unsa?

⁴ Sa dihang miingon si Jesus kaniya: “Sa pagkamatuod ako magaingon kanimo karong adlawa, Ikaw magauban kanako sa Paraiso,” iyang gipunting ang pagkabanhaw nianang maluloy-on nga mamumuhat ug daotan. Kana tino nga usa ka matuod nga kahupayan sa kriminal kinsa nagpakita ug pagtuo. Aron mabanhaw kadtong tawhana, kinahanglan unang banhawon si Jesus. Unya, gamiton ang iyang hinatag-sa-Diyos nga gahom sa pagkabanhaw, tawgon ug balik ni Jesus kining mamumuhat ug daotan gikan sa patay sa adlaw sa pagkabanhaw sa kalibotan sa katawhan.​—Lucas 23:43; Juan 5:28, 29; 1 Corinto 15:20, 23; Hebreohanon 9:15.

5, 6. (a) Unsay gipasulat ni Gobernador Poncio Pilato sa ulohan sa gilansang nga Jesus? (b) Unsa kahang pinulongan ang gigamit ni Jesus sa dihang nakigsulti sa mamumuhat ug daotan?

⁵ Sa unsang pinulongan nga gihatag ni Jesus kadtong saara? Daghang pinulongan ang gigamit didto niadtong panahona. Kini gipakita pinaagi sa mga pulong nga gipasulat ni Gobernador Poncio Pilato sa ulohan sa gilansang nga Jesu-Kristo, sa pagpaila kaniya alang sa tanang lumalabay aron mabasa. Ang asoy diha sa Juan 19:19, 20 nagaingon: “Si Pilato misulat usab ug titulo ug iyang gibutang kini sa kahoy sa pagsakit. Kini ang nahisulat: ‘Si Jesus nga taga-Nazaret ang Hari sa mga Hudiyo.’ Busa daghang Hudiyo ang nakabasa niining tituloha, tungod kay ang dapit diin didto si Jesus gilansang duol man sa siyudad; ug kadto gisulat sa Hebreohanon, sa Latin, ug Grego.”

⁶ Pinaagi sa iyang pagkatawo sa Bethlehem sa iyang ulay nga inahan, si Maria, si Jesus natawo nga usa ka Hudiyo, o Hebreohanon. Busa, sa iyang pagsangyaw sulod sa tulo ug tunga ka tuig sa yuta nga iyang natawhan, dayag nga nagsangyaw siya sa Hudiyohanong pinulongan nga gigamit, o Hebreohanon. Busa, sa mipahayag siya ug mapasaligong mga pulong sa maluloy-on nga mamumuhat ug daotan, malagmit Hebreohanon ang iyang gisulti. Seguro iyang gigamit ang Hebreohanong pulong gan sa dihang naghisgot ug Paraiso​—ang pulong nga makita sa Genesis 2:8. Ddito, ang bersiyon sa Greek Septuagint sa Balaang Kasulatan migamit sa pulong pa·raʹdei·sos sa naghubad sa orhinal nga pulong gan.

7. Sa unsang paagi nahimaya si Jesus sa dihang siya gibanhaw?

⁷ Si Jesus gibanhaw gikan sa patay sa ikatulong adlaw human sa paglansang kaniya, o sa Nisan 16 sa Hebreohanong kalendaryo. Kap-atan ka adlaw sa ulahi siya mibalik sa langit, sa iyang orihinal nga puloy-anan, nga karon lamang diha sa mas binahaw nga kahimtang. (Buhat 5:30, 31; Filipos 2:9) Siya karon gisul-oban sa imortalidad o pagkadili-mamatay, usa ka hiyas nga giambitan sa iyang langitnong Amahan. Si Jehova nga Diyos mao ang bugtong nga Taghupot sa imortalidad hangtod sa pagkabanhaw ni Jesus gikan sa patay niadto nga Dominggo, Nisan 16.​—Roma 6:9; 1 Timoteo 6:15, 16.

Ang Lukat Nag-abli sa Dalan

8. Unsa ang orihinal nga katuyoan ni Jehova mahitungod sa yuta, ug unsay nagpakita nga siya nagpabilin niana nga katuyoan?

⁸ Kining tanan maoy mga lakang sa katuyoan sa Diyos aron masul-oban ang tibuok yuta uban sa paraisonhon nga katahom, oo, aron mahimong globonhong paraiso. (Genesis 1:28; Isaias 55:10, 11) Diha sa 1 Corinto 15:45, si apostol Pablo naghisgot kang Jesus ingon nga mao “ang kataposang Adan.” Kini nagpaila nga ang Diyos nagpabilin sa iyang orihinal nga katuyoan maylabot sa yuta ug nga dunay usa nga motuman sa katuyoan nga napakyas ang unang Adan sa pagbuhat.

9. Unsay gitagana ni Jesus sa pag-abli sa dalang balik sa Paraiso?

⁹ Sumala kang Pablo, si Jesus mitagana ug “halad pasighiuli.” (1 Timoteo 2:6) Si Jesu-Kristo mismo miingon: “Maingon nga ang Anak sa tawo mianhi, dili aron siya pagaalagaron, kondili sa pag-alagad ug sa paghalad sa iyang kalag ingon nga lukat alang sa daghan.” Kini ang nagpaposible alang niadtong may pagtuo kang Jesu-Kristo aron makabaton ug kinabuhing dayon.​—Mateo 20:28; Juan 3:16.

10. (a) Unsay gitino sa Diyos maylabot sa usa ka limitado pinaboran nga mga tawo? (b) Kanus-a nagsugod ang pagpili sa “gamay nga panon,” ug pinaagi kang kinsa?

¹⁰ Sa dihang mikayab si Jesus sa langit human sa iyang pagkabanhaw gikan sa patay, siya makatanyag sa merito sa iyang halad lukat ngadto sa Diyos alang sa tawhanong panimalay. Apan, maoy katuyoan sa iyang langitnong Amahan, si Jehova nga Diyos, sa pagsagop gikan sa mga nasod sa yuta ug “usa ka katawhan alang sa iyang ngalan.” (Buhat 15:14) Sumala sa Pinadayag 7:4 ug 14:1-4, kini dunay gidaghanon nga 144,000 lamang ka indibiduwal, ang “gamay nga panon,” nga gitawag ngadto sa langitnong Gingharian sa Diyos. (Lucas 12:32) Ang pagpili niining linain nga mga pinaboran ni Jehova nga Diyos nagsugod sa gipili ang 12 ka apostoles ni Jesu-Kristo. (Mateo 10:2-4; Buhat 1:23-26) Si Jesus miingon sa mga sakop sa haligi sa iyang kongregasyon: “Kamo wala magpili kanako, hinunoa ako mao ang nagpili kaninyo.” (Juan 15:16) Sila ang manguna sa buluhaton sa pagsangyaw sa umaabot nga globonhong Paraiso ilalom sa pagmando sa Gingharian.

Ang Pagkaduol sa Gingharian

11. Kanus-a gitakda nga matukod ang Mesiyanikong Gingharian?

¹¹ Sa ngalan ni Ginoong Jesu-Kristo, kita karong adlawa nagapadayon sa pagtanyag ug pag-ampo kang Jehova nga moabot ang Iyang Gingharian. (Mateo 6:9, 10; Juan 14:13, 14) Ang Mesiyanikong Gingharian gitakda nga matukod sa kataposan sa “tinudlong panahon sa mga nasod.” (Lucas 21:24) Kadtong Hentil nga mga Panahon natuman sa tuig 1914.a

12. Unsay nahitabo sa 1914 nga nahiuyon sa tagna ni Jesus mahitungod sa talagsaong mga butang nga magtimaan sa iyang dili-makitang presensiya?

¹² Kadtong tuiga gitiman-an sa unang gubat sa kalibotan sa tawhanong kasaysayan. Kini nahiuyon sa tagna ni Jesus mahitungod sa tagsaong mga butang nga magatimaan sa iyang dili-makitang presensiya sa gahom sa Gingharian ibabaw sa yuta. Gipangutana siya sa iyang mga tinun-an: “Tug-ani kami, Kanus-a man mahitabo kining mga butanga, ug unsa may ilhanan sa imong presensiya ug sa konklusyon sa sistema sa mga butang?” Sa pagtubag si Jesus miingon: “Kay managgubat ang nasod batok sa nasod ug ang gingharian batok sa gingharian, ug mahitabo ang mga gutom ug mga linog sa nagkalainlaing dapit. Kining tanan maoy sinugdanan lamang sa tanang mga kasakit. Ug kining maayong balita sa gingharian igawali sa tanang kanasoran; ug unya ang kataposan moabot.”​—Mateo 24:3, 7, 8, 14; Marcos 13:10.

13. (a) Unsang bahina nga usa ka maayong balita ang pagwali sa Gingharian sa Diyos? (b) Kanus-a pa nga gitanyag ang mga pag-ampo sa Gingharian sa Diyos, ug ang iyang mga saksi sa yuta gikapuyan ba sa pagtanyag niining mga pag-ampoa?

¹³ Kining maayong balita sa mga Saksi ni Jehova ginawali na karon kapin sa 200 ka yuta, ug may mga paningkamot nga gihimo sa pagpakaylap niini ngadto sa halayong mga teritoryo. Kini maoy balita, dili bahin sa usa ka kagamhanan sa kalibotan nga moabot pa, kondili sa usa ka gingharian nga karon nagagahom na, usa nga nagamando na. Kana nga gingharian natukod sa 1914. Kini ang nag-andam sa kahimtang alang sa sulbad sa pag-ampo nga gilaraw ni Jesus kapin sa 1,900 ka tuig kanhi. Kana nga pag-ampo gitanyag ngadto sa Tagmugna niana nga Gingharian sukad nga kanang usa nga mahimong Hari niana nga kagamhanan nagtudlo sa iyang mga disipulo sa pag-ampo alang niana. Busa ang Awtor niana nga Gingharian nagpakadungog sa pagpangayo alang niana sa dugay na kaayong panahon. Siya nalipay sa pagkadungog sa pag-ampo nga gitanyag ngadto kaniya pinaagi sa iyang saksi sa yuta sa tanan niadtong panahona, kay kini nagpakita nga sila nagpabilin sa ilang pagtuo sa pag-abot niana nga Gingharian. Sila wala kapuyi sa pagtanyag sa pag-ampo ngadto sa “Amahan sa mga langit,” nga daw makapuol na kini alang kanila.​—Mateo 6:9, 10.

14. Nganong ang mga Saksi ni Jehova nagapadayon sa pagwali sa maayong balita sa Gingharian sa Diyos?

¹⁴ Samtang ang mga Saksi ni Jehova nagtuo ug nagpahayag nga ang Gingharian natukod sa langit sa 1914, sila nagpadayon sa pagsangyaw niining maayong balita sa Gingharian. Ilang gihimo kini tungod kay kanang natukod nga Gingharian wala pa sa bug-os makagahom sa yuta apan gitugotan ang mga gingharian niining kalibotana nga makapadayon sa paggamit sa ilang gahom ug awtoridad ibabaw sa tanang tribo ug mga rasa sa katawhan. (Roma 13:1) Busa kini modangat sa bug-os nga diwa, sa ato pa, sa sukod nga kini mao ang bugtong kagamhanan nga magamando sa ibabaw sa tibuok nga yuta.​—Daniel 2:44.

15. Unsay nagakahitabo sukad sa Pentekostes 33 K.P. nga mas labaw pa kay sa pagdihog sa mga hari sa Israel?

¹⁵ Bisan pa nga gitudlo ingong Hari niana nga Gingharian, si Jesus dili mag-inusarang magmando. Si Jehova nga Diyos nagtudlo ug 144,000 ka sumusunod sa iyang harianong Anak nga mahimong kaubang mga manununod sa Mesiyanikong Gingharian sa Diyos. (Daniel 7:27) Sama nga ang karaang mga hari sa Israel gidihogan sa balaang lana sa pagdihog sa hataas nga saserdote, busa sukad sa adlaw sa Pentekostes 33 K.P., gidihogan ni Jehova ang 144,000 ka kaubang manununod ni Jesu-Kristo sa Iyang balaang espiritu, gianak sila sa espirituhanong kinabuhi sa langit uban sa “Hari sa mga hari ug Ginoo sa mga ginoo.”​—Pinadayag 19:16; itandi ang 1 Hari 1:39.

Ang Paraiso Ipasig-uli sa “ang Kataposang Ardan”

16. Unsay palaabuton sa Gingharian sa dihang gilansang si Jesus, apan nganong dili siya magwawali sa sayop nga balita?

¹⁶ Sa dihang gilansang si Jesus sa 33 K.P., daw imposible nga siya dunay gingharian. Apan sa iyang pagwali mahitungod sa Gingharian sa Diyos, siya dili magwawali sa sayop nga balita. Sa ikatulo nga adlaw human sa paglansang kaniya, gitino sa Tagmugna sa Gingharian nga ang mga disipulo ni Jesus dili mag-ampo alang sa usa ka kagamhanan nga dili posible. Gibanhaw ni Jehova ang Usa kinsa maghawas Kaniya diha sa ginaampo nga Gingharian ug gisul-oban siya ug imortalidad.

17, 18. (a) Unsay kahulogan sa pagtawag kang Jesus nga “ang kataposang Adan”? (b) Unsay gipakita sa mga hitabo sa kalibotan sukad sa 1914?

¹⁷ Si Jesus nahibalo nga hatagan siya sa Maglalalang sa unang Paraiso sa yuta ug obligasyon sa pagbag-o sa Paraiso ug sa pagdumala sa pagpapuyo sa tibuok yuta nga tanaman. Diha sa 1 Corinto 15:45, 47, atong mabasa: “Kini ang nasulat: ‘Ang unang tawo nga si Adan nahimong buhi nga kalag.’ Ang kataposang Adan nahimong espiritu nga maghahatag-ug-kinabuhi. Ang unang tawo gikan sa yuta ug hinimo sa abog; ang ikaduhang tawo gikan sa langit.” Ang ikaduhang Adan nanaog gikan sa langit ug mao ang usa nga gigamit ni Jehova sa pagtukod pag-usab sa Paraiso dinhi sa yuta. Niini nga basehanan nga si Ginoong Jesu-Kristo miingon sa maluloy-on nga mamumuhat ug daotan: “Ikaw magauban kanako sa Paraiso.” (Lucas 23:43) Gikan niini nga panagsultihay matin-aw na usab nga ang Paraiso pagatukoron sa yuta ilalom sa Gingharian sa langit diha sa mga kamot sa gihimayang Jesu-Kristo, “ang kataposang Adan.”

¹⁸ Ang mga hitabo sa kalibotan sukad sa 1914 magkauyon sa mga tagna nga gipamulong ni Jesu-Kristo ug busa nagpamatuod nga si Kristo nagmando na sukad niadto. Kapin sa pito na ka dekada karon, ang mga tawo niining ika-20ng siglo nga kaliwatan nga nabuhi sukad sa 1914 nakaeksperyensiya sa katumanan sa mga hitabo nga nalista sa tagna ni Jesus nga makita diha sa Mateo kapitulo 24. Busa, kining yugtoa sa panahon hapit nang matapos, uban sa pagpasig-uli sa Paraiso sa yuta nga haduol na.​—Mateo 24:32-35; itandi ang Salmo 90:10.

Usa ka Kulbahinam Bag-ong Kalibotan nga Panahon Anaa sa Unahan!

19, 20. (a) Human sa Armageddon, ngadto sa unsa agakon ni Jehova ang mga nahigugma kaniya? (b) Unsay kinahanglan buhaton human gilayon sa Armageddon?

¹⁹ Kini dili makalaay, makapuol nga sistema sa mga butang nga diha niini ipailaila ni Jehova ang mga nahigugma kaniya human nga iyang mabindikar ang iyang unibersal nga pagkasoberano sa walay pagduhaduha diha sa gubat sa Armageddon. Ang umaabot nga katuigan alang sa tawhanong pamilya ilalom sa maayong pagmando sa Mesiyanikong Hari, si Jesus, ang Anak sa Diyos, kulbahinam gayod unya nga katuigan. Oh, pagkadaghang butang ang pagabuhaton nga mapuslanon! Ang bisan unsa ug ang tanang mga ulat nga mabilin sa nawong sa yuta gikan sa tibuok-yuta nga gubat tali sa langitnong mga panon ni Jehova ug sa nanagpanong mga puwersa sa daotan wagtangon. Wala na unyay lama pa nga mabilin.

²⁰ Apan unsay ikasulti bahin sa tanang gamit sa gubat nga mabilin sa mga nasod? Tungod sa simbolikong timailhan sa gitas-on sa panahon nga magamit sa paghipos sa mga gamit nga mobuto, dako gayod kaayo ang gidaghanon. (Ezekiel 39:8-10) Ang mga makalabang-buhi sa Armageddon mopaigo nga magamit ang bisan unsang mga materyal nga mabilin sa gubat sa mga nasod sa mapuslanong mga katuyoan.​—Isaias 2:2-4.

21. Sama sa eksperyensiya sa mga nakalabang-buhi sa Lunop, unsay kahimtang ang atubangon sa mga makalabang-buhi sa Armageddon, apan unsa ang dakong kalainan?

²¹ Ang gipanalanginan modernong-adlaw nga mga katugbang ni Noe ug sa iyang pamilya ingong milagrosong mga nakalabang buhi sa tibuok yuta nga Baha makaatubang ug situwasyon sa yuta nga sama sa usa nga nakaplagan sa pamilya ni Noe. Apan, si Satanas nga Yawa ug ang iyang mga panon sa demonyo dili na mohampak sa dili-makitang kalangitan nga nagalibot sa yuta apan bug-os nga dili na palihokon sa napulo ka siglo. (Pinadayag 20:1-3) Ang mga makalabang-buhi sa Armageddon makabaton ug mahagitong buluhaton sa pagsupil sa yuta nga miagi sa “dakong adlaw sa Diyos nga Labing Makagagahom,” atubangon ang bisan unsang mga epekto nga mabilin niini ning planetaha.​—Pinadayag 16:14.

22. Sa unsang paagi ang mga makalabang-buhi sa Armageddon mosanong sa hagit sa pagpalapad sa Paraiso sa tibuok yuta?

²² Sanglit diyutay lamang, kining mga makalabang-buhi sa gubat sa Armageddon sa kinaiyanhon malaoman nga makuyawan kaayo sa dihang hatagan ug dakong trabaho sa pagpalapad sa Paraiso sa tibuok yuta. Apan sa kasukwahi, malipay sa hilabihan, sila mohimo ug maisogon ug masinundanon nga pagsugod niana. Sila bug-os nakasabot nga kining yutaa mao ang simbolikong tumbanan sa Diyos, ug sa tim-os buot nila nga kining yutan-ong kalibotan himoong usa ka kahimtang nga madanihon ug matahom nga takos kapahulayan sa iyang mga tiil dinhi.

23. Unsang pagpaluyo ang mabatonan sa mga makalabang-buhi sa Armageddon ingong pasalig nga ang ilang buluhaton sa pagpasig-uli sa Paraiso molampos?

²³ Makapalipay ug makapadasig ang pagkasayod nga sila dili pasagdang mag-inusara ug walay-tabang human himoon kining malipayong pag-alagad sa katumanan sa sugo sa Diyos maylabot sa yuta. (Itandi ang Isaias 65:17, 21-24.) Ilang mabatonan ang bug-os, walay-kinutoban nga pagpaluyo sa Usa kinsa misaad nga ipasig-uli ang Paraiso ug kinsa miingon sa adlaw sa iyang pagkayab sa langit: “Kanako gikahatag ang kagahom sa langit ug sa yuta.” (Mateo 28:18) Iyang nabatonan gihapon kana nga kagahom, ug siya makahimo sa pagtuman sa iyang talagsaong saad sa maluloy-on nga mamumuhat ug daotan, sumala sa atong makita unya gikan sa sunod nga artikulo.

[Mga Footnote]

Mga Pangutana sa Pagsobli

◻ Unsay gipasalig sa saad ni Jesus diha sa Kalbaryo alang sa katawhan ug sa usa ka kriminal?

◻ Unsa ang pasukaranan sa pag-abli sa dalang balik sa Paraiso?

◻ Napakyas ang unang Adan sa pagbuhat ug unsa, apan unsay buhaton sa “ang kataposang Adan”?

◻ Human sa Armageddon, ngadto sa unsang matang sa sistema sa mga butang agakon ni Jehova ang mga nahigugma kaniya?

[Hulagway sa panid 13]

Ang artikulo “Kataposan sa Tanang Gingharian sa 1914” migula diha sa “The World Magazine” sa Agosto 30, 1914