Mga Adlaw Maingon sa “mga Adlaw ni Noe”

“Ang yuta napuno sa kabangisan . . . kadto nadaot, tungod kay ang tanang unod nagdaot sa iyang dalan sa yuta.”—GENESIS 6:11, 12.

1, 2. (a) Unsang mga matang sa kabangisan ang pakigbisogan sa mga Saksi ni Jehova karong adlawa? (b) Diha sa unsang mga kahimtang ang katawhan sa Diyos gilipay sa paglaom sa pagkabanhaw?

KABANGISAN! Maingon sa adlaw ni Noe, karong adlawa usab, ang kabangisan nahimong kasagarang pulong. Bisan kadtong nagalakaw uban sa matuod nga Diyos, sama kang Noe, dili imyun sa kabangisan. Kini kusganong nadayag sa pagtagad sa kalibotan dihang, sa Hulyo 21 sa miaging tuig, ang usa ka Kingdom Hall sa mga Saksi ni Jehova sa Sydney, Australia, naguba tungod sa usa ka bomba panahon sa usa ka pakigpulong publiko sa Bibliya bahin sa pagkamaunongon sa Diyos ug sa pamilya. Usa ka Saksi ang namatay. Kapin ug 40 ang naospital. Silang tanan naulian ra, bisan pag ang pipila may dagkong mga ulat ingong sangpotanan sa maong kriminal nga kasuko. Mikomento ang usa ka polis nga detektib: “Dihay 110 ka tawo sa sulod ug kadto milagro gayod nga kita walay 110 nga patay.”

² Sa ubang bahin sa yuta​—sama sa Amihanang Irlandiya, Lebanon, ug El Salvador​—ang mga Saksi ni Jehvoa nagamantala sa “maayong balita” diha sa palibot nga nagapadayon ang kabangis. May pipila nga nangamatay, nga ang uban samtang nagsangyaw. Sa daghang kayutaan “ang hitabong wala hisayri daan,” sama sa mga aksidente ug mga linog, nakahunos usab sa bililhong mga kinabuhi, nga sa maong mga okasyon ang katawhan ni Jehova gilipay sa paglaom sa pagkabanhaw.​—Ecclesiastes 9:11; 1 Tesalonica 4:13, 14.

3. (a) Unsa ang mahimong mahitabo sa pipila sa katawhan ni Jehova, sumala sa gipaila sa bag-o pang mga hitabo ug sa Lucas 21:16? (b) Unsang pasalig ang atong nabatonan bahin sa panalipod sa Diyos panahon sa “dakong kasakitan”?

³ Sa dili pa dugay sa Mexico, sa tingob 23 ka Saksi ug mga nakig-uban kanila naapil sa kapin ug 5,000 nga namatay sa usa ka malaglagong linog. Sa Puerto Rico, pito pa ang apil sa 300 nga nawad-ag kinabuhi tungod sa mga baha ug mga pagkabanlas sa yuta. Nagkahulogan ba kini nga si Jehova napakyas sa pagtaganag panalipod sa pipila sa iyang mga alagad? Dili gayod. Kita dili ingong dili maapektahan sa mga aksidente ug mga katalagman. Ug bahin sa paglutos, gipasidan-an ni Jesus ang iyang mga tinun-an, nga miingon: “Ilang pagapatyon ang pipila kaninyo.” Ginatos sa atong mga igsoon ang namatay sa mga kamot sa Nazing si Hitler. Kadtong tanan pagahinumdoman ni Jehova sa pagkabanhaw. Bisan pa niana, inigkahitabo sa tibuok yuta sa gitagnang “dakong kasakitan,” ipakita ni Jehova nga siya makaarang sa pagluwas niadtong magatawag sa iyang ngalan, sumala sa iyang gibuhat sa mga adlaw ni Noe.​—Lucas 21:16-19; Mateo 24:14, 21, 22, 37-39; Isaias 26:20, 21; Joel 2:32; Roma 10:13.

4. Unsay kahimtang sa mga kondisyon karong adlawa kon itandi nianang gibatbat sa Genesis 6:11, 12?

⁴ Sukad 1914 ang kabangisan miatake sa tibuok yuta. Kapin ug usa ka gatos ka milyong tawo ang namatay sa mga gubat ug mga katalagman niining sigloha. Ang katawhan gihampak sa mga pagtulis sa ayroplano ug barko, mga pamomba sa terorista, mga pagpatay sa masa, dinumtanay sa mga rasa, ug gihulga sa pagkapuo tungod sa nukleyar nga mga armas. Tinuod, karon maoy “lisod nga mga panahon” duyog sa “kagul-anan sa kanasoran, tungod kay wala mahibalo sa lutsanan.” (2 Timoteo 3:1-5, 13; Lucas 21:25) Bisan pa niana, ang katawhan ni Jehova karong adlawa nagapuyo taliwala sa usa ka hampak nga labaw pang makuyaw kay sa kabangisan, bisan pag kini subsob ilangkit sa kabangisan. Kini mahibalik sa kapin ug 4,300 ka tuig ngadto sa adlaw ni Noe. Unsa man kana?

Pagtuo ni Noe Taliwala sa Kahilayan

5, 6. (a) Giunsa ni Satanas paghugaw sa katawhan? (b) Sa unsang mga paagi si Noe ug iyang pamilya lahi ingong dili bahin niadtong kalibotana?

⁵ Sukad sa pagsukol sa Eden paunahan, si Satanas nga Yawa determinado sa “paglimbong sa tibuok gipuy-an nga yuta.” (Pinadayag 12:9) Gisugo ni Jehova ang lalaki ug babaye sa paggamit sa ilang hinatag-sa-Diyos nga mga katakos sa sekso sa madungganong paagi sulod sa kahikayan sa kaminyoon, aron “pun-on ang yuta” sa ilang matang. (Genesis 1:28; Hebreohanon 13:4) Apan ang Yawa miliso sa paghugaw sa katawhan pinaagi sa dili-kinaiyanhong sekso. Sa unsang paagi? Ang espiritung mga anak sa Diyos miduyog kang Satanas sa iyang pagsukol. Sila nahimong “mga demonyo,” nga si Satanas mao ang ilang “magmamando.” (Lucas 11:15) Ug nalangkoban sa unsa ang kalihokan niadto sa mga demonyo? Sila nanganaog sa yuta, nagsul-ob ug tawhanong mga lawas, ug nakigsekso sa maanyag nga mga anak babaye sa mga tawo. Makalilisang ang sangpotanan!

⁶ Gipanganak ang mestiso nga mga liwat, unodnong mga higante nga katunga demonyo, katunga tawo. Sila mao ang Nephilim, mamumunong “Mga Tighulog” sa katawhan, sumala sa ginapakita sa talaan: “Ug ang yuta nadaot sa panan-aw sa matuod nga Diyos ug ang yuta napuno sa kabangisan. Busa nakita sa Diyos ang yuta ug, tan-awa! kadto nadaot, tungod kay ang tanang unod nagdaot sa iyang dalan sa yuta.” Ang kabangisan ug kahilayan sa sekso nahimong kaylap kaayo nga kini ikaingon mahitungod lamang kang Noe: “Siya nakita nga walay ikasaway taliwala sa iyang mga kaliwatan. Si Noe milakaw uban sa matuod nga Diyos.” Ang iyang asawa, iyang mga anak lalaki, ug ilang mga asawa​—sila lamang sa tanang tawo​—ang nagpakitag pagtuo ug diyosnong kahadlok. Dayag, ang banay ni Noe wala mahugawi sa kahilayan sa sekso sa iyang adlaw.​—Genesis 6:4, 9-12, Ref. Bi. nga potnot.

7. Sumala sa gipasundayag sa adlaw ni Noe, sa unsang paagi si Jehova nagahukom sa daotan ug sa matarong? (Itandi ang Mateo 25:40, 45, 46.)

⁷ Gipuo ni Jehova kadtong mabangison, nabuang-sa-sekso, demonyohanong kalibotan. Pinaagi sa pagpadala sa dakong Lunop, iyang gipapas ang tanan nga daotan. Ang mestisong Nephilim ug ang daotang mga tawo gibanlas ngadto sa kalaglagan, samtang ang demonyohanong kanhi mga anak sa Diyos ming-ikyas balik ngadto sa kalibotan sa espiritu​—sa pagpaabot sa paghukom sa Diyos kanila. Apan may mga naluwas! Si Noe ug ang iyang pamilya naluwas. Ug ngano man? Tungod sa ilang pagtuo, nga gipaluyohan sa mga buhat sa pagtukod sa arka ug pagsangyaw sa pagkamatarong ngadto niadtong gihukman-sa-kalaglagan nga kalibotan.​—2 Pedro 2:4, 5.

Mga Tawong Makibag-o, Pagbantay!

8. Sa unsang mga bahin ang adlaw ni Noe nagahulagway sa atong adlaw?

⁸ Ang adlaw ni Noe naglandong sa atong adlaw. Sa unsang paagi atong nasayran kini? Aw, gitagna ni Jesus ang susamang panahon sa kabangisan, pagkamalapason, ug pagkawalay-gugma ingong bahin sa “ang ilhanan” nga kita nagabarog sa ngilit sa “dakong kasakitan nga wala pa sukad mahitabo sukad sa sinugdanan sa kalibotan hangtod karon, wala, ni mahitabo pa kini pag-usab.” Siya miingon usab: “Mahitungod nianang adlawa ug taknaa walay nahibalo, . . . kondili ang Amahan lamang.” Unya siya midugang: “Maingon kaniadto sa mga adlaw ni Noe, mao usab unya ang presensiya sa Anak sa tawo. Kay maingon sa mga adlaw sa wala pa ang lunop, sila nanagpangaon ug nanagpanginom, ang mga lalaki nangasawa ug ang mga babaye gipangasawa, hangtod sa adlaw nga si Noe misulod sa arka; ug sila wala magtagad hangtod miabot ang lunop ug gianod silang tanan, mao usab unya ang presensiya sa Anak sa tawo.”​—Mateo 24:3-21, 36-39

9. Sa unsang paagi atong malikayan ang dulnganan niadtong ‘wala magtagad’?

⁹ Oo, “sila wala magtagad.” Apan dili kinahanglang ikaw mahisama kanila. Ikaw mahimong makaikyas dihang ang Ginoong Jesus igapadayag na gikan sa langit, nga magpahinabo sa panimalos sa Diyos pinaagi sa walay-kataposang paglaglag “niadtong wala makaila sa Diyos ug niadtong wala magsugot sa maayong balita mahitungod sa atong Ginoong Jesus.” (2 Tesalonica 1:7, 8) Dili kinahanglang ikaw mahisama sa kalibotanong mga tawo kansang pangunang interes sa kinabuhi mao ang pagpahimuot sa kaugalingon, pagpangagpas sa madungganong karera o materyal nga bahandi, nga wala maghunahuna sa Diyos. Sa pagkamatuod, “ang ilang diyos mao ang ilang tiyan.”​—Filipos 3:19.

“Dumti ang Daotan”

10, 11. (a) Sa pagbaton sa pag-uyon sa Diyos, unsang mga bisyo ang pagalikayan? (b) Unsang hinagiban ang atong igasul-ob, ug ngano?

¹⁰ Niining kataposang mga adlaw, ang kinabuhi sa daghan kaayong tawo nasentro sa sekso, nga kasado kun dili kasado. Ug alang sa daghan niadtong minyo, naandan na ang diborsiyo o pagnulo. Nga wala manumbaling sa tinong mga pasidaan sa mga tinun-an ni Jesus, daghan sa Kakristiyanohan nagapraktis sa homoseksuwalidad. Ang pipila kanila “nakadawat na sa bug-os nga balos” sa dagway sa AIDS ug sa ubang ipasa-sa-sekso nga mga sakit. Bisan pa niana, adunay paglaom sa kaluwasan bisan sa maong mga tawo. Hinumdomi, si Jesus naghisgot nga paborable bahin sa mga bigaon nga naglimpiyo sa ilang mga kinabuhi ug nagtuo kaniya, nga kaatbang sa hambogiro, dili-mahinulsolong relihiyosong mga pangulo sa iyang adlaw.​—Roma 1:26, 27; 2 Pedro 2:9, 10; Judas 6, 7; Mateo 21:31, 32.

¹¹ Si bisan kinsa sa katawhan ni Jehova nga tingali namantsahan o natental sa pagbuhat sa imoral nga mga buhat kinahanglang mahigmata ug mosul-ob sa bug-os nga hinagiban nga ginatagana sa Diyos! (Efeso 6:11-18) Karong mga adlawa matuod nga “maingon gayod sa mga adlaw ni Noe.” Kanang “nagangulob nga leyon,” ang Yawa, ug ang iyang mahilayong mga demonyo nagabuhat nga walay hunong sa pagbulag ug pagbitik sa mga alagad sa Diyos. Kinahanglang mobarog kita batok sa maong mga kaaway, nga lig-on sa pagtuo.​—1 Pedro 5:8, 9.

12. Nganong hinungdanon ang pagsunod sa tambag sa Salmo 97:10?

¹² Bisan pag makapakurat, ang pipila nga ilado sa organisasyon ni Jehova nadaog sa imoral nga mga buhat, apil ang homoseksuwalidad, pag-ilisay sa asawa, ug pag-abusar sa bata. Igapahayag, usab, nga sulod sa miaging tuig, 36,638 ka tawo ang gipalagpot gikan sa Kristohanong kongregasyon, nga ang kadaghanan kanila tungod sa pagbuhat sa imoralidad. Kinahanglang huptang mahinlo ang organisasyon ni Jehova! (1 Corinto 5:9-13) Karon panahon nga ang mga ansiano sa kongregasyon, mga ministeryal nga alagad, ug sa pagkamatuod tanan natong mga igsoong lalaki ug babaye maglikay sa bisan unsang kahimtang nga mahimong mosangko sa imoralidad. Ang pagkamaunongon sa mga sukdanan ni Jehova pagagantihan, sumala sa ginapahayag sa Salmo 97:10: “O kamong mga nahigugma kang Jehova, dumti ang daotan. Siya nagabantay sa mga kalag sa iyang mga maunongon; gikan sa kamot sa mga daotan iyang pagaluwason sila.”

13. Unsang maayong tambag ang gihatag ni apostol Pablo ug Pedro?

¹³ Sa kinaulahian, ang “dakong kasakitan” magwagtang sa tanan niadtong “dulumtanan sa ilang kahugawan.” Dako gayod ang atong kabalaka sa pagdumot, oo, pag-ayad, ug paglikay sa kalibotanong pagkamahilayon! Kinahanglang kita “mokalagiw sa pakighilawas”! (Pinadayag 21:1, 8; 1 Corinto 6:9, 10, 18) Si apostol Pedro, tapos sa pagpasidaan batok sa nagapugas-sa-pagduhaduha nga mga apostata ug sa kamatuoran sa “adlaw ni Jehova,” nagaawhag kanato ngadto sa “balaang mga buhat sa kagawian ug binuhatan sa diyosnong pagkamahinalaron.” Siya midugang: “Apan adunay bag-ong mga langit ug usa ka bag-ong yuta nga atong ginapaabot sumala sa iyang saad, ug magapabilin niini ang pagkamatarong. Busa, mga hinigugma, sanglit nagapaabot kamo niining mga butanga, buhata ang inyong maarangan nga sa kataposan hikaplagan kamo niya nga walay buling ug walay hugaw ug anaa sa pakigdait.” Dako gayod nga kalipay ang sa ingon makadangat sa “bag-ong yuta,” diin ang Diyos ‘maghimo sa tanang butang nga bag-o’ ug hinlo!​—2 Pedro 3:3-7, 10-14; Pinadayag 21:1, 4, 5.

Pamati sa Dugang ‘mga Pasidaan’

14. Nganong ang paghinlo pinaagi sa Lunop temporaryo lamang?

¹⁴ Tapos hinloi sa dakong Lunop ang yuta sa tanang demonyohanon ug tawhanong kahugawan, gisubli ni Jehova ang sugo nga sa sinugdan gihatag ngadto kang Adan, pinaagi sa pag-ingon ngadto kang Noe ug sa iyang mga anak: “Magmabungahon kamo ug magdaghan ug pun-on ninyo ang yuta.” (Genesis 9:1) Sa usa ka paagi ilang gibuhat kini. Ang 70 ka “mga banay”​—usa ka masambingayong hingpit nga numero​—nahitala sa Genesis kapitulo 10. Apan ang katawhan nag-antos pa sa mga epekto sa sala nga napanunod gikan ni Adan. Ug dayag ang mga tawo naagak na usab sa demonyohanong impluwensiya sa pagkahibanlod sa kahilayan sa sekso.

15. Unsay atong makat-onan gikan sa paghukom sa Diyos sa Sodoma?

¹⁵ Sa wala madugay, ang “higala” ni Jehova, si Abraham, ug ang pag-umangkon ni Abraham si Lot namalhin ngadto sa dapit sa Canaan. Gipili ni Lot ang pagbalhin ngadto sa Distrito sa Jordan, nga maoy “sama sa tanaman ni Jehova.” Apan kadto ba ingon sa moral nga paagi? Halayo niana! Ang siyudad sa Sodoma, diin si Lot nanimuyo, ug ang kanait nga Gomora nahunob sa homoseksuwalidad. Dili hikaplagan didto bisan ang napulo lang ka tawong matarong. Tungod niadto, gipahinabo ni Jehova sa maong mga siyudad “ang hudisyal nga silot sa walay-kataposang kalayo.” Dili na gayod mapasig-uli kadtong mahilayong mga siyudad! Gitumong ni Jesus ang paghukom sa Diyos sa Sodoma, duyog sa nahitabo “sa mga adlaw ni Noe,” sa pagpasiugda sa panginahanglan nga kita magbantay!​—Genesis 13:10; 18:32; Judas 7; Lucas 17:26-30.

16. Tungod sa unsang kalihokan sa demonyo nga kinahanglang kita makigbugno alang sa pagtuo?

¹⁶ Ayaw pagkasayop! Si Satanas ug iyang mga demonyo nagaatake pa! Bisag gitambog na ngadto sa masambingayong “mga gahong sa baga nga kangitngitan” ug gidid-an sa pagsul-ob sa unodnong mga lawas, ang maong mahilayong mga espiritu determinado sa pagdaot sa mga tawo, ug ilabina sa mga alagad ni Jehova. (2 Pedro 2:4-6) Pihong ang mga demonyo nag-impluwensiya kang Canaan sa pagbuhat sa iyang imoral nga buhat ngadto sa iyang apohang lalaki si Noe. (Genesis 9:22-25) Tinong sila ang nagpasanay sa mga kahiwian nga nahimong ‘paagi sa yuta sa Canaan,’ mao nga sa kataposan gisuka niini ang mga molupyo. (Levitico 18:3-25) Sa samang paagi, ang mga demonyo nagapalambo sa dili-kinaiyanhong mga buhat sa sekso nga nagasakit sa daghan kaayong komunidad karong adlawa. Sa pagpakigbugno alang sa pagtuo, kinahanglang suklan nato ang bisan unsang mga pag-atake sa maong nahulog nga mga manulonda nga nagaduso sa mga tawo sa ‘pagpatuyang sa pakighilawas ug pagtinguha sa unod alang sa dili-kinaiyanhong paggamit.’​—Judas 3, 6, 7.

Pagtukod Alang sa Kaluwasan

17. Sama kang Noe ug sa iyang pamilya, sa unsang paagi kita makapadayag nga kita dili bahin sa kalibotan?

¹⁷ Tungod sa kaugdang sa atong mga panahon, sa unsang paagi hikaplagan nato ang dalan sa kaluwasan? Aw, giunsa ni Noe ug iyang pamilya paglabang-buhi? “Pinaagi sa pagtuo si Noe . . . naghukom sa kalibotan.” (Hebreohanon 11:7) Sa susama karong adlawa, ang mga Saksi ni Jehova “dili bahin” sa daotang kalibotan. Dugang pa, atong gipasundayag ang atong pagtuo pinaagi sa pagpahinungod sa atong mga kinabuhi kang Jehova ug pagpabawtismo sa tubig aron mahimong mga tinun-an ni Jesu-Kristo.​—Juan 17:14, 16; Mateo 28:19.

18. Unsay gilandongan sa pagtukod sa arka?

¹⁸ Dugang pa, kita nagapakig-ambit sa buluhaton ni Jehova alang niining adlawa, usa ka espirituwal nga buluhaton sa pagtukod nga gidumala sa Labaw nga Noe, si Jesu-Kristo. Ingong dapit sa kasegurohan ug kaluwasan, ang arka nagahawas sa espirituwal nga paraiso nga gitukod ni Jehova taliwala sa iyang mga magsisimba sukad 1919. Kini mao ang kahimtang sa napasig-uling makigdaitong relasyon uban sa Diyos. Kini ang Iyang kahikayan alang sa kaluwasan sa antitipikal nga pamilya sa Labaw nga Noe latas sa “dakong kasakitan.”​—Mateo 24:21; 1 Corinto 3:9, 11; 2 Corinto 12:3, 4; Pinadayag 7:13, 14.

19. Unsay gilandongan ni Noe, mga sakop sa iyang pamilya, ug ilang buluhaton?

¹⁹ “Si Noe nauyonan sa mga mata ni Jehova.” Siya nagahulagway gayod kang Jesu-Kristo, kinsa milakaw nga mapaubsanon uban sa Diyos dinhi sa yuta, nga wala magbuhat sa bisan unsang butang sa iyang kaugalingong pagbuot! (Genesis 6:8; Mateo 17:1, 5; Juan 8:28) Silang duruha maoy mga magwawali sa pagkamatarong​—usa ka maayong panig-ingnan sa tanang saksi ni Jehova. Ug kita makatinong ang asawa ni Noe, nga naglandong sa nahibiling mga dinihogan sa yuta karong adlawa, maoy sulundan sa pagkamapinasakopon. (2 Pedro 2:5; Lucas 4:14-19; Efeso 5:21-24) Inigpalandong nato unsa ka dako kaayo ang buluhaton sa pagtukod sa arka alang sa kaluwasan, mahanduraw nato kon unsa ka malipayon sa tigulang nga Noe nga siya may mga katabang nga mao ang tulo niya ka abtik nga anak lalaki ug ilang mga asawa! Sila haom nagahulagway sa “dakong panon” karong adlawa nga nagaabaga sa kinadak-an sa espirituwal nga buluhatong pagtukod sulod sa kataposang mga bahin padulong sa antitipikal nga Lunop.​—Pinadayag 7:9, 15.

20, 21. (a) Unsang masanagong mga palaaboton ang nagapaabot sa mga magsisimba ni Jehova diha sa nahinloan na nga yuta? (b) Unsang kalipay ang maagoman bisan karon?

²⁰ Dihang kining yutaa mahinloan na, nga andam nang himoong literal nga paraiso, kadtong gihulagwayan sa mga anak ug mga binalaye ni Noe sa usa ka panahon tingali magbaton ug mga anak diha sa pagkamatarong. Unya tungod sa milagro sa pagkabanhaw makompleto na ang pagpuno sa yuta sa mga tawo. Ang tanang nagadawat sa pribilehiyo sa pagkahimong “ubang mga karnero” ni Jesus igapasig-uli sa kahingpitan, ug sa paglabang-buhi sa kataposang pagsulay inigtugyan na ni Kristo sa Gingharian ngadto sa iyang Amahan, sila igapahayag nga matarong alang sa kinabuhing dayon.​—Juan 5:28, 29; 10:16; 1 Corinto 15:24-26; Salmo 37:29; Pinadayag 20:7, 8.

²¹ Tagsaon ang mga kalipay nga anaa sa unahan alang sa matinumanong mga magsisimba ni Jehova! Apan dako ang kalipay nga hikaplagan bisan karon pinaagi sa tibuok-kasingkasing nga pagpakig-ambit sa pagtukod sa modernong-adlaw nga arka sa kaluwasan. Unsay pag-uswag nianang buluhatona? Ang atong sunod nga pagtuon mohatag sa tubag.

UNSAY IMONG TUBAG?

◻ Sa unsang paagi ang una-Lunop nga mga hitabo magpasidaan kanato?

◻ Unsang mga pagtulon-an ang atong makuha gikan sa Mateo 24:37-39?

◻ Nganong hinungdanon kaayo ang “pagdumot sa daotan”?

◻ Sa unsang paagi kita makaambit sa pagtukod sa antitipikal nga arka?

[Kahon sa panid 11]

MAINGON SA ‘ADLAW NI NOE’—

“40 porsiento lamang sa mga magtutudlog relihiyon sa kolehiyo . . . nagtuo nga imoral ang pagpakigsekso sa usa ka dili-minyong lalaki ug babaye.”—Saturday Oklahoman & Times, Disyembre 29, 1984

[Kahon sa panid 12]

Bililhon ba ang mga Prinsipyo sa Bibliya?

Usa ka paring Episcopalian namati sa usa ka serbisyo sa paglubong nga gidumala sa usa sa mga Saksi ni Jehova. Human niadto, nga gidapit sa pari, duha ka ministro gikan sa Watch Tower Society mitambong sa usa ka diskusyon sa ubay-ubay nga klerigo sa Brooklyn Heights, New York City.

Mitungha ang isyu sa homoseksuwalidad. Gitin-aw sa mga Saksi nga ang Bibliya nagadili niini ug ang mga Saksi nagapalagpot sa mga tawong nagabuhat sa bisan unsang matang sa imoralidad. (Roma 1:24-27; 1 Corinto 6:9, 10; Judas 7) Gipangutana sa mga Saksi ang mga klerigo kon unsay ilang baroganan bahin nianang butanga ug nadawat nila ang mosunod nga mga tubag:

Usa ka ministro sa Congregational: “Sa akong hunahuna kami dunay lagda sa pagpalagpot diha sa segundaryong mga balaod sa among iglesya, apan bisan pag mamatay, dili ako mahinumdom nga among sukad gihisgotan kanang balaora!”

Ang paring Episcopalian: “Kon among hisgotan kanang balaora, wala na kamiy [mahibiling] mga parokyano.”

Usa ka Katolikong monsenyor: “Kon among ipatuman kanang balaora, kamiy walay [mahibiling] mga pari.”

Bisan pag kining mga komentoha sa mga klerigo tingali nagapasobra sa mga butang, ang mga Saksi ni Jehova malipay sa ilang kaugalingong malig-ong baroganan sa paghupot sa kongregasyon nga mahinlo. Sila “dili bahin sa kalibotan.”​—Juan 15:19.

[Kahon sa panid 13]

MAINGON SA ‘ADLAW NI NOE’—

“Ang usa ka publikong tunghaan sa New York City alang sa homoseksuwal hayskul nga mga estudyante nabuksan sa Manhattan.” Ang magtutudlo niana miingon: “Buot namo ang palibot diin ang bayot ug tomboy nga mga bata dili mapailalom sa dili-hamtong nga mga tin-edyer.”—The New York Times, Hunyo 6, 1985

[Kahon sa panid 14]

MAINGON SA ‘ADLAW NI NOE’—

“Ang mga sakop sa Riverside Church gahapon miaprobar sa pabor-bayot nga polisa nga nagadawat sa homoseksuwal nga mga relasyon ingong bahin sa ideya sa Kristohanong pamilyahanong kinabuhi.”—New York Post, Hunyo 3,  1985