Diyosnong Pagtulon-an Nagmadaogon

“Ang imong mga mata mahimo gayong mga mata nga nakakita sa imong Dakong Instruktor. Ug ang imong mga igdulongog makadungog sa usa ka pulong sa imong likod nga magaingon: ‘Kini mao ang dalan. Lumakaw kamo diha niana.’”​—ISAIAS 30:20, 21.

1. Nganong ang instruksiyon ni Jehova tukmang matawag nga diyosnong pagtulon-an?

SI Jehova nga Diyos ang Tinubdan sa labing maayong pagtulon-an nga mahimong madawat ni bisan kinsa. Kon magpatalinghog kita sa dihang siya mosulti, ilabina pinaagi sa iyang Sagradong Pulong, siya mahimong atong Dakong Instruktor. (Isaias 30:20) Ang Hebreohanong teksto sa Bibliya nagtawag kaniyang “ang Usa nga Balaan.” (Salmo 50:1) Busa, ang instruksiyon ni Jehova maoy balaan o diyosnong pagtulon-an.

2. Sa unsang diwa matuod nga ang Diyos mao lamang ang maalamon?

² Gipasigarbo sa kalibotan ang daghang edukasyonal nga institusyon niini, apan walay usa niana ang mohatag ug diyosnong pagtulon-an. Ngani, ang tanang kaalam sa kalibotan nga natigom sa tibuok kasaysayan gamay ra kon itandi sa diyosnong instruksiyon nga gipasukad sa way-kinutobang kaalam ni Jehova. Ang Roma 16:27 nag-ingon nga ang Diyos mao lamang ang maalamon, ug tinuod kini sa diwa nga si Jehova lamang ang nagbaton ug hingpit nga kaalam.

3. Nganong si Jesu-Kristo ang labing dakong magtutudlo nga sukad nabuhi sa yuta?

³ Ang Anak sa Diyos, si Jesu-Kristo, maoy sumbanan sa kaalam ug kinabantogang magtutudlo nga nabuhi sukad sa yuta. Dili katingalahan! Sa dugay nang kapanahonan si Jehova mao ang iyang Magtutudlo sa kalangitan. Sa pagkamatuod, ang diyosnong pagpanudlo nagsugod sa gisugdan sa Diyos ang pagtudlo sa una niyang linalang, ang iyang bugtong nga Anak. Busa si Jesus nakaingon: “Ingon sa gitudlo sa Amahan kanako ako nagapamulong niining mga butanga.” (Juan 8:28; Proverbio 8:22, 30) Ang mismong mga pulong ni Kristo nga nahitala sa Bibliya dakog ikadugang sa atong kahibalo sa diyosnong pagtulon-an. Pinaagi sa pagtudlo kon unsay gitudlo ni Jesus, ang dinihogang mga Kristohanon nagsugot sa ilang Dakong Instruktor, kansang kabubut-on mao nga “ang nagkadaiya uyamot nga kaalam sa Diyos” ikapahibalo pinaagi sa kongregasyon.​—Efeso 3:10, 11; 5:1; Lucas 6:40.

Ang Pagpangagpas sa Kaalam

4. Unsay gikaingon mahitungod sa katakos sa utok?

⁴ Ang pagbaton ug kaalam nga maoy sangpotanan sa diyosnong pagpanudlo nagkinahanglan sa kugi nga paggamit sa atong hinatag-Diyos nga mga katakos sa paghunahuna. Posible kini kay ang utok sa tawo dako kaayog natagong katakos. Matud sa librong The Incredible Machine: “Bisan ang labing komplikadong mga kompiyuter nga atong mahulagway maoy baroton kon itandi sa halos way-kinutobang kakuti ug kamapaayon-ayonon sa utok sa tawo​—mga hiyas nga gipahinabo sa iyang kuti, may-sukdanan nga sistema sa elektrokemikal nga senyales. . . . Ang minilyong senyales nga mokilab agi sa imong utok sa bisan unsang gutlo magdalag talagsaong kargada sa impormasyon. Kini magdalag balita mahitungod sa sulod ug gawas nga kalikopan sa imong lawas: mahitungod sa pamikog sa imong tudlo sa tiil, o kahumot sa kape, o kataw-anang komento sa usa ka higala. Samtang ang ubang senyales magproseso ug mag-analisar sa impormasyon, ipatungha niini ang pila ka emosyon, mga handumanan, mga hunahuna, o mga plano nga mosangko sa usa ka desisyon. Halos dihadiha, ang senyales gikan sa imong utok mosulti sa ubang mga bahin sa imong lawas kon unsay buhaton: ikitiwkitiw ang imong tudlo sa tiil, imna ang kape, katawa, o tingali ihatag ang igmat nga tubag. Kasamtangan ang imong utok nagabantay usab sa imong pagginhawa, kemistriya sa dugo, temperatura, ug ubang hinungdanong mga proseso nga wala ka makaamgo. Kini magpadalag mga sugo nga ipadayon ang di-mabalhinon ug hapsayng obra sa imong lawas bisan pa sa kanunayng kausaban sa inyong kalikopan. Kini usab mangandam alang sa umaabot nga mga panginahanglan.”​—Panid 326.

5. Sa Kasulatanhong diwa, unsay kaalam?

⁵ Bisan pag ang utok sa tawo sa walay duhaduha adunay kahibulongang katakos, sa unsang paagi magamit nato ang kaisipan sa labing maayong paagi? Dili pinaagi sa atong paghatag ug bug-os nga pagtagad sa hagong pagtuon sa pinulongan, kasaysayan, siyensiya, o matandiong relihiyon. Kinahanglang gamiton nato ang atong mga katakos sa paghunahuna ilabina diha sa pagdawat ug diyosnong pagtulon-an. Kini lamang ang mosangpot sa tinuod nga kaalam. Apan unsa ang tinuod nga kaalam? Sa Kasulatanhong diwa, ang kaalam nagpasiugda sa maayong pangatarongan nga gibase sa tukmang kahibalo ug tinuod nga pagsabot. Ang kaalam mopaarang nato sa paggamit nga malamposon sa kahibalo ug pagsabot aron sa pagsulbad sa mga suliran, sa paglikay o pagsanta sa mga kapeligrohan, sa pagtabang sa uban, ug sa pagkab-ot sa mga tumong. Makaiikag, giatbang sa Bibliya ang kaalam sa kabuangan ug kahungog​—mga kinaiya nga gusto gayod natong likayan.​—Deuteronomio 32:6; Proverbio 11:29; Ecclesiastes 6:8.

Talagsaong Basahong-Tun-anan ni Jehova

6. Aron ipadayag nato ang matuod nga kaalam, unsay kinahanglan nga gamiton nato pag-ayo?

⁶ Daghan ang kalibotanong kaalam alirong nato. (1 Corinto 3:18, 19) Ngani, kining kalibotana adunay daghang eskuylahan ug mga librarya nga adunay minilyong libro! Daghan niini kanila maoy mga basahong-tun-anan nga mohatag ug instruksiyon sa pinulongan, matematika, siyensiya, ug ubang mga natad sa kahibalo. Apan ang Dakong Instruktor nagtagana ug basahong-tun-anan nga molabaw sa tanan nga uban​—ang iyang dinasig nga Pulong, ang Bibliya. (2 Timoteo 3:16, 17) Kini tukma dili lamang kon maghisgot sa mga ulohang sama sa kasaysayan, geograpiya, ug botaniya kondili sa dihang magtagna usab sa umaabot. Dugang pa, motabang kini kanato sa pagkinabuhi sa labing malipayon ug labing mabungahong kinabuhi karon mismo. Siyempre, ingon nga ang mga estudyante sa usa ka eskuylahan sa kalibotan kinahanglang mogamit sa ilang mga libro, kinahanglang kita masinati pag-ayo ug mogamit sa dakong Basahong-tun-anan sa Diyos aron ipasundayag nato ang matuod nga kaalam ingong mga “tinudloan ni Jehova.”​—Juan 6:45.

7. Nganong makaingon ka nga ang pagkadunay kahibalo lamang sa ulo sa mga unod sa Bibliya dili paigo?

⁷ Bisan pa, ang pagkadunay kahibalo sa ulo lamang sa Bibliya dili sama sa matuod nga kaalam ug pagsunod sa diyosnong pagtulon-an. Ingong ilustrasyon: Sa ika-17ng siglo K.P., usa ka Katolikong lalaki nga ginganlag si Cornelius van der Steen gustong mahimo nga Heswita apan wala madawat kay siya putot kaayo. Matud ni Manfred Barthel diha sa iyang librong The Jesuits​—History & Legend of the Society of Jesus: “Ang komite nagpahibalo kang van der Steen nga andam silang mohikling sa panginahanglan sa kahabogon, apan sa kondisyon lamang nga siya makasag-ulo sa tibuok Bibliya. Ang estorya dili na angay isugid kon si van der Steen wala pa mosugot niining hingaping gipangayo.” Pagkahago ang pagsag-ulo sa tibuok Bibliya! Apan, sa tinuoray pagkalabi pang hinungdanon nga sabton ang Pulong sa Diyos inay sag-ulohon kini.

8. Unsay motabang kanato sa pagbatog kaayohan gikan sa diyosnong pagtulon-an ug pagpadayag sa matuod nga kaalam?

⁸ Aron makabaton kita sa bug-os nga kaayohan sa diyosnong pagpanudlo ug magpadayag sa matuod nga kaalam, gikinahanglan nato ang tukmang kahibalo sa Kasulatan. Gikinahanglan usab nga giyahan kita sa balaang espiritu o aktibong gahom ni Jehova. Kini mopaarang nato sa pagkakat-on sa talagsaong mga kamatuoran, “ang laglom nga mga butang sa Diyos.” (1 Corinto 2:10) Busa, sa makugihon tun-an nato ang talagsaong Basahong-tun-anan ni Jehova ug iampo ang iyang paggiya pinaagi sa balaang espiritu. Nahiuyon sa Proverbio 2:1-6, atong pamatian ang kaalam, ikiling ang atong kasingkasing sa pag-ila, ug sangpiton ang salabotan. Kinahanglang buhaton nato kini nga samag kita nangita ug nalubong nga bahandi, kay nianang panahona lamang nga kita ‘makasabot sa pagkahadlok kang Jehova ug makakaplag sa kahibalo mismo sa Diyos.’ Ang paghisgot sa pipila ka kadaogan ug mga kaayohan sa diyosnong pagtulon-an mopausbaw sa atong pagpabili sa hinatag-Diyos nga kaalam.

Mauswagon nga Pagsabot

9, 10. Unsay giingon sa Diyos, sumala sa nahisulat sa Genesis 3:15, ug unsa ang tukmang pagsabot nianang mga pulonga?

⁹ Ang diyosnong pagtulon-an nagmadaogon tungod sa paghatag sa katawhan ni Jehova ug mauswagong pagsabot sa Kasulatan. Pananglitan, atong nasayran nga si Satanas nga Yawa ang misulti pinaagi sa bitin sa Eden ug nagbutangbutang nga ang Diyos namakak sa dihang Siya miingon nga kamatayon ang silot sa pagkaon sa gidiling bunga. Bisan pa niana, atong nakita nga ang pagkamasupakon kang Jehova nga Diyos tinuod nga nagpahinabo sa kamatayon sa tawhanong banay. (Genesis 3:1-6; Roma 5:12) Bisan pa, ang Diyos naghatag sa katawhan ug paglaom sa giingnan niya ang bitin, ug sa ingon si Satanas: “Igabutang ko ang panagkaaway tali kanimo ug sa babaye ug tali sa imong binhi ug sa iyang binhi. Pagasamaran ka niya sa ulo ug ikaw pagasamaran niya sa tikod.”​—Genesis 3:15.

¹⁰ Kanang mga pulonga naglakip sa usa ka sekreto nga mauswagong gipadayag pinaagi sa diyosnong pagpanudlo. Si Jehova nagtudlo sa iyang katawhan nga ang pangunang tema sa Bibliya mao ang kabayawan sa iyang pagkasoberano pinaagi sa Binhi, nga usa ka kaliwat ni Abraham ug ni David nga may legal nga katungod sa pagkamagmamando sa Gingharian. (Genesis 22:15-18; 2 Samuel 7:12, 13; Ezekiel 21:25-27) Ang atong Dakong Instruktor nagtudlo kanato nga si Jesu-Kristo mao ang pangunang Binhi sa “babaye,” ang unibersohanong organisasyon sa Diyos. (Galacia 3:16) Bisan pa sa tanang pagsulay nga gipahamtang ni Satanas kaniya, gihuptan ni Jesus ang integridad​—bisan hangtod sa kamatayon, ang pagsamad sa Binhi diha sa tikod. Nasayran usab nato nga ang 144,000 kaubang manununod sa Gingharian gikan sa katawhan moduyog kang Kristo sa pagdugmok sa ulo ni Satanas, “ang orihinal nga bitin.” (Pinadayag 14:1-4; 20:2; Roma 16:20; Galacia 3:29; Efeso 3:4-6) Pagkadako sa atong pagpabili sa maong kahibalo sa Pulong sa Diyos!

Ngadto sa Kahibulongang Kahayag sa Diyos

11. Nganong ikaingon nga ang diyosnong pagpanudlo nagmadaogon tungod sa pagpadangat sa mga tawo sa espirituwal nga kahayag?

¹¹ Ang diyosnong pagtulon-an nagmadaogon tungod sa pagpadangat sa mga tawo ngadto sa espirituwal nga kahayag. Ang dinihogang mga Kristohanon nakasinati niana ingong katumanan sa 1 Pedro 2:9: “Apan kamo maoy ‘usa ka piniling rasa, usa ka harianong pagkasaserdote, usa ka balaan nga nasod, usa ka katawhan alang sa linaing pagpanag-iya, aron nga sa kaylap inyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.” Karong adlawa, ang hinatag-Diyos nga kahayag gipahimuslan usab sa “usa ka dakong panon” nga mabuhi sa walay kataposan sa usa ka paraisong yuta. (Pinadayag 7:9; Lucas 23:43) Samtang ang Diyos magatudlo sa iyang katawhan, ang Proverbio 4:18 mahimong tinuod: “Ang dalan sa mga matarong maoy sama sa sanag nga kahayag nga magakasanag ug magakasanag hangtod sa pagkahingpit sa adlaw.” Kining mauswagong paagi sa pagkakat-on magadalisay sa atong pagsabot sa diyosnong pagtulon-an, maingon nga ang mga estudyante mouswag tungod sa maayong tabang sa usa ka magtutudlo samtang sila magatuon sa gramatika, kasaysayan, o sa laing ulohan.

12, 13. Batok sa unsang makuyawng mga doktrina nga ang diyosnong pagtulon-an nanalipod sa katawhan ni Jehova?

¹² Ang laing kadaogan sa diyosnong pagtulon-an mao nga manalipod kini sa mapaubsanong mga nagdawat niini batok sa “mga pagtulon-an sa mga demonyo.” (1 Timoteo 4:1) Sa laing bahin, tan-awa ang Kakristiyanohan! Niadtong 1878, ang Romano Katolikong obispong si John Henry Newman misulat: “Kay nagsalig niadto sa gahom sa Kristiyanidad sa pagsukol sa pagtakod sa kadaotan, ug pag-usab sa mga galamiton mismo ug mga tulomanong konektado sa pagsimba sa demonyo ngadto sa pagkagalamiton sa maayong balita, . . . ang mga pangulo sa Simbahan sukad sa sayong mga panahon andam, kon motungha ugaling ang higayon, sa pagsagop, o pagsundog, o pag-uyon sa naglungtad nga mga rituwal ug mga kostumbre sa katawhan, ingon man sa pilosopiya sa edukadong matang.” Si Newman midugang nga ang mga butang sama sa balaang tubig, sotana sa pari, ug mga imahen “ngatanan may paganong sinugdanan, ug gibalaan tungod sa pagkasagop niini sa Simbahan.” Ang katawhan sa Diyos mapasalamaton gayod nga ang diyosnong pagtulon-an nanalipod kanila batok sa maong apostasiya. Kini nagmadaogon batok sa tanang matang sa demonismo.​—Buhat 19:20.

¹³ Ang diyosnong pagtulon-an nagmadaogon batok sa relihiyosong kasaypanan sa tanang paagi. Ingong mga tawo nga tinudloan sa Diyos, pananglitan, dili kita motuo ug Trinidad kondili nag-ila nga si Jehova mao ang Labing Hataas, si Jesus mao ang iyang Anak, ug ang balaang espiritu mao ang aktibong gahom sa Diyos. Dili kita mahadlok ug impiyernong-kalayo, kay nasayod kita nga ang impiyerno sa Bibliya mao ang kasagarang lubnganan sa katawhan. Ug samtang ang mga sumusunod sa bakak nga relihiyon nag-ingon nga ang tawhanong kalag dili mamatay, nasayod kita nga ang mga patay walay nahibaloan nga bisan unsa. Makahisgot kita ug daghang kamatuoran nga nabatonan tungod sa diyosnong pagtulon-an. Dako gayong panalangin nga mahigawas sa espirituwal nga kaulipnan sa Dakong Babilonya, ang empiryo sa kalibotan sa bakak nga relihiyon!​—Juan 8:31, 32; Pinadayag 18:2, 4, 5.

14. Nganong ang mga alagad sa Diyos makapadayon sa paglakaw diha sa espirituwal nga kahayag?

¹⁴ Tungod kay ang diyosnong pagtulon-an nagmadaogon batok sa relihiyosong kasaypanan, kini makapaarang sa mga alagad sa Diyos sa paglakaw diha sa espirituwal nga kahayag. Sa pagkamatuod, sila makadungog sa usa ka pulong sa ilang likod nga magaingon: “Kini mao ang dalan. Lumakaw kamo diha niana.” (Isaias 30:21) Ang pagtulon-an sa Diyos magapanalipod usab sa iyang mga alagad batok sa bakak nga pangatarongan. Sa dihang “ang mini nga mga apostol” nagpahinabog kasamok sa kongregasyon sa Corinto, si apostol Pablo misulat: “Kay ang mga hinagiban sa among pagpakiggubat dili unodnon, apan gamhanan pinaagi sa Diyos alang sa pagpamukan sa lig-ong pagkatarok nga mga butang. Kay among ginapamukan ang mga pangatarongan ug ang matag tugbawng butang nga gibangon batok sa kahibalo sa Diyos; ug among ginahimong binihag ang tanang hunahuna aron himoon kining masinugtanon kang Kristo.” (2 Corinto 10:4, 5; 11:13-15) Ang mga pangatarongan nga supak sa diyosnong pagtulon-an gipukan pinaagi sa instruksiyon nga gihatag uban sa kalumo diha sa kongregasyon ug pinaagi sa pagwali sa maayong balita ngadto sa mga tagagawas.​—2 Timoteo 2:24-26.

Pagsimba Pinaagi sa Espiritu ug Kamatuoran

15, 16. Unsay kahulogan sa pagsimba kang Jehova pinaagi sa espiritu ug kamatuoran?

¹⁵ Samtang mouswag ang buluhatong pagwali sa Gingharian, ang diyosnong pagtulon-an nagmadaogon sa pagpakita sa mga maaghop kon unsaon pagsimba ang Diyos “pinaagi sa espiritu ug kamatuoran.” Sa atabay ni Jacob duol sa siyudad sa Sicar, giingnan ni Jesus ang usa ka babayeng Samarianhon nga siya makataganag tubig nga magahatag ug kinabuhing walay kataposan. Sa pagtumong sa mga Samarianhon, siya midugang: “Kamo nagasimba sa wala ninyo mailhi . . . Ang takna nagasingabot, ug mao na karon, sa dihang ang matuod nga mga magsisimba mosimba sa Amahan pinaagi sa espiritu ug kamatuoran, kay, sa pagkatinuod, ang Amahan nagapangita sa mga ingon kanila nga mosimba kaniya.” (Juan 4:7-15, 21-23) Unya si Jesus nagpaila nga siya mao ang Mesiyas.

¹⁶ Apan sa unsang paagi makasimba kita sa Diyos pinaagi sa espiritu? Pinaagi sa paghatag ug putling pagsimba gikan sa mapasalamatong mga kasingkasing nga nahupong sa gugma sa Diyos nga pinasukad sa tukmang kahibalo sa iyang Pulong. Makasimba kita kaniya pinaagi sa kamatuoran pinaagi sa pagsalikway sa relihiyosong mga kabakakan ug pinaagi sa pagbuhat sa kabubut-on sa Diyos, sumala sa gipadayag diha sa dakong Basahong-tun-anan ni Jehova.

Nagmadaogon Batok sa mga Pagsulay ug sa Kalibotan

17. Sa unsang paagi makapamatuod ka nga ang diyosnong pagtulon-an nakatabang sa mga alagad ni Jehova sa pagsagubang sa mga pagsulay?

¹⁷ Sa dihang ang katawhan sa Diyos moatubang ug mga pagsulay, ang diyosnong pagtulon-an subsob nga magmadaogon. Tagda kini: Sa pagsugod sa Gubat sa Kalibotan II, sa Septiyembre 1939, ang mga alagad ni Jehova nagkinahanglag espesyal nga pagsabot sa iyang dakong Basahong-Tun-anan. Nakatabang pag-ayo ang usa ka artikulo diha sa The Watchtower, Nobyembre 1, 1939, nga tin-awng nagpahayag sa diyosnong pagtulon-an mahitungod sa Kristohanong pagkaneyutral. (Juan 17:16) Sa susama, sa sinugdanan sa katuigang 1960, ang mga artikulo sa Bantayanang Torre mahitungod sa may-kinutobang pagpasakop sa kagamhananong “labawng mga pagbulot-an” nakatabang sa katawhan sa Diyos sa pagsunod sa diyosnong pagtulon-an bisan pa sa katilingbanong kagubot.​—Roma 13:1-7; Buhat 5:29.

18. Unsay pag-isip sa nag-angkong mga Kristohanon sa ikaduha ug ikatulong mga siglo K.P. sa dili-ligdong nga kalingawan, ug unsang tabang ang gitagana sa diyosnong pagtulon-an bahin niana karong adlawa?

¹⁸ Ang diyosnong pagtulon-an moabag kanato nga magmadaogon batok sa mga panental, sama sa mga pangdani sa pagtinguhag dili-ligdong nga kalingawan. Matikdi ang giingon sa nag-angkong mga Kristohanon sa ikaduha ug ikatulong mga siglo sa atong Komong Panahon. Si Tertullian misulat: “Kami wala makiglabot, sa sinultihan, panan-aw o pandungog, sa kabuangan sa sirkos, sa kawalay-ulaw sa teatro, sa kaluog sa hawanan sa dula.” Ang laing magsusulat niadtong yugtoa nangutana: “Unsay pagabuhaton sa usa ka matinumanong Kristohanon taliwala niining mga butanga, sanglit siya dili gani angay magpalandong sa pagkadaotan? Nganong siya mahimuot man sa mga paghulagway sa kaulag?” Bisan pag ang maong mga magsusulat nabuhig pila ka tuig tapos sa unang-siglong mga Kristohanon, gisaway nila ang dili-ligdong nga mga kalingawan. Karong adlawa, ang diyosnong pagtulon-an mohatag kanatog kaalam sa paglikay sa malaw-ay, imoral, ug mapintas nga kalingawan.

19. Sa unsang paagi ang diyosnong pagtulon-an motabang kanato nga magmadaogon batok sa kalibotan?

¹⁹ Ang pagsunod sa diyosnong pagtulon-an makapaarang nato sa pagdaog batok sa kalibotan mismo. Oo, ang pagpadapat sa pagtulon-an sa atong Dakong Instruktor mohimo kanatong madaogon batok sa daotang mga impluwensiya niining kalibotana nga nahimutang sa gahom ni Satanas. (2 Corinto 4:4; 1 Juan 5:19) Ang Efeso 2:1-3 nag-ingon nga gibuhi kita sa Diyos bisan pag kita namatay na diha sa atong kalapasan ug kasal-anan sa dihang kita naggawi sumala sa magmamando sa pagbulot-an sa kahanginan. Nagpasalamat kita kang Jehova nga ang diyosnong pagtulon-an nagtabang kanato nga magmadaogon batok sa kalibotanong mga pangibog ug sa espiritung nagagikan sa iya ug sa atong kaaway​—ang pangunang maglilimbong, si Satanas nga Yawa!

20. Unsang mga pangutana ang takos sa dugang paghisgot?

²⁰ Nan, tin-aw nga ang diyosnong pagtulon-an nagmadaogon sa daghang paagi. Sa pagkamatuod, maorag imposible ang paghisgot sa tanang kadaogan niini. Ang katawhan sa tibuok kalibotan apektado niini. Apan unsay ginabuhat niini alang kanimo? Sa unsang paagi ginaapektahan sa diyosnong pagtulon-an ang imong kinabuhi?

Unsay Nakat-onan Nimo?

◻ Unsay kahulogan sa matuod nga kaalam?

◻ Unsay mauswagong gipadayag sa Diyos mahitungod sa Genesis 3:15?

◻ Sa unsang paagi ang balaang pagtulon-an nagmadaogon sa espirituwal nga mga butang?

◻ Unsay kahulogan sa pagsimba sa Diyos pinaagi sa espiritu ug kamatuoran?

◻ Sa unsang paagi ang diyosnong pagtulon-an nakatabang sa mga alagad ni Jehova nga magmadaogon batok sa mga pagsulay ug sa kalibotan?

[Hulagway sa panid 10]

Gihuptan ni Jesus ang integridad hangtod sa kamatayon​—ang pagsamad sa Binhi diha sa tikod