“Magmaisogon ug Magmalig-on Kaayo”

“Ayaw kamo kahadlok kanila, kay si Jehova nga inyong Diyos mao ang Usa nga magapakig-away alang kaninyo.”—DEUTERONOMIO 3:22.

1. (a) Unsay kahimtang sa Israel dihang hapit nang matapos ang pagpanaw sa kamingawan? (b) Unsay tambag ang gihatag ni Moises?

ANG panahon miabot na alang sa labing hinungdanong mga hitabo sa kasaysayan sa Israel. Ang balaang nasod sa Diyos karon kinahanglang mangandam sa pagsulod sa Yutang Saad! Sulod sa 40 ka tuig, si Moises nanguna sa mga Israelinhon latas sa dako ug makalilisang nga kamingawan. Apan karon, diha dapit sa Suba sa Jordan sa yuta sa Moab, siya mipakigpulong sa katawhan sa Diyos sa kataposang higayon. Sa panuigong 120, “ang iyang mga mata wala mongitngit, ug ang iyang kusog wala usab maluya,” ni mihinay ang iyang tingog. Si Josue, hapit nang mopuli kaniya, ug hayan ang tanang Israel naghinamhinam sa pagpamati sa gamhanang mga pahamatngon ni Moises sa kasugoan ni Jehova ug sa iyang kusganong tambag nga magmaisogon dihang misulod sila sa pagpuyo sa yuta.​—Deuteronomio 1:1-5, 19, 21, 29, 30; 3:22; 31:6, 7, 23; 34:7.

2. Sa unsang paagi nahibalo kita nga ang rekord niining mga butanga maoy sa pagtudlo kanato karon?

² Kadto bang mga hitaboa sa dugay nang katuigang miagi makasaysayhon lamang? Dili gayod! Si apostol Pablo nagsulti kanato: “Ang tanang butang nga gisulat kaniadto gisulat alang sa pagtudlo kanato, aron nga pinaagi sa atong pailob ug pinaagi sa paglipay gikan sa mga kasulatan makabaton unta kitag paglaom.” (Roma 15:4) Kanang maong rekord adunay modernong adlawng mga katugbang. Makalig-on kini kanato karon alang sa espirituwal nga gubat. Nagsilbi usab kining “pasidaan kanato karon nga hing-abutan sa kataposan sa sistema sa mga butang,” nga makatabang kanato sa paglikay sa mga lit-ag ni Satanas.​—1 Corinto 10:11; 1 Pedro 4:7.

Ang Kusog ni Josue—Diin Gikan?

3, 4. (a) Nganong kinahanglan ugmaron nato ang kaisog? (b) Unsaon nato kini sa paghimo?

³ Sa dili madugay karon, ang katawhan sa Diyos mosulod na paingon sa bag-ong sistema sa mga butang. Tungod sa mga hitabo nga nanagpanungha sa kalibotan, kinahanglang ugmaron nato ang pagkamaisogon. Sa unsang paagi mahimo nato kini? Samtang nangandam si Josue sa pagsulod sa Yutang Saad, siya gisugo sa Diyos: “Magmaisogon ug mamaglig-on gayod sa pag-atiman sa pagbuhat sumala sa tanang balaod nga gisugo kanimo ni Moises nga akong alagad. Ayaw pagtipas ngadto sa tuo ni ngadto sa wala, aron magmauswagon ka bisan asa ka paingon. Ayaw pag-ibulag kining basahon sa kasugoan gikan sa imong baba, hinunoa basahon mo kini sa mahinay sa adlaw ug sa gabii, aron himatngonan mo sa pagbuhat sumala sa tanan nga gisulat dinha; kay sa ingon niana himoon mo nga malamposon ang imong dalan ug molihok ka nga maalamon.”​—Josua 1:7, 8.

⁴ Ah, anaa ang sekreto! Basaha ang Bibliya kada adlaw. Nasudlan kini sa mga kasugoan sa Diyos alang kanato. Hinuktoki kini. Sunda ang mga pahinumdom niini. Ayaw itugot nga madala ka sa materyalistiko, imoral nga kalibotan sa imong palibot. Bisan unsa pay imong kahimtang, lihok nga maalamon. Ipadapat sa praktikal nga paagi ang tukmang kahibalo ug espirituwal nga pagsabot nga imong nakat-onan gikan sa imong pagtuon sa Pulong sa Diyos. Ipahayag kini ngadto sa uban. Kay sa pagbuhat sa ingon ug sa pagsalig kang Jehova, sa pagkatinuod ikaw mahimong ‘maisogon ug malig-on kaayo, ug himoon mo nga malamposon ang imong dalan.’​—Itandi sa Salmo 1:1-3; 93:5; 119:165-168.

5. (a) Sama kang Josue, sa unsang paagi ang batan-ong mga ministro karon makabaton ug kusog? (b) Unsang maayong mga tumong ang mabatonan sa mga batan-ong Saksi karon?

⁵ Si Josue nahimong “alagad ni Moises gikan sa iyang pagkabatan-on” paunahan. (Numeros 11:28) Walay duhaduha nga kining suod nga pag-ubanay nakatabang kaniya sa pagbaton ug espirituwal nga kalig-on. Sa susama, ang batan-ong mga ministro karon makakuhag kalig-on pinaagi sa pagtrabaho uban sa debotadong mga ginikanan, mga payunir, dugay nang mga Saksi, ug ubang maunongong mga alagad ni Jehova. Ang pakigbahin sa pagpamalaybalay nga pagsangyaw uban sa mga madasigon makahatag kalipay ug makatabang sa paglig-on sa pagkahamtong sa atong mga batan-on ug sa tinguha sa pag-uswag sa ministeryo. (Buhat 20:20, 21; Isaias 40:28-31) Pagkamaayong tumong ang mabatonan sa batan-ong mga Saksi kay sa bug-os panahong pag-alagad alang sa Gingharian ni Jehova!​—Salmo 35:18; 145:10-12.

6. Sa unsang paagi panig-ingan si Josue kanato maylabot sa kampaniya batok kang Amalek?

⁶ Dihang gipadala ni Moises si Josue sa pagpakig-away sa mga Amalekanhon, “gibuhat ni Josue ang giingon kaniya ni Moises.” Siya masinundanon; busa, naangkon niya ang kadaogan. Kita, usab, makabahin sa pagbayaw kang Jehova kon bug-os natong hatagag pagtagad ang mga instruksiyon sa gubat nga atong madawat pinaagi sa iyang organisasyon. Gisultihan ni Jehova si Moises sa paghandum sa Iyang kadaogan batok kang Amalek pinaagi sa pagsulat niini diha sa libro ug sa pagpahibalo niini diha sa mga igdulongog ni Josue. Walay duhaduha dugang nga gihimaya ni Josue ang kadaogan ni Jehova pinaagi sa pagsulti niini ngadto sa uban. Sa samang paagi, kita karon makapahibalo sa gamhanong mga buhat sa Soberano Ginoong Jehova, ug kita makamantala sa iyang umaabot nga “adlaw sa panimalos” diha sa mga daotan.​—Exodo 17:10, 13, 14; Isaias 61:1, 2; Salmo 145:1-4.

7, 8. (a) Unsang pagsalig ang gipahayag ni Josue ug Caleb dihang mibalik gikan sa Canaan? (b) Unsang pasidaan ug pagdasig ang atong nakita sa pag-atiman ni Jehova sa mga butang niadtong panahona?

⁷ Dihang gipadala ni Moises ang 12 ka pangulo sa banay aron sa pag-espiya sa Yutang Saad, iyang gilakip si Josue uban kanila. Sa paghiuli, ang napulo ka espiya mipahayag ug dakong kalisang sa mga pumoluyo sa yuta sa Canaan ug giagda ang katawhan sa pagkampaniya sa pagbalik ngadto sa Ehipto. Apan si Josue ug si Caleb maisogong miingon: “Kon si Jehova nahimuot kanato, siya magpasulod kanato niining yutaa, ug kini iyang ihatag kanato, usa ka yuta nga nagaagay sa gatas ug dugos. Mao lamang nga dili kamo moalsa batok kang Jehova; ug kamo, ayaw kahadlok sa katawhan, kay sila ang tinapay alang kanato. Ang ilang mga salipdanan kuhaon gikan sa ibabaw kanila, ug si Jehova uban kanato. Ayaw kahadlok kanila.”​—Numeros 13:1–​14:38.

⁸ Apan, ang panon sa Israel nagpadayon sa pagbagolbol, maoy hinungdan nga nangilabot si Jehova ug gihukman kadtong talawang mga Israelinhon sa 40 ka tuig nga paglibodlibod sa kamingawan. Gawas kang Caleb ug Josue, ang tanan sa ilang mga lalaki sa gubat nangamatay nga wala makakita sa Yutang Saad. Usa gayod kini ka pasidaan alang kanato karon! Kinahanglang dili gayod kita magbagolbol batok sa mga kahikayan ni Jehova. Bisag sagubangon nato ang malisod nga mga teritoryo sa pagsangyaw, kinahanglang maisogon kita ug malig-on sa pagduaw sa mga balay sa mga tawo uban sa makaluwas ug kinabuhing balita sa Gingharian. Hinaot nga dili kita mahisama niadtong modernong adlawng mga apostata, kinsa inay magpamatuod atubangan sa katilingban, mas gusto pang mopasipala sa ilang mga igsoon ug sa pagbalik sa mga paagi sa kalibotan​—ang antitipong Ehipto.​—Numeros 14:1-4, 26-30; Lucas 12:45, 46; itandi sa Buhat 5:27-29, 41, 42.

Ipadayag ang Ngalan ni Jehova!

9. Sa unsang paagi nagkinabuhi si Josue sumala sa iyang bag-ong ngalan?

⁹ Ang listahan sa Bibliya sa 12 ka espiya nagngalan kang Josue nga Hoshea, nga nagkahulogang “Kaluwasan.” Apan ning puntoha ang rekord nag-ingon: “Si Moises padayong nagtawag kang Hohsea ang anak nga lalaki ni Nun Jehoshua [nagkahulogan, ‘Si Jehova Mao ang Kaluwasan’].” Nganong gipasiugda ni Moises ang ngalan ni Jehova? Tungod kadto kay ilabinang nag-alagad si Josue aron sa pagbayaw nianang ngalana. Si Josue nahimong buhing panig-ingnan sa pagkamasinundanon sa sugo nga gipasiugda ni Moises sa ulahi sa Israel: “Kinahanglang higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog.” Sa pagbuhat niini, siya nakapribilehiyo sa pagpasundayag nga si ‘Jehova mao ang kaluwasan.’​—Numeros 13:8, 16; Deuteronomio 6:5.

10. (a) Unsay kahulogan alang kanimo sa ngalan ni Jehova? (b) Unsang kusog ang atong makuha gikan sa dugang mga pulong ni Jehova kang Josue?

¹⁰ Dili ba midangat man usab kita sa pagtamod sa ngalan ni Jehova nga mao ang labing bililhon ug takos sa tanang pagdayeg? Ang iyang mahimayaong ngalan nagkahulogang “Siya ang Nagpahinabo” maylabot sa pagtuman sa iyang mga saad. Unsa ka makapalipay sa iyang mga saad sa Gingharian! Uban ang kadasig nga sama kang Josue, gusto natong himayaon ang ngalan ug ang mga katuyoan ni Jehova atubangan sa tanang modawat pa sa paglaom sa iyang mahinlo ug matarong bag-ong sistema sa mga butang. Niining masulayong panahon, kita makakuhag kalig-on gikan sa dugang mga pulong ni Jehova ngadto kang Josue: “Wala ko ba ikaw sugoa? Magmaisogon ug magmalig-on ka. Ayaw pagkahadlok ug dili ka maluya, kay si Jehova nga imong Diyos magauban kanimo bisan asa ikaw moadto.”​—Josue 1:9.a

11. (a) Sa unsang paagi ang kahulogan sa ngalan ni Jesus napadako dihang misakay siya pasulod sa Jerusalem? (b) Sa unsang paagi gitamod ni Jesus ang ngalan ni Jehova, ug unsay nagpakita niini?

¹¹ Ang Gregong pulong nga katumbas sa ngalang Josue, kun Jehoshua, mao ang Jesus, nga nagkahulogan usab nga “Si Jehova Mao ang Kaluwasan.” Pinaagi kang Jesus-Kristo nga mitagana si Jehova ug kaluwasan alang sa katawhan. Sa 33 K.P. dihang misakay si Jesus ug asno paingon sa Jerusalem, ang panon sa katawhan misinggit: “Luwasa, kami nagaampo! Bulahan siya nga nagaanhi sa ngalan ni Jehova!” (Marcos 11:9; Zacarias 9:9) Si Josue mao ang tinuod nga tipo ni Jesus, nga ‘nagbilin kanato ug panig-ingnan aron kita managsunod sa iyang tunob.’ (1 Pedro 2:21) Sama kang Josue, bililhon alang kang Jesus ang ngalan ni Jehova, ug iyang gihimaya kanang ngalana. Makaduha ka beses diha sa iyang kataposang pag-ampo uban sa iyang mga disipulo, iyang gipasiugda ang ngalan ni Jehova, nga nag-ingon: “Gipadayag ko ang imong ngalan ngadto sa mga tawo nga kanako imong gitugyan gikan sa kalibotan. . . . Ug ang imong ngalan akong gipaila kanila ug kini igapaila ko pa, aron ang gugma nga imong ginahuptan sa imong paghigugma kanako maanaa kanila ug ako mahiusa kanila.” (Juan 17:6, 26) Pagkadakong pribilehiyo ang atong nahuptan sa pagpaila nianang ngalana ngadto sa uban!

12. Unsang gamhanang mga buhat ang atong gihulat karon, ug ngano?

¹² Samtang magabasa kita diha sa rekord sa Bibliya mahitungod sa maunongong pagpanguna ni Josue, atong mahinumdoman nga ang Dakong Josue, si Jesu-Kristo, mao ang nagapanguna sa katawhan sa Diyos karon. Ang “mga adlaw ni Jehova” sa paghimaya haduol na. Pagkadako sa atong kahinam nga nagahulat sa katumanan sa iyang saad sa usa ka matarong bag-ong sistema nga mosunod nianang adlawa! (2 Pedro 3:10-13, 17, 18) Nan, sa masaligon, kita makapanan-aw sa unahan sa dugang gamhanong mga buhat ni Jehova, nga mas gamhanan kay sa iyang gihimo pinaagi kang Josue.

Ang Milagro ni Jehova sa Jordan

13. (a) Unsa ang daw imposibleng situwasyon ang giatubang sa Israel diha sa sidlakang tampi sa Jordan? (b) Sa unsang paagi ang pagkamasundanon sa Israel gibalosan?

¹³ Panahon kadto sa ting-ani sa tuig 1473 W.K.P., ug panahon kadto sa tingbaha sa Suba sa Jordan. Sa unsang paagi ang milyonmilyong mga kalag, tigulang ug batan-on, mga lalaki, mga babaye, ug mga bata, madala sa pagtabok nianang sulog nga baha? Apan gisugo ni Jehova si Josue: “Karon bumangon ka, tabok sa Jordan, ikaw ug kining tibuok katawhan.” Sa baylo, ang katawhan miingon kang Josue: “Ang tanan nga imong gisugo kanamo among buhaton.” Ang Israel migikan. Ang mga saserdote mitabok ug una, nga nagdala sa arka sa tugon, nga mainampingong gitabonan ug nga naghawas sa presensiya ni Jehova uban kanila. Misugod si Jehova sa ‘paghimog katingalahang mga butang sa ilang taliwala,’ sa “nangabot na sa Jordan ang mga nanagyayong sa Arka ug ang mga tiil sa mga saserdote nanghituslob na didto sa daplin sa mga tubig . . . ang mga tubig nga miagos gikan sa itaas mihunong.” Ang mga tubig sa ubos “gisap-ongan,” sa pag-agos sa Patayng Dagat, “ug ang mga tawo milabang.” (Josue 1:2, 16; 3:5-16) Pagkadako nga milagro!

14. Unsang katugbang ang naglungtad niining adlawa, ug unsay resulta sa gihatag nga pagpamatuod?

¹⁴ Ang sulog nga Jordan adunay katugbang sa lunop sa katawhan nga karon nagakatidlom sa kalaglagan diha sa Armageddon. (Itandi sa Isaias 57:20; Pinadayag 17:15.) Karon, samtang nagbarog ang katawhan sa ngilit nianang kataposang pagtundag, gilig-on ni Jehova ang iyang katawhan, nga karon may gidaghanong kapin sa 3,000,000​—usa ka gidaghanong ikatandi nianang sa katawhan sa Diyos nga mimartsa uban kang Josue.​—Itandi sa Habacuc 2:3.

15. (a) Unsa sa modernong panahon ang kaamgid sa maisogong lihok sa mga saserdote balik didto? (b) Sa unsang paagi girepresentar ang “dakong panon” niini nga larawan?

¹⁵ Samtang ang milyonmilyon sa Israel mitabok sa tunga sa suba, “ang mga saserdote nga nagyayong sa arka sa tugon ni Jehova nanindog nga malig-on sa yuta nga mamala taliwala sa Jordan,” nga nagbarog sa pagpangilabot ni Jehova nga Diyos sa mga butang. (Josue 3:17) Sa 1919 nga ang gamayng panon sa dinihogang mga Saksi milakang nga maisogon atubangan sa “mga tubig” sa katawhan. Sa 1922 sila maisogong misanong sa panawag nga ‘iwali, iwali, iwali ang Hari ug ang iyang Gingharian,’ nga sa ato pa nagaingon: “Ania ako! Ipadala ako.” Si Jehova nagpasalig kanila: “Dihang moagi ikaw sa tubig, ako magauban kanimo; ug inig-agi mo sa mga suba, dili ka malumos.” Sa 1931, iyang gipasidunggan sila pinaagi sa paghatag kanilag ngalang mga Saksi ni Jehova. (Isaias 6:8; 43:2, 12) Lakip niadtong mitabok sa Jordan mao ang dili-Levihanong mga Israelinhon ug ang mga kaliwat sa mga dili-Israelinhon ang “nagkasagol nga panon sa katawhan” nga migawas sa Ehipto uban kang Moises. Sa susama, ang “dakong panon” karon nakigbahin sa pagtabok ngadto sa bag-ong sistema sa Diyos, samtang ang mga nanghibilin sa espirituwal nga saserdoteng matang nagabarog nga “malig-on, dili matarog,” sulondan sa ilang pagtuo.​—Exodo 12:38; Pinadayag 7:9; 1 Corinto 15:58.

Paghandum sa Milagro

16. (a) Sa unsang paagi ang milagro sa Jordan gihandum? (b) Unsay gisugyot niini maylabot sa gamhanang mga buhat ni Jehova karon?

¹⁶ Aron mahandum ang milagro sa Jordan, gisugo ni Jehova ang 12 ka tawo, nga naghawas sa tagsatagsa ka banay sa Israel, sa pagdalag 12 ka bato gikan sa taliwala sa suba ug ibutang kini diha sa kasadpang tampi sa Gilgal. Kadtong mga batoha nagbarog didto ingon nga walay kataposang handumanan sa ngalan ni Jehova ug sa iyang gamhanong mga buhat. Ang umaabot nga mga Israel sultihan nga kining handumanan gihimo “aron ang tanang katawhan sa kalibotan makaila sa kamot ni Jehova, nga kana kusgan; aron kamo mahadlok kang Jehova nga inyong Diyos sa tanang panahon.” (Josue 4:1-8, 20-24) Sa modernong panahon, ang katingalahang mga buhat ni Jehova sa pagtipig sa iyang katawhan, bisan pa sa mapintas nga mga pag-atake sa politikal ug relihiyosong mga lider, nagbarog ingong handumanan nga siya nagauban sa iyang katawhan. Walay duhaduha ang iyang dako modernong adlawng mga buhat sa pagbayaw sa iyang ngalan pagahandumon sa walay kataposan diha sa iyang bag-ong sistema sa mga butang.​—Pinadayag 12:15, 16; Salmo 135:6, 13.

17. (a) Unsang dugang paghandum ang gihimo ni Josue? (b) Unsa ang dili malikayan sa katawhan maylabot sa samang pamatuod karon?

¹⁷ Usa pa ka handumanan ang gikinahanglan: “Si Josue nagpatindog sa napulo ug duha ka bato sa kinataliwad-an sa Jordan, sa dapit nga gitindogan sa tiil sa mga saserdote nga nagyayong sa arka sa tugon, ug kini atua nagatindog gihapon didto hangtod niining adlawa.” Dihang mikawas ang mga saserdote gikan sa taliwala sa suba ug gibuhian ni Jehova ang nasap-ongang tubig, kini mibuhagay diha sa 12 ka bato sa pamatuod. (Josue 4:9) Busa, dili makaikyas kanang maong baha sa presensiya niadtong mga batoha. Sa karon usab, ang katawhan tulin nga nagakaunlod paingon sa “Patayng Dagat” sa Armageddon. Apan dili kini makaikyas sa pamatuod nga nagkadaghan ang mga Saksi ni Jehova sa tibuok-kalibotan samtang sila nagabarog nga “malig-on diha sa usa ka espiritu uban sa usa ra ka kalag nga managhugop sa pagpakigbisog alang sa pagtuo sa maayong balita.” (Filipos 1:27, 28) Ang nahuptang mga rekord nagpakita nga, sa yugto sa 67 ka tuig hangtod sa tuig 1986, ang mga Saksi nakapahimutang diha sa mga balay sa katawhan sa tibuok-yuta, diha sa kapin sa 200 ka pinulongan, ug kapin sa 570,000,000 ka libro ug kapin sa 6,400,000,000 ka kopya sa Bantayanang Torre ug Pagmata! nga mga magasin, ug milyonmilyong mga suskrisyon sa magasin​—pagkadako gayod nga pamatuod!

18. (a) Unsang mga hiyas ang gipakita sa saserdoteng matang karon? (b) Sa unsang paagi ang katawhan sa Diyos napadasig?

¹⁸ Malipayon kita nga nagapadayon ang pagpanaksi hangtod niining tuiga sa 1986. Ang pagbuhat sa kabubut-on sa Diyos nagkinahanglag pagkugi, sama nga gipas-an sa 12 ka lalaki ang iyang batong handumanan ug gidala kini paingon sa Gilgal. Apan ang dakong espiritu sa pagpayunir nakahiusa sa modernong adlawng katawhan sa Diyos, nagadasig kanila nga padayong “magmaisogon ug magmalig-on kaayo.”​—Salmo 27:14; 31:24; Sofonias 3:9.

19. Sa pagrepaso sa dugang mga hitabo sa mga adlaw ni Josue, unsang pasalig ang atong mabatonan?

¹⁹ Ang ubang mga hitabo sa mga adlaw ni Josue makadasig kanato sa pagpadayon sa unahan, masaligon nga mohimo si Jehova ug dugang mga milagro alang sa iyang katawhan. Repasohon sa among sunod nga artikulo ang pipila niini.

[Mga footnote]

Pagpalandong sa mga Hitabo sa mga Adlaw ni Josue​—

◻ Nganong kinahanglang lantawon kini labaw pa kay sa usa lamang ka kasaysayan?

◻ Sa unsang paagi atong maugmad ang kaisog ug espirituwal nga kusog?

◻ Unsang maayong sumbanan ang gibilin ni Josue kanato?

◻ Sa unsang paagi naglandong si Josue kang Jesus?

◻ Unsa ang mga hitabo karon nga katumbas sa nahitabo sa Jordan?