Paghusay sa Tibuok-Kalibotang Isyu Hangtod sa Hangtod
“Si Jehova mismo diha sa imong tuong kamot magadugmok sa mga hari sa adlaw sa iyang kasuko.”—SALMO 110:5.
1, 2. Sa tuig 70 K.P., unsang hitabo ang tingali naghatag pagduhaduha sa pagkatibuok-kalibotan sa pagkasoberano ni Jehova nga Diyos, apan niadtong panahona, kang kinsa niya giwaling ang iyang pabor?
ANG tibuok-kalibotang pagkasoberano sa Maglalalang sa langit ug sa yuta mao ang kinalabwang isyu atubangan sa mga tawo ug mga manulonda. Sa dili madugay, ang isyu pagahusayon sa tanang panahon, kay sa daghan nang siglo ang mga kaaway ni Jehova naghagit sa iyang pagkasoberano. Sa pagkamatuod, ang pagkalaglag sa 70 K.P. sa siyudad sa Jerusalem kauban sa templo niana nga gipahinungod kang Jehova tingali nagpahinabog pagduhaduha sa pagkatibuok-kalibotan sa pagkasoberano sa Maglalalang. Bisan pa niana, may angayang katarongan nga wala pilia ni Jehova nga mahimong usa ka manggugubat nga Diyos alang sa unodnong Israel.
2 Unsa ang katarongan? Niadtong panahona giwaling ni Jehova nga Diyos ang iyang pabor ngadto sa usa ka bag-ong nasod, usa ka espirituwal nga Israel, “ang Israel sa Diyos,” sumala sa pagtawag ni apostol Pablo sa kongregasyon ni Jesu-Kristo. (Galacia 6:16) Hinuon, sa pagkakaron sa tibuok gitawag Kristohanong Panahon, si Jehova wala magpakig-away alang sa espirituwal nga Israel ingong manggugubat nga Diyos sa samang paagi nga siya nakig-away alang sa kinaiyanhong Israel ubos sa tugon sa Moisesnong Kasugoan. Gitugotan pa niya ang Romanong mga sundalo, nga gisibahan sa mga Hudiyo, nga ipapatay si Jesu-Kristo sa usa ka kahoy sa pagsakit sa Kalbaryo. Kadto maoy 37 ka tuig una sa ikaduhang pagkalaglag sa Jerusalem pinaagi sa mga Romano, sa 70 K.P.
3, 4. Sukad sa mga adlaw ni Moises hangtod ni Haring Ezekias, giunsa pagpadayag sa Diyos nga siya usa ka manggugubat, apan sa kahimtang sa espirituwal nga mga Israelinhon unsay matuod kon bahin sa iyang pakig-away ug sa ilang pakig-away?
3 Sukad sa mga adlaw sa propetang si Moises hangtod sa paghari ni Haring Ezekias sa Jerusalem, si Jehova nga Diyos nakig-away sa milagrosong paagi dapig sa nasod sa Israel, ug ang mga Israelinhon nakig-away ubos kaniya pinaagi sa makapatayng mga hinagiban. (Deuteronomio 1:30; 3:22; 20:3, 4; Josue 10:42) Apan dili kana ang kahimtang sa espirituwal nga Israel! Sukad sa pagkamatay ni Jesu-Kristo sa gawas sa Jerusalem hangtod sa atong Komung Panahon, kining manggugubat nga Diyos wala mopalabi sa pagpakig-away sa pisikal nga pakiggubat alang sa Israel sa Diyos. Busa, siya wala mag-awtorisar sa espirituwal nga mga Israelinhon nga naglangkob sa Kristohanong kongregasyon nga makig-away pinaagi sa materyal nga mga hinagiban sa gubat. Ang mga Kristohanon adunay laing matang sa pakiggubat nga pagabugnoon.
4 Nahiuyon niini, usa sa pangunang mga mag-aaway alang sa Kristohanong pagtuo misulat ngadto sa isigka-Kristohanon sa Corinto, Gresya: “Ang mga hinagiban sa among pakiggubat dili unodnon, apan gamhanan pinaagi sa Diyos aron sa paglumpag sa kinotaan pag-ayong mga butang. Kay kami nagalumpag sa mga pangatarongan ug sa tanang hatag-as nga butang nga gipatindog batok sa kahibalo sa Diyos; ug kami nagabihag sa tanang panghunahuna aron kini magmasinugtanon kang Kristo; ug kami nagahupot sa among kaugalingon nga andam sa paghatag ug silot alang sa matag pagkamasupilon, inigkahingpit na sa inyong kaugalingong pagkamasinugtanon.” (2 Corinto 10:4-6) Sayosayo sa samang sulat, si Pablo naghisgot sa “mga hinagiban sa pagkamatarong sa tuo nga kamot ug sa wala.”—2 Corinto 6:7; tan-awa usab ang Efeso 6:11-18.
Si Jehova Makig-away sa Armageddon
5. Sa tanaman sa Getsemane, unsang baroganan ang gikuha ni Jesus bahin sa paggamit sa materyal nga mga hinagiban sa pagdepensa sa kaugalingon, ug unsang dalan ang pagasundon sa iyang mga tinun-an?
5 Si Jesu-Kristo, sa dinhi sa yuta, wala gayod mogamit ug makapatayng mga hinagiban sa pagdepensa sa kaugalingon. Sa gabii sa pagbudhi kaniya sa tanaman sa Getsemane, ang iyang debotadong tinun-an nga si Simon Pedro miibot sa espada ug mitigbas sa dalunggan sa sulugoon sa Hudiyonhong hataas nga saserdote. Apan sa milagrosong paagi gipasig-uli ni Jesus ang dalunggan sa dapit niini ug miingon: “Ang tanan nga mobakyaw ug espada mamatay pinaagi sa espada. O nagahunahuna ba kamo nga ako dili makahangyo sa akong Amahan sa pagtagana kanako niining gutloa sa kapin sa napulog-duha ka lehiyon nga mga manulonda? Sa maong kahimtang, unsaon sa pagkatuman sa Kasulatan nga kini angay mahitabo niining paagiha?” (Mateo 26:52-54) Sa atubangan niining tanan, ang matuod nga mga manunundog sa nagasakripisyo-sa-kaugalingong Anak sa Diyos nagahupot sa ilang pagkaneyutral, sa direkta ug sa dili-direkta, kon bahin sa kalibotanong pakiggubat.—Juan 17:16; 18:36.
6. Panahon sa gubat sa dakong adlaw sa Diyos nga Makagagahom sa Tanan sa Armageddon, unsang baroganan ang kuhaon sa mga Saksi ni Jehova?
6 Nan, dinhi pahibaloa ang mga nasod nga sa panahon sa “gubat sa dakong adlaw sa Diyos nga Makagagahom sa Tanan” diha sa “dapit nga gitawag sa Hebreohanon nga Har–Magedon,” ang mga Saksi ni Jehova dili moapil sa pakig-away. Kana ilang itugyan ngadto sa manggugubat nga Diyos, “si Jehova sa mga kasundalohan,” uban sa iyang mga lehiyon sa mga manulonda ubos sa pagpangulo ni Jesu-Kristo.—Pinadayag 16:14-16; 19:11-21; Salmo 84:12.
Hapit Nang Ipadayon ni Jehova ang Iyang Militaryong Kalihokan
7. Ingong manggugubat nga Diyos, si Jehova gitawag sa unsang titulo, ug siya giklasipikar ba sa gihapon sa ingon?
7 Ang Diyos sa karaang Israel nailhan ug gitawag nga Jehova tseva·’ohthʹ, o Jehova sa mga kasundalohan. (1 Samuel 1:3, 11) Sa Roma 9:29 (King James Version) ang Kristohanong apostol Pablo nagtumong sa Isaias 1:9 ug nagsulat: “Kon ang Ginoo sa Kasundalohan wala magbilin kanato sa usa ka binhi, kita unta mahisama sa Sodoma, ug mahisama sa Gomora.” Gawas pa, ang Kristohanong tinun-an si Santiago misulat: “Ang mga pagtuwaw nila nga nanag-ani nahidangat sa mga dalunggan sa Ginoo sa kasundalohan.” (Santiago 5:4, KJ; American Standard Version) Busa si Pablo ug si Santiago nagklasipikar sa Diyos ingong Jehova sa mga kasundalohan sulod sa unang siglo sa atong Komung Panahon. Sa misunod nga 18 ka siglo, ang Diyos wala makigbahin sa unodnong pakiggubat alang sa espirituwal nga Israel, ang Israel sa Diyos, sa paagi nga iyang gibuhat alang sa karaang Israel, apan siya gihapon mao si Jehova sa mga kasundalohan.
8-10. (a) Kinsay nag-awtorisar sa gubat sa langit, ug nganong si Miguel labing may katakos sa pagpakiggubat? (b) Unsa ang sangpotanan sa gubat sa langit, ug unsa ka dakong panahon ang nahibilin una pa sa gubat sa dakong adlaw ni Jehova?
8 Sa pagkatawo sa Mesiyanikong Gingharian sa 1914 sa pagkatapos sa “mga panahon sa mga Hentil,” ang gubat misilaob sa langitnong dominyo ni Jehova nga Diyos. (Lucas 21:24, KJ) Kinsay nag-awtorisar niadtong gubata? Si Jehova nga Diyos mismo. Gipadala niya ang iyang naentronong Anak ngadto sa natad sa panggubatan ubos sa ngalang Miguel tungod kay kini Siya maoy labing may-katakos sa pagtubag sa pangutanang nasulod sa maong ngalan, nga mao, “Kinsa ang Sama sa Diyos?” Si Miguel milihok dayon ingong nagpakig-away nga hawas ni Jehova sa mga kasundalohan.
9 Nahiuyon niana, atong mabasa sa Pinadayag 12:7-10: “Ug ang gubat misilaob sa langit: si Miguel ug ang iyang mga manulonda nakig-away sa dragon, ug ang dragon ug ang iyang mga manulonda nakig-away apan wala makadaog, ni may dapit nga hikaplagan alang kanila sa langit. Busa gitambog ang dakong dragon, ang unang bitin, ang usang gitawag Yawa ug Satanas, nga nagalimbong sa tibuok nga gipuy-ang yuta; siya gitambog sa yuta, ug ang iyang mga manulonda gitambog uban kaniya. Ug akong nadungog ang usa ka makusog nga tingog sa langit nga nagaingon: ‘Karon miabot na ang kaluwasan ug ang gahom ug ang gingharian sa atong Diyos ug ang pagbulot-an sa iyang Kristo, tungod kay ang magsusumbong sa atong mga igsoon gikatambog na.’”
10 Sa pagkakaron, kapig 70 ka tuig tapos nianang gubata sa mga langit, “hamubo na lamang nga panahon” ang nahibilin sa dili pa mosilaob ang gubat sa dakong adlaw ni Jehova ug ang Diyos tin-aw magapasundayag sa iyang kaugalingon ingong si Jehova sa mga kasundalohan nganha sa kaliwatan sa katawhan karon.—Pinadayag 12:12; Zacarias 14:3.
Ang Mag-aaway Alang sa Kabayawan ni Jehova
11. Unsang tinudlong panahon ang ginapaabot sa nahibilin sa gamay nga panon ug sa dakong panon, ug unsa unya ang masadyaon nilang dayegon?
11 Ubos sa inspirasyon, ang makinaadmanong si Haring Solomon sa karaang Israel misulat: “Alang sa tanan adunay tinudlo nga panahon, bisan panahon alang sa tanang kahikayan sa silong sa mga langit: . . . panahon sa gubat ug panahon sa kalinaw.” (Ecclesiastes 3:1-8) Sa yuta ang mga tinun-an sa nagamandong Hari si kinsa maoy “labaw pa kay kang Solomon” nagapaabot sa panahon ug okasyon nga Siya magapanguna sa madaogong langitnong mga manulonda padulong sa pakigbugno sa Har–Magedon. (Mateo 12:42; Pinadayag 19:11-16) Didto siya “magabantay [sa kanasoran] pinaagi sa baras nga puthaw,” nga magadugmok kanila “pinaagi sa setro nga puthaw.” (Pinadayag 19:15; Salmo 2:9) Pagadayegon gayod sa iyang madaiton, gipanalipdang mga tinun-an ang makalilisang niyang pagluwas kanila! Mag-apil kini sa nahibilin sa “gamay nga panon” sa iyang kaubang mga manununod sa Gingharian ug sa “dakong panon” sa iyang “ubang mga karnero” nga nagahambin sa paglaom nga magapanunod sa Paraisong yuta ubos sa iyang malinawong paghari sa usa ka libo ka tuig. (Lucas 12:32 Pinadayag 7:9-17; Juan 10:16) Sa pagkamasadyaon, “sa silong sa landong mismo sa Usang Makagagahom sa Tanan,” sila modayeg sa lanog nga kadaogan sa Magbalantay-Hari, si Jesu-Kristo, sa kabayawan sa tibuok-kalibotang pagkasoberano ni Jehova nga Diyos.—Salmo 91:1.
12. Gikan diin maaninaw na ang gubat alang sa mga nasod, ug uban ang unsang sangpotanan sumala sa Salmo 68:1, 2?
12 Nga walay pagpasobra, ikaingon na karon nga ang gubat gikan sa gawas sa kalibotan sa tawo ug nagalangkit sa paggamit sa tukmang-pagkapuntiriya nga mga hinagiban nga molupig sa nukleyar niyang mga bomba maaninaw na sa atubangan sa tanang nasod sa yuta, kon kaha sulod o gawas sa organisasyong Hiniusang Kanasoran. Pamati: “Patindoga ang Diyos, patibulaaga ang iyang mga kaaway, ug pakakalagiwa tungod kaniya kadtong mainitong nagadumot kaniya. Sama sa aso nga ginapalid, hinaot imo silang papahawaon; sama sa talo nga matunaw tungod sa kalayo, mamahanaw unta ang mga daotan gikan sa atubangan sa Diyos.”—Salmo 68:1, 2.
13. Samtang nagapadayon ang mga pangandam sa gubat, kang kinsa karon gitumong ang mga pulong sa Salmo 45:1-6 sa paaging labing tukma sa panahon?
13 Ang mga pangandam alang sa gubat sa tanang gubat nagapadayon na karon. Ingong kinalabwang Mag-aaway sa Diyos, ang Magbubugno alang sa kabayawan ni Jehova gitumong sa mosunod nga mga pulong nga gitagik ubos sa inspirasyon sa usa ka sakop sa nasod sa Israel: “Ikaw matahom pa kay sa mga anak sa mga tawo. Ang pagkamadanihon gibubo diha sa imong mga ngabil. Mao nga ang Diyos nagpanalangin kanimo sa panahong walay tino. Ibakos ang imong pinuti sa imong hawak, Oh usa nga gamhanan, uban sa imong kahalangdon ug imong kahimayaan. Ug sa imong kahimayaan magpadayon hangtod sa kalamposan; magakabayo ka tungod sa kamatuoran ug pagkamapaubsanon ug pagkamatarong, ug ang imong tuong kamot magatudlo kanimo diha sa makalilisang nga mga butang. Mahait ang imong mga udyong—ang mga katawhan mangapukan ilalom kanimo—diha sa kasingkasing sa mga kaaway sa hari. Ang Diyos mao ang imong trono sa panahong walay tino, bisan sa walay kataposan; ang setro sa imong pagkahari mao ang setro sa katul-id.”—Salmo 45:1-6.
Ang Kanasoran Naghugpong Batok Kang Jehova
14, 15. Tapos buhii sa pagkabilanggo, unsang mga pulong gikan sa Salmo 2 ang gikutlo sa mga apostoles ingong natuman, ug unsang hangyo ang ilang gihimo sa Diyos?
14 Wala madugay tapos sa pagkatukod sa Kristohanong kongregasyon sa adlaw sa Pentekostes 33 K.P., nasabtan sa dinihogang mga Kristohanon ang kapadapatan sa Salmo 2:1, 2. Kining kasulatana mabasa: “Nganong ang mga nasod nangagubot ug ang mga nasodnong pundok nagbagutbot sa usa ka butang nga kawang? Ang mga hari sa yuta nagpahimutang ug ang mga punoan naghugpong batok kang Jehova ug batok sa iyang dinihogan.” Tapos ang mga apostoles sa Dinihogang Usa ni Jehova nakaagom sa ilang unang pagdakop ug pagdagmal sa kaawayng mga Hudiyo, sila miduyog pag-usab sa ilang isigka-Kristohanon ug dayon nagkutlo niining mga pulonga sa Salmo 2 ingong gikomposo ni Haring David. Ang Buhat 4:23-30 nagataho sa butang, nga nagaingon:
15 “Tapos sila buhii sila nangadto sa ilang kaugalingong katawhan ug nagtaho sa mga butang gisulti kanila sa pangulong mga saserdote ug sa mga ansiano. Sa pagkadungog niini sila mipatugbaw sa ilang mga tingog nga nahiusa ngadto sa Diyos ug miingon: ‘Gamhanang Ginoo, ikaw mao ang Usa nga nagbuhat sa langit ug sa yuta ug sa dagat ug sa tanang butang diha kanila, ug si kinsa pinaagi sa balaang espiritu miingon pinaagi sa baba sa atong katigulangan nga si David, ang imong alagad, “Nganong ang mga nasod nangagubot ug ang mga katawhan nagapalandong sa kawang nga mga butang? Ang mga hari sa yuta nagpahimutang ug ang mga punoan naghugpong batok kang Jehova ug batok sa iyang dinihogan.” Bisan pag ingon, si Herodes ug si Poncio Pilato uban sa mga tawo sa mga nasod ug sa mga katawhan sa Israel sa pagkamatuod nagkahiusa niining siyudara batok sa imong balaang alagad si Jesus, si kinsa imong gidihogan, aron sa pagbuhat sa mga butang gitino nang daan sa imong kamot ug tambag nga mahitabo. Ug karon, Jehova, tagda ang ilang mga pagbahad, ug itugot sa imong mga ulipon nga magpadayon sa pagpahayag sa imong pulong uban sa tanang kaisog, samtang imong ituy-od ang imong kamot alang sa pagpang-ayo ug samtang mahitabo ang mga ilhanan ug mga tilimad-on pinaagi sa ngalan sa imong balaang alagad nga si Jesus.’”
16, 17. (a) Sa tibuok tawhanong kasaysayan, may nahitabo ba sukad nga ikatandi sa nagsugod sa pagkahitabo sa 1914? Isaysay. (b) Unsang dalan ang padayong ginasubay sa mga nasod, sa ingon nagaobligar kang Jehova nga Diyos sa pagsulat sa unsa nganha sa ‘basahon sa iyang mga gubat’?
16 Bisan pa niana, kon bahin sa gubot nga mga nasod, ang mga hari nagapahimutang sa ilang kaugalingon nga nagkausa, mga politikanhong pangulo nga naghugpong batok kang Jehova ug sa iyang Dinihogan, si Jesu-Kristo, unsay ikatandi sa tibuok kasaysayan sa tawo niadtong nagsugod 76 ka tuig nga miagi sa 1914? Kadto dili lamang mao ang tuig sa dihang misilaob ang unang gubat sa kalibotan sa tibuok kinabuhi sa tawo kondili mao ilabina ang tuig sa dihang natapos ang mga panahon sa mga Hentil, “ang tinudlong mga panahon sa kanasoran”! (Lucas 21:24) Ang Salmo 2 tin-aw nga may dako pang katumanan sugod niadtong tuiga.
17 Sa kataposan sa mga panahon sa mga Hentil sa 1914, walay mausa sa kanasoran—wala bisan ang kanasoran sa gitawag Kakristiyanohan, nga ang daghang lungsoranon niana relihiyosong nagaisip nga sila espirituwal nga mga Israelinhon—nakiling sa pagdawat sa Dinihogang Usa ni Jehova, si Jesu-Kristo, alang sa trono sa pagkamagmamando ibabaw sa yuta. Ug karon, 71 ka tuig tapos “kining maayong balita sa gingharian” gisugdan nga “iwali sa tibuok gipuy-ang yuta ingong pamatuod sa tanang nasod,” gikan sa 1919 padayon sa unahan, ang kanasoran sa sulod ug gawas sa Kakristiyanohan tinong dili modayeg sa dugay-nang-gipahibalong Hari ni Jehova ug manumpa sa pag-unong kaniya samtang isalikway nila ang kaugalingon nilang pagmando ibabaw sa yuta. (Mateo 24:14) Sa kasukwahi, sila sa kataposan nahidangat sa panahon ug kahimtang sa dihang ginaobligar nila si Jehova sa pagsulat, ingnon ta, sa dakong kataposan sa “basahon sa mga Gubat ni Jehova.”—Numeros 21:14.
Mahimayaong Kadaogan sa Manggugubat nga Diyos
18. Kita karon uyon sa unsang lihok sa bahin ni Jehova, ug kinsa unya ang diha sa iyang kiliran, ingnon ta, alang sa katumanan sa Salmo 110?
18 Nan, asdang aron makiggubat, Oh Jehova sa mga kasundalohan, uban sa imong harianong Anak, si Jesu-Kristo, diha sa imong kiliran! Kaniya gitumong ang matagnaong mga pulong: “Magmando ka sa taliwala sa imong mga kaaway. Si Jehova mismo sa imong tuong kamot magadugmok sa mga hari sa adlaw sa iyang kasuko. Ipatuman niya ang paghukom taliwala sa mga nasod; iyang ipahinabo a-g kabug-osan sa patayng mga lawas. Siya magadugmok sa pangulo sa usa ka yuta nga daghag tawo.”—Salmo 110:2, 5, 6.
19. Mahitungod sa gubat sa dakong adlaw sa Diyos nga Makagagahom sa Tanan nga anaa lamang sa unahan, unsang pag-ampo ang atong ginatanyag kaniya alang sa dakong panon sa ubang mga karnero?
19 Oh, Jehova sa mga kasundalohan, himoa ang imong matinumanong mga alagad sa yuta nga masadyaong mga saksi sa imong walay-samang kadaogan pinaagi sa imong manggugubat nga Hari, si Jesu-Kristo, sa panahon sa gubat sa dakong adlaw sa Diyos nga Makagagahom sa Tanan diha sa dapit nga gitawag sa Hebreohanon nga Har–Magedon! (Pinadayag 16:14) Tapad sa nahibilin sa matuod espirituwal nga mga Israelinhon, himoa nga ang dakong panon sa mga karnerohon nga “nanaglaba sa ilang mga biste ug nagpaputi kanila diha sa dugo sa Kordero” malipayong “mogula sa dakong kasakitan” aron mahimo nga imong yutan-ong mga saksi hangtod sa hangtod! (Pinadayag 7:14) Ilalom sa imong mahigugmaong pag-atiman, himoa nga sila makalabang-buhi nga dili na mamatay ngadto sa walay-gubat nga dominyo sa imong madaogong Anak, kinsa magamando ibabaw sa nahinloang yuta nga mahimong usa ka matahom nga paraiso, nga nahiuyon sa imong unang katuyoan. Himoa nga sila dayag nga pamatuod sa tanang nabanhawng mga patay sa kabayawan sa pagkasoberano nga makataronganong imoha ibabaw sa tibuok nga kalibotan! Kami nagapasalamat kanimo nga imo na unyang mahusay ang tibuok-kalibotang isyu hangtod sa hangtod, oo, sa walay kataposan!
Nahinumdom Ka Ba?
◻ Unsa ang kinalabwang isyu atubangan sa mga tawo ug mga manulonda?
◻ Unsang kalainan ang nagalungtad tali sa pagpakig-away ni Jehova alang sa karaang Israel ug alang sa espirituwal nga Israel?
◻ Panahon sa Armageddon, unsang baroganan ang pagakuhaon sa mga Saksi ni Jehova, ug ngano?
◻ Kanus-a ba ang Salmo 2:1, 2 nagbaton sa walay-samang katumanan?
◻ Sa unsang paagi ang tibuok-kalibotang isyu pagahusayon hangtod sa hangtod?
[Hulagway sa panid 24, 25]
Ang “dakong panon” modayeg sa madaogong Magbalantay-Hari sa Diyos