Ang Salabotan nga Gihatag ni Jehova

“Mahitungod niadtong dunay salabotan taliwala sa katawhan, sila magatudlo sa daghan.”—DANIEL 11:33.

1, 2. (a) Bisan pa nga nakaeksperyensiya ang mga Israelinhon sa mahigugmaong-kalulot sa Diyos, nganong maalsahon ang ilang paggawi? (b) Unsay mapuslanon alang kanatong buhaton? (Jeremias 51:10)

ANG mga tawo sa karaang Israel nahibalo nga si Jehova mao lamang ang bugtong matuod nga Diyos. Sila gisultihan bahin sa iyang mga pakiglabot uban sa ilang mga amahan, ug sila sa personal nakaeksperyensiya sa iyang mahigugmaong-kalulot. Apan sa makadaghang higayon, sila milihok uban ang dakong pagkakulang ug salabotan. Sila “milihok nga maalsahon” kang Jehova ug sa iyang mga hawas. Ngano? Tungod kay “sila wala makahinumdom” sa iyang nahimo alang kanila. (Salmo 106:7, 13) Dili tungod kadto kay sila wala makahibalo niining mga butanga; sila napakyas sa pagpalandong niini nga mapabilhon. Sumala sa gidangatan, sila napamatud-ang “mga tawo nga nagapangandoy sa daotang mga butang.”​—1 Corinto 10:6.

² Sa atong adlaw, ang dakong paagi nga diin gihimo ni Jehova ang iyang mga Saksi nga lahi nga katawhan mao ang salabotan nga iyang gitagana pinaagi sa iyang makitang organisasyon. Ang atong kaugalingong pagpabili sa paagi sa pagtultol ni Jehova sa iyang katawhan mapalig-on pinaagi sa pagsobli sa pipila ka pananglitan sa maong salabotan. Ang usa niini nalangkit sa subok mismo sa atong pagtuo​—ang kailhanan sa Diyos mismo.

Ang Diyos ba Trinidad?

3. Unsay nakahimo sa mga alagad ni Jehova, kapin sa usa ka gatos ka tuig kanhi, sa pagsabot sa kamatuoran mahitungod sa kailhanan sa Diyos? (1 Corinto 8:5, 6)

³ Ang Kakristiyanohan malig-ong nagpatuo nga kadtong dili-motuo sa Trinidad mga erehes. Apan inay mahadlok sa tawo, ang mga alagad ni Jehova miila nga, dili ang mga tradisyon ug mga doktrina sa dili-dinasig nga mga tawo, kondili ang Balaang Kasulatan ang nagahatag sukdanan sa pagsabot kon unsa ang kamatuoran. Nagtukod niini nga pundasyon, balik pa sa 1882 kining dedikadong mga estudyante sa Bibliya tin-awng nagpahayag diha sa Watch Tower: “Ang among mga magbabasa nahibalo nga samtang kita nagtuo kang Jehova nga Diyos ug Jesus, ug sa balaang Espiritu, atong gisalikway nga bug-os dili-kasulatanhon, ang pagtulon-an nga kini maoy tulo ka Diyos diha sa usa ka persona, o ginaingon kana sa pipila, nga usa ka Diyos diha sa tulo ka persona.”​—Juan 5:19; 14:28; 20:17.

4. (a) Gitugkad pa gayod ang ilalom, unsay nasabtan sa katawhan sa Diyos bahin sa basehanan sa doktrinang Trinidad ug sa mga epekto sa maong doktrina? (b) Nganong gihatagan ni Jehova ang iyang mga alagad sa maong salabotan?

⁴ Kining mga mahigugmaon sa kamatuoran sa Bibliya nagdukiduki sa pagtugkad pa gayod sa ilalom ug nakakita sa sinugdan sa doktrina sa Trinidad diha sa dili-Kristohanong mga relihiyon. Pinaagi sa mainampingong pagtuon sa Kasulatan, sila nakadangat sa kahibalo nga kon ang pipila ka teksto sa Bibliya mopatim-aw nga nagasuportar sa mga ideya sa Trinidad, tungod kadto sa mapihigong mga hunahuna sa mga maghuhubad, dili tungod nianang anaa sa labing karaang mga manuskrito sa orihinal-nga-pinulongan. Ilang nasabtan nga kining maong pagtulon-an, nga gipakaingon nga nagahimaya kang Jesus, sa aktuwal nagkasumpaki sa iyang mga pagtulon-an ug nagapasipala kang Jehova. Busa, ang gula sa Watch Tower nga gihisgotan sa ibabaw nag-ingon: “Kinahanglan nga kita ingong mga tigpangita sa kamatuoran, magmatinuoron sa atong kaugalingon ug sa Pulong sa atong Amahan, nga makahimo kanatong tinuod nga maalamon. Busa, isalikway ang mga tradisyon ug mga doktrina sa mga tawong dili-dinasig ug ang daotang mga sistema, manghawid kita nga hugot sa porma sa makataronganong mga pulong nga nadawat gikan sa atong Ginoo ug sa mga Apostoles.” Sanglit ilang gimahal pag-ayo ang kamatuoran ug mihatag pagtagad dili lamang sa pipila ka paboritong mga bersikulo sa Bibliya kondili sa tibuok nga Pulong sa Diyos, gihatagan sila ni Jehova ug salabotan nga dayag nga nagpalahi kanila gikan sa Kakristiyanohan.​—2 Timoteo 3:16, 17; tan-awa ang New World Translation Reference Bible, panid 1580, seksiyon 6B.

Ang Tukmang Dapit sa Ngalan ni Jehova

5. Unsay nagpaluyo sa kiling sa pagwagtang sa personal nga ngalan sa Diyos gikan sa mga hubad sa Bibliya? (Pinadayag 22:18, 19)

⁵ Palandonga ang ikaduhang pananglitan: Sa dihang gitago o bug-os nga giwala ang personal nga ngalan sa Diyos diha sa mga hubad sa Bibliya sa nagkauswag nga gidaghanon, gihatagan ug dakong pasiugda sa Watch Tower Society ang pagkabililhon nianang ngalana. Ang Kakristiyanohan nangatarongan nga ang pagkuha sa ngalan ni Jehova mohatag sa Ebanghelyo ug dugang unibersohanong kamadanihon, apan ang dinihogang mga alagad ni Jehova nahibalo kon kinsay anaa sa likod nianang laraw sa pagwala gikan sa Balaang Kasulatan sa labing hinungdanong ngalan sa tanan. (Itandi ang Jeremias 23:27.) Ang katawhan sa Diyos nahibalo nga kini hinulhogan sa Yawa aron sa pagpala gikan sa tawhanong panumdoman ang ngalan sa matuod nga Diyos.

6. Kasukwahi sa dalan sa Kakristiyanohan, unsay gihimo sa matuod nga mga alagad aron sa paghimaya sa iyang ngalan? (Buhat 15:14)

⁶ Sukwahi sa dalan nga gisubay sa Kakristiyanohan, sukad sa iyang unang pagpatik (1879), ang Bantayanang Torre naghatag pangunang dapit sa balaang ngalan, JEHOVA. Niadtong 1926 kining magasina nagpasiugda ug artikulo “Kinsa ang Mohimaya Kang Jehova?” (Salmo 135:21) Niadtong 1931 gidawat sa mga estudyante sa Bibliya nga nakig-uban sa Watch Tower Society ang ngalang mga Saksi ni Jehova. (Isaias 43:10-12) Sila dugang nga midangat usab sa pagkasabot sa dakong bili sa pagbalaan sa ngalan ni Jehova. (Isaias 12:4, 5) Niadtong 1944 sila misugod sa pagpatik sa American Standard Version sa Bibliya, nga nag-apil sa ngalang Jehova kapin sa 6,800 ka besis. Maylabot sa publikasyon sa Bibliya, hinunoa, ang labing talagsaon mao ang pagprinta, sukad sa 1950, sa New World Translation. Kini naghatag sa balaang ngalan sa hustong dapit niini diha sa Hebreohanon ug sa Kristohanon Gregong Kasulatan.

7. Sa unsang paagi ang paghatag pasiugda sa ngalan sa Diyos ug sa tanang nalangkit niini mapuslanong nakaapekto sa daghang tawo?

⁷ Ang pasiugda nga gihatag sa personal nga ngalan sa Diyos nakahatag kalipay sa milyon-milyong mga mahigugmaon sa pagkamatarong sa tibuok-yuta. Kini nakatabang kanila sa pagpabili sa matuod nga Diyos ingong Persona. Ug sila midangat sa pagkahibalo sa iyang mga dalan, sila nakahimo sa paggawi nga maalamon, o may salabotan.​—Miqueas 4:2, 5.

Ang Tawhanong Kalag ba Dili-Mamatay?

8. Sayo sa modernong-adlaw sa kasaysayan, unsay nakat-onan sa mga Saksi ni Jehova bahin sa kalag ug sa kahimtang sa patay?

⁸ Karon, ang ikatulong pananglitan: Sa sayong yugto sa modernong-adlawng kasaysayan sa mga alagad ni Jehova, ang gugma alang sa Pulong sa Diyos mao ang nakabukas sa ilang mga mata sa ubang bililhong mga kamatuoran. Kapin sa usa ka siglo kanhi, tukmang nasabtan sa “matinumanon ug maalamong ulipon” nga ang kalag dili maoy usa ka may-kinaadman ug mabulag nga espiritu nga nagapuyo sulod sa mga tawo kondili nga kini mao ang tawo mismo. (Mateo 24:45-47) Niadtong 1880 gituki sa Watch Tower ang orihinal nga pinulongan sa mga pulong Sheol ug Hades diha sa Bibliya nga gihubad sumala sa paglitok ug mihukom nga kini nagpaila sa lubnganan. Kini nagpunting usab nga ang mga tawo nga gihukman ngadto sa Gehenna gilaglag, wala sakita.​—Tan-awa usab ang New World Translation Reference Bible, panid 1573-5.

9. Niadtong 1894, unsay giingon sa Watch Tower bahin sa sinugdanan sa doktrina nga ang tawhanong mga kalag sa kinaiyanhon dili-mamatay?

⁹ Niadtong 1894 ang Watch Tower mibangon ug pangutana, “Nan kanus-a mitungha ang popular nga ideya nga ang tawhanong linalang nakabaton ug imortalidad, sa kinaiyanhon, ug dala-sa-pagkatawo?” Uban sa salabotan, kini mitubag: “Sa pagdukiduki sa mga panid sa kasaysayan, among nakita nga, bisan pa ang doktrina sa pagkadili-mamatay sa tawhanong kalag wala itudlo sa dinasig nga mga saksi sa Diyos, kini mao ang mismong diwa sa tanang paganong mga relihiyon. . . . Busa, dili tinuod, nga si Socrates ug Plato mao ang una nga nagtudlo sa doktrina: kini dunay mas una pang magtutudlo kay kanila, ug mas maayo pa. Ugaling, sila ang naghapsay sa doktrina . . . ug gihimo kining pilosopiya, ug busa naghimo niining mas madanihon ug madawat sa edukadong matang sa ilang mga adlaw ug sukad niadto. Ang unang rekord niining bakak nga doktrina makita diha sa labing karaang kasaysayan nga nahibaloan sukad sa tawo​—ang Bibliya. Ang bakak nga magtutudlo mao si Satanas.”a

10. Unsang daotang mga epekto ang misangpot gikan sa relihiyosong kabakakan bahin sa kalag ug sa kahimtang sa patay, apan unsay nahimo sa pagtabang sa mga tawong makataronganon?

¹⁰ Pinaagi sa pagpakaylap sa kabakakan nga ang tanang tawo dunay dili-mamatay nga kalag ug nga ang daotan sa walay-kataposan sakiton diha sa impiyernong kalayo, sayop nga gihawasan ug gipasipalahan ni Satanas ang ngalan sa Diyos. Ang unang editor sa Watch Tower, si C. T. Russell, nakaamgo niana. Iyang nakita ang intelehenting mga tawo nga nagsalikway sa ideya sa walay-kataposang kasakit, apan, makasubo, nagsalikway sa Bibliya tungod kay nagtuo sila nga kini mao ang tuboran nianang dili-makataronganong doktrina. Aron mawala ang aso sa Ngitngit nga Katuigan gikan sa mga hunahuna sa mga tawong makataronganon, sumala sa pagkapamulong niya niana, si Igsoong Russell mihatag ug makapukawng publikong pakigpulong “Pag-adto ug Paggawas sa Impiyerno! Kinsay Atua Didto.”

11. (a) Sa dihang nainila ang espiritismo, unsang pasidaan ang gipalanog sa ‘matinumanong ulipon’ nga matang? (b) Kinsa ang nakapahimulos niining pasidaana, ug sa unsang paagi?

¹¹ Kadto maoy usa ka yugto diin ang espiritismo nainila. Apan uban sa salabotan nga gihimong posible ni Jehova nga Diyos pinaagi sa iyang Pulong, nasabtan sa ‘matinumanong ulipon’ nga matang nga ang ginaingong mga espiritu sa patay nga gipakigsultihan sa mga tawo mao ang mga demonyo. Ang gamhanang mga pangatarongan sa Kasulatan gipresentar diha sa mga pakigpulong sa publiko ug sa nasulat nga porma aron sa pagbuka sa mga mata sa mga tawong matinuoron ug kasingkasing sa kapeligrohan sa pakiglangkit sa espiritistikanhong mga buhat. (Deuteronomio 18:10-12; Isaias 8:19) Ingong resulta niining salabotan nga gihatag ni Jehova sa iyang mga alagad, libolibong mga tawo sa tibuok yuta napagawas gikan sa kahadlok sa patay, gikan sa buhat sa espiritismo, ug gikan sa mahugawng mga kustombre nga nalangkit sa espiritismo.

Kristohanong Pamatasan Diha sa Magubot nga Kalibotan

12, 13. (a) Ipatin-aw ang Daniel 11:32, 33. (b) Unsa ang pipila ka paninugdang mga kamatuoran sa Bibliya nga naghatag basehanan sa pagsabot nga gihatag “niadtong dunay salabotan”?

¹² Gipaila ni propetang Daniel nga ang mga alagad sa Diyos mopakitag salabotan maylabot sa ikaupat nga butang, usa ka hinungdanong isyu​—ang neyutralidad. Human sa pagbatbat nga detalyado sa panag-away tali sa inilang politikal nga mga pundok sa kalibotan, ang Daniel 11:32, 33 nag-ingon: “Kadtong magabuhat ug daotan batok sa tugon, iyang agakon ngadto sa apostasiya pinaagi sa mga pag-ulo-ulo.” Sa ato pa, agakon sa totalitaryanhong hari sa amihanan kadtong nagaangkong mga Kristohanon apan nahigugma sa kalibotan, buot sa pag-uyon niini, ug busa nagadumot sa tugon ni Jehova alang sa usa ka Gingharian nga diin si Jesu-Kristo maoy mohari sa tibuok yuta. “Apan,” si Daniel mipadayon, “mahitungod sa katawhan nga nakaila sa ilang Diyos, sila mahimong makusganon ug molihok nga masangpoton. Ug mahitungod niadtong dunay salabotan taliwala sa katawhan, sila magatudlo sa daghan.”

¹³ Ang salabotan nga gikinahanglan aron makaatubang nga maalamon sa kanunayng magubot nga mga kahimtang nga nagalibot nato gipasikad diha sa pagsabot sa paninugdang mga kamatuoran sa Bibliya. Pinaagi sa pagtultol ni Jehova, ang ‘matinumanong ulipon’ nga matang nakasabot niining mga kamatuorana. Ang usa niini mao ang kamatuoran nga, sumala sa gipakita ni Jesus, nga ang makitang magmamando niining kalibotana mao si Satanas nga Yawa. (Lucas 4:5-8; Juan 12:31) Kaharmoniya niining kamatuorana, ang 1 Juan 5:19 midugang nga dili usa lamang ka pundok o lain kondili “ang tibuok kalibotan [ang tanang katawhan gawas sa tinuod Kristohanong kongregasyon] anaa sa gahom sa usa nga daotan.” (Pinadayag 12:9) Sanglit miingon si Jesus nga ang iyang mga sumusunod “dili bahin sa kalibotan,” kini nagkinahanglag Kristohanong neyutralidad sa ilang bahin.​—Juan 17:16.

14. (a) Ngadto sa unsang tukma sa panahong mga butang nga gipunting ang pagtagad sa mga alagad ni Jehova sa 1939 ug 1941? (b) Sa unsang paagi ang maong salabotan nakatabang sa mga Saksi ni Jehova sa paglihok nga maalamon?

¹⁴ Busa, tukma sa panahon nga sa dihang ang mga panganod sa Gubat sa Kalibotan II midulom sa Uropa, ang isyu sa Kristohanong neyutralidad gipasiugda sa The Watchtower sa Nobyembre 1, 1939. Nalangkit niining bahina mao ang laing pundamental nga kamatuoran​—ang pagkahinungdanon sa isyu sa unibersal nga pagkasoberano ug sa papel sa Mesiyanikong Gingharian sa paghusay niining isyuha. Sa tukma, sa 1941 kining maong isyu gipasiugda diha sa usa ka pakigpulong sa kombensiyon sa mga Saksi ni Jehova sa St. Louis, Missouri, T.B.A., ug sa pagkasunod tuig diha sa librong The New World. Pagkadakong panalipod ang nahatag sa maong diyosnong salabotan alang sa mga alagad ni Jehova niining nabahin ug nag-awayay nga kalibotan! Bisag ang relihiyosong mga sistema sa Kakristiyanohan nagkabahinbahin tungod kay ilang gitugotan ang ilang kaugalingon nga malangkit diha sa internasyonal nga gubat ug mga kalihokan sa gerilya sa pagpukan sa mga kagamhanan, ang mga Saksi ni Jehova sa tanang nasod hiusang nagpadayon sa paggugol sa ilang kaugalingon sa pagmantala sa Gingharian sa Diyos ingon nga mao ang bugtong paglaom sa katawhan. Sila puliki sa makaluwas ug kinabuhing buluhaton nga gitagna ni Jesu-Kristo sa dihang siya miingon: “Kining maayong balita sa gingharian igawali sa tibuok yuta alang sa pagpamatuod ngadto sa tanang kanasoran; ug unya moabot ang kataposan.”​—Mateo 24:14.

Katumanan sa mga Tagna sa Bibliya

15. Nganong ang mga alagad ni Jehova nakabaton ug salabotan?

¹⁵ Nganong ang mga alagad ni Jehova nakabaton niining maong salabotan? Tungod kay sila dunay bug-os nga pagsalig sa sinulat nga Pulong sa Diyos, ilang gituman kana, ug ang espiritu ni Jehova anaa kanila. Kini ang nakahimo usab kanila sa pagsabot sa hinungdanong mga tagna sa Bibliya, ug kini ang ikalimang punto nga atong hisgotan.

16, 17. (a) Nganong ang mga petsa nga gigamit sa mga Saksi ni Jehova lahi niadtong gihatag sa sekular nga mga manalaysay? (b) Sa unsang paagi nakapahimulos ang mga Saksi ni Jehova gikan sa ilang pagsalig sa Bibliya bahin sa paghatag petsa sa ika-20ng tuig ni Artaxerxes ug sa panahon sa pagkalaglag sa Jerusalem sa mga Babilonyanhon?

¹⁶ Ang sekular nga mga manalaysay, nga nagasalig sa ilang interpretasyon nga sa pila ka mga kaso diha sa tipak-tipak nga mga papan nga bato nga nakalotan sa mga arkeologo, miingon nga ang 464 W.K.P., mao ang unang tuig sa pagkahari ni Artaxerxes Longimanus ug nga sa 604 W.K.P. mao ang unang tuig sa pagkahari ni Nabucodonosor II. Kon tinuod kana, ang ika-20ng tuig ni Artaxerxes nagsugod sa 445 W.K.P., ug ang petsa sa pagkalumpag sa Jerusalem pinaagi sa mga Babilonyanhon (sa ika-18ng tuig sa paghari ni Nabucodonosor) maoy sa 587 W.K.P. Apan kon gamiton sa estudyante sa Bibliya kadtong mga petsaha sa dihang mag-ihap sa katumanan sa tagna, siya sa yano maglibog.

¹⁷ Ang mga Saksi ni Jehova dugay nang naikag sa mga nakaplagan sa mga arkeologo sanglit may kalabotan kini sa Bibliya. Apan, kon ang interpretasyon niining mga nakaplagan magkasumpaki sa tin-awng mga pulong sa Bibliya, atong gidawat uban ang pagsalig ang gipamulong sa Balaang Kasulatan, kon bahin man kini sa mga butang maylabot sa kronolohiya o sa ubang mga topiko. Ingong resulta, ang mga alagad ni Jehova dunay nang midawat nga ang matagnaong panahon nga nagsugod sa ika-20ng tuig ni Artarxerxes iphon gikan sa 455 W.K.P. ug busa ang Daniel 9:24-27 sa pagkakasaligan nagpunting sa tinghunlak sa tuig 29 K.P. ingong panahon nga gidihogan ang Mesiyas.b Alang sa samang katarongan, ilang nasabtan nga ang tagna sa Daniel kapitulo 4 mahitungod sa “pito ka panahon” nagsugod sa pag-ihap sa 607-606 W.K.P. ug nga kini nagpunting sa tinghunlak sa 1914 K.P., ingong tuig nga naentrono si Kristo sa langit isip nagamandong Hari ug kining kalibotana misulod na sa panahon sa kataposan niini.c Apan dili unta nila masabtan kining kulbahinam nga mga katumanan sa tagna kon sila natarog pa sa ilang pagsalig sa dinasig nga Balaang Kasulatan. Busa, ang salabotan nga ilang gipakita sa direkta nalangkit sa ilang pagsalig sa Pulong sa Diyos.

18. Unsay gisaad sa Isaias 65:13, 14 bahin sa espirituwal nga kahimtang sa maunongong mga alagad ni Jehova?

¹⁸ Gitandi ang espirituwal nga mga kahimtang sa iyang maunongong mga alagad batok sa mga indibiduwal ug mga grupo nga mosalindot dayon sa Kasulatan aron sa pagdapig sa bisan unsang butang nga popular, si Jehova nagaingon: “Tan-awa! Ang akong mga alagad magakaon, apan kamo pagagutomon. Tan-awa! Ang akong mga alagad magainom, apan kamo pagauhawon. Tan-awa! Ang akong mga alagad magakalipay, apan kamo mag-antos sa kaulaw. Tan-awa! Ang akong mga alagad manag-awit tungod sa kalipay sa kasingkasing, apan kamo managhilak tungod sa kasubo sa kasingkasing ug managbakho tungod sa kaguol sa espiritu.”​—Isaias 65:13, 14.

19. (a) Sa panguna, pinaagi sa unsa nga ang “matinumanon ug maalamong ulipon” nagataganag mga katin-awan sa Kasulatan? (b) Unsang matang sa programa sa pagtuon ang nakahimo kanato sa pagpahimulos sa bug-os gikan sa espirituwal nga pagkaon?

¹⁹ Sumala sa gipakita niining lakbit nga pagsobli sa kasaysayan, pinaagi sa mga tudling sa Ang Bantayanang Torre nga ang mga pagpatin-aw sa hinungdanong Kasulatanhong mga kamatuoran gitagana kanato pinaagi sa “matinumanon ug maalamong ulipon” ni Jehova. Ang Bantayanang Torre mao ang pangunang instrumento nga gigamit sa “ulipon” nga matang aron sa pag-apod-apod sa espirituwal nga pagkaon. Ikaw ba bug-os nga nagapahimulos niini? Ginabasa ba nimo ang matag gula, ug ang imo bang programa sa pagtuon naglakip sa pagtan-aw sa kasulatan nga gihisgotan apan wala kutloa? Gihimo ba nimong batasan ang pagpalandong sa imong natun-an, nagatukod ug pagpabili niana, nagapalandong sa unsang paagi kini nagaapektar sa imong tinamdan, sa imong mga tinguha, sa imong adlaw-adlawng mga kalihokan, sa imong mga tumong sa kinabuhi? Ang imong pagbuhat niini mahimong dakong butang diha sa imong paghimog mga desisyon nga ipasukad diha sa tinuod nga salabotan nga si Jehova lamang ang makahatag.

[Mga Footnote]

Unsay Imong Nahinumdoman?

◻ Ang Diyos ba Trinidad, ug nganong mao kanay imong tubag?

◻ Diin ang tukmang dapit sa ngalan sa Diyos?

◻ Ang tawhanong kalag ba dili-mamatay?

◻ Unsang salabotan ang gihatag ni Jehova bahin sa Kristohanong pamatasan niining magubot nga kalibotan?

◻ Ang mga Saksi ni Jehova nakadawat ug unsang salabotan mahitungod sa katumanan sa Bibliya?

[Mga hulagway sa panid 18]

Pinaagi sa Ang Bantayanang Torre, “ang matinumanon ug maalamong ulipon” naghatag salabotan bahin sa kahulogan sa kasulatan ug sa aplikasyon niini sa atong adlaw