Ang Bibliya nag-ingon nga ang arka ni Noe “nahiluna diha sa kabukiran sa Ararat.” (Genesis 8:4) Diha sa rehiyon sa Ararat, anaa ang iladong bukid nga gitawag karon ug Mount Ararat sa sidlakang Turkey, duol sa utlanan sa Armenia ug Iran.

Daghan ang nangadto sa maong dapit aron sa pagpangita sa arka ni Noe. Sila dunay daghang makapainteres nga mga estorya apan sila walay lig-ong ebidensiya. Dihay makapaintrigang mga letrato nga kuha gikan sa ayroplano, nakaplagang mga kahoy nga nabulitan ug alkitran, ug taho sa mga tawong nakakita kono sa arka, mao nga daghan ang nadasig sa pagpangitag mas katuohan nga mga ebidensiya. Apan dili lalim ang pagpangita niana. Ang usa ka dapit nga sagad adtoan mao ang lugar nga nahimutang sa gihabogong mga 4,600 metros nga halos taluktok na sa Mount Ararat. Gawas pa, tungod sa kagubot sa politika, ang mga langyaw dili usahay tugotan sa pag-adto sa maong lugar.

Bisan pa niana, daghang tawo nga interesadong makakita sa arka ang naninguha sa pag-adto didto. Sila nagtuo nga ang ubang bahin sa arka anaa pa gihapon diha sa Mount Ararat, ug kini natabonag yelo sa halos tibuok tuig. Matod pa nila, dakog purohan nga makita ang arka sa mga tuig nga init ang klima.

Daghan ang nagtuo niana tungod sa mga taho. Sumala pa ni Josephus, nga usa ka Hudiyong historyador sa unang siglo C.E., ang mga historyador nga nauna kaniya nag-ingon nga ang arka makita kono diha sa tumoy sa kabukiran sa Ararat. Gikaingon usab nga dihay mga tawo nga nanguhag piraso sa mga kahoy nga nabulitag alkitran gikan sa arka aron himoong sobenir. Usa sa mga tawo nga gihisgotan ni Josephus mao si Berossus, nga usa ka historyador sa Babilonya sa ikatulong siglo B.C.E.

Sa miaging siglo, ang usa sa makapainteres nga report mao ang gitaho ni George Hagopian nga taga-Armenia. Siya nag-asoy nga sayo sa katuigan sa 1900 sa dihang siya bata pa, sila sa iyang uyoan miadto sa arka ug mikatkat pa gani kono sa arka. Si Hagopian namatay sa 1972, apan ang mga tawo karon interesado pa gihapon sa iyang gisulti.

Kini ba Tinuod nga Basehanan sa Pagtuo?

Angay ba kitang motuo nga dihay nakadiskobre sa arka o dunay makadiskobre niini sa umaabot? Lagmit nga dili na gayod nila kini madiskobrehan. Hinumdomi nga wala isulti sa Bibliya ang eksaktong lugar nga nahimutangan sa arka sa dihang mihubas ang Lunop. Ang gihisgotan lang mao ang “kabukiran sa Ararat.”

Ang mga tawo naghunahuna nga kana nagtumong sa kinatas-ang bukid sa maong lugar. Apan, ang Bibliya wala maghisgot nga ang arka gipahimutang sa Diyos didto gayod sa taluktok sa Mount Ararat, nga karon usa ka bugnaw kaayong bukid nga halos singko kilometros ang gihabogon.a Hinumdomi nga si Noe ug ang iyang pamilya nagpuyo sa arka sulod sa pipila ka bulan human kini napahimutang sa bukid. (Genesis 8:4, 5) Gawas pa, sila ug ang mga mananap malisdan gayod sa pagkanaog tungod sa kahabog sa maong bukid. Busa, makaingon kita nga ang dapit diin gipahimutang ang arka mas ubos kay sa gituohan sa ubang mga tawo karon, apan kini may igong gihabogon nga motakdo sa gisulti sa Genesis 8:4, 5. Ug bisan diin pa kini nahimutang diha sa rehiyon sa Ararat, kini lagmit dugay nang nadugta o kaha gipanguha na sa mga tawo ang mga kahoy niini.