Pakigsuod sa Diyos
“Ako Nahibalo Pag-ayo sa mga Kasakit nga Ilang Giantos”
“BALAAN, balaan, balaan si Jehova.” (Isaias 6:3) Kanang mga pulonga nagpakita nga dili gayod hitupngan ang kahinlo ug kaputli ni Jehova nga Diyos. ‘Nagpasabot ba kana nga siya dili mabination o lisod duolon?’ tingali mangutana ka. ‘Mahalon kaha sa usa ka balaang Diyos ang makasasala, dili hingpit nga tawo nga sama kanako?’ Atong susihon ang makapadasig nga mga pulong nga gisulti sa Diyos kang Moises, sumala sa nahisulat sa Exodo 3:1-10.
Usa ka adlaw samtang nagbantay sa mga karnero, si Moises nakakita ug usa ka katingalahan kaayong butang—usa ka tunokong tanom nga nagdilaab apan kini “wala maut-ot” o masunog. (Bersikulo 2) Kay nainteres, iya kining giduol aron susihon. Apan, pinaagi sa usa ka anghel, si Jehova misulti kang Moises gikan sa nagdilaab nga tanom: “Ayaw pagduol diri. Huboa ang imong mga sandalyas gikan sa imong mga tiil, tungod kay ang dapit nga imong gitindogan maoy balaan nga yuta.” (Bersikulo 5) Hunahunaa ra—ang yuta mismo nahimong balaan tungod sa nagdilaab nga tunokong tanom nga naghawas sa presensiya sa balaan nga Diyos!
Ang balaang Diyos adunay rason sa pagpakigsulti kang Moises. Ang Diyos miingon: “Sa walay duhaduha nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw tungod sa mga nagpugos kanila sa pagtrabaho; tungod kay ako nahibalo pag-ayo sa mga kasakit nga ilang giantos.” (Bersikulo 7) Ang Diyos wala magpakabuta-bungol sa pag-antos ug pangamuyo sa iyang katawhan. Gibati mismo ni Jehova ang ilang kagul-anan. Matikdi nga ang Diyos miingon: “Ako nahibalo pag-ayo sa mga kasakit nga ilang giantos.” Mahitungod sa mga pulong nga “ako nahibalo pag-ayo,” ang usa ka reperensiya miingon: “Ang [maong] ekspresyon nagpasabot sa kaugalingong pagbati, pagmahal, ug kaluoy.” Ang mga pulong nga gisulti ni Jehova kang Moises nagpadayag nga Siya mahunahunaon ug mahigugmaon kaayo nga Diyos.
Nan, unsay gihimo sa Diyos? Wala lamang siya mobatig kaluoy, apan milihok usab siya. Mihukom siya nga luwason ang iyang katawhan gikan sa Ehipto ug dalhon sila sa “usa ka yuta nga nagaagay sa gatas ug dugos.” (Bersikulo 8) Aron maluwas sila, gisugo ni Jehova si Moises: “Pagawason mo ang akong katawhan . . . gikan sa Ehipto.” ((Bersikulo 10) Gituman ni Moises ang maong sugo ug iyang gipagawas ang mga Israelitas sa Ehipto niadtong 1513 B.C.E.
Si Jehova wala mausab. Ang iyang mga magsisimba karon makaseguro nga siya nakakita sa ilang mga kalisdanan ug maminaw sa ilang mga pagtuaw. Siya nahibalo pag-ayo sa kasakit nga ilang giantos. Apan si Jehova dili lamang mobati ug kaluoy sa iyang matinumanong mga alagad. Ang maluluy-ong Diyos motabang gayod “tungod kay siya may kahingawa” kanila.—1 Pedro 5:7.
Ang kaluoy sa Diyos naghatag kanatog paglaom. Pinaagi sa iyang tabang, kitang dili-hingpit nga mga tawo makatuman sa matarong nga mga sukdanan sa Diyos ug mahimong dalawaton kaniya. (1 Pedro 1:15, 16) Usa ka Kristohanong babaye nga nakigbisog sa depresyon nahupayan sa kasinatian ni Moises sa tunokong tanom. Siya miingon: “Kon si Jehova makahimo sa pagbalaan sa yuta, tingali aduna pay gamay nga paglaom alang kanako. Kini nga kamatuoran dakog natabang kanako.”
Gusto ka bang makakat-on ug dugang mahitungod sa balaan nga Diyos, si Jehova? Posible gayod nga masuod kita kaniya, tungod kay si Jehova “nahibalo pag-ayo sa atong pagkaumol, nga nahinumdom nga kita abog.”—Salmo 103:14.