EDREI

1. Usa ka harianong siyudad ni Og nga hari sa Basan. (Jos 12:4; 13:12) Human pildiha si Sihon nga Amorihanon, ang Israelinhong kasundalohan ubos sa pagtultol ni Moises “mitungas,” nga mao, mipaingon sa amihanan, hangtod nga ilang naengkwentro ang kasundalohan ni Og sa “gubat sa Edrei,” lagmit didto sa habagatang utlanan sa Basan. Bisan tuod si Og mao ang kataposan sa samag higanteng Repaim ug lagmit inubanan sa usa ka lisod buntogon nga kasundalohan, ang mga Israelinhon, nga gidasig ni Jehova nga dili mahadlok, nagpapas kang Og, sa iyang mga anak nga lalaki, ug sa iyang katawhan, ug dayon nanag-iya sa iyang teritoryo. (Num 21:33-35; Deu 3:1-10) Ang siyudad sa ulahi gihatag ngadto sa mga anak ni Manases ingong bahin sa panulondon niini. (Jos 13:31) Ang Edrei gituohan sa kadaghanan nga mao ang presenteng-adlaw nga siyudad sa Derʽa nga mga 50 km (31 mi) sa SHS sa habagatang tumoy sa Dagat sa Galilea, duol sa Yarmuk. Lakip sa mga kagun-oban didto mao ang usa ka siyudad nga wala pa bug-os makubkob, ug kini nga siyudad gitukod diha sa bato ilalom sa usa ka siyudad nga anaa sa ibabaw niini.

2. Usa ka kinutaang siyudad sa Neptali. (Jos 19:​32, 35, 37) Kini giisip nga mao ang modernong Tell Khureibeh, mga 7 km (4 mi) sa AAK sa Hazor.