ANATOT

1. Usa ka Benjaminhon, anak nga lalaki ni Beker.​—1Cr 7:8.

2. Usa sa mga pangulo sa katawhan kansang kaliwat, kon dili man siya mismo, nagpamatuod ug nagtimbre sa usa ka kasaligang kontrata sa mga adlaw ni Nehemias, sa paglakaw diha sa dalan sa matuod nga pagsimba kang Jehova.​—Neh 9:38; 10:​1, 19.

3. Usa ka Levihanong siyudad sa teritoryo sa Benjamin. (Jos 21:​17, 18; 1Cr 6:60) Ang maong ngalan napreserbar diha sa ngalan sa gamayng balangay nga gitawag ug ʽAnata nga wala pay 5 km (3 mi) sa AAS sa Jerusalem, samtang ang orihinal nga dapit gituohan nga mao ang Ras el-Kharrubeh nga mga 800 m (0.5 mi) sa HK sa maong balangay. Gikan sa nahimutangan niini diha sa kabungtoran, malantaw ang Walog sa Jordan ug ang amihanang bahin sa Dagat sa Asin. Ang Anatot maoy pinuy-anan sa duha ka gamhanang mga tawo ni David. (2Sa 23:27; 1Cr 12:3) Gihinginlan ni Solomon si Abiatar ngadto sa Anatot, sa ingon nagtapos sa linya sa hataas nga mga saserdote gikan sa balay ni Eli. (1Ha 2:26) Ang Anatot maoy usa sa sinakit nga mga siyudad tungod sa pag-atake sa misulong nga kasundalohan sa Asirya.​—Isa 10:30.

Si Jeremias maoy taga-Anatot apan nahimong usa ka ‘manalagna nga wala pasidunggi’ taliwala sa iyang kaugalingong katawhan, sanglit sila nagtinguha man sa iyang kinabuhi tungod sa pagpahayag sa mensahe ni Jehova sa kamatuoran. (Jer 1:1; 11:21-23; 29:27) Tungod niana, gitagna ni Jehova ang katalagman sa siyudad, ug kini miabot sa takdang panahon sa dihang gipukan sa Babilonya ang maong yuta. (Jer 11:21-23) Sa wala pa malaglag ang Jerusalem, gigamit ni Jeremias ang iyang legal nga mga katungod sa pagpalit sa luna sa yuta sa iyang ig-agaw didto sa Anatot ingong usa ka ilhanan nga adunay pagpasig-uli gikan sa pagkadestiyero. (Jer 32:7-9) Lakip sa unang grupo niadtong namalik gikan sa pagkadestiyero kauban ni Zorobabel mao ang 128 ka tawo gikan sa Anatot; ug ang Anatot maoy lakip sa mga lungsod nga gipuy-an pag-usab, sa ingon nagtuman sa tagna ni Jeremias.​—Esd 2:23; Neh 7:27; 11:32.