REGLA
Ang binulan nga paggula sa mga inagas (dugo, pluwido, ug ubang hugaw nga mga tisyu) gikan sa matris sa babaye. Ang regla sa mga babaye kasagarang masinatian kada bulan, nga mahitabo sa matag upat ka semana. Ang mga batang babaye magsugod sa ilang pagregla inigkadalagita, ug kini kasagarang magpadayon hangtod sa pagmenopos, ang matag pagregla sagad moabot ug tulo ngadto sa lima ka adlaw.
Ang Kasulatan naglangkit sa regla uban sa pagkadili-putli ug kahugawan (Lev 12:2; Eze 22:10; 36:17), ang usa ka porma sa Hebreohanong pulong nga susama niini (nid·dahʹ) usahay gihubad nga “kahugawan sa pagregla.” (Lev 15:25, 26) Ang usa ka porma sa laing Hebreohanong termino, da·wehʹ, nga mahimong magpasabot nga balatian (Lam 5:17), gihubad nga “babayeng may regla.” (Lev 15:33; Isa 30:22) Ang pagregla maoy gipasabot usab sa prase nga “ang naandang butang sa mga babaye.”—Gen 31:35.
“Mahugaw” Ubos sa Balaod. Sumala sa Moisesnong Balaod, ang usa ka babaye giisip nga mahugaw sulod sa pito ka adlaw sa panahon sa iyang kinaiyanhong pagregla. Ang higdaanan o ang bisan unsang ubang butang nga mahigdaan o malingkoran sa nagregla nga babaye mahimo usab nga mahugaw. Ang bisan kinsa nga makahikap kaniya o sa mga butang nga iyang nahugawan kinahanglan nga maglaba sa iyang besti ug maligo, ug ang maong tawo magpabilin nga mahugaw hangtod sa pagkagabii. Kon ang iyang kahugawan sa pagregla mahianha sa lalaki nga nakigdulog kaniya (sama sa dihang, wala damha, ang bana nakigdulog sa iyang asawa sa pagsugod sa regla), siya mahimong mahugaw sulod sa pito ka adlaw, ug ang higdaanan nga mahigdaan sa bana giisip nga mahugaw.
Ang babaye gilantaw usab nga mahugaw sulod sa panahon sa dili-regular nga pag-agas sa dugo o “may inagas nga mas dugay kay sa iyang kahugawan sa pagregla,” nga sa maong panahon ang mga butang nga iyang mahigdaan o malingkoran ingon man ang mga tawo nga makahikap niining mga butanga mahimong mahugaw. Human motang-on ang dili-kinaiyanhon nga pag-agas, siya moihap ug pito ka adlaw, ug dayon siya mahimong mahinlo. Sa ikawalong adlaw ang babaye magdalag duha ka tukmo o duha ka piso sa salampati ngadto sa saserdote, kinsa mohimo sa pagtabon-sa-sala alang kaniya, nga magtanyag sa usa niini nga mga langgam ngadto kang Jehova ingong usa ka halad-sa-sala ug ang lain ingong halad-nga-sinunog.—Lev 15:19-30; tan-awa ang HINLO, PAGKAHINLO.
Kon ang usa ka lalaki ug babaye tinuyong magdulog sa panahon sa kahugawan sa pagregla sa babaye, sila pagapatyon. (Lev 18:19; 20:18) Ang pagdili sa panagdulog sa panahon sa pagregla lagmit nakaamot sa maayong panglawas, tingali makasanta, pananglitan, sa pagpanghubag sa kinatawo, sa ordinaryong paghubag sa agianan sa ihi. Ang mga Israelinhon gipahinumdoman usab bahin sa pagkabalaan sa dugo pinaagi sa mga regulasyon sa Balaod nga nalangkit sa pagregla o sa inagas sa dugo. Kini nga mga lagda dili lamang iya sa mga babaye, kay ang mga lalaki mamahimong mahugaw usab sa mga inagas nga mahimong mahitabo kanila. (Lev 15:1-17) Ang regulasyon labot sa pagregla ilabinang nagpakita sa konsiderasyon ni Jehova sa mga babaye. Ang Kristohanong bana, bisan tuod siya dili ubos sa Balaod (Rom 6:14; Efe 2:11-16), makahimog maayo kon tagdon ang binulan nga siklo ug kinaiyanhong mga kausaban sa iyang asawa, nga magpuyo uban kaniya “sumala sa kahibalo” ug maghatag kaniya ug kadungganan “samag ngadto sa usa ka sudlanan nga mas mahuyang, ang babaye.”—1Pe 3:7.