Graduasyon sa Ika-85ng Klase sa Gilead—Usa ka Sadyang Okasyon

HUMAN sa inagurasyon sa templo mga 3,000 ka tuig kanhi, si Solomon “nagpapauli sa mga tawo ngadto sa ilang mga balay, nga masadyaon ug maayog pagbati sa kasingkasing.” (2 Cronicas 7:10) Kanang mga pulonga nagabatbat nga maayo sa mga gibati sa kapig 4,000 ka tawo samtang sila nanggawas sa Jersey City Assembly Hall sa mga Saksi ni Jehova niadtong Septiyembre 11, 1988. Ang okasyon? Graduwasyon sa ika-85ng klase sa Watchtower Bible School of Gilead.

Tapos sa usa ka awit, gibuksan ang programa uban sa kinasingkasing nga pag-ampo ni W. L. Barry, usa ka membro sa Nagamandong Lawas. Si T. Jaracz, nga sakop usab sa Nagamandong Lawas, nagsilbing tsirman sa adlaw. ‘Aron kining okasyona mahimong makapapresko ug makapalig-on gayod,’ matud ni Jaracz, ‘gikinahanglan ang espiritu ni Jehova ug ang iyang mga panalangin.’ Sa pagkamatuod, kana dayag samtang nagpadayon ang programa.

Human nianang mga pulong sa pag-abiabi, nadawat sa mga graduwado ang tambag nga panamilit sa serye sa mugbo, praktikal nga mga pakigpulong. Si R. L. Rains sa Komite sa Bethel ang unang nagpakigpulong. Sa pagpasukad sa iyang mga komento sa Genesis 12:1, 2, gitambagan ni Rains ang mga estudyante: ‘Mahimong panalangin sa inyong misyonaryong asaynment.’ Ug sa unsang paagi mahimo nila kana? ‘Kana maoy pinaagi sa inyong pagkinabuhi sa inyong pag-abot didto,’ siya nagpasiugda. Sa sunod gipasiugda niya ang duha ka butang nga makatabang pag-ayo: (1) Pagaamgohon nila nga kinahanglang himoon nila ang pila ka kausaban aron makapasibo ngadto sa ilang bag-ong mga asaynment; ug (2) angay nilang huptan ang makigdaitong mga relasyon sa uban.

Sa mainiton, makapadasig nga paagi, si J. E. Barr sa Nagamandong Lawas ang sunod mipakigpulong, nga nakigsulti sa mga graduwado mahitungod sa temang “Hatagi Kamig Dugang Pagtuo,” nga gipasukad sa Lucas 17:5. ‘Sa matag adlaw hinumdomi ninyo,’ mitambag si Barr, ‘sa pagpangayo kang Jehova nga hatagan kamog dugang pagtuo.’ Kinahanglang ilang hinumdoman kanunay ang tinuod nga hinungdan nga sila gipadala ni Jehova sa ilang mga asaynment. ‘Batyaga ang gahom sa Diyos nga dili makita ingon man ang iyang makitang organisasyon nga nagapaluyo kaninyo sa kanunay, sa adlaw ug gabii,’ miawhag si Barr. ‘Dili ninyo mapasobrahan ang kasubsob sa pagpangayo diha sa inyong mga pag-ampo, “Jehova, hatagi intawon kamig dugang pagtuo.”’

Napukaw ang katingala sa dihang mipahibalo ang tsirman sa tema sa sunod mamumulong, si F. D. Songer sa Komite sa Pabrika: “Usa ka Talagsaong Pagsalig ug Usa ka Espesyal nga Yawi.” Gikuha ni Songer ang iyang mga komento gikan sa 1 Cronicas 9:26. 27 ug kon unsay gipamulong didto mahitungod sa Levihanong mga magbalantay sa ganghaan. ‘Ang ilang katungdanan maoy katungdanan sa talagsaong pagsalig,’ misaysay si Songer. Nabatonan nila ang yawi—ang kasangkapan nga nagpahayag sa gahom mismo sa pagbuot sa entrada padulong sa balaang mga dapit sa templo. Sila kasaligan, nga nag-abli sa mga ganghaan nga kasaligan sa kada buntag. Sa pagtapos, gisultihan ni Songer ang mga graduwado: ‘Kamo gihatagag talagsaong pagsalig ug usa ka espesyal nga yawi, ingnon ta, nga pinaagi niana buksan, sa sunodsunod nga buntag, kadtong buot mosulod sa mga sawang sa matuod nga pagsimba. Bantayi ninyog maayo ang maong pagsalig ug gamitang kasaligan ang maong yawi.’

Sunod, si M. G. Henschel sa Nagamandong Lawas naghisgot sa temang “Magpadayon Kamo sa Paghupot sa Sumbanan sa Maayong mga Pulong.” Nga nagtumong sa 2 Timoteo 1: 13, 14, si Igsoong Henschel misaysay nga ang tambag nga panamilit ni Pablo kang Timoteo mao: ‘Gamita kining sumbanan sa maayong mga pulong nga imong nadawat gikan kanako, ug bantayi kini sama sa usa ka bahandi, usa ka pagsalig.’ Ang mga graduwado, usab, nakadawat ug usa ka bahandi. Sa miaging lima ka bulan, sila nagtuon sa Bibliya ug sa mga butang maylabot sa ministeryo. ‘Kining instruksiyona, kining sumbanan sa maayong mga pulong,’ misaysay si Henschel, ‘maoy usa ka butang gibutang sa Diyos diha sa inyong mga kamot aron gamiton, dili lamang alang sa inyong kaugalingon, kondili alang sa uban.’

Unsang panamilit nga tambag ang nabatonan sa duha ka instruktor sa tunghaan alang sa ilang mga estudyante? Si J. D. Redford unang mipakigpulong bahin sa temang “Dawata ang Inyong mga Sayop.” Si Redford miingon nga bisan pag nasayod kita nga “kitang tanan mapandol sa daghang panahon,” kon kita isumbong nga nakahimog sayop, kita lagmit magpakamatarong sa atong kaugalingon. (Santiago 3:2) ‘Ang pagdumili sa pagdawat sa atong mga sayop nahisama sa pag-angkon sa pagkadili-masalaypon,’ matud ni Redford. Ang pagdawat sa atong mga sayop mao ang dalang maalamon. Sa unsang paagi? Ang mamumulong nagpatin-aw: ‘Walay makahupot sa pagtahod sa uban kon mopugos siya nga siya husto bisan pag ipaila ang usa ka dayag nga sayop. Sa unsang paagi ang usa makasalig sa tawo nga nasayran niya gikan sa kasinatian nga mosakripisyo pa sa kamatuoran aron lang ipadayag nga siya husto? Ang pagdawat ug sayop nagaugmad diha kanato sa kalig-on, pagtahod-sa-kaugalingon. Apan ang dili pagdawat ug sayop maoy pagkatalawan, ug kana magapaluya kanato sa moral nga paagi.’ Ang pagpadapat nianang praktikal nga tambag pihong motabang sa mga graduwado nga ikasabot pag-ayo sa uban.

Si U. V. Glass, ang laing instruktor ug ang registrar sa tunghaan, nagpasukad sa pangataposan niyang tambag sa asoy ni Gideon sa Bibliya, si kinsa gigamit ni Jehova sa pagluwas sa Israel gikan sa kamot sa mga Midianhon. (Maghuhukom, mga kapitulo 6-8) Gipasundayag ni Gideon nga ang pagsalig ni Jehova diha kaniya wala masayop, kay sa dihang buot sa mga tawo nga himoon siyang hari, siya mibalibad, nga miingon: “Si Jehova mao ang magahari ibabaw ninyo.” (Maghuhukom 8:23) ‘Kamo usab,’ matud ni Glass, ‘dili gustong mabayaw. Gipamatud-an na ninyo ang inyong kaugalingon. Apan kini wala magkahulogan nga kamo ang nagahimo sa pagpakig-away. Si Jehova mao ang nagapaluyo kaninyo.’

Ang kataposang mamumulong sa buntag mao si A. D. Schroeder sa Nagamandong Lawas, ug nadayag samtang siya namulong nga ang Tunghaang Gilead duol sa iyang kasingkasing. Ug sa maayong hinungdan—siya mao ang registrar sa dihang ang tunghaan gitukod sa 1943. Gihan-ay ni Igsoong Schroeder ang temang “Makaplagan nga Matinuohon,” nga gipasukad sa 1 Corinto 4:2. Unsay nalangkit sa pagkamatinuohon? ‘Nagabatbat kini sa pagkapunog pagtuo sa usa ka tawo diha sa mga gipahayag ug sa bililhong mga saad ni Jehova nga Diyos,’ mipatin-aw si Schroeder. ‘Nagkahulogan usab kini nga ang usa matinud-anon, dili mabalhinon, maunongon kang Jehova.’ May mga panig-ingnan ba niadtong nakaplagang matinuohon? Diha ang una-Kristohanong mga lalaki ug mga babaye nga gihisgotan sa Hebreohanon kapitulo 11; si Jesu-Kristo; ug ang mga apostol ug ubang dinihogang mga disipulo sa unang siglo K.P. Tapos sa pag-awhag sa pagtagad sa pila ka panig-ingnan karong adlawa, si Igsoong Schroeder nangutana: ‘Komosta man kita?’ Siya midugang: ‘Mahimong ikaw matinuohon o ikaw dili matinuohon. Kon kita sakop sa mga dinihogan o sa dakong panon, kitang tanan, ang duha ka klase, kinahanglang samang magmatinuohon sa atong pagkatinawag.’

Human sa mga pamulongpulong ni Igsoong Schroeder, gipasa sa tsirman ang mga pangomosta nga nadawat gikan sa nagkadaiyang mga nasod. Ang gutlo miabot na niadto aron madawat sa mga estudyante ang ilang mga diploma. Ang 22 ka estudyante naggikan sa unom ka nasod—Canada, Pinlandiya, Alemanya, Gran Britanya, Sweden, ug sa Tinipong Bansa. Hinuon, ang ilang mga asaynment magdala kanila ngadto sa 11 ka lainlaing nasod—Belize, Dominica, Ecuador, El Salvador, Hong Kong, Lesotho, Pakistan, Paraguay, Puerto Rico, Senegal, ug Taiwan. Ug unsay giingon sa mga graduwado bahin sa ilang adlaw sa graduwasyon? Usa sa mga estudyante nagbasa sa usa ka sulat nga gitumong sa Nagamandong Lawas ug sa pamilyang Bethel, nga mabasa sa bahin: “Nagapasalamat kami kaninyo sa makausa pa tungod sa paghimo niining lima ka bulan nga labing halandumon sa among tibuok kinabuhi.”

Tapos sa intermisyon, si W. L. Van De Wall sa Komite sa Departamento sa Pag-alagad misugod sa programa sa hapon pinaagi sa pagdumala sa usa ka pinamubo nga Pagtuon sa Bantayanang Torre. Tapos niadto, ang mga estudyante nagpasundayag ug mubong programa, nga nagdula sa pila ka makaiikag—ug usahay kataw-anan—nga mga kasinatian nga ilang naagian samtang nagsangyaw sa New York City. Unya, ang tanan nga mitambong, apil ang ika-85ng klase, nagpahimulos sa espesyal nga programa nga nag-ulohang “Pagsinati nga Maayo sa Atong Madasigong mga Misyonaryo.” Pinaagi sa slides ug recordings, ang mamiminaw nakakita—ug nakadungog—sa pila ka karaang mga misyonaryo.

Ingong usa ka haom nga konklusyon, ang mga estudyante nagpasundayag sa usa ka drama sa Bibliya nga ang sinina iya sa maong panahon nga nagpasiugda sa panginahanglan nga buhaton ang kabubut-on sa Diyos nga madasigon. Tapos sa kataposang awit, ang tanan natandog sa dulot samtang si F. W. Franz, ang 95-anyos nga presidente sa Watchtower Society, mitanyag sa usa ka mainitong paniklop nga pag-ampo. Human niadto, ang tanan “namauli sa ilang mga balay, nga masadyaon ug maayog pagbati sa kasingkasing.”

Nga gitukod sa 1943, ang Watchtower Bible School of Gilead nagabansay ug nagapadalag mga misyonaryo ngadto sa tanang bahin sa yuta. Alang sa unang 35 ka klase, ang tunghaan didto sa Kingdom Farm sa Watchtower Society, duol sa South Lansing, New York. Sa ika-36 nga klase, nga misugod sa Pebrero 6, 1961, ang tunghaan gibalhin ngadto sa hedkuwarter sa Sosyedad sa Brooklyn, New York, diin kini gidumala hangtod karon. Ugaling, sa pagsugod sa ika-86 nga klase sa Oktubre 17, 1988, ang tunghaan ibalhin ngadto sa Watchtower Farms, duol sa Pine Bush, New York.

[Kahon sa panid 21]

Mga Estadistika sa Klase:

Aberids nga edad: 29.1

Aberids nga katuigan sa kamatuoran: 13:4

Aberids nga katuigan sa bug-os-panahong ministeryo: 9.1

Gidaghanon sa ulitawong mga igsoon: 2

Gidaghanon sa mga magtiayon: 10

[Hulagway sa panid 23]

Ika-85ng Klase nga Migraduwar sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubangan paingon sa luyo, ug ang mga ngalan gilista sa wala patuo sa matag lumbay.

(1) Johnston, Y.; Kuismin, S.; Ugarte, Z.; Williams, Z.; Grischkewitz, G. (2) Powers, E.; D’Angelo, L; Honsberger, J.; Williams, J.; James, J. (3) Kuismin, V.; Grischkewitz, U.; Ugarte, R.; Rogerson, A.; Lantunen, K; James, D. (4) Rogerson, M.; Johnston, R.; D’Angelo, T.; Honsberger, T; Powers, T.; Danielson, M.