Jehova—Usa ka Diyos nga Nagapadayag sa mga Tinago

[Kapsiyon sa panid 7]

“Adunay usa ka Diyos sa kalangitan nga Tigpadayag sa mga tinago.”​—DANIEL 2:28.

1, 2. (a) Sa unsang paagi si Jehova lahi sa iyang dakong Kaaway? (b) Sa unsang paagi ginapabanaag sa mga tawo kini nga kalainan?

SI Jehova, ang supremo ug mahigugmaong Diyos sa uniberso, ang usa ug ang bugtong nga Maglalalang, maoy usa ka Diyos sa kaalam ug hustisya. Dili kinahanglang itago niya ang iyang kaugalingon kon kinsa siya, ang iyang mga buhat, o ang iyang mga katuyoan. Sa iyang kaugalingong panahon ug sa iyang kaugalingong pagbuot, iyang ipadayag ang iyang kaugalingon. Niining paagiha siya lahi sa iyang Kaaway, si Satanas nga Yawa, kinsa naningkamot sa pagtago sa iyang kaugalingon kon kinsa gayod siya ug sa iyang mga katuyoan.

² Sama nga si Jehova ug Satanas lahi, nan lahi usab ang ilang mga magsisimba. Kadtong nagasunod sa pagpanguna ni Satanas mailhan pinaagi sa pagkamalipoton ug pagkalimbongan. Sila naningkamot sa pagpresentar sa ilang kaugalingon nga maayo konohay, samtang nagahimog mga buhat nga iya sa kangitngit. Ang mga Kristohanon sa Corinto gisultihan sa dili pagkahibulong niini nga kamatuoran. “Kay ang maong mga tawo bakak nga mga apostol, malimbongong mga mamumuhat, nagahimo sa ilang kaugalingon nga mga apostol ni Kristo. Ug dili ikatingala, kay si Satanas mismo kanunayng nagahimo sa iyang kaugalingon nga usa ka anghel sa kahayag.” (2 Corinto 11:​13, 14) Ang mga Kristohanon, sa laing bahin, nagalantaw kang Kristo ingong ilang Pangulo. Samtang dinhi pa sa yuta hingpit niyang gipabanaag ang personalidad sa iyang Amahan, si Jehova nga Diyos. (Hebreohanon 1:​1-3) Busa, pinaagi sa pagsunod kang Kristo, ang mga Kristohanon nagasundog kang Jehova, ang Diyos sa kamatuoran, sa pagkamadayganon, ug kahayag. Dili usab nila kinahanglang ililong ang ilang kaugalingon kon kinsa sila, ang ilang mga buhat, o ang ilang mga katuyoan.​—Efeso 4:​17-19; 5:​1, 2.

3. Sa unsang paagi atong matubag ang pasangil nga ang mga tawong nangahimong mga Saksi ni Jehova gipugos sa pakig-anib sa “sekretong sekta”?

³ Sa mga panahon nga siya nahibalo nga mao ang labing maayo, ginapahibalo ni Jehova ang mga detalye bahin sa iyang mga katuyoan ug bahin sa umaabot nga wala pa mahibaloi kaniadto sa mga tawo. Niining bahina siya maoy usa ka Diyos nga nagapadayag sa mga tinago. Busa, ang mga tawo nga buot moalagad kaniya gidapit​—oo giawhag​—sa pagkakat-on sa maong gipadayag nga impormasyon. Ang 1994 nga surbi sa kapin sa 145,000 ka Saksi sa usa ka nasod sa Uropa nagpakita nga, sa aberids, ang matag usa kanila personal nga misusi sa mga pagtulon-an sa mga Saksi ni Jehova sulod sa tulo ka tuig una pa mipili nga mahimong usa ka Saksi. Sila mipili sumala sa ilang kaugalingong pagbuot nga wala pugsa. Ug sila nagpadayon sa pagkabaton ug kagawasan sa pagbuot ug paglihok. Pananglitan, tungod kay ang pipila misupak sa hataas nga mga sukdanan sa moralidad sa mga Kristohanon, sila sa ulahi mihukom nga dili sila buot mopadayon ingong mga Saksi. Hinunoa, makaiikag nga sulod sa miaging lima ka tuig, daghan niining mga Saksi kanhi mihimog mga lakang sa ilang pagbalik sa pagpakig-uban ug kalihokan ingong mga Saksi.

4. Unsa ang dili angay kabalak-an sa matinumanong mga Kristohanon, ug nganong dili?

⁴ Sa pagkamatuod, dili tanang mga Saksi kanhi mibalik, ug taliwala kanila mao ang pipila kinsa adunay mga katungdanan sa kaakohan sulod sa Kristohanong kongregasyon. Dili kini ikatingala, kay bisan ang usa sa suod kaayong mga sumusunod ni Jesus, si apostol Judas, mibulag. (Mateo 26:​14-16, 20-25) Apan katarongan ba kini nga matugaw bahin sa Kristiyanidad mismo? Ikalimod ba niini ang kalamposan sa mga Saksi ni Jehova sa pagtuman sa ilang edukasyonal nga kalihokan? Dili gayod, sama nga wala gayod makapahunong ang mabudhiong buhat ni Judas Iscariote sa mga katuyoan sa Diyos.

Labing Makagagahom Apan Mahigugmaon

5. Sa unsang paagi kita nahibalo nga si Jehova ug si Jesus nahigugma sa mga tawo, ug sa unsang paagi ilang gipasundayag kini nga gugma?

⁵ Si Jehova maoy usa ka Diyos sa gugma. Siya nagatagad sa katawhan. (1 Juan 4:​7-11) Bisan pa sa iyang hataas kaayong posisyon, siya malipay sa paghimo sa mga tawo ingong iyang mga higala. Mahitungod sa usa sa iyang karaang mga alagad, atong mabasa: “‘Si Abraham nagbutang ug pagtuo kang Jehova, ug kadto giisip kaniya ingong pagkamatarong,’ ug gitawag siya nga ‘higala ni Jehova.’” (Santiago 2:23; 2 Cronicas 20:​7; Isaias 41:​8) Sama nga magtug-anay ang tawhanong mga higala ug kompidensiyal nga mga butang, o mga sekreto, mao man usab si Jehova uban sa iyang mga higala. Niining bahina gisundog ni Jesus ang iyang Amahan, kay siya nakighigala sa iyang mga tinun-an ug iyang gisultihan sila ug sekretong mga butang. “Wala na ako magatawag kaninyo nga mga ulipon,” iyang giingnan sila, “tungod kay ang usa ka ulipon wala mahibalo kon unsay ginabuhat sa iyang agalon. Apan ginatawag ko kamong mga higala, tungod kay ang tanang butang nga akong nadungog gikan sa akong Amahan akong gipahibalo kaninyo.” (Juan 15:15) Ang pribadong impormasyon, o “mga tinago,” nga nahibaloan ni Jehova, sa iyang Anak, ug sa ilang mga higala nagpahiusa kanila diha sa dili-mabugto nga bugkos sa gugma ug debosyon.​—Colosas 3:14.

6. Nganong dili kinahanglang tagoon ni Jehova ang iyang mga tinguha?

⁶ Ang kahulogan sa ngalang Jehova, “Siya nga Nagapahinabo,” nagpaila sa iyang katakos sa pagkahimo sa bisan unsa nga buot niya nga mahimo aron matuman ang iyang kabubut-on. Dili sama sa mga tawo, dili kinahanglang tagoan ni Jehova ang iyang mga katuyoan tungod sa kahadlok nga basin makababag ang uban sa pagtuman niini. Siya dili gayod mapakyas, busa madayganon niyang gibutyag diha sa iyang Pulong, ang Bibliya, ang kadaghanan sa iyang mga katuyoan nga pagahimoon. Siya nagsaad: “Ang akong pulong . . . dili mobalik kanako nga walay mga sangpotanan, kondili kini magatuman sa akong gikahimut-an, ug kini tino nga molampos nga tungod niana kini akong gipadala.”​—Isaias 55:11.

7. (a) Unsay gitagna ni Jehova sa Eden, ug sa unsang paagi gipamatud-an ni Satanas nga matuod ang Diyos? (b) Sa unsang paagi ang prinsipyo sa 2 Corinto 13:​8 tinuod gayod kanunay?

⁷ Wala magdugay human sa pag-alsa sa Eden, gipadayag ni Jehova sa lakbit ang kataposang resulta sa nagapadayong kontrobersiya tali kaniya ug sa iyang Kaaway, si Satanas. Ang gisaad nga Binhi sa Diyos sa masakit kaayo, apan dili ikamatay, masamdan, samtang si Satanas sa kataposan mag-antos ug makamatayng pagkasamad. (Genesis 3:15) Sa 33 K.P., tinuod nga gisamdan sa Yawa ang Binhi, si Kristo Jesus, pinaagi sa pagpahinabo sa iyang kamatayon. Niining paagiha, natuman ni Satanas ang Kasulatan ug sa samang higayon napamatud-an si Jehova nga usa ka Diyos sa kamatuoran, bisan pag dili gayod kini ang tumong ni Satanas. Ang iyang pagdumot sa kamatuoran ug pagkamatarong, maingon man ang iyang mapahitas-on, dili-mahinulsolong tinamdan, nag-agak kaniya sa pagbuhat sumala gayod sa gitagna sa Diyos nga iyang buhaton. Oo, sa tanang magsusupak sa kamatuoran, bisan kang Satanas mismo, ang prinsipyo tinuod: “Kami walay arang mahimo batok sa kamatuoran, kondili alang lamang sa kamatuoran.”​—2 Corinto 13:8.

8, 9. (a) Unsay nahibaloan ni Satanas, apan kini ba nga kahibalo nakadaot sa pagkatuman sa mga katuyoan ni Jehova? (b) Unsang tin-awng pasidaan ang wala panumbalinga sa mga magsusupak ni Jehova, ug ngano?

⁸ Sanglit ang Gingharian sa Diyos dili-makitang natukod sa 1914, ang Pinadayag 12:​12 natuman: “Gumikan niini panagsaya, kamong mga langit ug kamong mga nagapuyo niini! Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” Bisan pa niana, ang pagkahibalo ba nga ang iyang panahon mubo na nagtukmod kang Satanas sa pagbag-o sa iyang dalan? Kana maoy pagdawat sa bahin ni Satanas nga si Jehova maoy usa ka Diyos sa kamatuoran ug nga ingong Supremong Magmamando, siya lamang ang takos nga pagasimbahon. Apan, ang Yawa dili andam sa pagdawat ug kapildihan, dili bisan pag nahibalo niining mga kamatuorana.

⁹ Madayganong gibutyag ni Jehova kon unsay mahitabo sa dihang si Kristo moabot aron magpakanaog ug paghukom sa sistema sa kalibotan ni Satanas. (Mateo 24:​29-31; 25:​31-46) Niining bahina, ang iyang Pulong nagpahibalo mahitungod sa mga magmamando sa kalibotan: “Sa diha nga sila magaingon: ‘Kalinaw ug kasegurohan!’ niana ang kalit nga kalaglagan modangat dihadiha kanila ingon sa pag-ul-ol sa kasakit sa usa ka babayeng mabdos.” (1 Tesalonica 5:3) Kadtong nagasunod sa panig-ingnan ni Satanas dili magpatalinghog niining klaro nga pasidaan. Sila nabutaan tungod sa ilang daotang mga kasingkasing, ug kini nagpugong kanila sa paghinulsol sa ilang daotang dalan ug sa pagbag-o sa ilang mga laraw ug paagi nga nagasulay sa pagsanta sa mga katuyoan ni Jehova.

10. (a) Sa unsang sukod natuman ang 1 Tesalonica 5:​3, apan unsay angay nga reaksiyon sa katawhan ni Jehova? (b) Nganong ang mga tawong walay pagtuo mahimong mas agresibo sa umaabot sa pagsupak sa katawhan sa Diyos?

¹⁰ Ilabina sukad sa 1986, sa dihang gideklarar sa Hiniusang Kanasoran ang Internasyonal nga Tuig sa Kalinaw, ang kalibotan okupado kaayo sa paghisgot bahin sa kalinaw ug kasegurohan. Gihimo ang tinong mga lakang diha sa usa ka paningkamot nga maangkon ang kalinaw sa kalibotan, ug may igoigo kining kalamposan. Mao ba kini ang tibuok nga katumanan niining tagnaa, o kita ba makalaom ug makakurat nga usa ka matang sa paanunsiyo? Ipatin-aw ni Jehova kanang butanga sa iyang tinakdang panahon. Kasamtangan, magpabilin kita nga magmata sa espirituwal, “nga nagapaabot ug kanunayng ginahuptan nga duol sa hunahuna ang pagkaanaa sa adlaw ni Jehova.” (2 Pedro 3:12) Samtang ang panahon nagpadayon sa paglabay nga magadugang ang panaghisgot bahin sa kalinaw ug kasegurohan, ang ubang mga indibiduwal nga nahibalo niining pasidaana, apan mopili sa dili pagpanumbaling niini, mahimong mosupak pa sa dili pagtuo nga si Jehova dili motuman, o dili makatuman, sa iyang pulong. (Itandi ang Ecclesiastes 8:​11-13; 2 Pedro 3:​3, 4.) Apan ang matuod nga mga Kristohanon nahibalo nga tumanon ni Jehova ang iyang katuyoan!

Hustong Pagtahod sa mga Ahensiya nga Gigamit ni Jehova

11. Unsay nakat-onan ni Daniel ug Jose bahin kang Jehova?

¹¹ Sa dihang si Haring Nabucodonosor, nga magmamando sa Neo-Babilonyanhong Imperyo, nagdamgo ug makatugawng damgo nga dili siya makahinumdom, nangayo siya ug tabang. Ang iyang mga saserdote, mga salamangkero, ug mga diwatahan dili makapadayag kaniya kon unsa ang iyang damgo ni makapatin-aw kon unsay kahulogan niini. Apan, ang alagad sa Diyos nga si Daniel nakapadayag kon unsay iyang damgo, apan siya miadmitir dihadiha nga ang pagbutyag sa damgo ug ang kahulogan niini dili maoy tungod sa iyang kaugalingong kaalam. Si Daniel miingon: “Adunay usa ka Diyos sa langit nga Tigpadayag sa mga tinago, ug siya nagpahibalo kang Haring Nabucodonosor kon unsay mahitabo sa kataposang bahin sa mga adlaw.” (Daniel 2:​1-30) Sa daghang siglo sayo pa niini, si Jose, laing manalagna sa Diyos, nakaeksperyensiya usab nga si Jehova maoy usa ka Tigpadayag sa mga tinago.​—Genesis 40:​8-22; Amos 3:​7, 8.

12, 13. (a) Kinsa ang kinadak-ang manalagna sa Diyos, ug nganong mao kanay imong tubag? (b) Kinsa karon ang nag-alagad ingong “mga tinugyanan sa sagradong mga tinago sa Diyos,” ug sa unsang paagi angay nato silang lantawon?

¹² Ang kinadak-ang manalagna ni Jehova nga nag-alagad sa yuta mao si Jesus. (Buhat 3:​19-24) Si Pablo nagpatin-aw: “Ang Diyos, kinsa namulong dugay na kanhi sa daghang okasyon ug sa daghang paagi ngadto sa atong mga katigulangan pinaagi sa mga propeta, sa kataposan niining mga adlawa namulong kanato pinaagi sa usa ka Anak, si kinsa gitudlo niya nga manununod sa tanang butang, ug pinaagi kang kinsa iyang gihimo ang mga sistema sa mga butang.”​—Hebreohanon 1:​1, 2.

¹³ Si Jehova nagpakigsulti sa unang mga Kristohanon pinaagi sa iyang Anak, si Jesus, kinsa nagpahibalo sa diyosnong mga tinagoan ngadto kanila. Gisultihan sila ni Jesus: “Kaninyo gikatugot ang pagsabot sa sagradong mga tinago sa gingharian sa Diyos.” (Lucas 8:10) Si Pablo sa ulahi naghisgot bahin sa dinihogang mga Kristohanon ingong “mga ubos ni Kristo ug mga tinugyanan sa sagradong mga tinago sa Diyos.” (1 Corinto 4:1) Karong adlawa, ang dinihogang mga Kristohanon nagpadayon sa pag-alagad nga ingon niana, nga naglangkob sa kasaligan ug mabuot nga ulipon nga matang nga pinaagi sa Nagamandong Lawas niini nagataganag espirituwal nga pagkaon sa hustong panahon. (Mateo 24:​45-47) Kon gitahod gayod nato pag-ayo ang dinasig nga mga manalagna sa Diyos sa nangaging panahon, ug ilabina ang Anak sa Diyos, dili ba angay usab natong tahoron ang tawhanong ahensiya nga gigamit ni Jehova karong adlawa sa pagpadayag sa impormasyon sa Bibliya nga kinahanglanon kaayo alang sa iyang katawhan niining malisod nga mga panahon?​—2 Timoteo 3:​1-5, 13.

Sa Pagkamadayganon o Pagkatinago?

14. Kanus-a nga padayong pagahimoon sa mga Kristohanon ang kalihokan sa tago, busa nagsunod sa kang kinsang panig-ingnan?

¹⁴ Ang pagkamadayganon ba ni Jehova sa pagbutyag sa mga butang nagpasabot nga ang mga Kristohanon kinahanglan sa tanang panahon ug ilalom sa tanang kahimtang magbutyag sa tanang butang nga ilang nahibaloan? Aw, ang mga Kristohanon mosunod sa tambag ni Jesus sa iyang mga apostoles nga ‘magmabinantayon ingon sa mga halas apan inosente ingon sa mga salampati.’ (Mateo 10:16) Kon sultihan nga dili sila mahimong mosimba sa Diyos sumala sa gipangayo sa ilang mga konsensiya, ang mga Kristohanon magpadayon sa ‘pagsugot sa Diyos,’ kay sila nahibalo nga walay tawhanong ahensiya ang may katungod sa pagdili sa pagsimba kang Jehova. (Buhat 5:29) Si Jesus mismo nagpasundayag sa pagkatukma niini. Atong mabasa: “Karon human niining mga butanga si Jesus mipadayon sa pagsuroy sa Galilea, kay dili niya buot mosuroy sa Judea, tungod kay ang mga Hudiyo nagatinguha man sa pagpatay kaniya. Apan, ang kasaulogan sa mga Hudiyo, ang kasaulogan sa mga tabernakulo, haduol na. Busa si Jesus miingon kanila [iyang dili-magtutuong mga igsoon sa unod]: . . . ‘Umadto kamo sa kasaulogan; ako dili pa moadto niini nga kasaulogan, tungod kay ang akong takdang panahon wala pa sa bug-os moabot.’ Busa human niya isulti kanila kining mga butanga, siya mipabilin sa Galilea. Apan sa nakaadto na ang iyang mga igsoong lalaki sa kasaulogan, niana siya usab miadto mismo, dili sa dayag apan sa tago.”​—Juan 7:​1, 2, 6, 8-10.

Motug-an ba o Dili?

15. Sa unsang paagi gipakita ni Jose nga ang dili pagtug-an sa tinago usahay mao ang mahigugmaong butang nga himoon?

¹⁵ Sa pila ka kahimtang, ang pagtago sa usa ka butang dili lamang maalamon kondili usab mahigugmaon. Pananglitan, sa unsang paagi si Jose, ang ama-ama ni Jesus, milihok sa dihang iyang nahibaloan nga ang iyang sinayorang pangasaw-onon, si Maria, “mabdos pinaagi sa balaang espiritu”? Atong mabasa: “Hinunoa, si Jose nga iyang bana, tungod kay siya matarong ug dili buot nga himoon siyang usa ka talan-awon sa publiko, naglaraw sa pagdiborsiyo kaniya sa tago.” (Mateo 1:18, 19) Pagkadi-maluloton unta kon himoon siya nga talan-awon sa publiko!

16. Unsang kaakohan ang pagahimoon sa mga ansiyano, maingon man sa tanang ubang membro sa kongregasyon, may kalabotan sa kompidensiyal nga mga butang?

¹⁶ Ang kompidensiyal nga mga butang nga mohatag ug kaulawan o kasakit dili angay isulti ngadto sa mga tawong walay labot. Kinahanglang ibutang kini sa hunahuna sa Kristohanong mga ansiyano sa dihang sila mohatag ug personal nga tambag o paghupay sa kaubang mga Kristohanon o kaha magadisiplina kanila tungod sa mabug-at nga sala batok kang Jehova. Ang pag-atiman niining mga butanga sa Kasulatanhong paagi gikinahanglan; ang pagpadayag sa kompidensiyal nga mga butang ngadto sa mga tawong walay labot wala kinahanglana ug dili-mahigugmaon. Sa pagkatinuod, ang mga membro sa Kristohanong kongregasyon dili mosulay sa pagsukitsukit sa kompidensiyal nga impormasyon gikan sa mga ansiyano apan magatahod sa kaakohan sa ansiyano sa pagtago sa kompidensiyal nga butang. Ang Proverbio 25:​9 nag-ingon: “Ipangaliyupo ang imong kahimtang uban sa imong isigkatawo, ug ayaw pag-ibutyag ang tinago sa ubang tawo.”

17. Nganong ang mga Kristohanon sa kadaghanang kahimtang magtago sa kompidensiyal nga mga butang, apan nganong dili nila kini itago sa tanang panahon?

¹⁷ Kining prinsipyoha usab tinuod sulod sa pamilya o sa suod nga mga higala. Ang pagtago sa kompidensiyal nga mga butang hinungdanon aron malikayan ang di-pagsinabtanay ug pagkadaot sa mga relasyon. “Ang hangin sa amihanan nagadala ug ulan; mao man ang usa ka dila nga nagabutyag ug tinago, magadala ug usa ka masuk-anong dagway.” (Proverbio 25:23) Sa pagkatinuod, ang pagkamaunongon ngadto kang Jehova ug sa iyang matarong nga mga prinsipyo, maingon man ang gugma alang sa nakasalang mga indibiduwal, tingali may panahong kinahanglang itug-an sa mga ginikanan, sa Kristohanong mga ansiyano, o sa ubang mga tawong awtorisado bisan ang kompidensiyal nga mga butang.a Apan sa kadaghanang kaso, tagoan sa mga Kristohanon ang personal nga mga sekreto sa uban, bantayan kini sama sa ilang pagbantay sa ilang kaugalingon.

18. Unsang tulo ka Kristohanong hiyas ang makatabang kanato sa pagtino kon unsa ang angay natong itug-an ug dili angay itug-an?

¹⁸ Agig sumaryo, sundogon sa usa ka Kristohanon si Jehova pinaagi sa pagtago sa pipila ka kompidensiyal nga mga butang kon gikinahanglan, itug-an lang kini kon angay. Sa paghukom kon unsa ang iyang itug-an ug dili itug-an, siya giyahan sa pagkamapaubsanon, pagtuo, ug gugma. Ang pagkamapaubsanon magpugong kaniya batok sa sobra nga pagpaimportante sa kaugalingon, nga maningkamot nga madayeg sa uban pinaagi sa pagtug-an kanila sa tanang butang nga iyang nahibaloan o pinaagi sa pagpahinam kanila sa mga sekreto nga dili niya ikatug-an. Ang pagsalig sa Pulong ni Jehova ug sa Kristohanong kongregasyon magtukmod kaniya sa pagsangyaw sa diyosnong pagkatagana nga impormasyon sa Bibliya samtang magbantay sa pagsultig mga butang nga mahimong makasilo sa uban sa sinugdan. Oo, ang gugma magtukmod kaniya sa dayag nga pagsulti sa mga butang nga nagahimaya sa Diyos ug nga kinahanglang mahibaloan sa mga tawo aron makabaton ug kinabuhi. Ang kompidensiyal personal nga mga butang, sa laing bahin, siya magbantay, kay nahibalo nga sa kadaghanang kahimtang ang pagtug-an niini magpaila sa pagkakulang ug gugma.

19. Unsang buhat ang makatabang sa pag-ila sa matuod nga mga Kristohanon, ug unsay mosangpot niini?

¹⁹ Kining timbang nga paagi makatabang sa pag-ila sa matuod nga mga Kristohanon. Wala nila itago kon kinsa ang Diyos diha sa likod sa maskara sa pagkawalay-ngalan o sa likod sa usa ka misteryoso, dili-ikapatin-awng doktrina nga Trinidad. Ang wala-hiilhing mga diyos mao ang kinaiyahan sa bakak nga relihiyon, dili sa matuod. (Tan-awa ang Buhat 17:​22, 23.) Ang dinihogang mga Saksi ni Jehova nagapabili gayod sa pribilehiyo sa pagkahimong “mga tinugyanan sa sagradong mga tinago sa Diyos.” Pinaagi sa dayag nga pagbutyag niining mga tinago ngadto sa uban, sila nagatabang sa pagdani sa mga matinud-anon ug kasingkasing sa pagpangita sa panaghigala ni Jehova.​—1 Corinto 4:​1; 14:​22-25; Zacarias 8:​23; Malaquias 3:18.

[Footnote]

Unsay Imong Tubag?

◻ Nganong dili kinahanglang tagoon ni Jehova ang iyang mga katuyoan?

◻ Ngadto kang kinsa gipadayag ni Jehova ang iyang mga tinago?

◻ Unsa ang mga kaakohan sa mga Kristohanon may kalabotan sa kompidensiyal nga mga butang?

◻ Unsang tulo ka hiyas ang makatabang sa mga Kristohanon sa pagkahibalo kon unsay itug-an o dili itug-an?

[Mga hulagway sa panid 8, 9]

Si Jehova nagapadayag sa mga tinago pinaagi sa iyang Pulong