[lagmit, Antelope].

Usa ka Seiranhon, usa ka sultan sa mga Horihanon sa yuta sa Edom. (Gen 36:​20, 21; 1Cr 1:38) Ang Genesis 36:28 nag-ingon nga ang mga anak nga lalaki ni “Disan” mao si Uz ug Aran, samtang ang 1 Cronicas 1:42 diha sa Hebreohanon nga Masoretikong teksto, Gregong Septuagint, ug Syriac nga Peshitta naghisgot kang “Dison” ingong ilang katigulangan. Kining kalainan sa bokales, nga lagmit resulta sa sayop sa magkokopya, nasulbad diha sa daghang Iningles ug Cebuano nga mga hubad (AS, KJ, JB, Le, NCV, NW, Ro, Yg) pinaagi sa paggamit ug parehong hubad sa duha ka teksto, sama sa gihimo sa makuting rebisyon ni Clementino sa Latin nga Vulgate.

[lagmit, Antelope].

Ang ngalan sa usa o lagmit sa duha ka magkalahi nga tawo diha sa mga talaan sa kagikan nga narekord sa Genesis 36:20-28 ug 1 Cronicas 1:38-42.

Diha sa Genesis 36:​20, 21 (usab sa ber 29, 30) pito ka “anak nga lalaki ni Seir nga Horihanon” ang gitala ingong mga sultan, nga mao, si Lotan, Sobal, Zibeon, Anah, Dison, Ezer, ug Disan. Dayon, sa mga bersikulo 22 hangtod sa 28, ang matag usa sa pito ka sultan gitala uban sa iyang mga anak nga lalaki. Sa bersikulo 25 ang usa sa mga anak nga lalaki ni Anah ginganlan ug Dison. Ang pipila nagtuo nga kini nga Dison maoy apo ni Seir ug pag-umangkon ni Sultan Dison, nga nag-isip nga ang tanang pito ka sultan maoy “mga anak nga lalaki” ni Seir sumala sa eksaktong diwa sa pulong, nga mao, sa samang kaliwatan.

Apan, ang uban nagtuo nga ang asoy nagpresentar lamang sa pito ka sultan ingong mga kaliwat ni Seir, dili sa samang kaliwatan, sa ingon maoy “mga anak nga lalaki” sa halapad nga diwa niini. Busa sila nag-ingon nga ang Dison sa bersikulo 25 mao ra si Sultan Dison (Gen 36:​21, 26) ug dili ang iyang pag-umangkon. Sumala niini nga panglantaw, bisan tuod anak nga lalaki ni Sultan Anah, si Dison gihisgotan lakip sa ubang unom ka sultan dili tungod kay ilang igsoon kondili tungod kay sila parehog katungdanan ingong usa ka sultan.