Himoa ang Walay-Kataposang mga Bukton ni Jehova nga Imong Tukod

“Ang Diyos nga dumalayon mao ang imong puluy-anang dapit, ug sa ilalom mao ang mga bukton nga walay kataposan.”—DEUTERONOMIO 33:27, American Standard Version.

1, 2. Nganong ang katawhan ni Jehova makasalig sa iyang pagpaluyo?

SI Jehova may pagtagad sa iyang katawhan. Ngani, sa tanan nga kagul-anan sa mga Israelinhon, “kadto nakapaguol niya”! Tungod sa gugma ug kahangawa, iyang “gialsa sila ug gidala sila.” (Isaias 63:7-9) Busa kon magmatinumanon kita sa Diyos, makasalig kita sa iyang pagpaluyo.

² Ang propetang si Moises miingon: “Ang Diyos sa karaang panahon maoy usa ka dapit nga tagoanan, ug sa ilalom mao ang mga bukton nga walay kataposan.” (Deuteronomio 33:27) Nagaingon ang laing hubad: “Ang Diyos nga dumalayon mao ang imong dapit puluy-anan, ug sa ilalom mao ang mga bukton nga walay kataposan.” (American Standard Version) Apan sa unsang paagi ang mga bukton sa Diyos nagatabang sa iyang mga alagad?

Nganong Daghan Kaayong Kalisdanan?

3. Kanus-a ba bug-os pahimuslan sa katawhan “ang mahimayaong kagawasan sa mga anak sa Diyos”?

³ Ang pag-alagad kang Jehova dili magsagang kanato gikan sa kalisdanan nga maoy kasagaran sa mga tawo nga dili hingpit. Ang alagad sa Diyos nga si Job miingon: “Ang tawo, nga natawo sa babaye, hamubo ug kinabuhi ug puno sa suliran.” (Job 14:1) Mahitungod sa “mga adlaw sa atong katuigan,” ang salmista miingon: “Ang ilang pagpadayon maoy sa suliran ug sa makadaot nga mga butang.” (Salmo 90:10) Ang kinabuhi maoy ingon hangtod ‘ang kalalangan mapahigawas sa kaulipnan sa kadunotan ug makabaton sa mahimayaong kagawasan sa mga anak sa Diyos.’ (Roma 8:19-22) Kana mahitabo panahon sa Usa ka Libo ka Tuig nga Paghari ni Kristo. Unya pinasukad sa halad lukat ni Jesus, masinati sa tawhanong mga sakop sa Gingharian ang kaluwasan gikan sa sala ug kamatayon. Sa pagkatapos sa Milenyo, si Kristo ug ang iyang kaubang mga hari-saserdote makatabang na sa masinugtanong katawhan sa pagdangat sa kahingpitan, ug ang mga ngalan niadtong maunongon sa Diyos panahon sa kataposang pagsulay ni Satanas ug iyang mga demonyo mahisulat na nga permanente diha sa “basahon sa kinabuhi.” (Pinadayag 20:12-15) Unya bug-os nilang matagamtam ang mahimayaong kagawasan sa mga anak sa Diyos.

4. Inay sa pagreklamo bahin sa atong kahimtang sa kinabuhi, unsay angay natong buhaton?

⁴ Kasamtangan, inay moreklamo bahin sa atong kahimtang sa kinabuhi, mosalig kita kang Jehova. (1 Samuel 12:22; Judas 16) Magmapasalamaton usab kita tungod sa atong Hataas nga Saserdote, si Jesus, nga pinaagi kaniya kita makaduol sa Diyos “aron kita makabaton sa kaluoy ug makakaplag sa dili-takos nga kalulot alang sa tabang sa hustong panahon.” (Hebreohanon 4:14-16) Dili gayod unta kita manig-ingon kang Adan. Sa pagkamatuod, sa pagkasayop iyang gisumbong si Jehova ingon nga naghatag kaniyag daotang asawa, nga miingon: “Ang babaye nga imong gihatag aron akong makauban, siya naghatag kanako sa bunga gikan sa kahoy ug mao nga ako mikaon.” (Genesis 3:12) Ang Diyos nagahatag ug maayong mga butang ug dili maghatag kanatog mga kalisdanan. (Mateo 5:45; Santiago 1:17) Ang mga kalisod kasagaran mao ang sangpotanan sa atong kakulang sa kaalam o kasaypanan sa lain. Kana tingali modangat usab kanato tungod kay kita makasasala ug nagakinabuhi sa usa ka kalibotan nga nahiluna sa gahom ni Satanas. (Proverbio 19:3; 1 Juan 5:19) Bisan pa niana, ang walay-kataposang mga bukton ni Jehova kanunay nagapaluyo sa iyang maunongong mga alagad nga mainampoon nga nagasalig kaniya ug personal nga nagapadapat sa tambag sa iyang Pulong.​—Salmo 37:5; 119:105.

Gilig-on Panahon sa Sakit

5. Unsang pagdasig ang makaplagan sa mga masakiton sa Salmo 41:1-3?

⁵ Ang sakit makapaguol usahay sa kadaghanan kanato. Bisan pa niana, si David miingon: “Malipayon si bisan kinsa nga nagalihok nga may pagkamahunahunaon sa usa nga timawa; sa adlaw sa katalagman si Jehova motagana kaniyag kaikyasan. Si Jehova magabantay kaniya ug magatipig kaniya nga buhi. Siya igapahayag nga malipayon sa yuta; ug ikaw dili makatugyan kaniya ngadto sa kalag sa iyang mga kaaway. Si Jehova magapalig-on kaniya diha sa higdaanan sa sakit; ang tibuok niyang higdaanan imong pagailisan panahon sa iyang balatian.”​—Salmo 41:1-3.

6, 7. Giunsa pagtabang sa Diyos si David sa diha nga siya didto sa higdaanan sa sakit, ug sa unsang paagi kini makadasig sa mga alagad ni Jehova karong adlawa?

⁶ Ang usa ka tawong mahunahunaon nagatabang sa nanginahanglan. “Ang adlaw sa katalagman” mahimong bisan unsa nga adlaw sa katalagman o tagdugay nga kalisdanan nga makapaluya sa usa ka tawo. Nagasalig siya sa Diyos sa pagbantay kaniya panahon sa kaluyahon, ug ang uban ‘magapahayag kaniya nga malipayon diha sa yuta’ pinaagi sa pagsabwag sa balita sa maluluy-ong mga pakiglabot ni Jehova kaniya. Ang Diyos naglig-on kang David “ibabaw sa higdaanan sa sakit,” tingali sa panahon sa kalisdanan sa dihang ang anak ni David nga si Absalom nagtinguha sa pag-ilog sa trono sa Israel.—2 Samuel 15:1-6.

⁷ Sanglit si David nagpakitag pagkamahunahunaon sa timawa, gibati niya nga gilig-on siya sa Diyos samtang siya walay mahimo diha sa higdaanan sa sakit. (Salmo 18:24-26) Bisan pag masakiton nga grabe, siya masaligon nga ang Diyos ‘mag-ilis sa iyang higdaanan,’ dili pinaagi sa milagrosong pagwagtang sa sakit, kondili pinaagi sa paglig-on kaniya pinaagig makapalipay nga mga hunahuna. Kini nahisamag si Jehova nag-ilis sa iyang higdaanan gikan sa higdaanan sa sakit ngadto sa higdaanan sa pagkanaayo. Sa susama, kon kita nagaantos sa sakit ingong mga alagad sa Diyos, ang walay-kataposang mga bukton ni Jehova magapaluyo kanato.

Kahupayan Alang sa May Depresyon

8. Giunsa pagpakita sa usa ka masakitong Kristohanon ang iyang pagsalig sa Diyos?

⁸ Ang sakit tingali makapahinabog mental nga depresyon. Ang Kristohanon nga grabeng nagkasakit, kinsa usahay walay igong kusog, bisan sa pagbasa, miasoy: “Kini mipasinati nako sa daghang emosyon sa depresyon, sa mga pagbati sa kawalay bili, ug bisan sa mga luha.” Kay nahibalo nga buot siyang dag-on ni Satanas pinaagi sa pagkamawad-an sa kadasig, siya nagasukol, kay nasayod nga sa tabang ni Jehova dili siya mapakyas. (Santiago 4:7) Kining tawhana nakapalig-on sa uban nga nasayod nga siya nagasalig sa Diyos. (Salmo 29:11) Bisan pag naospital, siya mitelepono sa mga masakiton ug sa uban aron sa paglig-on kanila sa espirituwal. Siya mismo napalig-on pinaagi sa pagpamati sa audiocassette recordings sa mga honi sa Gingharian ug sa mga artikulo niining magasina ug sa kauban niining magasin, Pagmata! ug pinaagi sa pagpakig-uban sa isigka-Kristohanon. Ang maong igsoong lalaki miingon: “Regular akong nagapakigsulti kang Jehova diha sa pag-ampo, nga nagapangayo kaniya nga hatagan akog kusog, paggiya, paglipay, ug tabang aron makaantos.” Kon ikaw usa ka Kristohanon nga nagaantos sa grabeng mga suliran sa panglawas, salig kanunay kang Jehova ug himoa ang iyang walay-kataposang mga bukton nga imong tukod.

9. Unsang mga panig-ingnan ang nagpakita nga ang mental nga depresyon usahay mahimong suliran sa diyosnong katawhan?

⁹ Ang depresyon maoy usa ka karaang suliran. Samtang nailalom sa pagsulay, si Job namulong ingong usa ka tawo nga mibating gibiyaan sa Diyos. (Job 29:2-5) Ang kabalaka mahitungod sa nalaglag nga kahimtang sa Jerusalem ug sa mga paril niana nakapasubo kang Nehemias, ug si Pedro naguol sa labihan tungod sa paglimod kang Kristo mao nga siya mihilak sa mapait. (Nehemias 2:1-8; Lucas 22:62) Si Epaprodito naguol kay ang mga Kristohanon sa Filipos nakadungog nga siya nagkasakit. (Filipos 2:25, 26) Ang pila ka Kristohanon sa Tesalonica nakaagom ug depresyon, kay si Pablo miawhag sa mga igsoon didto nga “magasulti nga may paglipay sa magul-anon nga mga kalag.” (1 Tesalonica 5:14) Busa sa unsang paagi ang Diyos nagatabang sa maong mga tawo?

10. Unsa ang tingali makatabang sa pagsulay sa pagsagubang sa mental depresyon?

¹⁰ Ang personal nga desisyon kinahanglang himoon mahitungod sa propesyonal nga pagpatambal sa grabeng depresyon.a (Galacia 6:5) Ang igong pahulay ug timbang nga kalihokan basin makatabang. Inay isipong usa ka dakong suliran ang ubay-ubayng suliran, basin madiskobrehan sa usa ka magul-anong tawo nga makatabang ang pagsingkamot sa pagsulbad kanila usa sa usa ka panahon. Ang makahupay nga tabang gikan sa mga ansiano sa kongregasyon basin mapuslanon kaayo, ilabina kon kining suliran sa emosyon nagapahinabog espirituwal nga kabalaka. (Santiago 5:13-15) Labaw sa tanan, hinungdanon ang pagsalig kang Jehova, ‘nga itugyan ang tanan natong kabalaka diha kaniya, tungod kay siya matinagdanon kanato.’ Ang malahutayon ug kinasingkasing nga pag-ampo makahatag sa usa sa ‘kalinaw sa Diyos nga magabantay sa kasingkasing ug sa mga gahom sa panghunahuna pinaagi kang Kristo Jesus.’​—1 Pedro 5:6-11; Filipos 4:6, 7.

Si Jehova Nagatabang Nato sa Pag-antos sa Pagbangotan

11-13. Unsay makatabang sa paghupay sa kasubo tungod sa pagkamatay sa usa ka minahal?

¹¹ Ang laing makapaguol nga kasinatian mao ang pagkamatay sa usa ka minahal. Gidangoyngoyan ni Abraham ang pagkamatay sa iyang asawa, si Sara. (Genesis 23:2) Sa pagkamatay sa iyang anak nga si Absalom, si David nasubo pag-ayo. (2 Samuel 18:33) Aw, bisan ang hingpit nga tawong si Jesus “mihilak” tungod sa pagkamatay sa iyang higala si Lasaro! (Juan 11:35) Busa adunay kasub-anan sa dihang ang usa ka minahal kuhaon sa kamatayon. Apan unsay makatabang sa paghupay sa maong kasubo?

¹² Ang Diyos nagatabang sa iyang katawhan sa pag-antos sa labihang kasubo sa pagkanamatyan. Ang iyang Pulong nagaingon nga aduna unyay usa ka pagkabanhaw. Busa, kita dili “managsubo sama ra sa uban nga walay paglaom.” (1 Tesalonica 4:13; Buhat 24:15) Ang espiritu ni Jehova nagatabang nato sa pagbatog kalinaw ug pagtuo ug pagpalandong sa kahibulongang kaugmaon nga gisaad diha sa iyang Pulong, aron kita dili sa bug-os madat-ogan sa masulob-ong mga hunahuna bahin sa usa ka namatay nga minahal. Ang kahupayan moabot usab gikan sa pagbasa sa Kasulatan ug pag-ampo ngadto sa “Diyos sa tanang paglipay.”​—2 Corinto 1:3, 4; Salmo 68:4-6.

¹³ Makabaton kitag kahupayan gikan sa paglaom sa pagkabanhaw sama sa nabatonan sa diyosnong si Job, kinsa mipatugbaw: “Oh nga sa Sheol unta imo [Jehova] akong tagoan, nga imo akong ibutang sa tago hangtod nga mahupay ang imong kasuko, nga imo unta akong tagalan ug panahon ug mahinumdom ka kanako! Kon ang usa ka tawong kusgan mamatay mabuhi ba siya pag-usab? Ako magapaabot sa tanang adlaw sa akong pinugos nga pag-alagad, hangtod nga moabot ang akong kahupayan. Ikaw motawag, ug ako motubag. Ikaw nangandoy alang sa buhat sa imong mga kamot.” (Job 14:13-15) Ang dakong kasubo kasagarang dili masinati sa dihang ang usa ka higala mopanaw, kay gilaoman nato nga makita siya pag-usab. Ang halalom nga kasubo, nga ipahinabo sa pagkawala sa minahal mahimong makubsan kon isipon nato ang kamatayon sa usa ka matinumanong Kristohanon sa samang paagi. Kon siya may yutan-ong paglaom, siya pukawon gikan sa pagkatulog sa kamatayon dinhi sa yuta sulod sa Usa ka Libo ka Tuig nga Paghari ni Kristo. (Juan 5:28, 29; Pinadayag 20:11-13) Ug kon kita nagalaom nga mabuhing walay kataposan sa yuta, kita tingali ania dinhi sa pagsugat sa atong nabanhaw nga minahal.

14. Giunsa sa duha ka Kristohanong balong babaye pagsagubang ang kamatayon sa ilang mga bana?

¹⁴ Sa pagkamatay sa iyang bana, ang usa ka igsoong babaye nasayod nga kinahanglang ipadayon niya ang iyang mga buluhaton sa pag-alagad sa Diyos. Gawas sa pagkapuliki sa ‘daghang buluhaton sa Ginoo,’ gihimo niya ang tapaktapak nga kobrekama nga may 800 ka tapak. (1 Corinto 15:58) “Kadto maayong proyekto,” siya miingon, “tungod kay sa tanang panahon nga ako nagtrabaho ako nakapamati sa mga honi sa Gingharian ug sa mga teyp sa Bibliya, nga nakapapuliki sa akong kaisipan.” Siya nahimuot sa paghinumdom sa usa ka duaw sa usa ka eksperyensiadong ansiano ug iyang asawa. Gikan sa Bibliya, gipunting sa ansiano nga ang Diyos matinagdanon gayod sa mga balong babaye. (Santiago 1:27) Ang laing Kristohanong babaye wala magpadaog sa pagkaluoy-sa-kaugalingon sa dihang namatay ang iyang bana. Gipasalamatan niya ang pagpaluyo sa mga higala ug labaw pang nagmaikagon sa uban. “Sige akong nag-ampo ug nakaugmad ug mas suod nga relasyon uban kang Jehova,” siya miingon. Ug pagkatagsaon nga panalangin nga makabaton sa pagpaluyo sa walay-kataposang mga bukton sa Diyos!

Tabang sa Dihang Masayop Kita

15. Unsa ang diwa sa mga pulong ni David sa Salmo 19:7-13?

¹⁵ Bisan pag gihigugma nato ang kasugoan ni Jehova, kita masayop usahay. Kini pihong makapaguol kanato, sama nga kini nakapaguol kang David, nga alang kaniya ang mga balaod, mga pahinumdom, mga mando, ug hudisyal nga mga hukom labi pang tilinguhaon kay sa bulawan. Siya miingon: “Ang imong ulipon gipasidan-an pinaagi kanila; sa pagbantay kanila adunay dakong balos. Mga sayop​—kinsa ang makasabot? Ipahayag mo ako nga walay sala gikan sa mga sala nga natago. Pugngan mo ang imong alagad gikan usab sa mga buhat nga mapangahason; ayaw itugot nga sila magagahom kanako. Sa maong kahimtang ako mahingpit, ug ako magapabiling walay sala gikan sa dakong kalapasan.” (Salmo 19:7-13) Atong analisahon kining mga pulonga.

16. Nganong angay nga likayan nato ang pagkamapangahason?

¹⁶ Ang mga buhat nga mapangahason labi pang seryosong mga sala kay sa mga kasaypanan. Si Saul gisalikway ingong hari tungod sa mapangahasong paghalad ug sa dili pagpatay sa Amalekahanon nga haring Agag ug pagpahigawas sa labing maayong inagaw sa gubat, bisan pag gisugo sa Diyos nga laglagon ang mga Amalekahanon. (1 Samuel 13:8-14; 15:8-19) Si Haring Uzzias gitaptan sa sanla tungod sa mapangahasong pag-ilog sa mga katungdanan sa saserdote. (2 Cronicas 26:16-21) Sa dihang ang arka sa tugon gidala ngadto sa Jerusalem ug ang mga baka nga nagguyod sa karomata nagpahinabo sa pagkatuwang, ang Diyos naglaglag kang Uzza tungod sa mapasipalahong paghawid sa Arka aron kana matul-id. (2 Samuel 6:6, 7) Busa, kon kita dili mahibalo kon unsay buhaton o kon kaha kita giawtorisahan nga buhaton ang usa ka butang, angay nga ipakita nato ang kamakasaranganon ug konsultahon kadtong may salabotan. (Proverbio 11:2; 13:10) Hinuon, kon kita sukad nahimong mapangahason, angay nga moampo kita alang sa kapasayloan ug hangyoon ang Diyos nga tabangan kita sa pagbantay batok sa pagkamapangahason sa umaabot.

17. Sa unsang paagi ang natagong mga sala makaapektar sa usa ka tawo, apan sa unsang paagi mabatonan ang kapasayloan ug kahupayan?

¹⁷ Ang mga sala nga tinago makapahinabog kaguol. Sumala sa Salmo 32:1-5, si David misulay sa pagtago sa iyang sala, apan siya miingon: “Sa nagpakahilom ako ang akong mga bukog nagabok tungod sa akong pag-agulo sa tibuok nga adlaw. Sa adlaw ug gabii ang imong kamot mabug-at ibabaw nako. Ang kaumog sa akong kinabuhi nailisan ingon sa kauga sa ting-init.” Ang pagsulay sa pagpukgo sa sad-ang konsensiya nakapaluya kang David, ug ang kagul-anan nakapamenos sa iyang kusog sama sa usa ka kahoy nga mawad-an sa nagahatag-kinabuhing kaumog panahon sa usa ka hulaw o sa kainit sa ting-adlaw. Lagmit giantos niya ang daotang mga epekto sa hunahuna ug sa lawas ug nawad-ag kalipay tungod kay wala motug-an. Ang pagtug-an lamang ngadto sa Diyos ang nakahatag pasaylo ug kahupayan. Matud ni David: “Malipayon ang usa kansang pag-alsa gipasaylo, kansang sala gitabonan. . . . Ang akong sala akong gisugid kanimo sa kataposan, ug ang akong sayop wala ko pagtaboni. Ako miingon: ‘Himoon ko ang pagsugid sa akong mga kalapasan ngadto kang Jehova.’ Ug ikaw mismo nagpasaylo sa kasaypanan sa akong mga sala.” Ang mahigugmaong tabang gikan sa Kristohanong mga ansiano makatabang sa pagpausbaw sa espirituwal nga pagkaayo.​—Proverbio 28:13; Santiago 5:13-20.

18. Unsa ang ebidensiya nga ang sala mahimong may malungtarong mga epekto, apan unsa ang mahimong tinubdan sa paglipay sa maong mga kahimtang?

¹⁸ Ang sala basin may malungtarong mga epekto. Kana matuod alang kang David, kinsa nakahimog pagpanapaw uban kang Batseba, nagmaneobra sa kamatayon sa iyang bana, ug nangasawa sa mabdos nga balo. (2 Samuel 11:1-27) Bisan tuod ang Diyos nagpakitag kaluoy tungod sa pakigtugon sa Gingharian, ang paghinulsol ni David, ug iyang maluluy-on nga pagtagad sa uban, nasinati ni David ‘ang katalagman gikan sa iyang kaugalingong panimalay.’ (2 Samuel 12:1-12) Ang anak sa panapaw namatay. Ang anak ni David nga si Amnon naglugos sa iyang igsoong babaye sa amahan nga si Tamar ug gipatay sa mando sa iyang igsoong si Absalom. (2 Samuel 12:15-23; 13:1-33) Gipakaulawan ni Absalom si David pinaagi sa pagpakighilawas sa mga puyopuyo ni David. Gisulayan niya ang pag-ilog sa trono apan nakaagom sa kamatayon. (2 Samuel 15:1–​18:33) Ang sala sa gihapon may sangpotanan. Pananglitan, ang usa ka mamumuhat ug daotan nga napalagpot tingali maghinulsol ug mahibalik sa kongregasyon, apan dangtag mga tuig sa pagbuntog sa namantsahang dungog ug emosyonal nga kasakit nga sangpotanan sa sala. Kasamtangan, pagkamakahupay ang pagbaton sa pasaylo ni Jehova ug pagpaluyo sa iyang walay-kataposang mga bukton!

Giluwas Gikan sa mga Kalisod Diha Kanato

19. Sa unsang paagi ang espiritu sa Diyos makatabang sa dihang kita grabeng gisulayan?

¹⁹ Sa dihang grabe nga pagasulayon, basin kita kulang sa igong kaalam ug kusog sa paghimog usa ka desisyon ug pagtuman niana. Sa maong kahimtang, ang espiritu sa Diyos “moduyog uban ang tabang alang sa atong kahuyangan; kay ang suliran sa kon unsay atong igaampo sumala sa gikinahanglan nato wala nato mahibaloi, apan ang espiritu mismo nagapangaliyupo alang kanato uban sa mga agulo nga wala malitok.” (Roma 8:26) Kon ipahinabo ni Jehova ang kausaban sa mga kahimtang, kita angay magmapasalamaton. Bisan pa niana, ang iyang bukton tingali magluwas kanato sa laing paagi. Kon kita moampo alang sa kaalam, pinaagi sa iyang espiritu tingali ipaila ni Jehova kon unsay atong pagabuhaton ug itagana ang kusog nga gikinahanglan sa pagbuhat niana. (Santiago 1:5-8) Uban sa iyang tabang, kita makaantos sa dihang “masubo tungod sa nagkalainlain nga mga pagsulay” ug makalabang niana uban ang sinulayan ug nalig-on nga pagtuo.​—1 Pedro 1:6-8.

20. Unsay atong mapahimuslan kon himoon gayod natong atong tukod ang walay-kataposang mga bukton ni Jehova?

²⁰ Angay nga dili kita matak-an sa pagdangop sa Diyos diha sa pag-ampo. “Ang akong mga mata sa kanunay gitutok kang Jehova, kay siya mao ang nagapagawas sa akong mga tiil gikan sa pukot,” matud ni David. “Ilingi ang imong nawong kanako, ug pakitai akog kaluoy; kay ako nag-inusara ug sinakit. Ang mga kaguol sa akong kasingkasing midaghan; gikan sa mga kalisod diha kanako Oh pagakuhaon mo ako. Tan-awa ang akong kasakit ug akong pag-antos, ug pasayloa ang tanan kong mga sala.” (Salmo 25:15-18) Sama kang David, atong mapahimuslan ang balaang kaluwasan, kaluoy, ug kapasayloan kon himoon gayod nato ang walay-kataposang mga bukton ni Jehova nga atong tukod.

[Footnote]

Unsay Imong Tubag?

◻ Sa unsang paagi si Jehova nagatabang sa iyang mga alagad nga masakiton?

◻ Unsay makatabang sa dihang atong sulayan ang pagsagubang sa mental depresyon?

◻ Unsay makatabang sa paghupay sa kasubo tungod sa pagkamatay sa usa ka minahal?

◻ Sa unsang paagi kadtong nagatago sa ilang mga sala makabatog kahupayan?

◻ Unsang tabang ang anaa sa dihang ang katawhan ni Jehova gisulayan nga grabe?

[Hulagway sa panid 16, 17]

Makabaton kitag paglipay gikan sa paglaom sa pagkabanhaw, sama sa diyosnong si Job