Usa ka Bag-ong Kinabuhi Alang sa Atong mga Katigulangan

GITUDLO ba sa Pulong sa Diyos, ang Bibliya, nga ang matag usa sa naandan magpadayon sa pagkinabuhi sa kalibotan sa espiritu inigkamatay? Wala, wala kini magtudlo. Ang Bibliya nagtanyag ug kahibulongang paglaom sa kinabuhi human sa kamatayon, apan dili sa paagi nga gihunahuna sa daghan.

Tagda kon unsay giingon sa Bibliya bahin sa atong unang katigulangan, si Adan. Si Jehova nag-umol kaniya “gikan sa abog sa yuta.” (Genesis 2:7) Si Adan may kahigayonan nga mabuhing walay kataposan diha sa kalipay sa yuta. (Genesis 2:16, 17) Ugaling, siya mirebelde batok sa iyang mahigugmaong Maglalalang, ug ang resulta mao ang kamatayon.

Diin ba miadto si Adan sa dihang namatay? Ang Diyos nag-ingon kaniya: “Mobalik ka sa yuta, tungod kay gikan niini gikuha ikaw. Kay abog ka ug sa abog ikaw mobalik.”​—Genesis 3:19.

Diin ba si Adan sa wala pa si Jehova maglalang kaniya gikan sa abog? Wala bisag asa. Wala siya maglungtad. Busa sa dihang si Jehova miingon nga si Adan “mobalik sa yuta,” buot lang niyang ingnon nga si Adan sa makausa pa mahimong walay-kinabuhi, sama sa abog. Si Adan wala ‘motabok’ aron mahimong magtutukod sa kalibotan sa mga espiritu sa mga katigulangan. Siya wala moagi sa usa ka kinabuhi sa kahimayaan sa langit ni sa usa ka walay-kataposang pag-antos diha sa dapit sa pagsakit. Ang bugtong kausaban nga nahimo niya maoy gikan sa pagkinabuhi ngadto sa pagkawalay-kinabuhi, gikan sa paglungtad ngadto sa pagkawala-maglungtad.

Komosta ang nahibiling bahin sa katawhan? Ang mga kaliwat ba ni Adan dili na usab maglungtad inigkamatay? Ang Bibliya nagtubag: “Ang tanan [mga tawo ug mga mananap] mangadto sa usa lamang ka dapit. Silang tanan gikan sa abog, ug silang tanan mobalik sa abog.”​—Ecclesiastes 3:19, 20.

Ang Kahimtang sa mga Patay

Oo, ang mga patay walay-kinabuhi, dili makadungog, makakita, makasulti, o makahunahuna. Pananglitan, ang Bibliya nag-ingon: “Ang mga buhi nahibalo nga sila mangamatay; apan ang mga patay, sila dili mahibalo sa bisan unsa . . . Ang ilang gugma ug ang ilang kasilag ug ang ilang kasina nahanaw na.” Ang Bibliya usab nag-ingon: “Walay buluhaton ni paglaraw ni kahibalo ni kaalam sa Sheol [ang lubnganan], ang dapit nga imong paingnan.”​—Ecclesiastes 9:5, 6, 10.

Busa, sumala sa Pulong sa Diyos, samtang buhi pa ang mga tawo, sila nahibalo bahin sa kamatayon. Apan, inigkamatay, sila wala nay mahibaloan. Sila dili magbarog sa kilid sa ilang kaugalingong patayng lawas, nga magtan-aw sa ginabuhat ngadto niana. Diha sa pagkawala-maglungtad walay kalipay ni kasakit, walay kasadya ni kasubo. Kadtong mga nangamatay walay kahibalo nga nagalabay ang panahon. Anaa sila sa kahimtang nga walay panimuot nga labaw pa sa lalom nga pagkatulog.

Si Job, nga usa ka alagad sa Diyos sa karaang panahon, nahibalo nga ang mga tawo dili magpadayong buhi human mamatay. Nakasabot usab siya nga kon dili mangilabot ang Diyos, walay paglaom sa pagkinabuhi pag-usab. Si Job miingon: “Ang mahimsog nga tawo mamatay ug ilubong; ug ang gininhawa sa yutan-ong tawo mabugto, ug hain na siya? [Siya] mohigda ug dili na mobangon.” (Job 14:10, 12) Si Job wala gayod magdahom nga inigkamatay niya siya moduyog sa iyang mga katigulangan sa kalibotan sa mga espiritu.

Ang Paglaom sa Pagkabanhaw

Sanglit ang buhi mohunong sa paglungtad inigkamatay, ang hinungdanong pangutana mao kanang gipatugbaw ni Job sa dihang siya nagpadayon sa pagpangutana: “Kon ang mahimsog nga tawo mamatay mabuhi pa ba siya pag-usab?” Si Job mismo ang mihatag niining tubaga: “Ang tanang adlaw sa akong pinugos nga pag-alagad [panahon diha sa lubnganan] ako magpaabot, hangtod ang akong kahupayan moabot. Ikaw [Jehova] motawag, ug kanimo ako motubag. Kay ang buhat sa imong mga kamot imong ginapangandoy.”​—Job 14:14, 15.

Sa laing pagkasulti, bisag si Job mibalhin ngadto sa pagkawala-maglungtad, dili siya kalimtan sa Diyos. Si Job nagtuo nga moabot ang panahon sa dihang si Jehova nga Diyos “motawag” kaniya ug balik ngadto sa kinabuhi pinaagi sa pagkabanhaw.

Si Jesu-Kristo, ang Anak sa Diyos, nagpakita nga ang paglaom ni Job sa pagkabanhaw matuod gayod. Gipamatud-an ni Jesus nga ang mga patay mabanhaw. Sa unsang paagi? Pinaagi sa pagbuhat mismo niana! Wala siya didto sa pagbanhaw kang Job, apan samtang dinhi pa sa yuta gibanhaw ni Jesus ang anak nga lalaki sa usa ka babayeng balo sa siyudad sa Nain. Gibanhaw usab ni Jesus ang 12-anyos nga batang babaye sa usa ka tawo nga ginganlag si Jairo. Ug iyang gibanhaw ang iyang higalang si Lazaro, nga namatay sulod na sa upat ka adlaw.​—Lucas 7:11-15; 8:41, 42, 49-56; Juan 11:38-44.

Dugang pa sa paghimo niining mga milagroha, si Jesus naghisgot bahin sa usa ka dakong umaabot nga pagpamanhaw. Siya miingon: “Ang takna nagasingabot diin kadtong tanan nga anaa sa handomanang mga lubnganan makadungog sa iyang tingog ug managpanggula.” (Juan 5:28, 29) Sa ulahi, si apostol Pablo, kinsa gigamit ni Jehova sa pagbanhaw sa usa ka batan-ong lalaki, mipahayag usab ug pagtuo sa umaabot nga pagkabanhaw. Siya miingon: “Ako adunay paglaom ngadto sa Diyos . . . nga aduna unyay pagkabanhaw sa mga matarong ug sa mga dili-matarong.”​—Buhat 20:7-12; 24:15.

Kining mga paghisgot sa Kasulatan bahin sa umaabot nga pagpamanhaw wala magtumong sa padayong kinabuhi diha sa kalibotan sa espiritu. Kini nagpunting sa panahon sa dihang ang milyonmilyong mga patay mobalik ngadto sa kinabuhi diha sa pisikal nga mga lawas dinhi mismo sa yuta. Kining mga pagabanhawon dili maoy mga tawong walay panumdoman sa ilang nangaging kinabuhi sa yuta. Sila dili ipakatawo-pag-usab ingong mga masuso. Hinunoa, sila mao ra gihapong mga tawhana sa dihang sila nangamatay, nga may samang mga panumdoman ug personalidad. Sila makaila sa ilang kaugalingon ug sa uban. Pagkamakapalipay unya samtang kining mga tawhana makig-uban pag-usab sa ilang mga higala ug mga pamilya! Ug pagkamakaiikag unya ang pakighimamat sa atong mga katigulangan!

Pagkabanhaw Ngadto sa Kinabuhi sa Langit

Dili ba si Jesus nag-ingon nga ang pipila moadto sa langit? Oo, siya miingon. Sa gabii una pa siya patya, siya miingon: “Sa balay sa akong Amahan adunay daghang puy-anan. . . . Ako molakaw aron sa pag-andam ug dapit alang kaninyo. Usab, kon ako molakaw ug mag-andam ug dapit alang kaninyo, ako moanhi pag-usab ug pagadawaton kamo ngadto sa akong kaugalingon, aron nga kon asa ako kamo usab maatua.” (Juan 14:2, 3) Si Jesus nakigsulti ngadto sa iyang matinumanong mga apostoles, apan ang iyang mga pulong wala magpasabot nga ang tanang maayong mga tawo moadto sa langit.

Si Jesus nagpakita nga kadtong pagabanhawon ngadto sa langit kinahanglang makakab-ot sa mga kinahanglanon gawas pa sa pagkinabuhig matarong nga kinabuhi. Usa ka kinahanglanon mao ang pagbatog tukmang kahibalo bahin kang Jehova ug sa iyang mga katuyoan. (Juan 17:3) Ang ubang mga kinahanglanon mao ang pagpakitag pagtuo sa halad lukat ni Jesu-Kristo ug sa pagsunod sa Diyos. (Juan 3:16; 1 Juan 5:3) Ang lain pang kinahanglanon mao ang “ipakatawo pag-usab” ingong bawtismadong Kristohanon nga gipanganak sa balaang espiritu sa Diyos. (Juan 1:12, 13; 3:3-6) Ang dugang pang kinahanglanon alang sa kinabuhi sa langit mao ang paglahutay sama sa nahimo ni Jesus, nga nagpamatuod nga matinumanon sa Diyos bisan hangtod sa kamatayon.​—Lucas 22:29; Pinadayag 2:10.

Adunay katarongan alang sa maong halangdong mga kinahanglanon. Kadtong pagabanhawon ngadto sa langit adunay importanteng buluhaton nga himoon. Si Jehova nasayod nga ang tawhanong mga kagamhanan dili gayod molampos sa pagdumala sa mga kalihokan sa yuta. Busa mihikay siya ug usa ka langitnong kagamhanan, o Gingharian, nga magmando ibabaw sa katawhan. (Mateo 6:9, 10) Si Jesus mao ang Hari sa maong Gingharian. (Daniel 7:13, 14) Ang uban nga gipili gikan sa yuta ug pagabanhawon ngadto sa langit magmando uban kaniya. Ang Bibliya nagtagna nga kining mga binanhaw mahimong “usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.”​—Pinadayag 5:10.

Nakakab-ot ba ang kinabag-an sa katawhan sa mga kinahanglanon alang sa langitnong pagkabanhaw? Wala. Bisag dili ilang sayop, ang kadaghanan niadtong natulog diha sa kamatayon dili kuwalipikado. Daghan ang may diyutay o walay kahigayonan nga makakat-on sa kamatuoran mahitungod kang Jehova ug sa iyang mga katuyoan. Sila nabuhi ug namatay nga walay bisan unsang kahibalo bahin kang Jesu-Kristo o sa Gingharian sa Diyos.

Gitawag ni Jesus kadtong kinsa moadto sa langit nga “gamayng panon.” (Lucas 12:32) Sa ulahi gibutyag nga ang gidaghanon niadtong “gipalit gikan sa yuta” nga magmando uban ni Kristo sa langit maoy 144,000. (Pinadayag 14:1-3; 20:6) Bisag ang 144,000 maoy gidaghanon nga igo nang makaokupar sa “daghang puy-anan” nga gihisgotan ni Jesus, kini gamay lang kon itandi sa bilyonbilyong katawhan nga naggikan kang Adan.​—Juan 14:2.

Mga Hitabo sa Dili pa ang Yutan-ong Pagkabanhaw

Atong sublion ang atong nahisgotan na. Sumala sa Bibliya, kadtong nangamatay walay-kinabuhi diha sa kamatayon hangtod nga sila banhawon ni Jehova nga Diyos. Ang pipila banhawon ngadto sa kinabuhi sa langit, diin sila magmando uban ni Jesu-Kristo sa kagamhanang Gingharian. Ang kadaghanan sa katawhan pagabanhawon sa yuta, aron mahimong mga sakop niana nga Gingharian.

May bahin pinaagi sa yutan-ong pagkabanhaw, tumanon ni Jehova ang iyang katuyoan alang sa yuta. Si Jehova milalang niini “aron pagapuy-an.” (Isaias 45:18) Kini ang mahimong permanenteng puy-anan sa katawhan. Busa, ang salmista miawit: “Mahitungod sa mga langit, iya ni Jehova ang kalangitan, apan ang yuta gihatag niya ngadto sa mga anak sa mga tawo.”​—Salmo 115:16.

Sa dili pa magsugod ang pagpamanhaw sa kinabuhi sa yuta, ang dagkong mga kausaban kinahanglang mahitabo. Tingali ikaw mouyon nga dili katuyoan sa Diyos nga ang yuta mapuno sa gubat, polusyon, krimen, ug kapintasan. Kining mga problemaha gipahinabo sa mga tawo nga walay pagtahod sa Diyos ug sa iyang matarong nga mga balaod. Busa, ang Gingharian sa Diyos ‘magagun-ob niadtong mga nagagun-ob sa yuta’​—usa ka pangunang lakang sa pagtuman sa iyang kabubut-on sa yuta. (Pinadayag 11:18) Laglagon sa Gingharian ang tanang daotang mga tawo, tugotan ang matarong nga mabuhi sa yuta sa walay kataposan.​—Salmo 37:9, 29.

Paraiso sa Yuta

Kadtong pagabanhawon diha sa nahinloan nga yuta maoy malumo, matinagdanong mga tawo nga nagabuhat sa matarong. (Itandi ang Mateo 5:5.) Ubos sa mahigugmaong pagdumala sa Gingharian sa Diyos, sila magkinabuhi sa malipayong mga kinabuhi diha sa kasegurohan. Ang Bibliya naghatag niining kahibulongang paglantawng-daan sa mga kahimtang nga mangibabaw unya: “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:4.

Oo, ang yuta himoon nga usa ka paraiso. (Lucas 23:43) Hunahunaa kon unsay kahulogan niana! Ang mga ospital ug mga balayng alimahan sa mga tigulang mangawala na. Sa Paraiso, kadtong nag-antos karon sa mga epekto sa pagkatigulang mahimong mabaskog ug mahimsog pag-usab. (Job 33:25; Isaias 35:5, 6) Wala na unyay mga punerarya, mga menteryo, ug mga lapida. Pinaagi sa iyang Gingharian, si Jehova “maglamoy sa kamatayon sa walay kataposan.” (Isaias 25:8) Ang maong mga panalangin tinong magkahulogan ug usa ka bag-ong kinabuhi alang kanato ug alang sa atong mga katigulangan.

[Hulagway sa panid 7]

Kadtong pagabanhawon sa yuta mahimong mga sakop sa Gingharian