Pagbatog Kaayohan Gikan sa “mga Lugas sa Langit”
WALA madugay human sa ilang milagrosong kaluwasan gikan sa Ehipto, ang mga Israelinhon nagpadayag ug grabeng kakulag pagtuo sa ilang Manluluwas, si Jehova. Tungod niini, gitugotan sila ni Jehova nga maglatagaw sa kamingawan sa Sinai sulod sa 40 ka tuig. Sulod nianang panahona, ang mga Israelinhon ug ang “dako kaayong nagkasagol nga panon” sa mga langyaw nga mikuyog kanila nangaon ug nanginom “hangtod sa pagkabusog.” (Exodo 12:37, 38) Ang Salmo 78:23-25 nagsulti kanato kon sa unsang paagi kini nahimong posible: “Iyang [Jehova] gisugo ang dag-omong kalangitan sa itaas, ug iyang gibuksan ang mga ganghaan mismo sa langit. Ug siya nagpaulan kanila ug mana aron kan-on, ug ang mga lugas sa langit iyang gihatag kanila. Ang mga tawo mikaon sa tinapay mismo sa mga gamhanan; siya nagpadala kanila ug mga tagana hangtod sa pagkabusog.”
Ingong mag-aambit sa mana, gihubit ni Moises kining talagsaong pagkaon. Siya misulat nga inigkabuntag, human “ang lut-od sa yamog mahanaw . . . , sa ibabaw sa nawong sa kamingawan dihay gagmayng tipiktipik, gagmay sama sa nanibuok nga tun-og diha sa yuta. Sa dihang nakita kini sa mga anak sa Israel, sila miingon sa usag usa: ‘Unsa ba kini?’” o sa literal sa Hebreohanon, “man huʼ?” Kining mga pulonga malagmit mao ang lintunganay sa pulong “mana,” ang ngalan nga gihatag sa mga Israelinhon sa pagkaon. Si Moises nag-ingon: “Kini puti sama sa liso sa kulantro, ug ang lami niini sama sa lagpad nga tinapay nga may dugos.”—Exodo 16:13-15, 31, potnot.
Ang mana dili pagkaon nga motungha sa kinaiyanhon, sama sa pangatarongan sa uban. Usa ka dili-kinaiyanhong puwersa ang nalangkit sa pagtagana niini. Pananglitan, kini mabatonan dili lamang sa usa ka dapit o panahon. Kon tipigan hangtod sa buntag, kini mopatunghag mga ulod ug mosugod sa pagpanimaho; bisan pa niana, ang dobleng pahat nga tigomon sa matag pamilya sa adlaw sa dili pa ang senemanang Igpapahulay dili madaot hangtod mabuntag, mao nga makaon kini sa Igpapahulay—ang adlaw nga walay mana nga motungha. Sa pagkatinuod, ang mana maoy usa ka milagrosong tagana.—Exodo 16:19-30.
Ang paghisgot bahin sa “mga gamhanan,” o “mga manulonda,” diha sa Salmo 78 nagsugyot nga si Jehova mahimong naggamit sa mga manulonda sa pagtaganag mana. (Salmo 78:25, potnot) Kon unsa man ugaling, ang katawhan adunay tanang katarongan sa pagpasalamat sa Diyos tungod sa iyang kalulot. Bisan pa niana, ang kadaghanan nagpakitag dili-mapasalamatong tinamdan ngadto mismo sa Usa nga nagluwas kanila gikan sa pagkaulipon sa Ehipto. Kita usab basin magbalewala o mahimo pa ganing dili-mapasalamaton kon kita dili mamalandong sa iyang mahigugmaong-kalulot. Busa magpasalamat kita nga gilakip ni Jehova ang rekord sa kaluwasan sa Israel ug ang sunod nga mga hitabo alang sa “atong instruksiyon.”—Roma 15:4.
Usa ka Pagtulon-an Alang sa Israel Mapuslanon sa mga Kristohanon
Sa dihang si Jehova nagtagana sa mana, siya naghunahuna ug labaw pa kay sa pagtagbaw lamang sa pisikal nga mga panginahanglan sa mga tulo ka milyong Israelinhon. Buot niya nga mahimo ‘sila nga mapainubsanon ug sa pagsulay kanila’ aron madalisay ug madisiplina sila alang sa ilang kaayohan. (Deuteronomio 8:16; Isaias 48:17) Kon mosanong sila sa maong pagdalisay ug pagdisiplina, si Jehova malipay sa ‘pagbuhat ug maayo kanila sa ilang mga adlaw sa ulahi’ pinaagi sa paghatag kanilag kalinaw, kauswagan, ug kalipay sa Yutang Saad.
Usa ka hinungdanong butang nga kinahanglan nilang makat-onan mao nga “ang tawo dili mabuhi sa tinapay lamang kondili sa matag pulong gikan sa baba ni Jehova nga mabuhi ang tawo.” (Deuteronomio 8:3) Kon ang Diyos wala pa magtagana sa mana, ang mga tawo gipanggutom unta—usa ka kamatuoran nga ila dayong giadmitir. (Exodo 16:3, 4) Ang mapasalamatong mga Israelinhon adlaw-adlawng gipahinumdoman sa ilang bug-os nga pagdepende kang Jehova ug sa ingon nakakat-on sa pagpaubos. Sa dihang makaabot na sa Yutang Saad uban sa materyal nga kadagaya niini, sila gamay rag purohan nga malimot kang Jehova ug sa ilang pagdepende kaniya.
Sama sa mga Israelinhon, ang mga Kristohanon kinahanglang magpabiling mahunahunaon sa ilang pagdepende sa Diyos alang sa mga kinahanglanon sa kinabuhi—pisikal ug espirituwal. (Mateo 5:3; 6:31-33) Sa pagtubag sa usa sa mga tentasyon sa Yawa, gikutlo ni Jesu-Kristo ang mga pulong ni Moises sumala sa makaplagan diha sa Deuteronomio 8:3, nga nag-ingon: “Kini nahisulat, ‘Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.’” (Mateo 4:4) Oo, ang matuod nga mga magsisimba sa Diyos ginapakaon pinaagi sa mga pamulong ni Jehova nga makaplagan diha sa iyang Pulong. Dugang pa, mapalig-on ang ilang pagtuo sa dihang ilang masinati ang mapuslanong mga epekto niining maong mga pamulong diha sa ilang mga kinabuhi samtang naglakaw sila uban sa Diyos ug nag-una sa mga intereses sa iyang Gingharian.
Ang mga tawong dili-hingpit mahimong mawad-an sa ilang pagpabili sa mga butang nga nahimo nang rutina nga bahin sa kinabuhi—bisan pag kining mga butanga maoy pagpasundayag sa mahigugmaong kabalaka ni Jehova. Pananglitan, ang dili-kinaiyanhong tagana sa mana nakapahingangha ug nakapatagbaw sa mga Israelinhon sa sinugdanan, apan paglabay sa panahon daghan kanila ang nagreklamo. “Ang among kalag giluod na niining dulumtanang tinapay,” sila dili-matinahurong nagbagulbol—usa ka ilhanan nga sila nagsugod na sa “pagpahilayo gikan sa buhi nga Diyos.” (Numeros 11:6; 21:5; Hebreohanon 3:12) Busa, ang ilang panig-ingnan nagsilbing “pasidaan kanato nga naabtan sa mga kataposan sa mga sistema sa mga butang.”—1 Corinto 10:11.
Sa unsang paagi nato matisok sa kasingkasing kining maong pasidaang panig-ingnan? Usa ka paagi mao nga dili gayod tugotan ang mga pagtulon-an sa Bibliya o ang mga tagana nga atong madawat pinaagi sa matinumanon ug mabuot nga ulipon nga matang nga mahimong ordinaryo na lang, o naandan. (Mateo 24:45) Sa dihang magsugod kita sa pagbale-wala sa mga gasa ni Jehova o mapul-an niini, ang atong relasyon kaniya mosugod sa pagkabugnaw.
Adunay maayong katarongan nga wala kita gipabahaan ni Jehova pinaagi sa sigesige nga pagdawat ug kulbahinam nga bag-ong mga butang. Hinunoa, siya nagpadan-ag ug dugang kahayag sa iyang Pulong sa anam-anam, progresibong paagi. (Proverbio 4:18) Kini nagtugot sa iyang katawhan sa pagsagop ug pagpadapat sa mga butang nga ilang makat-onan. Si Jesus nagsundog sa panig-ingnan sa iyang Amahan sa dihang nagtudlo sa iyang unang mga tinun-an. Siya nagpatin-aw sa Pulong sa Diyos ngadto kanila “kutob sa ilang maarangan pagpamati,” o “pagsabot,” sumala sa pagkapadayag niini sa ubang hubad.—Marcos 4:33; itandi ang Juan 16:12.
Palig-ona ang Imong Apresasyon Alang sa mga Tagana sa Diyos
Gigamit usab ni Jesus ang pagsublisubli. Siyempre, ang hunahuna tingali makasabot dayon sa usa ka punto—usa ka prinsipyo sa Bibliya, pananglitan—apan ang pagtisok niini sa kasingkasing ug paghimo niini nga bahin sa Kristohanong “bag-ong personalidad” mokabat pa tingalig mas dugayng panahon, ilabina kon ang karaang kalibotanong mga paagi ug mga tinamdan maoy nakagamot na pag-ayo. (Efeso 4:22-24) Mao gayod kana ang kahimtang sa mga tinun-an ni Jesus kon may kalabotan na sa pagbuntog sa garbo ug pag-ugmad sa pagkamapainubsanon. Kinahanglang tudloan sila ni Jesus bahin sa pagkamapainubsanon sa makadaghang higayon, nga sa matag higayon nagpresentar sa mao gihapong paninugdang punto gikan sa laing anggulo aron kini modulot, nga sa ngadtongadto midulot gayod.—Mateo 18:1-4; 23:11, 12; Lucas 14:7-11; Juan 13:5, 12-17.
Sa modernong mga panahon, ang Kristohanong mga tigom ug mga publikasyon sa Watch Tower nagsunod sa panig-ingnan ni Jesus sa gihunahuna-pag-ayo nga paggamit sa pagsublisubli. Busa atong pabilhan kini ingong usa ka pagpahayag sa mahigugmaong kabalaka sa Diyos alang kanato ug dili gayod mobatig kapuol sa kon unsay atong ginadawat, sama nga ang mga Israelinhon gipul-an sa mana. Sa pagkatinuod, samtang kita mapailobong maningkamot sa pagpatisok sa makanunayong mga pahinumdom ni Jehova, ato unyang makita ang maayong mga bunga diha sa atong kinabuhi. (2 Pedro 3:1) Ang maong mapabilhong tinamdan magpakita gayod nga kita “nakasabot sa diwa” sa Pulong sa Diyos diha sa atong kasingkasing maingon man sa atong hunahuna. (Mateo 13:15, 19, 23) Mahitungod niini, kita adunay maayong panig-ingnan diha kang salmistang David, kinsa, bisan wala magbaton ug nagkadaiyang espirituwal nga pagkaon nga atong ginadawat karon, naghubit sa mga kasugoan ni Jehova ingong “matam-is pa kay sa dugos ug sa nagaagos nga dugos sa udlan”!—Salmo 19:10.
“Mana” nga Mohatag ug Walay-Kataposang Kinabuhi
“Ako mao ang tinapay sa kinabuhi,” gisultihan ni Jesus ang mga Hudiyo. “Ang inyong mga katigulangan mikaon sa mana didto sa kamingawan ug bisan pa niana nangamatay. . . . Ako mao ang buhing tinapay nga nanaog gikan sa langit; kon may mokaon niini nga tinapay siya mabuhi hangtod sa hangtod . . . Ang tinapay nga akong ihatag mao ang akong unod alang sa kinabuhi sa kalibotan.” (Juan 6:48-51) Ang literal nga tinapay o mana wala maghatag ug dili makahatag ug walay-kataposang kinabuhi. Apan kadtong magpasundayag ug pagtuo sa halad nga lukat ni Jesus sa ngadtongadto magtagamtam sa panalangin sa walay-kataposang kinabuhi.—Mateo 20:28.
Ang kadaghanan niadtong makabatog kaayohan gikan sa lukat ni Jesus magtagamtam sa walay-kataposang kinabuhi dinhi sa paraisong yuta. Ang “usa ka dakong panon” niini—nga gilandongan sa “dako kaayong nagkasagol nga panon” sa mga langyaw nga mikuyog sa mga Israelinhon sa ilang Pagbiya sa Ehipto—makalabang buhi sa umaabot nga “dakong kasakitan” nga maghinlo sa yuta sa tanang pagkadaotan. (Pinadayag 7:9, 10, 14; Exodo 12:38) Usa ka mas dako pang ganti ang matagamtam niadtong gilandongan sa mga Israelinhon mismo. Si apostol Pablo naghubit kanila, nga may gidaghanong 144,000, ingong naglangkob sa espirituwal nga Israel sa Diyos. Ang ilang ganti diha sa kamatayon mao ang pagkabanhaw ngadto sa kinabuhi sa langit. (Galacia 6:16; Hebreohanon 3:1; Pinadayag 14:1) Didto si Jesus maghatag kanila ug usa ka linaing matang sa mana.
Ang Kahulogan sa “Tinagong Mana”
“Kaniya nga magamadaogon igahatag ko ang pipila sa tinagong mana,” nag-ingon ang binanhawng Jesus ngadto sa espirituwal nga Israel. (Pinadayag 2:17) Kining simboliko nga tinagong mana makapahinumdom kanato sa mana nga gisugo sa Diyos kang Moises nga tipigan diha sa bulawang tibod sa sulod sa balaang arka sa pakigtugon. Ang Arka gitipigan diha sa Labing Balaan nga lawak sa tabernakulo. Didto kini gihuptan nga dili makita, gitago ingnon ta. Kay gitipigan ingong usa ka handomanan, kining maong sampol sa mana wala madaot samtang kini nagpabilin diha sa Arka, busa kini angayan nga simbolo sa dili-madaot nga tagana sa pagkaon. (Exodo 16:32; Hebreohanon 9:3, 4, 23, 24) Sa paghatag sa tinagong mana ngadto sa 144,000, si Jesus nagpasalig sa ilang pagdawat sa imortalidad ug pagkadili-madunoton ingong espirituhanong mga anak sa Diyos.—Juan 6:51; 1 Corinto 15:54.
“Kanimo [Jehova] anaa ang tuboran sa kinabuhi,” nag-ingon ang salmista. (Salmo 36:9) Pagkadakong panghimatuod ang tagana sa mana—literal ug simboliko—niana nga pasukaranang kamatuoran! Ang mana nga gihatag sa Diyos sa karaang Israel, ang masambingayong mana nga iyang gitagana sa dagway sa unod ni Jesus nga gihatag alang kanato, ug ang simboliko nga tinagong mana nga iyang ihatag pinaagi kang Jesus ngadto sa 144,000 magpahinumdom kanatong tanan sa atong bug-os nga pagdepende sa Diyos alang sa kinabuhi. (Salmo 39:5, 7) Atong ilhon sa mapainubsanon, sa makasaranganon, ug sa regular kining maong pagdepende. Sa baylo, si Jehova ‘magabuhat ug maayo kanato sa atong mga adlaw sa ulahi.’—Deuteronomio 8:16.
[Mga hulagway sa panid 26]
Aron makabaton ug walay-kataposang kinabuhi, ang tanang tawo nagdepende sa “buhing tinapay nga nanaog gikan sa langit”
[Hulagway sa panid 28]
Ang pagtambong sa tanang Kristohanong mga tigom magpabanaag sa atong pagpabili sa mga pahinumdom ni Jehova