HARA

Usa ka dapit diin didto gibalhin ni Haring Tilgat-pilneser (Tiglat-pileser III) sa Asirya ang mga binihag nga Israelinhon. (1Cr 5:26) Ang susamang mga teksto (2Ha 17:6; 18:11) bahin sa ulahing Asiryanhong pagdestiyero naghisgot nga ang mga Israelinhon gidala ngadto sa “mga siyudad sa mga Medianhon” (Masoretikong teksto) o sa “kabukiran sa mga Medianhon.” (LXX) Gihunahuna sa daghang eskolar nga ang hubad sa Septuagint lagmit mao ang husto ug gituohan nila nga ang “Hara” (Ha·raʼʹ, tingali usa ka Aramaikong katumbas sa Hebreohanong pulong alang sa “bukid” [har]) sa 1 Cronicas 5:26 nahimong ngalan sa usa ka dapit sa dihang ang prase nga “sa mga Medianhon” natangtang nga wala tuyoa. Kon husto kini nga pangagpas, ang “Hara” lagmit nagtumong sa “kabukiran sa mga Medianhon” sa S sa walog sa Suba sa Tigris. Bisan pa niana, ang pipila nga nag-isip nga ang Gozan sa 2 Hari 17:6 ug 18:11 maoy usa ka dapit (sama sa JB, RS) ug dili usa ka suba, nagtuo nga ang “Hara” lagmit maoy usa ka lokal nga ngalan alang sa usa ka bukirong rehiyon sa Turkey.