Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • w86 12/15 p. 21-26
  • “Si Jehova nga Among Diyos ang Among Alagaran”

Walay video nga available.

Sorry, dunay problema sa pag-load sa video

  • “Si Jehova nga Among Diyos ang Among Alagaran”
  • Ang Bantayanang Torre Nagapahayag sa Gingharian ni Jehova—1986
  • Sub-ulohan
  • Susamang Materyal
  • Nagalihok nga Maalamon
  • Pagpaluyo sa Organisasyon
  • Ang mga Pakig-away ni Jehova Alang sa Israel
  • Ang Atong Desisyon
  • Basahon sa Bibliya Numero 6—Josue
    “Ang Tibuok Kasulatan Dinasig sa Diyos ug Mapuslanon”
  • Ang Nahinumdoman ni Josue
    Ang Bantayanang Torre Nagapahayag sa Gingharian ni Jehova—2002
  • Mga Haylayt Gikan sa Basahon sa Josue
    Ang Bantayanang Torre Nagapahayag sa Gingharian ni Jehova—2004
  • Josue 1:9—“Magmalig-on Ka ug Magmaisogon”
    Mga Teksto Gipatin-aw
Uban Pa
Ang Bantayanang Torre Nagapahayag sa Gingharian ni Jehova—1986
w86 12/15 p. 21-26

“Si Jehova nga Among Diyos ang Among Alagaran”

“Apan alang kanako ug sa akong banay, kami magaalagad kang Jehova.”—JOSUE 24:15.

1. Sa unsang paagi ang basahon ni Josue nakahatag kanatog pagdasig ug panalipod?

ANG makapukawng mga hitabo sa basahon sa Josue girekord “sa pagtudlo kanato” ug ingong “mga pananglitan” sa pagdasig ug sa pagpanalipod kanato nga “hing-abotan sa kataposan sa mga sistema sa mga butang.” (Roma 15:4; 1 Corinto 10:11) Ang diyosnong mga hiyas, sama sa pailob, pagtuo, ug pagsunod, gipasiugda. “Pinaagi sa pagtuo ang mga padir sa Jericho nangatumpag tapos gilibotan nila kini sa pito ka adlaw. Pinaagi sa pagtuo si Rahab nga daotang babaye wala malaglag kauban sa mga masukihon, kay iya mang gidawat ang mga espiya sa malinawong paagi.” (Hebreohanon 11:30, 31) Ang pagtuo ni Josue, Rahab, ug ubang mga maunongon balik didto angay makadasig kanato nga mahimong maisogon ug malig-on, aron matapos ang buluhaton sa Ginoo karon.​—Josue 10:25; Juan 4:34.

2.(a) Sa unsang paagi gipakita ni Josue ang pagkamasundanon bisan sa kataposang detalye? (b) Unsay nahitabo sa kabukiran sa Ebal ug Gerisim?

2 Tapos sa dakong kadaogan sa Ai, gihatagag pagtagad ni Josue ang detalyadong mga instruksiyon nga natala diha sa Deuteronomio 27:1–​28:68. Diha sa Bukid sa Ebal siya nagpatindog ug altar nga tibuok bato, ug didto iyang gituman ang sugo: “Kinahanglang maghalad kamog halad sa pakigdait ug kana-a kana didto, ug magkalipay kamo atubangan ni Jehova nga inyong Diyos.” Gipatindog ang ubang mga bato ingong handumanan, gipaputi, ug ang mga pulong sa Kasugoan gisulat diha niana. Dayon ang mga banay gibahinbahin, usa ka grupo nagbarog diha sa Bukid sa Gerisim “sa pagpanalangin sa katawhan” ug ang laing grupo “sa pagtunglo diha sa Bukid sa Ebal.” Sa pinatugbawng mga tingog gibasa sa mga Levihanon ang mga tunglo tungod sa pagkamasukihon, ug ang tanang katawhan mitubag, “Amen!” Dayon ang mga panalangin tungod sa pagkamasundanon gipahayag. Apan alaut ang Israel kon sila mapakyas sa ‘pagtuman sa tanang mga pulong sa kasugoan ug sa pagkahadlok sa mahimayaon ug makalilisang nga ngalan ni Jehova nga Diyos’!​—Josue 8:32-35.

3, 4. (a) Unsang gamhanang pagtulon-an sa dalan sa Israel ang nahatag kanato karon? (b) Nganong dili gayod kita pul-an sa mao ra gihapong pabalikbalik nga mga butang? (c) Unsay gikinahanglan aron makasulod sa “masigpit nga pultahan”?

3 Nagpadayon ba ang Israel sa pagsunod sa ‘mga pulong sa kasugoan’? Bisan pa sa masubsob nga pahamatngon nga gihatag ni Moises, ug sa ulahi ni Josue, sa pagkaalaut napakyas sila. Pagkagamhanang pagtulon-an kini alang kanato karon! Bisan pa sa padayong mga pasidaan, adunay pipila nga naghunahuna nga makasupak sila sa mga kinahanglanon sa Diyos, nga ‘makadayon sa paglakaw sa ilang kaugalingong mga dalan,’ ug maluwas gihapon. Pagkadakong binuang! Sa pagkutlog balik sa mga kaagi sa Israel, si Pablo miingon: “Pasagdi siya nga nagadahom nga maayo na niyang pagkabarog magbantay nga basig mapukan siya.”​—1 Corinto 10:12; Ecclesiastes 2:13.

4 Gibiaybiay sa ubang katawhan sa Diyos ang mga pasidaan nga gihatag, nga nag-ingon nga sila gipul-an na sa pagpaminaw sa mao ra gihapong mga butang nga pabalikbalik. Apan kini sila sa kasagaran mao ang unang mahulog sa bitik ni Satanas. Ang dinasig nga basahon sa Bibliya sa Deuteronomio (sa Hebreohanon Mish·neh’ hat·to·rahʹ nagkahulogang, “Pagsoblisobli sa Kasugoan”) nasudlan ug upat ka dagkong mga pakigpulong ni Moises; napatin-aw kini sa Israel nga kinahanglang mosunod sila sa gipamulong nang mga kasugoan ni Jehova. Migamit si Moises ug kapin sa upat ka pilong gidaghanong pulong sa pasidaan sa pagkamusikihon ug sa miresultang “mga tunglo” nga iyang gigamit dihang nagpamulong sa “mga panalangin.” Diha sa Bukid sa Ebal, gipasidan-an na usab ni Josue ang Israel nga kinahanglang mosunod sila. Wala ba kini nagpakita kanato kon unsa ka hinungdanon ang pagpaningkamot sa “pagsulod sa hiktin nga dalan”?​—Mateo 7:13, 14, 24-27; 24:21, 22.

5. Unsang nagkausang pundok ang giatubang karon sa Israel, ug unsang samang situwasyon ang atong nakita karon?

5 Ang mahukmanong pakigtakos sa gahom hapit na. Ang ganghaang siyudad sa Jericho nalaglag na, sama nga malaglag ang bakak nga relihiyon dihang magsugod na ang “dakong kasakitan.” Napukan na ang Ai. Apan karon ang “tanang hari nga diha sa unahan sa Jordan sa kabungtoran ug sa Shepelah sa tanang kabaybayonan sa Dakong Dagat ug sa atbang sa Lebanon, ang mga Hitihanon ug ang Amorihanon, ang Canaanhon, ang Perisihanon, ang Hivitihanon ug ang Jebusihanon . . . naghiusa sa pagtigom aron sa pagpakig-away batok kang Josue ug sa Israel.” (Josue 9:1, 2) Diha sa modernong-adlaw nga katugbang niini, atong nakita ang kanasoran karon nga nabugkos diha sa gitawag nga Hiniusang Kanasoran. Sila nagapangitag kalinaw ug kasegurohan sa ilang kaugalingong mga paagi apan “nanagsabotsabot sa tingob batok kang Jehova ug batok sa iyang usa nga dinihogan,” ang Dakong Josue. (Salmo 2:1, 2) Unsa man unyay sangpotanan?

Nagalihok nga Maalamon

6, 7. (a) Sa unsang paagi nagpakitag interes ang Gabaanhon, ug unsang taktika ang ilang gihimo? (b) Sa unsang paagi gihusay kini ni Josue?

6 Sama kang Rahab sa ilang atubangan, ang ubang dili-Israelinhon karon misugod sa pagpakitag kaikag sa kaluwasan. Kini sila mao ang pumoluyo sa Gabaa, usa ka dakong siyudad sa amihanan sa Jebus, o Jerusalem. Sila nakadungog sa gamhanong mga buhat ni Jehova ug determinado nga sila makakitag kalinaw ug kasegurohan sa mga paagi ni Jehova. Apan sa unsang paagi? Sila nagpadala ngadto sa kampo sa Israel diha sa Gilgal ug mga lalaki nga nagdalag magahi ug dugmok nga mga tinapay ug daang mga sako ug daang mga panit nga sudlanan sa bino, ug nagsul-ob ug tinapakan nga mga sapot ug mga sandalyas. Miduol kang Josue, kining mga tawhana miingon: “Gikan sa halayo kaayong yuta ang imong mga sulogoon nanganhi tungod sa ngalan ni Jehova nga imong Diyos, kay nabati namo ang iyang kabantog.” Sa pagkadungog niini, “si Josue nakigdait kanila ug naghimo ug pakigsaad uban kanila aron pasagdan sila nga mabuhi.”​—Josue 9:3-15.

7 Apan, nahibaloan sa Israel sa ulahi nga ang mga Gabaanhon sa tinuod ‘nagpuyo sa ilang taliwala’! Giunsa paglantaw ni Josue karon ang ilang paglipot? Iyang gituman ang panumpa nga iyang gihimo kanila, ‘nga pasagdan sila nga mabuhi, ug gihimong mga mangangahoy ug magkakalos ug tubig sa tanang katilingban.’​—Josue 9:16-27; itandi sa Deuteronomio 20:10, 11.

8. Sa unsang mga paagi naglandong ang mga Gabaanhon sa “dakong panon”?

8 Daghan sa mga Netinim, nga sa ulahing katuigan mialagad sa templo ni Jehova, hayan mga kaliwat sa Gabaanhon. Busa ang mga Gabaanhon naglandong sa “dakong panon” nga karon naghatag sa Diyos ug “balaang pag-alagad sa adlaw ug sa gabii diha sa iyang templo.” (Pinadayag 7:9, 15) Bisan ug nagpuyo sa samag Canaanhong kalibotan, kini sila sa tinuod “dili bahin sa kalibotan.” Sa miagi, nag-antos sila sa “dugmok” nga espirituwal nga mga tinapay, sama sa nakita diha sa mga iglesya sa Kakristiyanohan, ug sila walay “bino” sa kalipay. Dihang ilang nailhan ang katawhan sa Diyos, sila miila nga naghimo si Jehova ug gamhanong mga buhat pinaagi sa iyang mga saksi. Sila mihimog halayong panaw gikan sa kalibotan ni Satanas aron mabayloan ang gisiong mga ‘sapot’ ug bag-ong pag-ila ingong mapaubsanong mga alagad ni Jehova, nga sinul-oban sa bag-ong personalidad.​—Juan 14:6; 17:11, 14, 16; Efeso 4:22-24.

Pagpaluyo sa Organisasyon

9. (a) Unsang problema ang sunod nga mibangon? (b) Unsay reaksiyon ni Josue, ug uban sa unsang pasalig?

9 Dihang si Adoni-sedek, nga hari sa Jerusalem, nakadungog nga nakigdait ang mga Gabaanhon sa Israel, “siya nahadlok gayod, tungod kay ang Gabaon usa man ka dakong siyudad, ingong usa sa harianong mga siyudad, . . . ug ang tanang mga tawo didto mga gamhanan.” Iyang gianib ang iyang kasundalohan sa upat ka hari, ug ilang gilikosan ang Gabaon. Dihadiha, ang mga Gabaon mihangyo kang Josue: “Umari ka kanamo sa pagdali ug luwasa kami ug tabangi kami.” Dihadiha, misanong si Josue, ug gipasaligan siya ni Jehova, nga nag-ingon: “Ayaw kahadloki sila, kay gihatag ko na sila sa imong mga kamot. Walay bisan usa ka tawo kanila nga makasukol kanimo.” Si Josue ug ang iyang kusganong mga sundalo mimartsa “sa tibuok gabii” aron pakalitan ang ilang mga kaaway.​—Josue 10:1-9.

10. (a) Unsang matanga sa lihok karon nga katumbas sa paglikos sa Gabaon? (b) Unsang determinasyon ang gipakita sa modernong-adlawng mga Gabaanhon?

10 Sama niadtong lima ka hari, ang ubang mga ulo sa kagamhanan karon nangasuko sa pagtan-aw nga daghan sa ilang katawhan​—gani “mga gamhanan”​—nga nagbarog alang sa Dakong Josue ug sa iyang tibuok-yuta nga Gingharian sa pagkamatarong. Kining mga magmamando nagtuo nga ang mga utlanan sa nasod kinahanglang ipabilin, bisan pa nga ang mga nasod kanunayng nag-awayay ug naggubatay sa usag usa. Busa naningkamot sila sa pagputol sa mga tagana sa espirituwal nga pagkaon gikan sa mahigugmaon ug kalinawng “dakong panon,” sa pagbando sa mga tigom diin dinhi nakigbahin sila niining “pagkaon,” ug sa pagpahunong kanila sa pagsulti ngadto sa uban mahitungod sa espirituwal nga mga butang. Apan kining modernong mga Gabaanhon nagbarog nga maunongon uban sa espirituwal nga Israel, nga nagaingon: “Kami mouban kaninyo.”​—Zacarias 8:23; itandi sa Buhat 4:19, 20; 5:29.

11. Sa unsang paagi atimanon sa mga Saksi ang mga problema karon?

11 Dihang ang “dakong panon” mangayo sa ilang “inahan” nga organisasyon ug tabang, ihatag gilayon kini ug sa tugob. Ang kaliksi sa mga Saksi ni Jehova sa pagbuhat sa mga butang nakita usab diha sa daghang mga paagi​—sama sa pagtukod dayon ug mga kahikayan aron matabangan ang nangabiktima sa mga kinaiyanhong katalagman ug sa dali nga pagpanukod ug mga Kingdom Hall ug ubang mga dapit nga katigoman sa pag-apod-apod sa “kalan-on.” Dihang gieskedyol ang kombensiyon sa miaging Hunyo sa Yankee Stadium, New York, usa ka panon sa buluntaryong mga maghihinlo misulod sa tungang gabii tapos sa dula sa besbol; ang istadyom wala pa sukad makita nga sama ka hinlo sa misunod nga upat ka adlaw. Ang kasaligang mga ansiano sa mga Saksi ni Jehova molihok usab dayon, aron sa pag-atiman sa problemang motungha sa pagwali sa maayong balita.​—Filipos 1:6, 7.

Ang mga Pakig-away ni Jehova Alang sa Israel

12. Unsang mga milagro ang gihimo ni Jehova dihang nakig-away sa Israel sa pagpanalipod sa mga Gabaanhon? (Itandi sa Habacuc 3:1, 2, 11, 12.)

12 Apan tan-awa, karon, ang Gabaon. Gigubot ni Jehova ang mga kaawayng mga sundalo. Gigukod sila sa Israel uban ang dako nga pagpamatay. Ug unsay atong nakita nga gihulog gikan sa langit? Dagkong piraso sa mga yelo! Mas daghan pa ang nangamatay niining dagkong mga bato nga yelo kay sa gipamatay sa mga sundalo sa Israel. Karon, pamati. Si Josue nagpakigsulti kang Jehova, ug unsay iyang gipamulong sa “atubangan sa Israel”? Kini: “Adlaw, humonong ka sa ibabaw sa Gabaon, ug, bulan, sa ibabaw sa walog sa Aijalon.” Lain na usab nga dakong milagro! “Ug sa tibuok adlaw,” ang adlaw misidlak niana nga panggubatan, hangtod nga ang panimalos sa Diyos bug-os nga napahamtang. Dili alang kanato nga lalisan kon giunsa ni Jehova paghimo kana nga milagro, ni atong duhaduhaan kon giunsa niya sa ‘paghimo’ sa dagkong mga kahayag sa pagsidlak sa iyang ikaupat nga “adlaw” sa paglalang. (Genesis 1:16-19; Salmo 135:5, 6) Ang rekord nagtapos: “Ug walay adlaw nga sama niana, sa una kun sa ulahi niya, nga si Jehova nagpatalinghog sa tingog sa usa ka tawo, kay si Jehova nakig-away alang sa Israel.”​—Josue 10:10-14.

13. Sa unsang paagi gidasig ni Josue ang iyang mga komander, ug unsa ang kataposang resulta?

13 Gitapos ang gubat pinaagi sa pagpatay sa lima ka hari, nga niining panahona si Josue miingon sa iyang mga komander: “Ayaw kahadlok o ayaw kaluya. Magmaisogon ug magmalig-on, kay ingon niana ang pagabuhaton ni Jehova sa tanan ninyong mga kaaway nga inyong ginaaway.” Nakita kining tinuod maylabot sa pito ka hari sa Canaan, ug tinuod gihapon kini dihang nangapukan ang laing kompletong numero sa 24 ka gingharian. Nan tapos lamang sa unom ka tuig sa gubat, nga nakapahulay ang yuta.​—Josue 10:16-25; 12:7-24.

14. Unsang kaisipan ug pagsalig ang atong atubangon sa Argmageddon?

14 Karon, atong atubangon ang kataposang gubat sa Armageddon, hinaot nga magmaigoson ug magmalig-on kita sama kang Josue, sa iyang gamhanang mga kasundalohan, ug sa dakong enkampamento sa Israel. Kita makasalig nga, sama nga naagak ni Jehova ang milyonmilyong mga Israelinhon nga walay tatsa ngadto sa Yutang Saad, sa ingon siya makahimog dugang makalilisang mga milagro sa pagdala sa milyonmilyon sa iyang walay kahadlok nga katawhan latas sa Armageddon ngadto sa iyang bag-ong sistema.​—Pinadayag 7:1-3, 9, 14; 19:11-21; 21:1-5.

Ang Atong Desisyon

15. Unsang matanga sa mga buluhaton ang malaoman sa “ubang mga karnero” sa bag-ong sistema sa Diyos?

15 Bisag ug hapit na siya karon modangat sa iyang 90 nga panuigon, may giatubang na usab si Josue ug laing dakong buluhaton​—kanang sa pagbahinbahin sa yuta tali sa mga banay sa Israel. Wala kini magkahulogan nga mahimong sayon ang kinabuhi alang sa mga Israelinhon. Sa pagkatinuod, nangayo si Caleb ug lugar sa Hebron, diin didto nagpuyo ang higanteng si Anakim; maoy iyang tinguha nga padayon siyang magamit sa pagpuo sa kataposang mga kaaway ni Jehova. Wala kini magpaila nga sa panahon sa Milenyal nga Pagmando ni Kristo sa ibabaw sa yuta adunay mga kaaway. Apan adunay mga buluhatong himoon. Diha sa bag-ong sistema sa mga butang, dili nato malaoman ang masayon, tinapolang paagi sa kinabuhi. Tapos makadawat sa ilang mga buluhaton diha sa “bag-ong yuta,” ang “ubang mga karnero” sa Ginoo dunay daghang buluhaton sa dagkong proyekto sa pagpatahom sa yuta ug sa paghimo niini nga literal nga Paraiso.​—Josue 14:6-15; Marcos 10:29, 30; Roma 12:11.

16. Unsa karon ang gihulagwayan sa kahikayan ni Jehova sa “mga siyudad nga dalangpanan”?

16 Dihang gibahinbahin ang yuta, may gigahin si Josue nga unom ka siyudad sa mga Levihanon aron mahimong “mga siyudad nga dalangpanan,” tulo sa masigkadaplin sa Jordan. Mao kini ang kahikayan ni Jehova sa pagpanalipod sa mamumuno nga nakapatay nga wala tuyoa nga makakalagiw ngadto sa usa niining mga siyudara. Kinahanglang pamatud-an sa mamumuno nga siya adunay mahinlong konsensiya atubangan sa Diyos, ug iyang himoon kini pinaagi sa pagpabilin diha nianang siyudara hangtod nga mamatay ang hataas nga saserdote. Sa susama, tungod sa ilang pakig-uban kanhi niining sad-an sa dugo nga kalibotan, ang “dakong panon” karon kinahanglang mangitag mahinlong konsensiya uban sa Diyos. Ilang mabatonan kanang mahinlong konsensiya pinaagi sa pagtug-an sa ilang mga sala, maghinulsol, magbag-o, magpahinungod kang Jehova, ug magpabawtismo. Dayon kinahanglang ilang ipatunhay kana nga baroganan. Ang “dakong panon” kinahanglang magpabilin diha sa “siyudad” hangtod nga mamatay si Jesus sa mahulagwayong paagi maylabot sa iyang buluhaton ingong hataas nga saserdote, sa kataposan sa iyang Usa ka Libo ka Tuig nga Pagmando.​—Josue 20:1-9; Pinadayag 20:4, 5; 1 Corinto 15:22, 25, 26.

17. Unsang malipayong resulta ang atong mapaabot karon?

17 Unsa ka katingalahan ang pagpanalangin ni Jehova sa iyang katawhang Israel! Ang dalan malisod, ug daghan ang mga pagsulay. Apan sa kataposan miabot sila sa Yutang Saad ug nanimuyo didto. Pakadako gayod sa pagpasalamat sa ilang mga kasingkasing kang Jehova! Ug sa pagpamatuod sa pagkamatinumanon ngadto sa atong Diyos, hinaot may sama kita nga kalipay dihang mosulod kita sa iyang bag-ong sistema, nga didto lakip na ang “bag-ong yuta.” Dayag, mahimong tinuod kini alang kanato, sama nga tinuod kini sa mga adlaw ni Josue: “Walay saad nga nakawang sa maayong mga saad nga gihimo ni Jehova sa balay sa Israel; ang tanan nangatuman.” (Josue 21:45) Hinaot may malipayon kang bahin niini!

18. (a) Unsay giasoy ug balik ni Josue sa mga tigulang sa Israel? (b) Unsang tinguha ang angay natong huptan maylabot sa bag-ong sistema ni Jehova?

18 Sa kataposan, sa 110 nga panuigon, gitigom ni Josue ang mga tigulang sa Israel. Iyang giasoy ug balik kanila ang katingalahang paagi sa pagpanalangin ni Jehova sa iyang matinumanong katawhan gikan sa mga adlaw ni Abraham hangtod niadtong adlawa. Sila karon gisultihan ni Jehova: “Busa gihatagan ko kamo ug usa ka yuta diin wala ninyo hagoi ug mga siyudad nga wala ninyo tukora, ug mingpuyo kamo didto. Sa mga parasan ug sa mga kaolibohan nga dili kamo ang nagtanom nga inyong gikaon.” Uban niining abundang tagana, ang Israel nagtinguha gayod nga “mahadlok kang Jehova ug mag-alagad kaniya sa katul-id ug sa kamatuoran” sa tanang panahon. Ug nagapan-aw sa unahan sa mahimayaong bag-ong sistema ni Jehova alang niining yutaa, segurado nga ang matag usa kanato may sama nga pangandoy.​—Josue 24:13, 14.

19. (a) Unsang pagpili ang gihatag karon ni Josue sa katawhan, ug unsay ilang gitubag? (b) Kita gustong mahisama kang kinsa? (c) Unsang pagpili ang atong himoon, ug uban sa unsa nga desisyon?

19 Dayon matin-awng gipadayag kini ni Josue sa katawhan: “Ug kon daotan sa inyong mga mata nga mag-alagad kang Jehova, magpili kamo niining adlawa kon kinsa ang inyong alagaron. . . . APAN ALANG KANAKO UG SA AKONG BANAY, KAMI MAGAALAGAD KANG JEHOVA.” Kini bang mga pulonga mapalanog sa matag usa kanato, sa magtutuong mga sakop sa atong mga pamilya, sa atong mga kongregasyon, sa tibuok-yuta nga “panimalay sa Diyos”? Siyempre makahimo sila! (Efeso 2:19) Ang mga tawo sa mga adlaw ni Josue mitubag kaniya, nga nagaingon: “Kay si Jehova nga among Diyos kami manag-alagad, ug sa iyang tingog kami magpatalinghog!” (Josue 24:15, 24) Apan, makasubo, sa milabay ang mga tuig napakyas sila sa pagbuhat sa ingon. Dili kita buot nga mahisama kanila nga nangapakyas. Gusto kita nga mahisama kang Josue ug sa iyang banay, sama kang Caleb, sama sa mga Gabaanhon, ug sama kang Rahab. Oo, “KAMI MAGAALAGAD KANG JEHOVA.” Hinaot nga atong buhaton kini sa maisogon ug uban sa bug-os nga pagsalig nga walay butang ang “arang makabulag kanato gikan sa gugma sa Diyos nga anaa kang Kristo Jesus nga atong Ginoo.”​—Roma 8:39.

Unsay Atong Nakat-onan Gikan sa Basahon ni Josue​—

◻ Mahitungod sa kaayohan sa balikbalik nga mga pahamatngon?

◻ Mahitungod sa pag-atiman sa modernong mga Gabaanhon?

◻ Mahitungod sa paagi sa pagpakiggubat ni Jehova sa Armageddon?

◻ Mahitungod sa panginahanglan sa pagkalagiw ngadto sa “siyudad nga dalangpanan”?

◻ Mahitungod sa pagpili kon kinsa ang atong alagaran?

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa